ಮೂರೇ ಪ್ರಮುಖ ಸಾಮಗ್ರಿ ಸಾಕು ಟೇಸ್ಟಿಯಾಗಿ ಮಾಡಬಹುದು ಹೆಸರುಬೇಳೆ ಪಾಯಸ

ಹೆಸರುಬೇಳೆ ಪಾಯಸ ಹಲವು ರೀತಿಯಲ್ಲಿ ಮಾಡಬಹುದು, ನಾವಿಲ್ಲಿ ತುಂಬಾನೇ ಸರಳವಾಗಿ ಮಾಡಬಹುದಾದ ಪಾಯಸದ ರೆಸಿಪಿ ನೀಡಿದ್ದೇವೆ, ಈ ಪಾಯಸ ರೆಡಿ ಮಾಡಿದರೆ ಬಿಸಿ ಬಿಸಿ ಸವಿಯಲು ಚೆನ್ನಾಗಿರುತ್ತದೆ, ತಣ್ಣಗಾದ ಮೇಲೂ ತುಂಬಾ ರುಚಿಯಾಗಿರುತ್ತದೆ. ಬನ್ನಿ ಈ ಪಾಯಸ ಮಾಡುವುದು ಹೇಗೆ ಎಂದು ನೋಡೋಣ:

ಈ ಪಾಯಸ ಮಾಡಲು ಪ್ರಮುಖವಾಗಿ ಬೇಕಾಗಿರುವುದು ಮೂರೇ ಮೂರು ಸಾಮಗ್ರಿ, ಹಾಲು, ಬೆಲ್ಲ, ಹೆಸರುಬೇಳೆ, ನಂತರ ನೀವು ತುಪ್ಪ, ಡ್ರೈ ಫ್ರೂಟ್ಸ್‌, ತೆಂಗಿನಕಾಯಿ ಹೋಳು ಇವೆಲ್ಲಾ ಸೇರಿಸವುದರಿಂದ ಪಾಯಸದ ಸ್ವಾದ ಹೆಚ್ಚಾಗುವುದು.

ಬೇಕಾಗುವ ಸಾಮಗ್ರಿ
ಹೆಸರು ಬೇಳೆ 1/4 ಕೆಜಿ
ಬೆಲ್ಲ 1/2 ಕೆಜಿ
ಹಾಲು ಅರ್ಧ ಲೀಟರ್‌
ಏಲಕ್ಕಿ 2
ತುಪ್ಪ 2 ಚಮಚ
ತೆಂಗಿನಕಾಯಿ ಹೋಳು (ಚಿಕ್ಕದಾಗಿ ಕತ್ತರಿಸಿದ್ದು)

ಮಾಡುವ ವಿಧಾನ

• ಹೆಸರುಬೇಳೆಗೆ ಒಂದು ಕಪ್‌ ನೀರು ಸೇರಿಸಿ 2-3 ವಿಶಲ್‌ ಬರುವವರೆಗೆ ಬೇಯಿಸಿ. ಹೀಗೆ ಬೇಯಿಸುವಾಗ ಒಂದು ಕಲ್ಲು ಕಲ್ಲುಪ್ಪು ಸೇರಿಸಿ
• ಮತ್ತೊಂದು ಪಾತ್ರೆಯಲ್ಲಿ ಬೆಲ್ಲ ಹಾಕಿ ಅದಕ್ಕೆ 1 ಕಪ್‌ ನೀರು ಸೇರಿಸಿ ಕಾಯಿಸಿ, ಬೆಲ್ಲದ ಪಾಕ ರೆಡಿಯಾದಾಗ ಆಫ್‌ ಮಾಡಿ.
• ಈಗ ನೀವು ಹಾಲನ್ನು ಕುದಿಸಿ, ಹಾಲು ಕುದಿ ಬರುವಾಗ ಸಿಮ್ ಮಾಡಿ ಹಾಲಿಗೆ ಏಲಕ್ಕಿ ಸೇರಿಸಿ
• ನಂತರ ಬೆಲ್ಲದ ಪಾಕ ಸೇರಿಸಿ ಕುದಿಸಿ
• ನಂತರ ಬೇಯಿಸಿದ ಹೆಸರು ಬೇಳೆಯನ್ನು ಸೌಟ್‌ನಿಂದ ಮ್ಯಾಶ್‌ ಮಾಡಿ ಹಾಲು ಬೆಲ್ಲದ ಮಿಶ್ರಣಕ್ಕೆ ಸೇರಿಸಿ
• ನಂತರ ಏಲಕ್ಕಿ ಸೇರಿಸಿ
• ಈಗ ಮತ್ತೊಂದು ಬಾಣಲೆಯಲ್ಲಿ 2 ಚಮಚ ತುಪ್ಪ ಹಾಕಿ ಅದರಲ್ಲಿ ತೆಂಗಿನಕಾಯಿ ಹೋಳು ಸೇರಿಸಿ ಅದು ಸ್ವಲ್ಪ ಕಂದು ಬಣ್ಣ ಬರುವವರೆಗೆ ಫ್ರೈ ಮಾಡಿ(ತುಂಬಾ ಕಪ್ಪಾಗುವವಷ್ಟು ಫ್ರೈ ಮಾಡಬೇಡಿ)
• ನಂತರ ತೆಂಗಿನಕಾಯಿ ಹೋಳನ್ನು ಪಾಯಸಕ್ಕೆ ಸೇರಿಸಿ
• ಇಷ್ಟು ಮಾಡಿದರೆ ಹೆಸರು ಬೇಳೆ ಪಾಯಸ ರೆಡಿ.

ಎಷ್ಟು ಜನಕ್ಕೆ ಸರ್ವ್‌ ಮಾಡಬಹುದು?
ನೀವು ಇಲ್ಲಿ ನೀಡಿರುವ ಅಳತೆಯಲ್ಲಿ ಮಾಡಿದರೆ 15-20 ಜನಕ್ಕೆ ಸರ್ವ್ ಮಾಡಬಹುದು.

ಹೆಸರು ಬೇಳೆ ಪ್ರತ್ಯೇಕ ಬೇಯಿಸಿ ಸೇರಿಸಿ
ಹೆಸರು ಬೇಳೆ ಬೇಯಿಸಿ ಹಾಲು ಹಾಕುವುದಕ್ಕಿಂತ, ಗೆಸರು ಬೇಳೆ ಪ್ರತ್ಯೇಕವಾಗಿ ಕುಕ್ಕರ್‌ನಲ್ಲಿ ಬೇಯಸಿ, ಅದನ್ನು ಹಾಲಿನ ಮಿಶ್ರಣಕ್ಕೆ ಸೇರಿಸಿ.

ಯಾವ ಬೆಲ್ಲ ಒಳ್ಳೆಯದು?
ಯಾವುದೇ ಬೆಲ್ಲ ಬಳಸಬಹುದು, ಈ ಪಾಯಸಕ್ಕೆ ಸಕ್ಕರೆಗಿಂತ ಎಲ್ಲ ಬಳಸುವುದೇ ಸೂಕ್ತ.

ಅರ್ಧ ಲೀಟರ್‌ ಹಾಲಿಗೆ , ಮತ್ತೆ ಅರ್ಧ ಲೀಟರ್ ನೀರು ಸೇರಿಸಬಹುದು.

ತೆಂಗಿನಕಾಯಿ ಹಾಲು ಹಾಕಿದರೆ ಇನ್ನೂ ಟೇಸ್ಟ್?
ನಾವು ನೀಡಿರುವುದು ಹಾಲು ಮಾತ್ರ ಹಾಕಿ ಮಾಡಿರುವ ಸಿಂಪಲ್ ರೆಸಿಪಿ, ನೀವು ಬೇಕಿದ್ದರೆ ಒಂದು ಕಪ್‌ ತೆಂಗಿನಕಾಯಿ ಹಾಲು ಕೂಡ ಸೇರಿಸಬಹುದು.

ಈ ಪಾಯಸ ಗಟ್ಟಿಯಾಗಿ ಮಾಡುವುದಕ್ಕಿಂತ ಗ್ಲಾಸ್‌ನಲ್ಲಿ ಹಾಕಿ ಕುಡಿಯುವ ರೀತಿ ನೀರು ನೀರಾಗಿ ಮಾಡಿದರೆ ಒಳ್ಳೆಯದು, ಇದನ್ನು ಬಿಸಿ ಬಿಸಿಯಾಗಿ ಸವಿಯಬಹುದು ಅಥವಾ ಫ್ರಿಡ್ಜ್‌ನಲ್ಲಿಟ್ಟು ಕೂಡ ಸರ್ವ್‌ ಮಾಡಬಹುದು.