ಮಾಮೂಲಿ ಪೂರಿ ಬಿಡಿ.. ಈ ಗ್ರೀನ್ ಪುರಿ ಟ್ರೈ ಮಾಡಿ! ಈ ರೀತಿ ಮಾಡಿದ್ರೆ ಸಾಫ್ಟ್ & ಟೇಸ್ಟಿ ಗ್ಯಾರಂಟಿ

ಮಾಮೂಲಿ ಪೂರಿ ಬಿಟ್ಟು ಬಿಡಿ.. ಈ 'ಗ್ರೀನ್ ಪೂರಿ' ಒಮ್ಮೆ ಟ್ರೈ ಮಾಡಿ ನೋಡಿ! ಹಸಿ ಬಟಾಣಿ ಮತ್ತು ಪಾಲಕ್‌ ಬಳಸಿದ್ರೆ ಈ ಪೂರಿ ಮೃದು ಮತ್ತು ಸಖತ್ ಟೇಸ್ಟಿ ಆಗಿರುತ್ತೆ. ಹೌದು, ನಮ್ಮ ಅಡುಗೆಯ ಕಣ್ಮಣಿಯೆಂದೆನಿಸಿರುವ ಪೂರಿ, ಹಬ್ಬವಿರಲಿ, ವಾರಾಂತ್ಯದ ಉಪಹಾರವಿರಲಿ, ಯಾವಾಗಲೂ ಮೆಚ್ಚುಗೆ ಗಳಿಸುತ್ತದೆ. ಆದರೆ, ಕೇವಲ ರುಚಿಗಷ್ಟೇ ಅಲ್ಲದೆ, ಆರೋಗ್ಯಕ್ಕೂ ಉತ್ತಮವಾದ ಪುರಿಬೇಕಿದ್ದರೆ, ಚಳಿಗಾಲದಲ್ಲಿ ಲಭ್ಯವಿರುವ ತಾಜಾ ತರಕಾರಿಗಳನ್ನು ಬಳಸಬೇಕು.

ಹಸಿ ಬಟಾಣಿಯ ಸುಂದರ ಸಿಹಿ ಸ್ವಾದ ಮತ್ತು ಪಾಲಕ್ ಸೊಪ್ಪಿನ ಪೌಷ್ಟಿಕಾಂಶಗಳು ಸೇರಿ ಸಿದ್ಧವಾಗುವ ಗ್ರೀನ್ ಪೂರಿ (Matar Palak Puri), ಕಣ್ಣಿಗೆ ಮುದ ನೀಡುವುದರ ಜೊತೆಗೆ ಹೊಟ್ಟೆಗೂ ಅಷ್ಟೇ ಸಂತೃಪ್ತಿ ನೀಡುತ್ತದೆ. ಚಳಿಗಾಲದಲ್ಲಿ ಹೇರಳವಾಗಿ ದೊರೆಯುವ ಹಸಿ ಬಟಾಣಿಯು ಪ್ರೋಟೀನ್ ಮತ್ತು ಫೈಬರ್‌ನ ಸಮೃದ್ಧ ಮೂಲವಾಗಿದೆ. ಇನ್ನು, ಪಾಲಕ್ ಸೊಪ್ಪು ಕಬ್ಬಿಣಾಂಶ ಹಾಗೂ ಜೀವಸತ್ವಗಳಿಂದ ಹೇರಳವಾಗಿದ್ದು, ದೇಹಕ್ಕೆ ಅಗತ್ಯ ಪೋಷಕಾಂಶಗಳನ್ನು ಒದಗಿಸುತ್ತದೆ.

Photo Credit: ಸಂಗ್ರಹ ಚಿತ್ರ

ಮಕ್ಕಳು ಸಾಮಾನ್ಯವಾಗಿ ಸೊಪ್ಪಿನ ಬಗ್ಗೆ ಅಷ್ಟೇನೂ ಆಸಕ್ತಿ ತೋರಿಸುವುದಿಲ್ಲ. ಅಂತಹ ಮಕ್ಕಳಿಗೆ ಈ ಹಸಿರುಬಣ್ಣದ ಪೂರಿಯನ್ನು ನೀಡುವುದರಿಂದ, ಅವರಿಗೆ ತಿಳಿಯದಂತೆಯೇ ಅಗತ್ಯ ಪೋಷಕಾಂಶಗಳನ್ನು ಒದಗಿಸುವುದು ಸುಲಭವಾಗುತ್ತದೆ. ಇದನ್ನು ಬೆಳಗಿನ ಉಪಹಾರಕ್ಕೆ ಅಥವಾ ಮಧ್ಯಾಹ್ನದ ಊಟಕ್ಕೂ ಸವಿಯಬಹುದು. ಬಟಾಣಿ-ಪಾಲಕ್ ಪೂರಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ಮಾಡುವ ವಿಧಾನ (Matar Palak Puri Recipe) ಇಲ್ಲಿದೆ.

ಬಟಾಣಿ-ಪಾಲಕ್ ಪೂರಿಗೆ ಬೇಕಾಗುವ ಸಾಮಗ್ರಿಗಳು

• ಗೋಧಿ ಹಿಟ್ಟು
• ಹಸಿ ಬಟಾಣಿ
• ಪಾಲಕ್ ಸೊಪ್ಪು
• ಹಸಿ ಮೆಣಸಿನಕಾಯಿ
• ಶುಂಠಿ
• ಬೆಳ್ಳುಳ್ಳಿ
• ಅಜವಾನ
• ಕೆಂಪು ಮೆಣಸಿನ ಪುಡಿ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ
• ನೀರು

ಬಟಾಣಿ-ಪಾಲಕ್ ಪೂರಿ ತಯಾರಿಸುವ ವಿಧಾನ

- ಮೊದಲಿಗೆ, ಹಸಿ ಬಟಾಣಿಯನ್ನು ಹಬೆಯಲ್ಲಿ ಬೇಯಿಸಿ ಅಥವಾ ನೀರಿನಲ್ಲಿ ಕುದಿಸಿ.

- ತಣ್ಣಗಾದ ನಂತರ ಇದನ್ನು ಶುಂಠಿ, ಬೆಳ್ಳುಳ್ಳಿ, ಮತ್ತು ಹಸಿ ಮೆಣಸಿನಕಾಯಿಯೊಂದಿಗೆ ಮಿಕ್ಸಿ ಜಾರ್‌ಗೆ ಹಾಕಿ ನುಣ್ಣಗೆ ಪೇಸ್ಟ್ ತಯಾರಿಸಿಕೊಳ್ಳಿ.

- ವಿಶಾಲವಾದ ಪಾತ್ರೆಯಲ್ಲಿ ಗೋಧಿ ಹಿಟ್ಟು, ರುಚಿಗೆ ತಕ್ಕಷ್ಟು ಉಪ್ಪು, ಅಜವಾನ, ಕೆಂಪು ಮೆಣಸಿನ ಪುಡಿ, ಮತ್ತು 2 ಚಮಚ ಎಣ್ಣೆಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ ಇದಕ್ಕೆ ಹೆಚ್ಚಿದ ಪಾಲಕ್ ಸೊಪ್ಪು ಮತ್ತು ಸಿದ್ಧಪಡಿಸಿದ ಬಟಾಣಿ ಪೇಸ್ಟ್ ಹಾಕಿ.

- ಅಗತ್ಯಕ್ಕೆ ಅನುಗುಣವಾಗಿ ನೀರನ್ನು ಸೇರಿಸುತ್ತಾ, ಹಿಟ್ಟನ್ನು ಗಟ್ಟಿಯಾಗಿ ಕಲಸಿಕೊಳ್ಳಿ.

- ಕಲಸಿದ ಹಿಟ್ಟನ್ನು 15-20 ನಿಮಿಷಗಳ ಕಾಲ ಬಟ್ಟೆ ಮುಚ್ಚಿ ನೆನೆಯಲು ಬಿಡಿ.

- ನೆನೆದಿರುವ ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ಮಾಡಿ. ಲಟ್ಟಣಿಗೆ ಬಳಸಿ ಸಾಮಾನ್ಯ ಗಾತ್ರದ ಪುರಿಗಳನ್ನು ಲಟ್ಟಿಸಿಕೊಳ್ಳಿ.

- ಪೂರಿ ಲಟ್ಟಿಸುವಾಗ ಎಣ್ಣೆ ಬಳಸುವುದರಿಂದ ಪೂರಿಗಳು ಎಣ್ಣೆ ಹೆಚ್ಚಾಗಿ ಹೀರಿಕೊಳ್ಳುವುದಿಲ್ಲ ಮತ್ತು ಮೃದುವಾಗಿ ಬರುತ್ತವೆ.

- ಈಗ ಕಡಾಯಿಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಕಾಯಿಸಿ. ಎಣ್ಣೆ ಸೂಕ್ತವಾಗಿ ಕಾದ ನಂತರ, ಒಂದೊಂದೇ ಪುರಿಯನ್ನು ಹಾಕಿ ಮಧ್ಯಮ ಉರಿಯಲ್ಲಿ ಕರಿಯಿರಿ.

- ಪೂರಿ ಎರಡೂ ಬದಿಯಲ್ಲಿ ಹಸಿರು ಮಿಶ್ರಿತ ಬಂಗಾರದ ಬಣ್ಣಕ್ಕೆ ತಿರುಗಿದಾಗ ಹೊರತೆಗೆಯಿರಿ.

ಸವಿಯುವುದು ಹೇಗೆ?

ಈ ಗರಿಗರಿ ಮತ್ತು ಮೃದುವಾದ ಪೂರಿಯನ್ನು (Spinach and Peas Poori) ಬಿಸಿಬಿಸಿ ಆಲೂಗಡ್ಡೆ ಪಲ್ಯ, ವಿಶೇಷ ಚಟ್ನಿ, ಅಥವಾ ಖಾರದ ಮಾವಿನಕಾಯಿ ಉಪ್ಪಿನಕಾಯಿಯೊಂದಿಗೆ ಸವಿದರೆ ಅದರ ರುಚಿ ಅದ್ಭುತ. ಮಕ್ಕಳಿಗೆ ಮೊಸರು ಅಥವಾ ಟೊಮೆಟೊ ಕೆಚಪ್‌ನೊಂದಿಗೆ ನೀಡಬಹುದು.

ಸಾಮಾನ್ಯ ಉಪಹಾರಕ್ಕಿಂತ ವಿಭಿನ್ನವಾಗಿರುವ ಈ ಬಟಾಣಿ ಪಾಲಕ್ ಪೂರಿ ರೆಸಿಪಿ ನಿಮ್ಮ ಚಳಿಗಾಲದ ದಿನಗಳನ್ನು ಮತ್ತಷ್ಟು ವಾವ್ ಎನಿಸುತ್ತದೆ. ಇದು ಕೇವಲ ಹೊಟ್ಟೆ ತುಂಬಿಸುವುದು ಮಾತ್ರವಲ್ಲದೆ, ಆರೋಗ್ಯದ ದೃಷ್ಟಿಯಿಂದಲೂ ಉತ್ತಮ ಆಯ್ಕೆಯಾಗಿದೆ. ಈ ಚಳಿಗಾಲ ಮುಗಿಯುವ ಮುನ್ನ ನಿಮ್ಮ ಕುಟುಂಬದೊಂದಿಗೆ ಈ ಹೆಲ್ದಿ ಗ್ರೀನ್ ಪೂರಿಯನ್ನು ಮಾಡಿ, ಎಂಜಾಯ್ ಮಾಡಿ.