ಸೌತೆಕಾಯಿ ಬಳಸಿ ಈ ರೀತಿ ಇಡ್ಲಿ ಮಾಡಿ! ಅಕ್ಕಿ ನೆನೆಸುವ, ರುಬ್ಬುವ ತೊಂದರೆಯೇ ಇಲ್ಲ.. ತೂಕವೂ ಇಳಿಯುತ್ತೆ

ತೂಕ ಇಳಿಸಲು ಬಯಸುವವರಿಗೆ ಸೂಪರ್ ಬ್ರೇಕ್‌ಫಾಸ್ಟ್! ಸೌತೆಕಾಯಿ ಬಳಸಿ ಈ ರೀತಿ ಇಡ್ಲಿ ಮಾಡಿ ನೋಡಿ. ಇಷ್ಟು ರುಚಿಯಾದ ಇಡ್ಲಿ ನೀವು ಯಾವತ್ತೂ ತಿಂದಿರಲ್ಲ. ಅಕ್ಕಿ ನೆನೆಸುವ, ರುಬ್ಬುವ ತೊಂದರೆಯೇ ಇಲ್ಲದೆ ಹತ್ತು ನಿಮಿಷದಲ್ಲಿ ರೆಡಿ. ಬಾಯಲ್ಲಿ ನೀರೂರಿಸುವ ಈ ಇಡ್ಲಿ (Idli Recipe) ಬೆಳಗಿನ ತಿಂಡಿಗೆ ಬೆಸ್ಟ್ ಆಯ್ಕೆ.

ದಕ್ಷಿಣ ಭಾರತೀಯರ ಅಚ್ಚುಮೆಚ್ಚಿನ ತಿಂಡಿಗಳಲ್ಲಿ ಇಡ್ಲಿ ಅಗ್ರಸ್ಥಾನದಲ್ಲಿದೆ. ಆದರೆ, ಅಕ್ಕಿ-ಬೇಳೆ ಇಡ್ಲಿಯ ದಿನನಿತ್ಯದ ರುಚಿ ಬದಲಿಸಲು ಬಯಸಿದರೆ, ಸೌತೆಕಾಯಿ ಇಡ್ಲಿ (Cucumber Idli) ಅತ್ಯುತ್ತಮ ಆಯ್ಕೆಯಾಗಿದೆ. ಅಕ್ಕಿ ನೆನೆಸಿ ರುಬ್ಬುವ ತೊಂದರೆಯಿಲ್ಲದೆ, ಕೇಲವೇ ನಿಮಿಷಗಳಲ್ಲಿ ಸಿದ್ಧವಾಗುವ ಈ ರುಚಿಕರ ಮತ್ತು ಆರೋಗ್ಯಕರವಾದ ಇಡ್ಲಿಯನ್ನು ಮಕ್ಕಳು ಹಾಗೂ ದೊಡ್ಡವರು ಇಬ್ಬರೂ ಇಷ್ಟಪಡುತ್ತಾರೆ.

Photo Credit: ಸಂಗ್ರಹ ಚಿತ್ರ

ಸೌತೆಕಾಯಿಯ ವಿಶಿಷ್ಟ ಗುಣವು ಇಡ್ಲಿಗೆ ಹೊಸ ಆಯಾಮ ನೀಡುತ್ತದೆ. ನೈಸರ್ಗಿಕವಾಗಿ ತಂಪು ಮತ್ತು ನೀರಿನಂಶಭರಿತವಾದ ಸೌತೆಕಾಯಿಯನ್ನು ಬಳಸುವುದರಿಂದ ಇಡ್ಲಿ ಹೆಚ್ಚು ಮೃದುವಾಗುತ್ತದೆ. ಜೊತೆಗೆ, ರವೆಯ ಬಳಕೆಯು ಜೀರ್ಣಕ್ರಿಯೆಗೆ ಸಹಕಾರಿಯಾಗಿದ್ದು, ಇಡ್ಲಿಯ ರುಚಿಯನ್ನು ವಿಭಿನ್ನಗೊಳಿಸುತ್ತದೆ.

ಸೌತೆಕಾಯಿ ಇಡ್ಲಿಯ ಪ್ರಯೋಜನಗಳು

ಸೌತೆಕಾಯಿ ಇಡ್ಲಿ(Cucumber Idli Recipe) ಹಲವು ಆರೋಗ್ಯ ಪ್ರಯೋಜನಗಳನ್ನು ಹೊಂದಿದೆ. ಸೌತೆಕಾಯಿ ಮತ್ತು ರವೆ ಎರಡೂ ಸುಲಭವಾಗಿ ಜೀರ್ಣವಾಗುವ ಆಹಾರ ಪದಾರ್ಥಗಳು. ಅಲ್ಲದೆ, ಬೇಸಿಗೆಯ ಬಿಸಿಲಿನಲ್ಲಿ ದೇಹಕ್ಕೆ ತಂಪು ನೀಡುವ ಉತ್ತಮ ಗುಣ ಸೌತೆಕಾಯಿಗಿದೆ. ಎಣ್ಣೆ ರಹಿತವಾಗಿ ತಯಾರಾಗುವುದರಿಂದ, ಇದು ಕಡಿಮೆ ಕ್ಯಾಲೋರಿಯುಕ್ತವಾಗಿದ್ದು ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಸೂಕ್ತ ಆಯ್ಕೆಯಾಗಿದೆ. ಸೌತೆಕಾಯಿಯಲ್ಲಿರುವ ವಿಟಮಿನ್ ಮತ್ತು ನೀರಿನಂಶ ಚರ್ಮದ ಆರೋಗ್ಯಕ್ಕೂ ಉತ್ತಮ.

ಸೌತೆಕಾಯಿ ಇಡ್ಲಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಸೌತೆಕಾಯಿ (ತುರಿದ)
• ರವೆ (ಸೂಜಿ)
• ಮೊಸರು (ಸ್ವಲ್ಪ ಹುಳಿಯಾಗಿದ್ದರೆ ಉತ್ತಮ)
• ಶುಂಠಿ
• ಹಸಿ ಮೆಣಸಿನಕಾಯಿ
• ಈನೋ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ
• ನೀರು

ಸೌತೆಕಾಯಿ ಇಡ್ಲಿ ತಯಾರಿಸುವ ವಿಧಾನ

- ಮೊದಲು ಸೌತೆಕಾಯಿಯನ್ನು ಚೆನ್ನಾಗಿ ತೊಳೆದು ತುರಿದುಕೊಳ್ಳಿ. ಸೌತೆಕಾಯಿಯಲ್ಲಿ ಅತಿಯಾದ ನೀರಿದ್ದರೆ ಸ್ವಲ್ಪ ಹಿಂಡಿ ತೆಗೆಯಬಹುದು. ಆದರೆ, ಇಡ್ಲಿ ಮೃದುವಾಗಲು ಅದರ ರಸವು ಮುಖ್ಯ ಎಂಬುದನ್ನು ನೆನಪಿಡಿ.

- ಒಂದು ದೊಡ್ಡ ಪಾತ್ರೆಯಲ್ಲಿ ರವೆ, ಮೊಸರು ಮತ್ತು ತುರಿದ ಸೌತೆಕಾಯಿಯನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ ಈ ಮಿಶ್ರಣಕ್ಕೆ ತುರಿದ ಶುಂಠಿ, ಹೆಚ್ಚಿದ ಹಸಿಮೆಣಸಿನಕಾಯಿ ಮತ್ತು ರುಚಿಗೆ ಬೇಕಾದಷ್ಟು ಉಪ್ಪನ್ನು ಸೇರಿಸಿ. ಹಿಟ್ಟು ತುಂಬಾ ಗಟ್ಟಿಯಾಗಿ ಕಂಡರೆ, ಸ್ವಲ್ಪ ನೀರನ್ನು ಸೇರಿಸಿ ದೋಸೆ ಹಿಟ್ಟಿಗಿಂತ ಸ್ವಲ್ಪ ಹೆಚ್ಚು ಗಟ್ಟಿಯಾಗಿರುವ ಹದಕ್ಕೆ ಸಿದ್ಧಪಡಿಸಿಕೊಳ್ಳಿ.

- ರವೆಯು ನೀರನ್ನು ಸರಿಯಾಗಿ ಹೀರಿಕೊಳ್ಳಲು, ಈ ಮಿಶ್ರಣವನ್ನು ಹತ್ತು ಅಥವಾ ಹದಿನೈದು ನಿಮಿಷಗಳ ಕಾಲ ಮುಚ್ಚಿಡಿ. ಹೀಗೆ ಮಾಡುವುದರಿಂದ ಇಡ್ಲಿಗಳು ಹೆಚ್ಚು ಮೃದುವಾಗಿ ಬರುತ್ತವೆ.

- ಹದಿನೈದು ನಿಮಿಷಗಳ ನಂತರ, ಹಿಟ್ಟನ್ನು ಮತ್ತೊಮ್ಮೆ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ ಇಡ್ಲಿ ಪಾತ್ರೆಯಲ್ಲಿ ನೀರನ್ನು ಕಾಯಲು ಇಡಿ. ಇಡ್ಲಿ ತಟ್ಟೆಗಳಿಗೆ ಎಣ್ಣೆಯನ್ನು ಸವರಿ ಸಿದ್ಧಪಡಿಸಿಕೊಳ್ಳಿ.

- ಬಳಿಕ ಇಡ್ಲಿ ಹಿಟ್ಟಿಗೆ ಈನೋ ಸೇರಿಸಿ, ಅದನ್ನು ಅತಿಯಾಗಿ ಕಲಸದೆ ನಿಧಾನವಾಗಿ ಮಿಶ್ರಣ ಮಾಡಿ.

- ಹಿಟ್ಟು ಉಬ್ಬಿದ ತಕ್ಷಣ, ಇಡ್ಲಿ ತಟ್ಟೆಗಳಿಗೆ ಹಾಕಿ, ಮಧ್ಯಮ ಉರಿಯಲ್ಲಿ ಹತ್ತು ಅಥವಾ ಹನ್ನೆರಡು ನಿಮಿಷಗಳ ಕಾಲ ಆವಿಯಲ್ಲಿ ಬೇಯಿಸಿ.

- ಬಿಸಿಯಾದ ಸೌತೆಕಾಯಿ ಇಡ್ಲಿಯನ್ನು ತೆಂಗಿನಕಾಯಿ ಚಟ್ನಿ ಅಥವಾ ಸಾಂಬಾರ್‌ನೊಂದಿಗೆ ಸವಿದರೆ, ಅದರ ರುಚಿ ಅದ್ಭುತವಾಗಿರುತ್ತದೆ.

ಮಕ್ಕಳಿಗೆ ನೀಡುವಾಗ ಸ್ವಲ್ಪ ತುಪ್ಪದೊಂದಿಗೆ ಸೇರಿಸಿದರೆ ಅವರು ಇನ್ನೂ ಹೆಚ್ಚು ಆಸಕ್ತಿಯಿಂದ ತಿನ್ನುತ್ತಾರೆ. ನೀವು ಇಡ್ಲಿಯ ರುಚಿಯನ್ನು ಮತ್ತಷ್ಟು ಹೆಚ್ಚಿಸಲು ಬಯಸಿದರೆ, ಹಿಟ್ಟಿಗೆ ಸಣ್ಣದಾಗಿ ಹೆಚ್ಚಿದ ಕೊತ್ತಂಬರಿ ಸೊಪ್ಪು ಅಥವಾ ತುರಿದ ಕ್ಯಾರೆಟ್‌ ಅನ್ನು ಸೇರಿಸಬಹುದು.