ತೆಂಗಿನಕಾಯಿ ಹಾಲು ಹಾಕಿ ಮಾಡುವ ಮೀನಿನ ಸಾರು, ತುಂಬಾ ರುಚಿಯಾಗಿರುತ್ತೆ

ನೀವು ಮೀನು ಸಾರು ಮಾಡುವುದಾದರೆ ತುಂಬಾ ಸರಳವಾದ ಮೀನಿನ ರೆಸಿಪಿ ನೀಡಿದ್ದೇವೆ, ಈ ಮೀನು ಸಾರನ್ನು ನೀವು ಸುಲಭವಾಗಿ ಮಾಡಬಹುದು, ಅಲ್ಲದೆ ತುಂಬಾ ರುಚಿಯಾಗಿ ಬರುತ್ತೆ ಕೂಡ. ಬನ್ನಿ ಈ ಮೀನಿನ ಸಾರು ಮಾಡುವುದು ಹೇಗೆ ಎಂದು ನೋಡೋಣ ಬನ್ನಿ:

ಬೇಕಾಗುವ ಸಾಮಗ್ರಿ
1/ 2 ಅಥವಾ 1 ಕೆಜಿ ಮೀನು
ಟೊಮೆಟೊ 2-3
ಒಂದೂವರೆ ಚಮಚ ಮೆಣಸಿನ ಪುಡಿ
1/2 ಚಮಚ ಕೊತ್ತಂಬರಿ ಪುಡಿ
1/2 ಅರಿಶಿಣ ಪುಡಿ
1 ಚಮಚ ಎಣ್ಣೆ
ಸ್ವಲ್ಪ ಸಾಸಿವೆ
ಹಸಿ ಮೆಣಸು 2
ಈರುಳ್ಳಿ 1
ಸ್ವಲ್ಪ ಮೆಂತೆ
ಉಪ್ಪು
ಹುಣಸೆ ಹಣ್ಣು ಒಂದು ನಿಂಬೆ ಹಣ್ಣು ಗಾತ್ರದಷ್ಟು
ಒಂದು ಕಪ್‌ ತೆಂಗಿನಕಾಯಿ ಹಾಲು

ಮಾಡುವ ವಿಧಾನ:

• ಪಾತ್ರೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ
• ಎಣ್ಣೆ ಬಿಸಿಯಾದಾಗ ಸ್ವಲ್ಪ ಸಾಸಿವೆ ಹಾಕಿ, ಸಾಸಿವೆ ಚಟ್‌ಪಟ್‌ ಶಬ್ದ ಮಾಡುವಾಗ, ಸ್ವಲ್ಪ ಮೆಂತೆ, ಈರುಳ್ಳಿ ಹಾಕಿ ಫ್ರೈ ಮಾಡಿ, ಈರುಳ್ಳಿ ಸ್ವಲ್ಪ ಮೆತ್ತಗಾದ ಮೇಲೆ ನೀವು ಟೊಮೆಟೊ ಹಾಕಿ
• ಟೊಮೆಟೊ ಮೆತ್ತಗಾಗುವವರೆಗೆ ಫ್ರೈ ಮಾಡಿ
• ನಂತರ ಅರಿಶಿಣ ಪುಡಿ, ಕೊತ್ತಂಬರಿ ಪುಡಿ, ಮೆಣಸಿನ ಪುಡಿ ಹಾಕಿ ಫ್ರೈ ಮಾಡಿ
• ನಂತರ ಹುಣಸೆ ಹಣ್ಣಿನ ರಸ ಹಾಕಿ, ಉಪ್ಪು ಹಾಕಿ ಕುದಿ ಬರಿಸಿ
• ನಂತರ ಮೀನು ಹಾಕಿ
• ಮೀನು ಹಾಕಿದ ಮೇಲೆ ಕಡಿಮೆ ಉರಿಯಲ್ಲಿ 5 ನಿಮಿಷ ಬೇಯಿಸಿ
• ನಂತರ ತೆಂಗಿನಕಾಯಿ ಹಾಲು ಹಾಕಿ 5 ನಿಮಿಷ ಕುದಿಸಿ
• ನಂತರ ಉರಿಯಿಂದ ಇಳಿಸಿ ಸ್ವಲ್ಪ ಕರಿಬೇವು ಹಾಕಿ, ಪಾತ್ರೆಯ ಬಾಯಿ ಮುಚ್ಚಿ 10 ನಿಮಿಷ ಹಾಗೇ ಬಿಡಿ
• ಇಷ್ಟು ಮಾಡಿದರೆ ಮೀನಿನ ಸಾರು ಸರ್ವ್ ಮಾಡಲು ರೆಡಿ.

ಸಲಹೆ: ನೀವು ತೆಂಗಿನಕಾಯಿ ಮಾರ್ಕೆಟ್‌ನಿಂದ ಪ್ಯಾಕ್‌ ಮಾಡಿಟ್ಟ ತೆಂಗಿನಕಾಯಿ ಹಾಲು ಬಳಸಬಹುದು.
ನೀವೇ ತೆಂಗಿನಕಾಯಿ ಹಾಲು ರೆಡಿ ಮಾಡಿದರೆ ಇನ್ನೂ ಒಳ್ಳೆಯದು
ಒಂದು ಕಪ್ ತೆಂಗಿನ ತುರಿಗೆ ಸ್ವಲ್ಪ ನೀರು ಹಾಕಿ ರುಬ್ಬಿ, ನಂತರ ಅದನ್ನು ಸೋಸಿ, ಆ ಹಾಲನ್ನು ಒಂದು ಪಾತ್ರೆಯಲ್ಲಿ ಸಂಗ್ರಹಿಸಿದರೆ ಆ ಹಾಲನ್ನು ಬಳಸಬಹುದು.

ಇತರ ಟಿಪ್ಸ್
ನೀವು ಒಂದು ಚಮಚ ಖಾರದ ಪುಡಿ ಹಾಗೂ ಅರ್ಧ ಚಮಚ ಕಾಶ್ಮೀರಿ ಮೆಣಸಿನ ಪುಡಿ ಹಾಕಿದರೆ ಮೀನಿನ ಸಾರು ಕೆಂಪಗೆ ಆಕರ್ಷಕವಾಗಿ ಕಾಣುವುದು.

ಯಾವ ಮೀನು ಬಳಸಬಹುದು?
ನಿಮಗಿಷ್ಟವಾದ ಮೀನನ್ನು ಈ ಸಾರಿಗೆ ಬಳಸಬಹುದು, ಆದರೆ ಕೆರೆ ಮೀನು ಅಥವಾ ಹೊಳೆ ಮೀನು ಟೇಸ್ಟ್ ಅನಿಸುವುದಿಲ್ಲ, ಸಮುದ್ರ ಮೀನುಗಳಾದ ಬೂತಾಯಿ, ಬಂಗುಡೆ, ತುನಾ, ಅಂಜಲ್ ಹೀಗೆ ನಿಮಗಿಷ್ಟವಾದ ಮೀನು ಬಳಸಬಹುದು.