ಬೋರಿಂಗ್ ರೈಸ್ ಬಿಟ್ಟು ಬಿಡಿ.. ಕ್ಯಾಪ್ಸಿಕಂ ಬಳಸಿ ಫಟಾಫಟ್ ಮಾಡಿ ಈ ತಿಂಡಿ! ಎಲ್ಲರೂ ಇಷ್ಟಪಟ್ಟು ತಿಂತಾರೆ!

ನಿತ್ಯ ಒಂದೇ ಬಗೆಯ ಊಟ, ಸಾಂಬಾರ್ ತಿಂದು ಬೇಜಾರಾಗಿದೆಯೇ? ಹೌದು ಎನ್ನುವುದಾದರೆ, ರಾತ್ರಿ ಊಟಕ್ಕಾಗಲೀ, ಮರುದಿನದ ಲಂಚ್ ಬಾಕ್ಸ್‌ಗಾಗಲೀ ಹೊಸದೊಂದು ರುಚಿ ನೀಡುವ ಅತ್ಯುತ್ತಮ ಆಯ್ಕೆಯೆಂದರೆ 'ಕ್ಯಾಪ್ಸಿಕಂ ರೈಸ್' (Capsicum Rice) ಅಥವಾ ಶಿಮ್ಲಾ ಮಿರ್ಚ್ ಪುಲಾವ್ (Shimla Mirch Pulao). ಇದು ನಿಮ್ಮ ದೈನಂದಿನ ಊಟಕ್ಕೆ ವಿಭಿನ್ನ ಆಯಾಮ ನೀಡುತ್ತದೆ.

ಕೇವಲ ರುಚಿಗಷ್ಟೇ ಅಲ್ಲದೆ, ಕ್ಯಾಪ್ಸಿಕಂ ರೈಸ್ ಮಕ್ಕಳಿಗೂ ಅಚ್ಚುಮೆಚ್ಚು. ಸಾಮಾನ್ಯವಾಗಿ ತರಕಾರಿಗಳನ್ನು ತಿನ್ನಲು ಹಿಂದೇಟು ಹಾಕುವ ಮಕ್ಕಳೂ ಸಹ ಈ ಖಾದ್ಯವನ್ನು ಇಷ್ಟಪಟ್ಟು ಸವಿಯುತ್ತಾರೆ. ಕಡಿಮೆ ಸಮಯದಲ್ಲಿ ತಯಾರಿಸಬಹುದಾದ ಈ ಹೆಲ್ದಿ ಹಾಗೂ ಟೇಸ್ಟಿ ಕ್ಯಾಪ್ಸಿಕಂ ರೈಸ್‌ಗೆ ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ಸರಳ ವಿಧಾನದ (Capsicum Rice Recipe) ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ.

Photo Credit: ಸಂಗ್ರಹ ಚಿತ್ರ

ದೊಡ್ಡ ಮೆಣಸಿನಕಾಯಿ ಎಂದೂ ಕರೆಯಲ್ಪಡುವ ಕ್ಯಾಪ್ಸಿಕಂ, ವಿಟಮಿನ್ ಸಿ ಯಿಂದ ಸಮೃದ್ಧವಾಗಿದೆ. ಇದನ್ನು ಅನ್ನದೊಂದಿಗೆ ಮಸಾಲೆಗಳೊಂದಿಗೆ ಸೇರಿಸಿ ತಯಾರಿಸಿದಾಗ ಮನೆಯೆಲ್ಲಾ ಪರಿಮಳದಿಂದ ತುಂಬಿ ಹೋಗುತ್ತದೆ. ಅದರಲ್ಲೂ, ಬ್ಯಾಚುಲರ್‌ಗಳು ಅಥವಾ ಉದ್ಯೋಗಸ್ಥ ದಂಪತಿಗಳಿಗೆ ಇದು ತ್ವರಿತವಾಗಿ ತಯಾರಿಸಬಹುದಾದ ಪೌಷ್ಟಿಕ ಮತ್ತು ಆರೋಗ್ಯಕರ ರೆಸಿಪಿ.

ಕ್ಯಾಪ್ಸಿಕಂ ರೈಸ್‌ಗೆ ಬೇಕಾಗುವ ಸಾಮಗ್ರಿಗಳು

• ಬೆಂದ ಅಥವಾ ಬೇಯಿಸಿದ ಅನ್ನ
• ಕ್ಯಾಪ್ಸಿಕಂ (ದೊಡ್ಡ ಮೆಣಸಿನಕಾಯಿ)
• ಈರುಳ್ಳಿ
• ಕೊತ್ತಂಬರಿ ಸೊಪ್ಪು
• ತುಪ್ಪ
• ರುಚಿಗೆ ತಕ್ಕಷ್ಟು ಉಪ್ಪು
• ಕಡಲೆ ಬೀಜ
• ಕಡಲೆ ಬೇಳೆ
• ಉದ್ದಿನ ಬೇಳೆ
• ಸಾಸಿವೆ
• ಅರಿಶಿನ ಪುಡಿ
• ಗರಂ ಮಸಾಲಾ
• ಕರಿಬೇವು
• ಕೊತ್ತಂಬರಿ ಕಾಳು
• ಜೀರಿಗೆ
• ಎಳ್ಳು
• ಒಣ ಮೆಣಸಿನಕಾಯಿ

ಕ್ಯಾಪ್ಸಿಕಂ ರೈಸ್ ಮಾಡುವ ವಿಧಾನ

- ಕ್ಯಾಪ್ಸಿಕಂ ರೈಸ್‌ಗಾಗಿ, ಮೊದಲು ಈರುಳ್ಳಿಯನ್ನು ಉದ್ದವಾಗಿ ತೆಳುವಾಗಿ ಹೋಳುಗಳಾಗಿ ಕತ್ತರಿಸಿ. ನಂತರ, ಒಂದು ಕ್ಯಾಪ್ಸಿಕಂ ಅನ್ನು ಸಣ್ಣದಾಗಿ ಮತ್ತು ನುಣ್ಣಗೆ ಹೆಚ್ಚಿಟ್ಟುಕೊಳ್ಳಿ.

- ಒಂದು ಬಾಣಲೆಯಲ್ಲಿ ಕಡಲೆ ಬೀಜಗಳನ್ನು ಹುರಿದು ತೆಗೆದಿಡಿ. ಅದೇ ಬಾಣಲೆಗೆ ಕಡಲೆ ಬೇಳೆ, ಉದ್ದಿನ ಬೇಳೆ, ಕೊತ್ತಂಬರಿ ಕಾಳು, ಜೀರಿಗೆ ಮತ್ತು ಎಳ್ಳು ಸೇರಿಸಿ, ಕಡಿಮೆ ಉರಿಯಲ್ಲಿ ಹುರಿಯಿರಿ.

- ಕೊನೆಯಲ್ಲಿ ಒಣ ಮೆಣಸಿನಕಾಯಿಗಳನ್ನು ಹಾಕಿ ಕೆಲವೇ ಸೆಕೆಂಡು ಹುರಿದರೆ ಸಾಕು.

- ಹುರಿದ ಮಸಾಲೆಗಳನ್ನು ತಣ್ಣಗಾಗಲು ಬಿಟ್ಟು, ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಮಾಡಿ. ಈ ಮಸಾಲಾ ಪುಡಿಯನ್ನು ಬಟ್ಟಲಿನಲ್ಲಿ ತೆಗೆದಿಡಿ.

- ಒಂದು ಕಡಾಯಿಯಲ್ಲಿ ತುಪ್ಪ ಅಥವಾ ಎಣ್ಣೆಯನ್ನು ಮಧ್ಯಮ ಉರಿಯಲ್ಲಿ ಬಿಸಿ ಮಾಡಿ. ಸಾಸಿವೆ ಮತ್ತು ಕರಿಬೇವನ್ನು ಸೇರಿಸಿ, ಚಟಪಟ ಎನ್ನುವಾಗ ಹೆಚ್ಚಿದ ಈರುಳ್ಳಿ ಹಾಕಿ ಚಿನ್ನದ ಬಣ್ಣ ಬರುವ ತನಕ ಹುರಿಯಿರಿ.

- ನಂತರ, ನುಣ್ಣಗೆ ಹೆಚ್ಚಿದ ಕ್ಯಾಪ್ಸಿಕಂ ಸೇರಿಸಿ, ಮೃದುವಾಗುವವರೆಗೆ ಬಾಡಿಸಿ.

- ಬಾಡಿಸಿದ ತರಕಾರಿಗಳ ಮಿಶ್ರಣಕ್ಕೆ ಗರಂ ಮಸಾಲಾ, ಅರಿಶಿನ ಪುಡಿ, ಮಸಾಲಾ ಪುಡಿ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ ಬೇಯಿಸಿದ ಅನ್ನ ಸೇರಿಸಿ, ಮಸಾಲೆಗಳೊಂದಿಗೆ ಚೆನ್ನಾಗಿ ಕಲಸಿ. ಬಾಣಲೆ ಮುಚ್ಚಿ ಐದು ನಿಮಿಷಗಳ ಕಾಲ ಕಡಿಮೆ ಉರಿಯಲ್ಲಿ ಬೇಯಲು ಬಿಡಿ.

- ಅಂತಿಮವಾಗಿ, ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ, ಚೆನ್ನಾಗಿ ಬೆರೆಸಿ. ಇಷ್ಟು ಮಾಡಿದರೆ ಸಾಕು, ಬಾಯಲ್ಲಿ ನೀರೂರಿಸುವ ಕ್ಯಾಪ್ಸಿಕಂ ರೈಸ್ ಈಗ ಸಿದ್ಧ.

- ಇದನ್ನು ತೆಳುವಾಗಿ ಹೆಚ್ಚಿದ ಈರುಳ್ಳಿ, ಕೊತ್ತಂಬರಿ ಸೊಪ್ಪು ಮತ್ತು ನಿಂಬೆಹಣ್ಣಿನ ರಸದೊಂದಿಗೆ ಅಲಂಕರಿಸಬಹುದು. ಬಯಸಿದಲ್ಲಿ ಮೇಲೆ ಸ್ವಲ್ಪ ಹುರಿದ ಗೋಡಂಬಿಗಳನ್ನು ಕೂಡ ಸೇರಿಸಿ, ಬಿಸಿಯಾಗಿ ಸವಿಯಬಹುದು ಅಥವಾ ಬಡಿಸಬಹುದು.