ಸಂಕ್ರಾಂತಿಯಂದು ಎಳ್ಳು-ಬೆಲ್ಲದ ಮಾವಾ ಬರ್ಫಿ ಮಾಡಿ! ಸೂಪರ್ ರುಚಿ.. ಒಮ್ಮೆ ತಿಂದರೆ ಬಿಡೋದೇ ಇಲ್ಲ

ಮಕರ ಸಂಕ್ರಾಂತಿ ಬಂತೆಂದರೆ ಕಣಕಣದಲ್ಲಿ ಎಳ್ಳು-ಬೆಲ್ಲದ ಘಮಲು ಹರಡಿರುತ್ತದೆ. ಚಳಿಗಾಲದಲ್ಲಿ ಎಳ್ಳು ಸೇವಿಸುವುದು ಕೇವಲ ಸಂಪ್ರದಾಯವಷ್ಟೇ ಅಲ್ಲ, ಆರೋಗ್ಯಕ್ಕೂ ಉತ್ತಮ. ಮಾರುಕಟ್ಟೆಯಲ್ಲಿ ಸಾಮಾನ್ಯವಾಗಿ ಸಿಗುವ ಗಜಕ್‌ಗಳು ಅತಿ ಗಟ್ಟಿಯಾಗಿರುತ್ತವೆ. ಆದರೆ, ಈ ಬಾರಿ ನಾವು ನಿಮಗೆ ಬಾಯಲ್ಲಿ ಇಟ್ಟರೆ ಕರಗುವಷ್ಟು ಮೃದುವಾದ 'ತಿಲ್ ಮಾವಾ ಗಜಕ್' (Til Mawa Gajak) ತಯಾರಿಸುವ ವಿಧಾನವನ್ನು ನೀಡುತ್ತಿದ್ದೇವೆ. ಈ ಹಬ್ಬಕ್ಕೆ ಮನೆಯಲ್ಲೇ ಶುದ್ಧವಾಗಿ ಈ ಸವಿಯನ್ನು ತಯಾರಿಸಿರಿ.

ಎಳ್ಳು ಮತ್ತು ಖೋವಾ ಬಳಸಿ, ಕೇವಲ 15 ನಿಮಿಷಗಳಲ್ಲಿ ರುಚಿಕರವಾದ ತಿಲ್ ಮಾವಾ ಗಜಕ್ ಅಥವಾ ಎಳ್ಳು ಬೆಲ್ಲದ ಮಾವಾ ಬರ್ಫಿ ತಯಾರಿಸಬಹುದು. ಇದು ವಿಶೇಷವಾಗಿ ಮಕ್ಕಳು ಹಾಗೂ ವಯಸ್ಸಾದವರಿಗೆ ಅತ್ಯಂತ ಪ್ರಿಯವಾಗುತ್ತದೆ. ಬಾಯಿ ನೀರೂರಿಸುವ ಈ ಸಿಹಿಯನ್ನು ತಯಾರಿಸುವ ಸರಳ ವಿಧಾನ (Til Mawa Gajak Recipe) ಹಾಗೂ ಕೆಲವು ಪ್ರಮುಖ ಸಲಹೆಗಳನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ.

Photo Credit: ಸಂಗ್ರಹ ಚಿತ್ರ

ಎಳ್ಳು ಬೆಲ್ಲದ ಮಾವಾ ಬರ್ಫಿಗೆ ಬೇಕಾಗುವ ಸಾಮಗ್ರಿಗಳು

• ಬಿಳಿ ಎಳ್ಳು - 1 ಕಪ್
• ಮಾವಾ (ಖೋವಾ) - 100 ಗ್ರಾಂ
• ಸಕ್ಕರೆ ಪುಡಿ ಅಥವಾ ಪುಡಿ ಮಾಡಿದ ಬೆಲ್ಲ - ರುಚಿಗೆ ತಕ್ಕಂತೆ 1 ಕಪ್
• ತುಪ್ಪ - 1 ರಿಂದ 2 ಚಮಚ
• ಏಲಕ್ಕಿ ಪುಡಿ - ಅರ್ಧ ಚಮಚ
• ಬಾದಾಮಿ ಅಥವಾ ಪಿಸ್ತಾ - ಅಲಂಕಾರಕ್ಕಾಗಿ

ಎಳ್ಳು ಬೆಲ್ಲದ ಮಾವಾ ಬರ್ಫಿ ತಯಾರಿಸುವ ವಿಧಾನ

- ಮೊದಲು, ನಾನ್‌ಸ್ಟಿಕ್ ಬಾಣಲೆಯನ್ನು ಕಡಿಮೆ ಉರಿಯಲ್ಲಿ ಬಿಸಿ ಮಾಡಿ. ಅದಕ್ಕೆ ಬಿಳಿ ಎಳ್ಳನ್ನು ಹಾಕಿ ಹುರಿಯಿರಿ.

- ಎಳ್ಳು ತಿಳಿ ಬಣ್ಣಕ್ಕೆ ತಿರುಗಿ, ಚಟಪಟ ಶಬ್ದ ಹೊರಡಿಸಲು ಆರಂಭಿಸಿದಾಗ, ಅದನ್ನು ತಟ್ಟೆಗೆ ವರ್ಗಾಯಿಸಿ ಸಂಪೂರ್ಣವಾಗಿ ತಣ್ಣಗಾಗಲು ಬಿಡಬೇಕು.

- ಅದೇ ಬಾಣಲೆಗೆ ಸ್ವಲ್ಪ ತುಪ್ಪ ಸೇರಿಸಿ, ಪುಡಿ ಮಾಡಿದ ಮಾವಾವನ್ನು ಹಾಕಿ. ಕಡಿಮೆ ಉರಿಯಲ್ಲಿ ಸುಮಾರು 3-4 ನಿಮಿಷಗಳ ಕಾಲ ಮಾವಾ ಮೃದುವಾಗಿ, ಬದಿಗಳಲ್ಲಿ ತುಪ್ಪ ಕಾಣಿಸಿಕೊಳ್ಳುವವರೆಗೆ ನಿರಂತರವಾಗಿ ಕೈಯಾಡಿಸುತ್ತಾ ಹುರಿಯಿರಿ.

- ಸಂಪೂರ್ಣವಾಗಿ ತಣ್ಣಗಾದ ಎಳ್ಳನ್ನು ಮಿಕ್ಸರ್ ಜಾರ್‌ಗೆ ಹಾಕಿ ತರಿತರಿಯಾಗಿ ಪುಡಿ ಮಾಡಿ. ಗಜಕ್‌ನ ಉತ್ತಮ ರುಚಿಗೆ ತುಂಬಾ ನೈಸ್ ಆಗಿ ಪುಡಿ ಮಾಡದಿರುವುದು ಮುಖ್ಯ ಎಂಬುದನ್ನು ನೆನಪಿಡಿ.

- ಈಗ ಹುರಿದ ಮಾವಾಕ್ಕೆ ಸಕ್ಕರೆ ಪುಡಿ ಅಥವಾ ಬೆಲ್ಲವನ್ನು ಸೇರಿಸಿ, ಅದು ಸಂಪೂರ್ಣವಾಗಿ ಕರಗಿ ಮಾವಾದೊಂದಿಗೆ ಚೆನ್ನಾಗಿ ಬೆರೆಯುವವರೆಗೆ ಮಿಕ್ಸ್ ಮಾಡಿ.

- ನಂತರ ಏಲಕ್ಕಿ ಪುಡಿ ಹಾಗೂ ಪುಡಿ ಮಾಡಿದ ಎಳ್ಳನ್ನು ಹಾಕಿ ಎಲ್ಲವನ್ನೂ ಚೆನ್ನಾಗಿ ಕಲಸಿಕೊಳ್ಳಿ. ಮಿಶ್ರಣವು ಬಾಣಲೆಯ ಬದಿಗಳನ್ನು ಬಿಟ್ಟು ಉಂಡೆಯಂತಾಗುವವರೆಗೆ ಕೈಯಾಡಿಸುತ್ತಿರಿ.

- ತುಪ್ಪ ಸವರಿದ ತಟ್ಟೆಗೆ ಸಿದ್ಧವಾದ ಬಿಸಿ ಮಿಶ್ರಣವನ್ನು ಹಾಕಿ ಸಮವಾಗಿ ಹರಡಿ. ಅದರ ಮೇಲೆ ಕತ್ತರಿಸಿದ ಬಾದಾಮಿ ಅಥವಾ ಪಿಸ್ತಾ ಚೂರುಗಳನ್ನು ಉದುರಿಸಿ, ಲಘು ಒತ್ತಡ ನೀಡಿ.

- ಮಿಶ್ರಣವು ಸ್ವಲ್ಪ ಉಗುರುಬೆಚ್ಚಗಿರುವಾಗಲೇ ಚಾಕುವಿನಿಂದ ನಿಮಗೆ ಬೇಕಾದ ಆಕಾರಕ್ಕೆ (ಚೌಕ ಅಥವಾ ಡೈಮಂಡ್) ಗೆರೆಗಳನ್ನು ಎಳೆಯಿರಿ. ನಂತರ, ಗಜಕ್ ಸಂಪೂರ್ಣ ತಣ್ಣಗಾದ ಮೇಲೆ ತುಂಡುಗಳನ್ನು ಬೇರ್ಪಡಿಸಿ.

ಈ ಟ್ರಿಕ್ ಫಾಲೋ ಮಾಡಿ

ಪರಿಪೂರ್ಣ ತಿಲ್ ಮಾವಾ ಗಜಕ್ ತಯಾರಿಸಲು ಕೆಲವು ಪ್ರಮುಖ ಸಲಹೆಗಳನ್ನು ಗಮನದಲ್ಲಿಡಿ. ಇಡೀ ಪ್ರಕ್ರಿಯೆಯಲ್ಲಿ ಉರಿಯನ್ನು ಕಡಿಮೆ ಇರಬೇಕು. ಹೆಚ್ಚು ಉರಿ ನೀಡಿದರೆ ಮಾವಾ ಕಪ್ಪಾಗಲು ಅಥವಾ ಸೀದ ವಾಸನೆ ಬರಲು ಕಾರಣವಾಗಬಹುದು.

ಎಳ್ಳು ಬಿಸಿಯಾಗಿರುವಾಗಲೇ ಅದನ್ನು ಮಿಕ್ಸಿಗೆ ಹಾಕಬೇಡಿ, ಇಲ್ಲದಿದ್ದರೆ ಅದು ಎಣ್ಣೆ ಬಿಟ್ಟು ಅಂಟಂಟಾಗಬಹುದು. ಇನ್ನು, ತಯಾರಾದ ಗಜಕ್ ಅನ್ನು ಗಾಳಿಯಾಡದ ಡಬ್ಬದಲ್ಲಿ ಸಂಗ್ರಹಿಸಿಟ್ಟರೆ ಒಂದು ವಾರದವರೆಗೆ ತಾಜಾವಾಗಿರುತ್ತದೆ.

ಒಟ್ಟಾರೆ, ಮೃದುವಾದ 'ತಿಲ್ ಮಾವಾ ಗಜಕ್' ಮಕ್ಕಳಿಗೆ ಹಾಗೂ ವಯಸ್ಸಾದವರಿಗೆ ತುಂಬಾ ಪ್ರಿಯವಾದ ಸಿಹಿಯಾಗಿದೆ. ಇದನ್ನು ಸುಲಭವಾಗಿ ಸೇವಿಸಬಹುದು. ಈ ಸಂಕ್ರಾಂತಿಗೆ ನಿಮ್ಮ ಕೈಯಾರೆ ತಯಾರಿಸಿದ ಈ ವಿಶೇಷ ಸಿಹಿಯನ್ನು ನೆರೆಹೊರೆಯವರು ಹಾಗೂ ಸಂಬಂಧಿಕರೊಂದಿಗೆ ಹಂಚಿಕೊಂಡು ಹಬ್ಬದ ಸಂಭ್ರಮವನ್ನು ಹೆಚ್ಚಿಸಿಕೊಳ್ಳಿ.