ಮಾಮೂಲಿ ಪೂರಿ ಬಿಡಿ.. ಮೂಲಂಗಿ ಬಳಸಿ ಈ ರೀತಿ ಮಾಡಿ ನೋಡಿ! ಇಷ್ಟು ರುಚಿಯಾದ ಪೂರಿ ಎಂದೂ ತಿಂದಿರಲ್ಲ

ಸಾಮಾನ್ಯ ಪೂರಿ ಬಿಡಿ, ಈ ರೀತಿ ಮಾಡಿ ನೋಡಿ! ಇಷ್ಟು ರುಚಿಯಾದ ಪೂರಿ ನೀವು ಖಂಡಿತ ತಿಂದಿರಲ್ಲ. ಅಕ್ಕಿ ಹಿಟ್ಟು ಮತ್ತು ಮೂಲಂಗಿ ಪೂರಿ ಮಾಡುವ ಸುಲಭ ವಿಧಾನ ಇಲ್ಲಿದೆ. ಹೌದು, ಚಳಿಗಾಲದಲ್ಲಿ ಬಿಸಿಬಿಸಿಯಾದ ತಿಂಡಿಯ ಅಗತ್ಯ ಹೆಚ್ಚು. ಮಾರುಕಟ್ಟೆಯಲ್ಲಿ ತಾಜಾ ಮೂಲಂಗಿಗಳು ಹೇರಳವಾಗಿ ಲಭ್ಯವಾಗುವ ಈ ಸಮಯದಲ್ಲಿ, ಮೂಲಂಗಿಯನ್ನು ಬಳಸಿ ವಿಭಿನ್ನವಾಗಿ ಏನಾದರೂ ತಯಾರಿಸಲು ಯೋಜಿಸಬಹುದು.

ಸಾಮಾನ್ಯವಾಗಿ ಸಲಾಡ್ ಅಥವಾ ಸಾಂಬಾರ್‌ಗಳಿಗೆ ಬಳಸುವ ಮೂಲಂಗಿಯಿಂದ, ಹೊಸ ರುಚಿಯ ಪೂರಿ ತಯಾರಿಸಬಹುದು ಎಂಬುದು ಹಲವರಿಗೆ ಅಚ್ಚರಿ ಮೂಡಿಸಬಹುದು. ಅಕ್ಕಿ ಹಿಟ್ಟು ಮತ್ತು ಮೂಲಂಗಿಯ ಸಂಯೋಜನೆಯಲ್ಲಿ ತಯಾರಿಸುವ ಈ ಸ್ಪೆಷಲ್ ಪೂರಿ (Chawal-Mooli Ki Puri), ಇತರೆ ಪೂರಿಗಳಿಗಿಂತ ಭಿನ್ನವಾದ ಸುವಾಸನೆ ಮತ್ತು ಗರಿಗರಿಯಾಗಿರುತ್ತದೆ. ಗೋಧಿ ಹಿಟ್ಟಿನ ಪೂರಿಗಿಂತಲೂ ಹೆಚ್ಚು ಆರೋಗ್ಯಕರವಾಗಿರುವ ಇದು, ಜೀರ್ಣಕ್ರಿಯೆಗೂ ಸಹಕಾರಿಯಾಗಿದೆ. ಚಳಿಗಾಲದ ಉಪಹಾರಕ್ಕೆ ಇದು ಅತ್ಯುತ್ತಮ ಮತ್ತು ಪೌಷ್ಟಿಕ ಆಯ್ಕೆಯಾಗಿದೆ.

Photo Credit: ಸಂಗ್ರಹ ಚಿತ್ರ

ಇಡ್ಲಿ-ದೋಸೆಗಿಂತ ಹೊಸ ರುಚಿ

ಈ ಅಕ್ಕಿ-ಮೂಲಂಗಿ ಪೂರಿಯ ವಿಶೇಷತೆ ಎಂದರೆ, ಅಕ್ಕಿ ಹಿಟ್ಟಿನಿಂದ ಇದು ಗರಿಗರಿಯಾಗಿ ಮೂಡಿಬರುತ್ತದೆ. ಮೂಲಂಗಿಯು ತನ್ನದೇ ಆದ ವಿಶಿಷ್ಟ ರುಚಿ ಸೇರಿಸುತ್ತದೆ. ಅಷ್ಟೇ ಅಲ್ಲದೆ, ಇದರಲ್ಲಿರುವ ಜೀರ್ಣಕ್ರಿಯೆಗೆ ಪೂರಕವಾದ ಅಂಶಗಳಿಂದ, ಎಣ್ಣೆಯಲ್ಲಿ ಕರಿದ ತಿನಿಸಾಗಿದ್ದರೂ ಸುಲಭವಾಗಿ ಜೀರ್ಣವಾಗುತ್ತದೆ. ಮನೆಯಲ್ಲಿ ನಿತ್ಯ ಮಾಡುವ ಇಡ್ಲಿ-ದೋಸೆಗಿಂತ ಹೊಸ ರುಚಿ ಬಯಸುವವರಿಗೆ ಇದು ಹೇಳಿ ಮಾಡಿಸಿದಂತಿದೆ.

ಅಕ್ಕಿ-ಮೂಲಂಗಿ ಪೂರಿಗೆ ಬೇಕಾಗುವ ಪದಾರ್ಥಗಳು

• ಅಕ್ಕಿ ಹಿಟ್ಟು
• ಮೂಲಂಗಿ
• ಹಸಿ ಮೆಣಸಿನಕಾಯಿ
• ಜೀರಿಗೆ
• ಓಂ ಕಾಳು (ಅಜವಾನ)
• ಉಪ್ಪು
• ಕೊತ್ತಂಬರಿ ಸೊಪ್ಪು
• ಎಣ್ಣೆ
• ನೀರು

ಅಕ್ಕಿ-ಮೂಲಂಗಿ ಪೂರಿ ತಯಾರಿಸುವ ವಿಧಾನ

- ಮೊದಲಿಗೆ ಮೂಲಂಗಿಯನ್ನು ಚೆನ್ನಾಗಿ ತೊಳೆದು ಸಿಪ್ಪೆ ತೆಗೆದು ತುರಿದುಕೊಳ್ಳಿ.

- ಮೂಲಂಗಿಯಲ್ಲಿ ಹೆಚ್ಚಿನ ನೀರಿನಂಶವಿರುವುದರಿಂದ, ತುರಿದ ನಂತರ ಅದನ್ನು ಕೈಗಳಿಂದ ಲಘುವಾಗಿ ಹಿಂಡಿ ಹೆಚ್ಚುವರಿ ನೀರನ್ನು ತೆಗೆಯುವುದು ಉತ್ತಮ.

- ನಂತರ, ಒಂದು ವಿಶಾಲವಾದ ಪಾತ್ರೆಯಲ್ಲಿ ಅಕ್ಕಿ ಹಿಟ್ಟನ್ನು ಹಾಕಿ. ಅದಕ್ಕೆ ತುರಿದ ಮೂಲಂಗಿ, ಕತ್ತರಿಸಿದ ಹಸಿ ಮೆಣಸಿನಕಾಯಿ, ಜೀರಿಗೆ, ಓಮ ಕಾಳು, ಉಪ್ಪು ಹಾಗೂ ಸಣ್ಣಗೆ ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ. ಈ ಪದಾರ್ಥಗಳನ್ನು ಹಿಟ್ಟಿನೊಂದಿಗೆ ಸಮನಾಗಿ ಬೆರೆಯುವಂತೆ ಚೆನ್ನಾಗಿ ಕಲಸಿ.

- ಈಗ, ಅಗತ್ಯವಿದ್ದರೆ ಒಂದಿಷ್ಟು ನೀರನ್ನು ಮಾತ್ರ ಚಿಮುಕಿಸುತ್ತಾ ಹಿಟ್ಟನ್ನು ಗಟ್ಟಿಯಾಗಿ ಕಲಸಿಕೊಳ್ಳಿ. ಮೂಲಂಗಿಯಲ್ಲೇ ನೀರಿನಂಶವಿರುವುದರಿಂದ ಕಡಿಮೆ ನೀರು ಬೇಕಾಗಬಹುದು.

- ಹಿಟ್ಟು ಕಲಸಿದ ನಂತರ ಅದನ್ನು ಒಂದು ಪಾತ್ರೆಯಿಂದ ಮುಚ್ಚಿ ಸುಮಾರು ಹತ್ತು ನಿಮಿಷಗಳ ಕಾಲ ಹಾಗೆಯೇ ಬಿಡಿ, ಇದರಿಂದ ಹಿಟ್ಟು ಹದಗೊಳ್ಳುತ್ತದೆ.

- ಹಾಲು ಹದವಾದ ನಂತರ, ಹಿಟ್ಟಿನಿಂದ ಸಣ್ಣದಾದ ಉಂಡೆಗಳನ್ನು ಮಾಡಿ. ಲಟ್ಟಣಿಗೆಗೆ ಸ್ವಲ್ಪ ಎಣ್ಣೆಯನ್ನು ಸವರಿ, ಈ ಉಂಡೆಗಳನ್ನು ಅಕ್ಕಿ ಪೂರಿಯ ಆಕಾರದಲ್ಲಿ ಲಟ್ಟಿಸಿ. ಹಿಟ್ಟು ಅಕ್ಕಿ ಹಿಟ್ಟಾಗಿರುವುದರಿಂದ ಪೂರಿ ಸೀಳದಂತೆ ಎಚ್ಚರಿಕೆಯಿಂದ ಲಟ್ಟಿಸಬೇಕು.

- ಒಂದು ಕಡಾಯಿಯಲ್ಲಿ ಎಣ್ಣೆಯನ್ನು ಹಾಕಿ ಬಿಸಿ ಮಾಡಿ. ಎಣ್ಣೆ ಸಾಕಷ್ಟು ಕಾದ ನಂತರ, ಉರಿಯನ್ನು ಮಧ್ಯಮಕ್ಕೆ ಇಳಿಸಿ ಲಟ್ಟಿಸಿದ ಪೂರಿಗಳನ್ನು ಎಣ್ಣೆಯಲ್ಲಿ ಹಾಕಿ.

- ಪೂರಿಗಳು ಎರಡೂ ಕಡೆಗಳಲ್ಲಿ ಹೊಂಬಣ್ಣಕ್ಕೆ ತಿರುಗುವವರೆಗೆ ಚೆನ್ನಾಗಿ ಕರಿಯಿರಿ. ಇಷ್ಟು ಮಾಡಿದರೆ ಸಾಕು ಬಿಸಿಬಿಸಿಯಾದ ಪೂರಿ ಸಿದ್ಧ (Chawal-Mooli Ki Puri Recipe).

- ಬಿಸಿಬಿಸಿಯಾದ ಅಕ್ಕಿ-ಮೂಲಂಗಿ ಪೂರಿಗಳನ್ನು ಯಾವುದೇ ಸೈಡ್ ಡಿಶ್ ಇಲ್ಲದೆಯೂ ತಿನ್ನಬಹುದು. ಆದರೆ, ಅದರ ರುಚಿಯನ್ನು ಮತ್ತಷ್ಟು ಹೆಚ್ಚಿಸಲು, ಈ ತಿನಿಸುಗಳೊಂದಿಗೆ ಸವಿಯಬಹುದು.

• ಮಸಾಲಾ ಆಲೂಗಡ್ಡೆ ಪಲ್ಯ ಅಥವಾ ಕುರ್ಮಾ
• ತಾಜಾ ಮೊಸರು ಮತ್ತು ಆವಕಾಯ್ ಉಪ್ಪಿನಕಾಯಿ
• ಪುದೀನಾ ಅಥವಾ ತೆಂಗಿನಕಾಯಿ ಚಟ್ನಿ

ಈ ಚಳಿಗಾಲದಲ್ಲಿ ನಿಮ್ಮ ಮನೆಯಲ್ಲಿ ಈ ಅಕ್ಕಿ-ಮೂಲಂಗಿ ಪೂರಿಯನ್ನು ಖಂಡಿತಾ ಒಮ್ಮೆ ಪ್ರಯತ್ನಿಸಿ ನೋಡಿ. ಇದರ ಅನನ್ಯ ರುಚಿ ಮಕ್ಕಳು, ದೊಡ್ಡವರು ಸೇರಿದಂತೆ ಮನೆಯಲ್ಲಿ ಎಲ್ಲರಿಗೂ ಖಂಡಿತಾ ಇಷ್ಟವಾಗುತ್ತದೆ.