ಅಬ್ಬಬ್ಬಾ!! ಎಂಥ ರುಚಿ.. ಡಾಬಾ ಸ್ಟೈಲ್ ಪಾಲಕ್ ಖಿಚಡಿ ಮಾಡಿ! ತೂಕವೂ ಡಬಲ್ ಇಳಿಯುತ್ತೆ

ಹೋಟೆಲ್ ರುಚಿಯ ಖಿಚಡಿ! ಅತೀ ಕಡಿಮೆ ಸಮಯದಲ್ಲಿ ಮಾಡಿ ಬಿಸಿಬಿಸಿ ಪಾಲಕ್ ಖಿಚಡಿ. ಡಯಟ್ ಮಾಡುವವರಿಗೆ ಮತ್ತು ತೂಕ ಇಳಿಸಲು ಇದುವೇ ಬೆಸ್ಟ್ ರೆಸಿಪಿ. ಹೌದು, ನಮ್ಮ ಅಡುಗೆ ಪದ್ಧತಿಯಲ್ಲಿ 'ಖಿಚಡಿ' (Khichdi Recipe) ಕೇವಲ ಆಹಾರವಲ್ಲ. ಇದೊಂದು ಭಾವನೆ. ಚಳಿಗಾಲದ ಮಧ್ಯಾಹ್ನ ಬಿಸಿಯಾದ ಖಿಚಡಿಯ ಆನಂದವೇ ಬೇರೆ. ಬದಲಾಗುವ ಹವಾಮಾನಕ್ಕೆ ದೇಹಕ್ಕೆ ಹೆಚ್ಚಿನ ಪೋಷಕಾಂಶ ಮತ್ತು ರೋಗನಿರೋಧಕ ಶಕ್ತಿ ಬೇಕು.

ಸಾಮಾನ್ಯ ಖಿಚಡಿಗಿಂತ ಭಿನ್ನವಾದ, ಹಸಿರು ಸೊಪ್ಪಿನ ಶಕ್ತಿ ತುಂಬಿದ 'ಪಾಲಕ್ ಖಿಚಡಿ' (Palak Khichdi) ಇತ್ತೀಚೆಗೆ ಜನಪ್ರಿಯವಾಗಿದೆ. ಇದು ನೋಡಲು ಆಕರ್ಷಕ ಹಾಗೂ ಆರೋಗ್ಯಕ್ಕೂ ಅತ್ಯುತ್ತಮ. ಚಳಿಗಾಲದ ಮಧ್ಯಾಹ್ನದ ಊಟಕ್ಕೆ ಬಿಸಿಬಿಸಿ ಮತ್ತು ಆರೋಗ್ಯಕರ ಪಾಲಕ್ ಖಿಚಡಿ ತಯಾರಿಸುವುದು ಹೇಗೆ? ಕೆಲವೇ ಕೆಲವು ಸುಲಭ ಸಾಮಗ್ರಿಗಳನ್ನು ಬಳಸಿ ಹೋಟೆಲ್ ರುಚಿಯ ಪಾಲಕ್ ಖಿಚಡಿ ತಯಾರಿಸುವ ಹಂತ ಹಂತದ ವಿಧಾನ (Palak Khichdi Recipe) ಮತ್ತು ಕೆಲವು ಪ್ರಮುಖ ಸಲಹೆಗಳು ಇಲ್ಲಿವೆ.

ಪಾಲಕ್ ಖಿಚಡಿಯ ಪ್ರಯೋಜನಗಳು

ಆರೋಗ್ಯದ ದೃಷ್ಟಿಯಿಂದ, ಪಾಲಕ್ ಸೊಪ್ಪಿನಲ್ಲಿ ಹೇರಳವಾಗಿರುವ ಕಬ್ಬಿಣಾಂಶವು ರಕ್ತಹೀನತೆಯನ್ನು ತಡೆಯಲು ಸಹಾಯ ಮಾಡುತ್ತದೆ. ಹೆಸರು ಬೇಳೆಯು ಪ್ರೋಟೀನ್ ಒದಗಿಸಿದರೆ, ಅಕ್ಕಿ ಶಕ್ತಿಯ ಮೂಲವಾಗಿದೆ. ಸುಲಭವಾಗಿ ಜೀರ್ಣವಾಗುವ ಗುಣದಿಂದಾಗಿ ಇದು ಮಕ್ಕಳಿಗೆ ಹಾಗೂ ವಯಸ್ಸಾದವರಿಗೂ ಅತ್ಯುತ್ತಮ ಆಹಾರವಾಗಿದೆ.

ಪಾಲಕ್ ಖಿಚಡಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಅಕ್ಕಿ - 1 ಕಪ್
• ಹೆಸರು ಬೇಳೆ - ಅರ್ಧ ಕಪ್
• ಪಾಲಕ್ ಸೊಪ್ಪು - 1 ಕಟ್ಟು
• ಈರುಳ್ಳಿ - 1
• ಟೊಮೆಟೊ - 1 (ಸಣ್ಣಗೆ ಹೆಚ್ಚಿದ್ದು)
• ತುರಿದ ಶುಂಠಿ - 1 ಚಮಚ
• ಸಣ್ಣಗೆ ಹೆಚ್ಚಿದ ಬೆಳ್ಳುಳ್ಳಿ
• ಹಸಿ ಮೆಣಸಿನಕಾಯಿ
• ಜೀರಿಗೆ - 1 ಚಮಚ
• ಅರಿಶಿನ - ಅರ್ಧ ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಒಗ್ಗರಣೆಗೆ - 1 ಚಮಚ ತುಪ್ಪ (ಅಥವಾ ಎಣ್ಣೆ)
• ಇಂಗು - ಒಂದು ಚಿಟಿಕೆ
• ಒಣ ಮೆಣಸಿನಕಾಯಿ
• ನೀರು - 3 ರಿಂದ 4 ಕಪ್

ಪಾಲಕ್ ಖಿಚಡಿ ತಯಾರಿಸುವ ಸರಳ ವಿಧಾನ

- ಅಕ್ಕಿ ಮತ್ತು ಹೆಸರು ಬೇಳೆಯನ್ನು ಚೆನ್ನಾಗಿ ತೊಳೆದು 10-15 ನಿಮಿಷ ನೆನೆಯಲು ಬಿಡಿ.

- ಕುಕ್ಕರ್‌ನಲ್ಲಿ ಅಕ್ಕಿ, ಬೇಳೆ, ಅರಿಶಿನ, ಉಪ್ಪು ಹಾಗೂ 3 ಕಪ್ ನೀರು ಸೇರಿಸಿ 2 ಸೀಟಿ ಬರುವವರೆಗೆ ಬೇಯಿಸಿ. ಖಿಚಡಿ ತುಂಬಾ ಗಟ್ಟಿಯಾಗದಂತೆ ಎಚ್ಚರವಹಿಸಿ.

- ಪಾಲಕ್ ಎಲೆಗಳನ್ನು ಶುಚಿಯಾಗಿ ತೊಳೆದು, ಒಂದು ನಿಮಿಷ ಕುದಿಯುವ ನೀರಿನಲ್ಲಿ ಹಾಕಿ ತೆಗೆಯಿರಿ (ಇದಕ್ಕೆ 'ಬ್ಲಾಂಚಿಂಗ್' ಎನ್ನುತ್ತಾರೆ).

- ತಕ್ಷಣ ತಣ್ಣೀರಿನಲ್ಲಿ ಹಾಕಿ, ಮಿಕ್ಸಿ ಜಾರ್‌ನಲ್ಲಿ ನುಣ್ಣಗೆ ಪೇಸ್ಟ್ ತಯಾರಿಸಿ. ಇದು ಖಿಚಡಿಗೆ ಆಕರ್ಷಕ ಗಾಢ ಹಸಿರು ಬಣ್ಣವನ್ನು ನೀಡುತ್ತದೆ.

- ಬಾಣಲೆಯಲ್ಲಿ ತುಪ್ಪ ಬಿಸಿ ಮಾಡಿ ಜೀರಿಗೆ, ಇಂಗು, ಒಣ ಮೆಣಸಿನಕಾಯಿ ಸೇರಿಸಿ. ಹೆಚ್ಚಿದ ಈರುಳ್ಳಿ, ಬೆಳ್ಳುಳ್ಳಿ, ಶುಂಠಿ ಹಾಕಿ ಕೆಂಪಾಗುವವರೆಗೆ ಹುರಿಯಿರಿ.

- ಟೊಮೆಟೊ, ಹಸಿಮೆಣಸಿನಕಾಯಿ ಸೇರಿಸಿ ಮೃದುವಾಗುವವರೆಗೆ ಬೇಯಿಸಿ. ಬೇಕಿದ್ದರೆ ಧನಿಯಾ ಪುಡಿ, ಜೀರಿಗೆ ಪುಡಿ, ಕೆಂಪು ಮೆಣಸಿನ ಪುಡಿ ಸೇರಿಸಿ ರುಚಿ ಹೆಚ್ಚಿಸಿಕೊಳ್ಳಿ.

- ಸಿದ್ಧಪಡಿಸಿದ ಪಾಲಕ್ ಪೇಸ್ಟ್ ಅನ್ನು ಬಾಣಲೆಗೆ ಹಾಕಿ 2 ನಿಮಿಷ ಬೇಯಿಸಿ. ನಂತರ ಬೆಂದಿರುವ ಅಕ್ಕಿ-ಬೇಳೆ ಮಿಶ್ರಣವನ್ನು ಸೇರಿಸಿ ಚೆನ್ನಾಗಿ ಬೆರೆಸಿ. ಎಲ್ಲವೂ ಒಂದಕ್ಕೊಂದು ಬೆರೆತು ಹದವಾದ ನಂತರ ಗ್ಯಾಸ್ ಆಫ್ ಮಾಡಿ.

- ರುಚಿಕರ ಪಾಲಕ್ ಖಿಚಡಿಯನ್ನು (Dal Palak Khichdi) ಬಿಸಿಬಿಸಿಯಾಗಿ, ಅದರ ಮೇಲೆ ಒಂದು ಚಮಚ ಗಟ್ಟಿ ತುಪ್ಪ (ಬೆಣ್ಣೆ) ಹಾಕಿ ಸವಿಯಿರಿ. ಇದರ ಜೊತೆಗೆ ಹಪ್ಪಳ, ಉಪ್ಪಿನಕಾಯಿ ಅಥವಾ ಮೊಸರು ಬಜ್ಜಿ (Raita) ಇದ್ದರೆ ಮಧ್ಯಾಹ್ನದ ಊಟ ಪರಿಪೂರ್ಣವಾದ ಅನುಭವ ನೀಡುತ್ತದೆ. ಚಳಿಗಾಲದ ಮಧ್ಯಾಹ್ನಕ್ಕೆ ಇದು ಅಮೃತಕ್ಕೆ ಸಮಾನ.