ಚಳಿಗಾಲದಲ್ಲಿ ಇಡ್ಲಿ ಗಟ್ಟಿಯಾಗದೆ ಮೃದುವಾಗಿರಲು 2 ಸಿಂಪಲ್‌ ಟ್ರಿಕ್ಸ್ ಟ್ರೈ ಮಾಡಿ

ಚಳಿಗಾಲದಲ್ಲಿ ಇಡ್ಲಿ ಮಾಡುವುದು ಅಷ್ಟು ಸುಲಭವಲ್ಲ, ಏಕೆಂದರೆ ಇಡ್ಲಿಗೆ ರುಬ್ಬಿದ ಹಿಟ್ಟು ಚೆನ್ನಾಗಿ ಹುದುಗು ಬಾರದೇ ಇದ್ದಾಗ ಇಡ್ಲಿ ಗಟ್ಟಿಯಾಗುವುದು, ಆ ಇಡ್ಲಿ ತಿನ್ನಲು ರುಚಿ ಅನಿಸುವುದಿಲ್ಲ. ಅಲ್ಲದೆ ಮನೆಗೆ ನೆಂಟರಿಷ್ಟರು ಬಂದಿದ್ದಾಗ ಬೆಳಗ್ಗೆ ಇಡ್ಲಿ ಮಾಡಿದರೆ ಸಾಕು, ಬ್ರೇಕ್‌ಫಾಸ್ಟ್ ಸುಲಭದಲ್ಲಿ ಮಾಡಬಹುದು ಎಂದು ಆಲೋಚಿಸಿ ಇಡ್ಲಿಗೆ ರುಬ್ಬಿ ಬೆಳಗ್ಗೆ ಇಡ್ಲಿ ಹಿಟ್ಟು ನೋಡಿದರೆ ಹಿಟ್ಟು ಹುದುಗು ಬಂದಿರಲ್ಲ, ಅದರಿಂದ ಇಡ್ಲಿ ಮಾಡಿದರೆ ತುಂಬಾ ಗಟ್ಟಿಯಾಗುವುದು ಇಂಥ ಸಮಸ್ಯೆ ಚಳಿಗಾಲದಲ್ಲಿ ಸರ್ವೇ ಸಾಮಾನ್ಯ ಅಲ್ವಾ?

ಹಾಗಂತ ಕೆಲವರು ಅಡುಗೆ ಸೋಡಾ ಬಳಸುತ್ತಾರೆ, ಆದರೆ ಇದು ಒಳ್ಳೆಯದಲ್ಲ, ಅಡುಗೆ ಸೋಡಾ ಇಡ್ಲಿಯನ್ನು ಮೃದುವಾಗಿಸುತ್ತೆ, ಆದರೆ ಹೊಟ್ಟೆಯ ಆರೋಗ್ಯಕ್ಕೆ ಒಳ್ಳೆಯದಲ್ಲ. ಅಲ್ಲದೆ ಕೆಲವರಿಗೆ ಅಡುಗೆ ಸೋಡಾ ಹಾಕಿದ ಅಡುಗೆ ತಿಂದರೆ ಆಗುವುದಿಲ್ಲ, ಹಾಗಾಗಿ ಈ ಆಯ್ಕೆ ಅಷ್ಟು ಒಳ್ಳೆಯದಲ್ಲ.

ನೀವು ಚಳಿಗಾಲದಲ್ಲಿ ಇಡ್ಲಿ ಹತ್ತಿಯಂತೆ ಮೃದುವಾಗಿರಲು ಈ 2 ಟಿಪ್ಸ್ ಬಳಸಿದರೆ ಸಾಕು, ಅಡುಗೆ ಸೋಡಾ ಹಾಕದೆಯೂ ಇಡ್ಲಿ ತುಂಬಾ ಮೃದುವಾಗಿರುವುದು.

ಟಿಪ್ಸ್ 1 ಅವಲಕ್ಕಿ ಸೇರಿಸುವುದು

ಇಡ್ಲಿಗೆ ಬೇಕಾಗುವ ಸಾಮಗ್ರಿ

1 ಕಪ್‌ ಇಡ್ಲಿ ಅಕ್ಕಿ

1/2 ಕಪ್‌ ಉದ್ದು

ಒಂದು ಮುಷ್ಠಿಯಷ್ಟು ಅವಲಕ್ಕಿ

ಅಕ್ಕಿ ಮತ್ತು ಉದ್ದು 8 ಗಂಟೆ ಕಾಲ ನೆನೆ ಹಾಕಬೇಕು, ಅವಲಕ್ಕಿಯನ್ನು ಇಡ್ಲಿಗೆ ರುಬ್ಬುವ 10 ನಿಮಿಷ ಮುನ್ನ ನೆನೆ ಹಾಕಿದರೆ ಸಾಕು,ಈಗ ಈ ಮೂರು ಸಾಮಗ್ರಿ ರುಬ್ಬಿ ಮಿಕ್ಸ್‌ ಮಾಡಿಟ್ಟರೆ ಸಾಕು ಇಡ್ಲಿ ಹಿಟ್ಟು ಚೆನ್ನಗಿ ಉಬ್ಬು ಬರುವುದು.

ಟಿಪ್ಸ್ 2: ಸ್ವಲ್ಪ ಬಿಸಿ ಮಾಡುವುದು

ನೀವು ರುಬ್ಬಿದ ಹಿಟ್ಟನ್ನು ಸ್ವಲ್ಪ ಬಿಸಿ ಮಾಡಿ, ಒಂದು ನಿಮಿಷ ಬಿಸಿ ಮಾಡಿ,ಹೀಗೆ ಬಿಸಿ ಮಾಡುವಾಗ ನಿರಂತರ ತಿರುಗಿಸುತ್ತಾ ಇರಬೇಕು, ಗಂಟು ಕಟ್ಟಬಾರದು, ನಂತರ ಹಿಟ್ಟನನ್ನು 8 ಗಂಟೆಗಳ ಕಾಲ ಹುದುಗು ಬರಲು ಬಿಡಬೇಕು, ಇಲ್ಲದಿದ್ದರೆ ತುಂಬಾ ಗಟ್ಟಿಯಾಗಿ ರುಬ್ಬಿ, ಬಿಸಿ ನೀರು ಹಾಕಿ ಇಡ್ಲಿ ಹಿಟ್ಟು ಹದಕ್ಕೆ ಹಿಟ್ಟನ್ನು ತಂದು ಮಿಕ್ಸ್ ಮಾಡಿಟ್ಟರೆ ಈ ಇಡ್ಲಿ ಕೂಡ ಮೃದುವಾಗಿರುವುದು.

ಇತರ ಸಲಹೆ

ನೀರಾ ಸೇರಿಸುವುದು

ನೀರಾ ಸಿಕ್ಕರೆ ಸ್ವಲ್ಪ ನೀರಾ ಅಕ್ಕಿ ಹಿಟ್ಟು ಜೊತೆಗೆ ಸೇರಿಸಿ ಮಿಕ್ಸ್‌ ಮಾಡಿಟ್ಟರೆ ಇದೆಯಲ್ಲಾ ಇಡ್ಲಿ ತುಂಬಾನೇ ಮೃದುವಾಗುವುದು.

ಟೈಮ್‌ ಇದ್ದರೆ ಮಧ್ಯಾಹ್ನವೇ ರುಬ್ಬಿ ಇಡಿ

ಸಂಜೆ ರುಬ್ಬಿ ರಾತ್ರಿ ಹುದುಗು ಬರಲು ಇಟ್ಟಾಗ ವಾತಾವರಣ ಇನ್ನೂ ತಂಪಾಗಿ ಇಡ್ಲಿಯ ಹಿಟ್ಟು ಹುದುಗು ಬರಲ್ಲ, ಅದರ ಬದಲಿಗೆ ರಾತ್ರಿ ಅಕ್ಕಿ ಮತ್ತು ಉದ್ದಿನ ಬೇಳೆ ನೆನೆ ಹಾಕಿ ಅದನ್ನು ಬೆಳಗ್ಗೆ ರುಬ್ಬಿ 8 ಗಂಟೆಗಳ ಇಟ್ಟು ನಂತರ ಹುದುಗು ಬಂದಿರುವ ಇಡ್ಲಿ ಮಿಶ್ರಣವನ್ನು ಫ್ರಿಡ್ಜ್‌ನಲ್ಲಿಟ್ಟು ಬಳಸಬಹುದು. ಬೆಳಗ್ಗೆ ಹೊತ್ತಿನಲ್ಲಿ ಬಿಸಿಲು ಬರುತ್ತದೆ, ಇಡ್ಲಿ ಹಿಟ್ಟು ಚೆನ್ನಾಗಿ ಹುದುಗು ಬರುವುದು.