ಸಕ್ಕರೆಗೆ ಹೇಳಿ ಬೈ-ಬೈ.. ಸಂಪೂರ್ಣ ಗೋಧಿ-ಬೆಲ್ಲದಿಂದ ಈ ಖೀರ್ ಮಾಡಿ! ನಾಲಿಗೆಗೆ ರುಚಿ, ಆರೋಗ್ಯಕ್ಕೆ ಹಿತ

ಸಕ್ಕರೆಗೆ ಹೇಳಿ ಬೈ-ಬೈ.. ಚಳಿಗಾಲಕ್ಕೆ ಆರೋಗ್ಯಕ್ಕೆ ಸ್ಪೆಷಲ್ 'ಗೋಧಿ-ಬೆಲ್ಲದ ಪಾಯಸ' ಮಾಡಿ ನೋಡಿ! ನಾಲಿಗೆಗೆ ರುಚಿ, ಆರೋಗ್ಯಕ್ಕೆ ಹಿತ. ಈ ರೀತಿ ಮಾಡಿದರೆ ಮನೆಯವರೆಲ್ಲಾ ಇಷ್ಟಪಟ್ಟು ಖಾಲಿ ಮಾಡ್ತಾರೆ. ಹೌದು, ಚಳಿಗಾಲದಲ್ಲಿ (Winter recipes) ಬಿಸಿಬಿಸಿಯಾದ ಸಿಹಿ ತಿನಿಸುಗಳನ್ನು ಸವಿಯಲು ಹೆಚ್ಚಿನವರು ಇಷ್ಟಪಡುತ್ತಾರೆ. ಸಾಮಾನ್ಯವಾಗಿ, ಸಕ್ಕರೆ ಮಿಶ್ರಿತ ಮಿಠಾಯಿಗಳಿಗೆ ಮಾರುಹೋಗುತ್ತಾರೆ. ಆದರೆ, ಇಂದಿನ ಬದಲಾದ ಜೀವನಶೈಲಿಯಲ್ಲಿ, ಸಕ್ಕರೆಯ ಅತಿಯಾದ ಬಳಕೆ ಆರೋಗ್ಯಕ್ಕೆ ಹಾನಿಕರ.

ಈ ಹಿನ್ನೆಲೆಯಲ್ಲಿ, ಸಕ್ಕರೆಗೆ ಅತ್ಯುತ್ತಮ ಪರ್ಯಾಯವಾಗಿ ಸಾಂಪ್ರದಾಯಿಕ 'ಗೋಧಿ-ಬೆಲ್ಲದ ಪಾಯಸ' (Wheat Jaggery Kheer) ಒಂದು ಪರಿಪೂರ್ಣ ಆಯ್ಕೆ. ಇದು ನಾಲಿಗೆಗೆ ರುಚಿ ನೀಡುವುದರ ಜೊತೆಗೆ, ಅತಿ ಹೆಚ್ಚು ಪೌಷ್ಟಿಕಾಂಶಗಳನ್ನು ಹೊಂದಿ ದೇಹಕ್ಕೆ ಅಗತ್ಯವಾದ ಶಕ್ತಿಯನ್ನು ಸಹ ಒದಗಿಸುತ್ತದೆ. ಗೋಧಿ ಮತ್ತು ಬೆಲ್ಲದ ಕಾಂಬಿನೇಷನ್ ಕೇವಲ ರುಚಿಗಷ್ಟೇ ಅಲ್ಲ, ಆರೋಗ್ಯಕ್ಕೂ ಬಹಳ ಉತ್ತಮ. ಈ ಪಾಯಸವು ಫೈಬರ್ ಸಮೃದ್ಧವಾಗಿದೆ. ಗೋಧಿಯಲ್ಲಿ ಹೆಚ್ಚಿನ ಪ್ರಮಾಣದ ನಾರಿನಂಶವಿರುವುದರಿಂದ ಜೀರ್ಣಕ್ರಿಯೆಗೆ ಹೆಚ್ಚು ಸಹಕಾರಿ.

ಶೀತ, ಕೆಮ್ಮಿನ ಸಮಸ್ಯೆ ವಿರುದ್ಧ ಫೈಟ್

ಬೆಲ್ಲವು ನೈಸರ್ಗಿಕವಾಗಿ ಕಬ್ಬಿಣದ ಗಣಿ. ರಕ್ತಹೀನತೆಯನ್ನು ತಡೆಯುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ದೇಹಕ್ಕೆ ಅಗತ್ಯವಾದ ಉಷ್ಣತೆಯನ್ನು ನೀಡುತ್ತದೆ. ಅಷ್ಟಲ್ಲದೆ, ಚಳಿಗಾಲದಲ್ಲಿ ಸಾಮಾನ್ಯವಾಗಿ ಕಾಡುವ ಶೀತ, ಕೆಮ್ಮಿನಂತಹ ಸಮಸ್ಯೆಗಳ ವಿರುದ್ಧ ಹೋರಾಡಲು, ಈ ಪಾಯಸವು ದೇಹದ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಗೋಧಿ-ಬೆಲ್ಲದ ಪಾಯಸ ಮಾಡುವ ವಿಧಾನ (Wheat Jaggery Kheer Recipe) ಇಲ್ಲಿದೆ.

ಗೋಧಿ-ಬೆಲ್ಲದ ಪಾಯಸಗೆ ಬೇಕಾಗುವ ಸಾಮಗ್ರಿಗಳು

• ಗೋಧಿ
• ಹಾಲು
• ಬೆಲ್ಲ (ರುಚಿಗೆ ಅನುಗುಣವಾಗಿ)
• ನೀರು
• ತುಪ್ಪ
• ಒಣ ಹಣ್ಣುಗಳು (ಗೋಡಂಬಿ, ಬಾದಾಮಿ, ಪಿಸ್ತಾ)
• ಏಲಕ್ಕಿ ಪುಡಿ

ಗೋಧಿ-ಬೆಲ್ಲದ ಪಾಯಸ ತಯಾರಿಸುವ ವಿಧಾನ

- ಮೊದಲಿಗೆ, ಗೋಧಿಯನ್ನು ಚೆನ್ನಾಗಿ ತೊಳೆದು ಕನಿಷ್ಠ 1 ರಿಂದ 2 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿಡಿ. ಇದರಿಂದ ಗೋಧಿಯು ಬೇಗ ಬೇಯುತ್ತದೆ ಮತ್ತು ಪಾಯಸವು ಮೃದುವಾಗುತ್ತದೆ.

- ನಂತರ, ದಪ್ಪ ತಳದ ಬಾಣಲೆ ಅಥವಾ ಕುಕ್ಕರ್‌ನಲ್ಲಿ ಒಂದು ಚಮಚ ತುಪ್ಪ ಬಿಸಿ ಮಾಡಿ. ನೀರು ಬಸಿದ ನೆನೆಸಿದ ಗೋಧಿಯನ್ನು ತಿಳಿ ಕಂದು ಬಣ್ಣಕ್ಕೆ ತಿರುಗಿ ಒಳ್ಳೆಯ ಸುಗಂಧ ಬರುವವರೆಗೆ ಮಧ್ಯಮ ಉರಿಯಲ್ಲಿ ಹುರಿಯಿರಿ.

- ಹುರಿದ ಗೋಧಿಗೆ ಹಾಲು ಮತ್ತು ಆವಶ್ಯಕ ಪ್ರಮಾಣದ ನೀರನ್ನು ಸೇರಿಸಿ. ಮಿಶ್ರಣವನ್ನು ಮಧ್ಯಮ ಉರಿಯಲ್ಲಿ 15 ರಿಂದ 20 ನಿಮಿಷ ಬೇಯಿಸಿ. ಗೋಧಿಯು ಸಂಪೂರ್ಣವಾಗಿ ಮೆತ್ತಗಾಗುವವರೆಗೆ ಬೇಯಿಸಿ.

- ಮತ್ತೊಂದು ಸಣ್ಣ ಪಾತ್ರೆಯಲ್ಲಿ ಬೆಲ್ಲ ಮತ್ತು ಕಾಲು ಕಪ್ ನೀರು ಹಾಕಿ ಬಿಸಿ ಮಾಡಿ. ಬೆಲ್ಲ ಸಂಪೂರ್ಣವಾಗಿ ಕರಗಿದ ನಂತರ, ಅದರಲ್ಲಿರುವ ಕಲ್ಮಶಗಳನ್ನು ತೆಗೆಯಲು ಸೋಸಿಕೊಳ್ಳಿ.

- ಈಗ ಈ ಬೆಲ್ಲದ ನೀರನ್ನು ಬೇಯಿಸಿದ ಗೋಧಿ ಮತ್ತು ಹಾಲಿನ ಮಿಶ್ರಣಕ್ಕೆ ಸೇರಿಸಿ. ಬೆಲ್ಲವು ಹಾಲಿನೊಂದಿಗೆ ಚೆನ್ನಾಗಿ ಬೆರೆಯುವಂತೆ ಮತ್ತೆ 5 ನಿಮಿಷ ಸಣ್ಣ ಉರಿಯಲ್ಲಿ ಕುದಿಸಿ.

- ಕೊನೆಯದಾಗಿ ಏಲಕ್ಕಿ ಪುಡಿಯನ್ನು ಪಾಯಸಕ್ಕೆ ಸೇರಿಸಿ. ಕತ್ತರಿಸಿದ ಗೋಡಂಬಿ, ಬಾದಾಮಿ ಮತ್ತು ಪಿಸ್ತಾವನ್ನು ತುಪ್ಪದಲ್ಲಿ ಹುರಿದು, ಬೇಯಿಸಿದ ಪಾಯಸಕ್ಕೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಇಷ್ಟು ಮಾಡಿದರೆ ಆರೋಗ್ಯಕರ ಗೋಧಿ-ಬೆಲ್ಲದ ಪಾಯಸ ಈಗ ಸವಿಯಲು ಸಿದ್ಧ.

- ಈ ಗೋಧಿ-ಬೆಲ್ಲದ ಪಾಯಸವನ್ನು ಬಿಸಿಯಾಗಿ ಅಥವಾ ತಣ್ಣಗಾದ ಮೇಲೆ ಸವಿಯಬಹುದು. ಬಿಸಿಯಾಗಿ ಸೇವಿಸಿದರೆ ಚಳಿಗಾಲದ ಹಿತಕ್ಕೆ ಅದ್ಭುತವಾಗಿರುತ್ತದೆ. ತಣ್ಣಗಾದ ಮೇಲೆ ಪಾಯಸ ಸ್ವಲ್ಪ ಗಟ್ಟಿಯಾಗುವುದರಿಂದ, ಸರ್ವ್ ಮಾಡುವ ಮೊದಲು ಸ್ವಲ್ಪ ಬಿಸಿ ಹಾಲು ಸೇರಿಸಿಕೊಳ್ಳಬಹುದು.

ಹಾಲು ಕುದಿಯುತ್ತಿರುವಾಗ ನೇರವಾಗಿ ಬೆಲ್ಲದ ಪುಡಿಯನ್ನು ಹಾಕಬೇಡಿ. ಕೆಲವೊಮ್ಮೆ ಹಾಲು ಒಡೆಯುವ ಸಾಧ್ಯತೆ ಇರುತ್ತದೆ. ಆದ್ದರಿಂದ, ಬೆಲ್ಲವನ್ನು ಕರಗಿಸಿ, ಸೋಸಿದ ನಂತರವೇ ಸೇರಿಸುವುದು ಸುರಕ್ಷಿತ ಮತ್ತು ಉತ್ತಮ ಮಾರ್ಗವಾಗಿದೆ. ಈ ಬಾರಿಯ ಚಳಿಗಾಲದಲ್ಲಿ ಸಕ್ಕರೆಯಿಂದ ಮಾಡಿದ ಸಿಹಿ ತಿನಿಸುಗಳ ಬದಲಿಗೆ, ಮನೆಯಲ್ಲೇ ತಯಾರಿಸಿದ ಈ ಪೌಷ್ಟಿಕ ಗೋಧಿ-ಬೆಲ್ಲದ ಪಾಯಸವನ್ನು ಸವಿಯಿರಿ. ಇದು ಮಕ್ಕಳಿಂದ ಹಿಡಿದು ವಯಸ್ಸಾದವರವರೆಗೆ ಎಲ್ಲರಿಗೂ ಇಷ್ಟವಾಗುವ ಅದ್ಭುತ ಸಿಹಿ.