ಹಬ್ಬದ ಸಂಭ್ರಮ ಹೆಚ್ಚಿಸುವ ರಾಜಸ್ಥಾನಿ 'ತಿಲ್ ಗುಡ್ ಟಿಕ್ಕಿ! ಮಕ್ಕಳು ಇಷ್ಟಪಡ್ತಾರೆ.. ಮಾಡೋದು ಈಸಿ

ಸಂಕ್ರಾಂತಿ ಹಬ್ಬಕ್ಕೆ ಗರಿಗರಿಯಾದ ಎಳ್ಳು ಬೆಲ್ಲದ ಸವಿ! ರಾಜಸ್ಥಾನಿ 'ತಿಲ್ ಗುಡ್ ಟಿಕ್ಕಿ' ಮಾಡಿ.. ಮಕ್ಕಳ ಆರೋಗ್ಯಕ್ಕೂ ಇದು ಬೆಸ್ಟ್. ಹೌದು, ಮೈ ಕೊರೆಯುವ ಚಳಿಗಾಲದಲ್ಲಿ (Winter) ದೇಹಕ್ಕೆ ಉಷ್ಣತೆ ಹಾಗೂ ಶಕ್ತಿ ಅತ್ಯಗತ್ಯ. ಉತ್ತರ ಭಾರತದಲ್ಲಿ, ಅದರಲ್ಲೂ ರಾಜಸ್ಥಾನದಲ್ಲಿ, ಈ ಅವಧಿಯಲ್ಲಿ 'ತಿಲ್ ಗುಡ್ ಟಿಕ್ಕಿ' (Rajasthani Til Gud Tikki) ಬಹಳ ಜನಪ್ರಿಯ.

ಮಕರ ಸಂಕ್ರಾಂತಿ ಹಬ್ಬದಲ್ಲಿ ಎಳ್ಳು ಮತ್ತು ಬೆಲ್ಲಕ್ಕೆ ವಿಶೇಷ ಮಹತ್ವವಿದೆ. ಈ ಟಿಕ್ಕಿ ಆ ಸಾಂಪ್ರದಾಯಿಕ ಅನುಗುಣವಾಗಿಯೇ ತಯಾರಿಸಲಾಗುತ್ತದೆ. ಮಕ್ಕಳು ಹೊರಗಿನ ಚಾಕಲೇಟ್ ಹಾಗೂ ಜಂಕ್ ಫುಡ್‌ಗಳಿಗೆ ಮಾರುಹೋಗುವ ಬದಲು, ಮನೆಯಲ್ಲೇ ತಯಾರಿಸಿದ ಈ ರಾಜಸ್ಥಾನಿ ಟಿಕ್ಕಿ ಹೊಸ ರುಚಿ ನೀಡುತ್ತದೆ. ಇದು ಮಕ್ಕಳನ್ನು ಶೀತ ಮತ್ತು ಚಳಿಯಿಂದ ರಕ್ಷಿಸುವುದಲ್ಲದೆ, ಅವರ ಆರೋಗ್ಯಕ್ಕೂ ಉತ್ತಮ.

Photo Credit: ಸಂಗ್ರಹ ಚಿತ್ರ

ಎಳ್ಳು ಕ್ಯಾಲ್ಸಿಯಂ ಮತ್ತು ಕಬ್ಬಿಣಾಂಶಗಳಿಂದ ಸಮೃದ್ಧವಾಗಿದ್ದು, ಮೂಳೆಗಳನ್ನು ಬಲಪಡಿಸುತ್ತದೆ. ಬೆಲ್ಲ ರೋಗನಿರೋಧಕ ಶಕ್ತಿ ಹೆಚ್ಚಿಸಿ, ದೇಹಕ್ಕೆ ಕಬ್ಬಿಣಾಂಶ ನೀಡುತ್ತದೆ. ಮೆಕ್ಕೆಜೋಳದ ಹಿಟ್ಟು ಗ್ಲುಟನ್ ಮುಕ್ತವಾಗಿದ್ದು, ಜೀರ್ಣಕ್ರಿಯೆಗೆ ಸುಲಭ. ಹಾಗಾದರೆ, ಮಕ್ಕಳಿಗೆ ಇಷ್ಟವಾಗುವ ಮತ್ತು ಚಳಿಗಾಲದ ಆರೋಗ್ಯಕ್ಕೆ ಪೂರಕವಾದ ಈ ರಾಜಸ್ಥಾನಿ 'ತಿಲ್ ಗುಡ್ ಟಿಕ್ಕಿ'ಯನ್ನು ಮನೆಯಲ್ಲೇ ಮಾಡುವುದು ಹೇಗೆ? ಮಕರ ಸಂಕ್ರಾಂತಿಯ ಸಂಭ್ರಮಕ್ಕೆ ಈ ಗರಿಗರಿ ಟಿಕ್ಕಿ ತಯಾರಿಸಲು ಬೇಕಾದ ಸಾಮಗ್ರಿಗಳು ಹಾಗೂ ಸಿಂಪಲ್‌ ರೆಸಿಪಿ (Til Gud Tikki Recipe) ಇಲ್ಲಿದೆ.

ತಿಲ್ ಗುಡ್ ಟಿಕ್ಕಿಗೆ ಬೇಕಾಗುವ ಸಾಮಗ್ರಿಗಳು

• ಮೆಕ್ಕೆಜೋಳದ ಹಿಟ್ಟು
• ಪುಡಿ ಮಾಡಿದ ಬೆಲ್ಲ
• ಬಿಳಿ ಎಳ್ಳು
• ನೀರು (ಬೆಲ್ಲ ಕರಗಿಸಲು)
• ಎಣ್ಣೆ ಅಥವಾ ತುಪ್ಪ
• ಏಲಕ್ಕಿ ಪುಡಿ

ತಿಲ್ ಗುಡ್ ಟಿಕ್ಕಿ ತಯಾರಿಸುವ ವಿಧಾನ

- ಒಂದು ಪಾತ್ರೆಯಲ್ಲಿ ಬೆಲ್ಲ ಮತ್ತು ನೀರು ಹಾಕಿ ಒಲೆಯ ಮೇಲಿಡಿ. ಬೆಲ್ಲ ಕರಗಿ ಒಂದು ಕುದಿ ಬಂದ ತಕ್ಷಣ ಗ್ಯಾಸ್ ಆರಿಸಿ. ಕಸ ತೆಗೆಯಲು ಈ ದ್ರಾವಣವನ್ನು ಸೋಸಿ. ಮಿಶ್ರಣ ಉಗುರುಬೆಚ್ಚಗಾಗುವವರೆಗೆ ಕಾಯಿರಿ.

- ದೊಡ್ಡ ಬಟ್ಟಲಿನಲ್ಲಿ ಮೆಕ್ಕೆಜೋಳದ ಹಿಟ್ಟು, ಬಿಳಿ ಎಳ್ಳು ಮತ್ತು ೨ ಚಮಚ ಎಣ್ಣೆ/ತುಪ್ಪ ಹಾಕಿ ಕಲಸಿ. ನಂತರ ಉಗುರುಬೆಚ್ಚಗಿನ ಬೆಲ್ಲದ ನೀರನ್ನು ಸ್ವಲ್ಪ ಸ್ವಲ್ಪವಾಗಿ ಸೇರಿಸುತ್ತಾ ಗಟ್ಟಿಯಾದ, ಮೃದುವಾದ ಹಿಟ್ಟನ್ನು ಕಲಸಿ. ಹಿಟ್ಟು ಕೈಗೆ ಅಂಟದಂತೆ ನೋಡಿಕೊಳ್ಳಿ.

- ಕಲಸಿದ ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ಮಾಡಿ. ಅಂಗೈಗೆ ಎಣ್ಣೆ ಸವರಿ, ಉಂಡೆಗಳನ್ನು ಮಧ್ಯದಲ್ಲಿ ಇಟ್ಟು ಒತ್ತಿ ಚಪ್ಪಟೆ (ಟಿಕ್ಕಿ) ಆಕಾರಕ್ಕೆ ತನ್ನಿ. ಟಿಕ್ಕಿಗಳು ಹೆಚ್ಚು ದಪ್ಪವೂ ಇರಬಾರದು, ಹೆಚ್ಚು ತೆಳ್ಳಗೂ ಇರಬಾರದು ಎಂಬುದನ್ನು ನೆನಪಿಡಿ.

- ಒಂದು ಬಾಣಲೆಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಕಾಯಿಸಿ. ಎಣ್ಣೆ ಬಿಸಿಯಾದ ನಂತರ ಉರಿಯನ್ನು ಮಧ್ಯಮ ಮಟ್ಟಕ್ಕೆ ಇಳಿಸಿ. ಆಕಾರ ಮಾಡಿದ ಟಿಕ್ಕಿಗಳನ್ನು ಎಣ್ಣೆಗೆ ಹಾಕಿ, ಎರಡೂ ಬದಿಗಳಲ್ಲಿ ಹೊಂಬಣ್ಣ ಬರುವವರೆಗೆ ಗರಿಗರಿಯಾಗಿ ಕರಿಯಿರಿ.

- ಕರಿದ ಟಿಕ್ಕಿಗಳು ಸಂಪೂರ್ಣವಾಗಿ ತಣ್ಣಗಾದ ಮೇಲೆ, ಅವುಗಳನ್ನು ಗಾಳಿಯಾಡದ ಡಬ್ಬದಲ್ಲಿಡಿ. ಸರಿಯಾಗಿ ಸಂಗ್ರಹಿಸಿದರೆ, ಇವು 15 ರಿಂದ 20 ದಿನಗಳವರೆಗೆ ತಾಜಾವಾಗಿರುತ್ತವೆ.

ಈ 'ತಿಲ್ ಗುಡ್ ಟಿಕ್ಕಿ' ಮಕ್ಕಳು ಮತ್ತು ದೊಡ್ಡವರಿಬ್ಬರಿಗೂ ನೈಸರ್ಗಿಕ ಶಕ್ತಿವರ್ಧಕ. ಸಂಸ್ಕರಿಸಿದ ಸಕ್ಕರೆಗೆ ಬದಲಾಗಿ ಬೆಲ್ಲ ಬಳಸಿರುವುದರಿಂದ ಇದು ಆರೋಗ್ಯಕರ. ಎಳ್ಳು ದೇಹಕ್ಕೆ ಉಷ್ಣತೆ ನೀಡಿ, ಚಳಿಯಿಂದ ರಕ್ಷಿಸುತ್ತದೆ. ಸಂಜೆ ಸ್ನ್ಯಾಕ್ ಆಗಿ ಅಥವಾ ಮಕ್ಕಳ ಲಂಚ್ ಬಾಕ್ಸ್‌ಗೆ ನೀಡಲು ಉತ್ತಮ. ಇದರ ಗರಿಗರಿ ಮತ್ತು ಸಿಹಿ ರುಚಿಯು ಎಲ್ಲರಿಗೂ ಇಷ್ಟವಾಗುತ್ತದೆ.

ಈ ಮಕರ ಸಂಕ್ರಾಂತಿಗೆ ಕೇವಲ ಎಳ್ಳು-ಬೆಲ್ಲ ಹಂಚುವುದಷ್ಟೇ ಅಲ್ಲದೆ, ನಿಮ್ಮ ಅಡುಗೆಮನೆಯಲ್ಲಿ ರಾಜಸ್ಥಾನದ ಈ ಸಾಂಪ್ರದಾಯಿಕ 'ತಿಲ್ ಗುಡ್ ಟಿಕ್ಕಿ' ತಯಾರಿಸಿ ನೋಡಿ. ಆರೋಗ್ಯಕರ ಮತ್ತು ರುಚಿಕರವಾದ ಈ ತಿಂಡಿ ಹಬ್ಬದ ಸಂಭ್ರಮವನ್ನು ಇಮ್ಮಡಿಗೊಳಿಸುವುದು ಖಚಿತ.