ಬೆಳಗ್ಗೆ ಈ ಗಂಜಿ ಕುಡಿಯಿರಿ.. ದೇಹಕ್ಕೆ ಶಕ್ತಿ ಸಿಗುತ್ತೆ, ಸೌಂದರ್ಯವೂ ಹೆಚ್ಚುತ್ತೆ

ಪ್ರತಿದಿನ ಬೆಳಗ್ಗೆ 1 ಗ್ಲಾಸ್ ಈ ಗಂಜಿ ಕುಡಿಯಿರಿ. ಕಬ್ಬಿಣಾಂಶ ಹೆಚ್ಚಿಸಿ, ದಿನವಿಡೀ ಚೈತನ್ಯ ಮತ್ತು ರೋಗನಿರೋಧಕ ಶಕ್ತಿ ವೃದ್ಧಿಸಿ. ಬೆಳಗಿನ ಉಪಾಹಾರವು ದಿನವಿಡೀ ಚೈತನ್ಯದಿಂದ ಇರಲು ಅತ್ಯಗತ್ಯ. ಸಾಮಾನ್ಯವಾಗಿ ನಾವು ಇಡ್ಲಿ, ದೋಸೆ ಅಥವಾ ಮಸಾಲೆಭರಿತ ಖಾದ್ಯಗಳನ್ನು ಸವಿಯುತ್ತೇವೆ. ಆದರೆ, ಕೆಲವೊಮ್ಮೆ ಗಡಿಬಿಡಿಯಲ್ಲಿ ಪೌಷ್ಟಿಕಾಂಶಭರಿತ ಆಹಾರ ಸೇವಿಸುವುದು ಕಷ್ಟವಾಗುತ್ತದೆ. ಇಂತಹ ಸಂದರ್ಭದಲ್ಲಿ, ಒಂದು ಕಪ್ ಅಥವಾ ಗ್ಲಾಸ್ ಸಜ್ಜೆ ಗಂಜಿಯು (Sajje Ganji) ನಿಮ್ಮ ಆರೋಗ್ಯಕ್ಕೆ ಉತ್ತಮ ಆಯ್ಕೆಯಾಗಬಲ್ಲದು.

ಸಜ್ಜೆ, ವಿಶೇಷವಾಗಿ ಉತ್ತರ ಕರ್ನಾಟಕದ ಜನಪ್ರಿಯ ಧಾನ್ಯ. ಇಲ್ಲಿ ಸಜ್ಜೆಯಿಂದ ರೊಟ್ಟಿಗಳನ್ನು ತಯಾರಿಸುತ್ತಾರೆ, ಅದರಲ್ಲೂ ಎಳ್ಳು ಅಮಾವಾಸ್ಯೆ ಹಬ್ಬದಂದು ಎಳ್ಳು ಬಳಸಿ ಸಜ್ಜೆ ರೊಟ್ಟಿ ಮಾಡುವುದು ವಾಡಿಕೆ. ಸಜ್ಜೆಯಲ್ಲಿ ಅಧಿಕ ಪ್ರಮಾಣದ ಕಬ್ಬಿಣಾಂಶವಿದೆ, ಅಲ್ಲದೆ ಇದು ದೇಹಕ್ಕೆ ಅಗತ್ಯವಿರುವ ಎಲ್ಲಾ ಅಮೈನೋ ಆಮ್ಲಗಳನ್ನು ಹೊಂದಿರುವ ಸಾರಜನಕದ ಉತ್ತಮ ಮೂಲವಾಗಿದೆ.

Photo Credit: ಸಾಂದರ್ಭಿಕ ಚಿತ್ರ

ಒಂದು ಲೋಟ ಸಜ್ಜೆ ಗಂಜಿಯು (Bajra Kanji) ನಿಮ್ಮ ದೈನಂದಿನ ಪೋಷಕಾಂಶಗಳ ಅಗತ್ಯತೆಯನ್ನು ಪೂರೈಸಿ, ದಿನವಿಡೀ ಚಟುವಟಿಕೆಯಿಂದ ಇರಲು ಸಹಾಯ ಮಾಡುತ್ತದೆ. ಇದು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹ ಸಹಕಾರಿ. ಈ ಗಂಜಿ ತಯಾರಿಸುವುದು ಸುಲಭ, ಮಕ್ಕಳು ಸಹ ಇಷ್ಟಪಟ್ಟು ಸವಿಯುತ್ತಾರೆ. ನಿತ್ಯ ಸೇವಿಸುವುದರಿಂದ ಅನಾರೋಗ್ಯದಿಂದ ದೂರವಿರಬಹುದು.

ಸಜ್ಜೆ ಗಂಜಿಯ ಆರೋಗ್ಯ ಪ್ರಯೋಜನಗಳು

• ಸಜ್ಜೆಯಲ್ಲಿ ಅಧಿಕ ಪ್ರಮಾಣದ ಕಬ್ಬಿಣಾಂಶ (Iron) ಇದೆ. ಇದು ರಕ್ತಹೀನತೆಯಿಂದ (Anemia) ಬಳಲುತ್ತಿರುವವರಿಗೆ ಒಂದು ವರದಾನ.

• ಸಜ್ಜೆಯು ದೇಹಕ್ಕೆ ಅಗತ್ಯವಿರುವ ಎಲ್ಲಾ ಅಮೈನೋ ಆಮ್ಲಗಳನ್ನು ಹೊಂದಿರುವ ಸಾರಜನಕದ (Protein) ಉತ್ತಮ ಮೂಲವಾಗಿದೆ.

• ಇದು ಸಂಕೀರ್ಣ ಕಾರ್ಬೋಹೈಡ್ರೇಟ್‌ಗಳನ್ನು ಹೊಂದಿರುವುದರಿಂದ, ಗಂಜಿಯನ್ನು ಸೇವಿಸಿದ ನಂತರ ಶಕ್ತಿಯು ನಿಧಾನವಾಗಿ ಬಿಡುಗಡೆಯಾಗುತ್ತದೆ.

• ಸಜ್ಜೆ ಗಂಜಿಯು ದೇಹದ ರೋಗನಿರೋಧಕ ಶಕ್ತಿಯನ್ನು (Immunity) ಹೆಚ್ಚಿಸಲು ಸಹಕಾರಿಯಾಗಿದೆ.

• ಇದರಲ್ಲಿ ಉತ್ತಮ ಪ್ರಮಾಣದ ಫೈಬರ್ ಇರುವುದರಿಂದ, ಇದು ಜೀರ್ಣಕ್ರಿಯೆಯನ್ನು ಸುಧಾರಿಸಲು ಮತ್ತು ಮಲಬದ್ಧತೆಯನ್ನು ತಡೆಯಲು ಸಹಾಯ ಮಾಡುತ್ತದೆ.

ಸಜ್ಜೆ ಗಂಜಿ ತಯಾರಿಸಲು ಬೇಕಾಗುವ ಪದಾರ್ಥಗಳು

• ಸಜ್ಜೆ
• ಸಾಸಿವೆ
• ಕ್ಯಾರೆಟ್
• ಬೀನ್ಸ್
• ಹಸಿ ಮೆಣಸು
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್
• ಕೊತ್ತಂಬರಿ ಸೊಪ್ಪು
• ಎಣ್ಣೆ
• ರುಚಿಗೆ ತಕ್ಕಷ್ಟು ಉಪ್ಪು

ಸಜ್ಜೆ ಗಂಜಿ ತಯಾರಿಸುವ ವಿಧಾನ ಹೀಗಿದೆ

- ಸಜ್ಜೆ ಗಂಜಿ ತಯಾರಿಸುವ ಸುಲಭ ವಿಧಾನ ಇಲ್ಲಿದೆ. ಮೊದಲಿಗೆ, ಸಜ್ಜೆಯನ್ನು ಎರಡು-ಮೂರು ಬಾರಿ ಚೆನ್ನಾಗಿ ತೊಳೆದು ಮಿಕ್ಸಿ ಜಾರ್‌ಗೆ ಹಾಕಿ ತರಿತರಿಯಾಗಿ ರುಬ್ಬಿಕೊಳ್ಳಬೇಕು.

- ನಂತರ, ಕುಕ್ಕರ್‌ಗೆ ರುಬ್ಬಿದ ಸಜ್ಜೆ ಪುಡಿ, ಮೂರು ಕಪ್ ನೀರು ಮತ್ತು ಅಗತ್ಯವಿರುವಷ್ಟು ಉಪ್ಪು ಸೇರಿಸಿ. ಮಧ್ಯಮ ಉರಿಯಲ್ಲಿ ಎರಡು ಸೀಟಿ ಕೂಗಿಸಿ ಸಜ್ಜೆಯನ್ನು ಬೇಯಿಸಿ.

- ಈ ಮಧ್ಯೆ, ಒಂದು ಬಾಣಲೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ ಸಾಸಿವೆ ಸಿಡಿಸಿ. ಬಳಿಕ ಸಣ್ಣದಾಗಿ ಹೆಚ್ಚಿದ ಕ್ಯಾರೆಟ್, ಬೀನ್ಸ್ ಸೇರಿಸಿ ಚೆನ್ನಾಗಿ ಹುರಿಯಿರಿ.

- ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಹಸಿ ವಾಸನೆ ಹೋಗುವವರೆಗೆ ಹುರಿದು, ನಂತರ ಕತ್ತರಿಸಿದ ಹಸಿಮೆಣಸಿನಕಾಯಿ ಹಾಕಿ ಸ್ವಲ್ಪ ಸಮಯ ಹುರಿಯಿರಿ.

- ಸ್ವಲ್ಪ ನೀರು ಸೇರಿಸಿ ಐದು ನಿಮಿಷ ಕುದಿಸಿದ ನಂತರ, ಕುಕ್ಕರ್‌ನಲ್ಲಿ ಬೇಯಿಸಿದ ಸಜ್ಜೆಯನ್ನು ಈ ಮಿಶ್ರಣಕ್ಕೆ ಸೇರಿಸಿ. ಚೆನ್ನಾಗಿ ತಿರುಗಿಸಿ ಮತ್ತೆ ಐದು ನಿಮಿಷ ಕುದಿಯಲು ಬಿಡಿ.

- ಅಂತಿಮವಾಗಿ, ಕೊತ್ತಂಬರಿ ಸೊಪ್ಪು ಹಾಕಿ ಒಲೆ ಆಫ್ ಮಾಡಿದರೆ, ಆರೋಗ್ಯಕರ ಮತ್ತು ರುಚಿಕರವಾದ ಸಜ್ಜೆ ಗಂಜಿ ಸಿದ್ಧವಾಗುತ್ತದೆ.

- ಪ್ರತಿದಿನ ಬೆಳಗ್ಗೆ ಈ ಪೌಷ್ಟಿಕಾಂಶಭರಿತ ಸಜ್ಜೆ ಗಂಜಿಯನ್ನು ಸೇವಿಸುವುದರಿಂದ ಅನಾರೋಗ್ಯದಿಂದ ದೂರವಿರಬಹುದು ಮತ್ತು ದಿನವಿಡೀ ಶಕ್ತಿಯುತವಾಗಿರಬಹುದು.