ಗಣರಾಜ್ಯೋತ್ಸವ.. ಈ ಬಾರಿ ತಿರಂಗಾ ಪುಲಾವ್ ಹೀಗೆ ಮಾಡಿ! ಅಡುಗೆ ಮನೆಯಲ್ಲೂ ದೇಶಭಕ್ತಿ.. ಅತೀ ಸುಲಭ

ಗಣರಾಜ್ಯೋತ್ಸವದ ತ್ರಿವರ್ಣ ಪುಲಾವ್! ನಿಮ್ಮ ತಟ್ಟೆಯಲ್ಲಿ ದೇಶಭಕ್ತಿಯ ರುಚಿ.. ಅತೀ ಸುಲಭ ವಿಧಾನ ಇಲ್ಲಿದೆ. ಹೌದು, ಗಣರಾಜ್ಯೋತ್ಸವ (Republic Day 2026) ಕೇವಲ ರಾಷ್ಟ್ರಧ್ವಜಾರೋಹಣ ಅಥವಾ ಪರೇಡ್‌ಗೆ ಸೀಮಿತವಲ್ಲ, ಅದು ನಮ್ಮ ಭಾರತೀಯತೆಯ ಅನನ್ಯ ಸಂಭ್ರಮ. ಈ ವಿಶೇಷ ದಿನದಂದು ಮನೆಮನೆಗಳಲ್ಲಿ ದೇಶಪ್ರೇಮದ ವಾತಾವರಣ ಸೃಷ್ಟಿಸಲು 'ತ್ರಿವರ್ಣ ಪುಲಾವ್' (Tiranga Pulao) ಅತ್ಯುತ್ತಮ ಆಯ್ಕೆ. ಕೇಸರಿ, ಬಿಳಿ, ಹಸಿರು ಬಣ್ಣಗಳಿಂದ ಕಂಗೊಳಿಸುವ ಈ ಪುಲಾವ್ ಕಣ್ಣಿಗೆ ಆಕರ್ಷಕವಾಗಿದ್ದು, ರುಚಿಯಲ್ಲಿ ಅದ್ಭುತವಾಗಿದೆ.

ಕೃತಕ ಬಣ್ಣಗಳ ಬದಲಿಗೆ ಪಾಲಕ್ ಮತ್ತು ಟೊಮೆಟೊ ಬಳಸಿ ನೈಸರ್ಗಿಕವಾಗಿ ಈ ತಿರಂಗಾ ರೈಸ್ ತಯಾರಿಸಬಹುದು. ಗಣತಂತ್ರ ದಿವಸದಂದು ಊಟದ ತಟ್ಟೆಗೆ ದೇಶಪ್ರೇಮದ ಸ್ಪರ್ಶ ನೀಡಲು ಈ ಸುಲಭ, ಹಂತ-ಹಂತದ ತಿರಂಗಾ ಪುಲಾವ್ ರೆಸಿಪಿ (Tiranga Pulao Recipe) ಬಗ್ಗೆ ಈ ಲೇಖನದಲ್ಲಿ ತಿಳಿಸಲಾಗಿದೆ.

ತಿರಂಗಾ ಪುಲಾವ್ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

ಕೇಸರಿ (ಕಿತ್ತಳೆ) ಬಣ್ಣದ ಭಾಗಕ್ಕೆ

• ಬಾಸುಮತಿ ಅಕ್ಕಿ (ಅರ್ಧ ಬೆಂದಿದ್ದು) - 1 ಕಪ್
• ತುಪ್ಪ - 1 ಚಮಚ
• ಜೀರಿಗೆ - 1/4 ಚಮಚ -
• ಶುಂಠಿ ಪೇಸ್ಟ್ - 1 ಚಮಚ
• ಟೊಮೆಟೊ ಪ್ಯೂರಿ - 1/4 ಕಪ್
• ಕೆಂಪು ಮೆಣಸಿನ ಪುಡಿ ಮತ್ತು ಪೇಸ್ಟ್ - 1/2 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು

ಬಿಳಿ ಬಣ್ಣದ ಭಾಗಕ್ಕೆ

• ಬಾಸುಮತಿ ಅಕ್ಕಿ (ಸಂಪೂರ್ಣವಾಗಿ ಬೆಂದಿದ್ದು) - 1 ಕಪ್

ಹಸಿರು ಬಣ್ಣದ ಭಾಗಕ್ಕೆ

• ತುಪ್ಪ - 2 ಚಮಚ
• ಜೀರಿಗೆ - 1/4 ಚಮಚ
• ಶುಂಠಿ ಪೇಸ್ಟ್ - 1 ಚಮಚ
• ಹಸಿ ಮೆಣಸಿನಕಾಯಿ ಪೇಸ್ಟ್ - 1 ಚಮಚ
• ಪಾಲಕ್ ಪ್ಯೂರಿ - 1/2 ಕಪ್
• ಉಪ್ಪು - ರುಚಿಗೆ ತಕ್ಕಷ್ಟು

ತ್ರಿವರ್ಣ ಪುಲಾವ್ ತಯಾರಿಸುವ ಸರಳ ವಿಧಾನ

- ಮೊದಲಿಗೆ, ಎರಡು ನಾನ್ ಸ್ಟಿಕ್ ಬಾಣಲೆಗಳನ್ನು ಒಲೆ ಮೇಲಿಟ್ಟು, ತಲಾ 2 ಚಮಚ ತುಪ್ಪ ಸೇರಿಸಿ ಕಾಯಿಸಿ. ಎರಡೂ ಬಾಣಲೆಗಳಿಗೆ ಜೀರಿಗೆ ಹಾಕಿ ಚಿಟಪಟ ಎನ್ನಲು ಬಿಡಿ.

- ಒಂದು ಬಾಣಲೆಯಲ್ಲಿ, ಜೀರಿಗೆ ಸಿಡಿದ ಮೇಲೆ ಶುಂಠಿ ಪೇಸ್ಟ್, ಕೆಂಪು ಮೆಣಸಿನ ಪುಡಿ / ಪೇಸ್ಟ್ ಮತ್ತು ಟೊಮೆಟೊ ಪ್ಯೂರಿ ಸೇರಿಸಿ. ಅರ್ಧ ಬೆಂದ ಅಕ್ಕಿ ಮತ್ತು ಉಪ್ಪು ಹಾಕಿ ಚೆನ್ನಾಗಿ ಬೆರೆಸಿ. ಸ್ವಲ್ಪ ನೀರು ಸೇರಿಸಿ, ಮುಚ್ಚಳ ಮುಚ್ಚಿ ಅಕ್ಕಿ ಕೇಸರಿ ಬಣ್ಣಕ್ಕೆ ತಿರುಗುವವರೆಗೆ ಬೇಯಿಸಿ.

- ಎರಡನೇ ಬಾಣಲೆಯಲ್ಲಿ ಜೀರಿಗೆ ಸಿಡಿದ ನಂತರ ಶುಂಠಿ ಪೇಸ್ಟ್, ಹಸಿಮೆಣಸಿನ ಪೇಸ್ಟ್, ಪಾಲಕ್ ಪ್ಯೂರಿ ಸೇರಿಸಿ. ಇದಕ್ಕೆ ಅಕ್ಕಿ ಮತ್ತು ಉಪ್ಪು ಹಾಕಿ ಮಿಶ್ರಣ ಮಾಡಿ. ಅಗತ್ಯವಿದ್ದರೆ ನೀರು ಸೇರಿಸಿ, ಮುಚ್ಚಳ ಮುಚ್ಚಿ ಹಸಿರು ಬಣ್ಣಕ್ಕೆ ಬರುವಂತೆ ಬೇಯಿಸಿ.

- ಕೇಸರಿ, ಬಿಳಿ ಮತ್ತು ಹಸಿರು ಬಣ್ಣದ ಅನ್ನ ಈಗ ಸಿದ್ಧ. ಇವನ್ನು ಆಕರ್ಷಕವಾಗಿ ಜೋಡಿಸಲು ರಿಂಗ್ ಮೋಲ್ಡ್ ಅಥವಾ ಆಳವಾದ ಬೌಲ್ ತೆಗೆದುಕೊಳ್ಳಿ. ಮೊದಲು ಮೋಲ್ಡ್‌ನಲ್ಲಿ ಕೇಸರಿ ಅನ್ನವನ್ನು ಹಾಕಿ ಹಗುರವಾಗಿ ಒತ್ತಿ. ನಂತರ ಬಿಳಿ ಅನ್ನ, ಕೊನೆಯಲ್ಲಿ ಹಸಿರು ಅನ್ನ ಹರಡಿ ಸಮತಟ್ಟು ಮಾಡಿ.

- ಮೋಲ್ಡ್ ಅನ್ನು ನಿಧಾನವಾಗಿ ತೆಗೆದರೆ, ಮೂರು ಬಣ್ಣಗಳು ಧ್ವಜದಂತೆ ಸುಂದರವಾಗಿ ಕಾಣುತ್ತವೆ. ಈ ಪುಲಾವ್ ಅನ್ನು ಬಿಸಿಯಾಗಿರುವಾಗಲೇ ಮೊಸರು ಬಜ್ಜಿ ಅಥವಾ ಸಲಾಡ್ ಜೊತೆಗೆ ಸರ್ವ್ ಮಾಡಿ.

ಈ ಸ್ಪೆಷಲ್ ಟಿಪ್ಸ್ ಬಳಸಿ

ಬಣ್ಣಕ್ಕಾಗಿ ಕೃತಕ ಬಣ್ಣಗಳ ಬದಲು ಟೊಮೆಟೊ ಮತ್ತು ಪಾಲಕ್ ಬಳಸಿದರೆ ಹೆಚ್ಚು ಆರೋಗ್ಯಕರ. ಪುಲಾವ್ ಬಿಡಿಬಿಡಿಯಾಗಿ ಬರಲು ಬಾಸುಮತಿ ಅಕ್ಕಿಯನ್ನು ಬಳಸುವುದೇ ಸೂಕ್ತ.