100 ವರ್ಷ ಆರೋಗ್ಯವಾಗಿರಬೇಕಾ? ಈ ತಿಂಡಿ ಮಾಡಿ ತಿನ್ನಿ ಸಾಕು..! ತೂಕವೂ ಇಳಿಯುತ್ತೆ

ಮಕ್ಕಳಿಗೆ ಶಕ್ತಿ, ದೊಡ್ಡವರಿಗೆ ಆರೋಗ್ಯ! ನಮ್ಮ ಪೂರ್ವಜರ ಆರೋಗ್ಯಕರ ಉಪಾಹಾರ.. ರಾಗಿ ಪಿಟ್ಟನ್ನು ಹೀಗೆ ಮಾಡಿ ನೋಡಿ. ಭಾರತದಲ್ಲಿ, ವಿಶೇಷವಾಗಿ ದಕ್ಷಿಣ ಭಾರತದಲ್ಲಿ, ರಾಗಿ ಯುಗಯುಗಾಂತರಗಳಿಂದ ಆಹಾರದ ಒಂದು ಪ್ರಮುಖ ಭಾಗವಾಗಿದೆ. ರಾಗಿ ಹಿಟ್ಟಿನಿಂದ ತಯಾರಿಸುವ ಖಾದ್ಯಗಳಲ್ಲಿ ರಾಗಿ ಪಿಟ್ಟು (Ragi Pittu) ಕೂಡ ಒಂದು. ಇದು ರುಚಿ ಮತ್ತು ಆರೋಗ್ಯವನ್ನು ಒದಗಿಸುವ ಅದ್ಭುತ ಸಾಂಪ್ರದಾಯಿಕ ಉಪಹಾರವಾಗಿದೆ. ರಾಗಿಯ ನೈಸರ್ಗಿಕ ಪೋಷಕಾಂಶಗಳು, ಬೆಲ್ಲ ಮತ್ತು ತೆಂಗಿನಕಾಯಿ ಮಿಶ್ರಣದಿಂದ ಇದು ಮಕ್ಕಳು ಮತ್ತು ದೊಡ್ಡವರಿಗೆ ಶಕ್ತಿ ನೀಡುವ ಆಹಾರವಾಗಿ ನಿಲ್ಲುತ್ತದೆ.

ನಿರ್ದಿಷ್ಟವಾಗಿ ರಕ್ತಹೀನತೆಯಿಂದ ಬಳಲುತ್ತಿರುವವರು, ಗರ್ಭಿಣಿಯರು, ಹಾಲುಣಿಸುವ ತಾಯಂದಿರು ಮತ್ತು ಬೆಳೆಯುವ ಮಕ್ಕಳಿಗೆ ಇದು ಅತ್ಯಂತ ಪ್ರಯೋಜನಕಾರಿ. ಹೆಣ್ಣು ಮಕ್ಕಳು ಪ್ರೌಢಾವಸ್ಥೆಗೆ ಬಂದಾಗ, ಅವರಿಗೆ ಈ ಖಾದ್ಯವನ್ನು ನೀಡಬೇಕು. ಇದನ್ನು ಸೇವಿಸುವುದರಿಂದ ಭವಿಷ್ಯದಲ್ಲಿ ಯಾವುದೇ ಸೊಂಟ ನೋವು (Back Pain Relief) ಬರುವುದಿಲ್ಲ ಎಂದು ಹೇಳಲಾಗಿದೆ. ಹೆಣ್ಣು ಮಕ್ಕಳಿಗೆ ಮಾತ್ರವಲ್ಲದೆ, ಗಂಡು ಮಕ್ಕಳಿಗೂ ವಾರಕ್ಕೆ 2 ಬಾರಿ ಇದನ್ನು ತಿನ್ನಿಸುವುದರಿಂದ ಭವಿಷ್ಯದಲ್ಲಿ ಸೊಂಟ ನೋವು ಬರದಂತೆ ತಡೆಯಬಹುದು. ಪ್ರತಿಯೊಬ್ಬರೂ ತಪ್ಪದೇ ಸೇವಿಸಬೇಕಾದ ರಾಗಿ ಪಿಟ್ಟು ಮನೆಯಲ್ಲೇ ಸುಲಭವಾಗಿ ತಯಾರಿಸುವುದು ಹೇಗೆ ಎಂಬುದನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ.

ರಾಗಿ ಪಿಟ್ಟು ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ರಾಗಿ - ಒಂದು ಕಪ್
• ಬೆಲ್ಲದ ಪುಡಿ - ಕಾಲು ಕಪ್
• ತೆಂಗಿನ ತುರಿ - ಕಾಲು ಕಪ್
• ಏಲಕ್ಕಿ ಪುಡಿ - 1 ಸ್ಪೂನ್
• ಉಪ್ಪು - ಸ್ವಲ್ಪ
• ನೀರು - ಅಗತ್ಯಕ್ಕೆ ತಕ್ಕಷ್ಟು

ರಾಗಿ ಪಿಟ್ಟು ತಯಾರಿಸುವ ವಿಧಾನ

ಮೊದಲು, ಒಂದು ಬಟ್ಟಲು ರಾಗಿಯನ್ನು ತೆಗೆದುಕೊಂಡು ಮಿಕ್ಸಿಯಲ್ಲಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ. ನಂತರ ಒಂದು ಪಾತ್ರೆಯಲ್ಲಿ ಈ ರಾಗಿ ಹಿಟ್ಟನ್ನು ಹಾಕಿ, ಅದಕ್ಕೆ ಒಂದು ಚಿಟಿಕೆ ಉಪ್ಪು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಈಗ ಸ್ವಲ್ಪ ಸ್ವಲ್ಪ ನೀರನ್ನು ಸೇರಿಸುತ್ತಾ ಹಿಟ್ಟನ್ನು ಕಲಸಿ. ಹಿಟ್ಟು ಮುದ್ದೆ ಮಾಡಿದಾಗ ಗಟ್ಟಿಯಾಗಿಯೂ, ಪುಡಿ ಮಾಡಿದಾಗ ಸಡಿಲವಾಗಿಯೂ ಇರಬೇಕು.

ಬಳಿಕ ಅಗಲವಾದ ಬಾಯಿ ಇರುವ ಪಾತ್ರೆಯಲ್ಲಿ ಅರ್ಧದಷ್ಟು ನೀರು ಹಾಕಿ. ಅದರ ಮೇಲೆ ನೀರಿನಲ್ಲಿ ನೆನೆಸಿದ ಬಟ್ಟೆಯನ್ನು ಹಾಸಿ, ಬಟ್ಟೆಯನ್ನು ದಾರದಿಂದ ಪಾತ್ರೆಗೆ ಬಿಗಿಯಾಗಿ ಕಟ್ಟಬೇಕು. ಈಗ ಕಲಸಿದ ರಾಗಿ ಹಿಟ್ಟನ್ನು ಈ ಬಟ್ಟೆಯ ಮೇಲೆ ಹಾಕಿ, ಹೆಚ್ಚುವರಿ ಬಟ್ಟೆಯನ್ನು ಹಿಟ್ಟಿನ ಮೇಲೆ ಮಡಚಿ, ಅದರ ಮೇಲೆ ಒಂದು ಪಾತ್ರೆಯನ್ನೋ ಅಥವಾ ತಟ್ಟೆಯನ್ನೋ ಕವುಚಿ ಮುಚ್ಚಬೇಕು.

ಈಗ ರಾಗಿ ಹಿಟ್ಟು ಇರುವ ಪಾತ್ರೆಯನ್ನು, ಅದರ ಮೇಲೆ ಕವುಚಿರುವ ತಟ್ಟೆಯ ಸಮೇತ ಒಲೆಯ ಮೇಲೆ ಇಟ್ಟು 15-20 ನಿಮಿಷಗಳ ಕಾಲ ಬೇಯಿಸಿ. ರಾಗಿ ಪಿಟ್ಟು ಬೆಂದ ನಂತರ ಚಾಕಲೇಟ್ ಬಣ್ಣಕ್ಕೆ ತಿರುಗುತ್ತದೆ. ಒಂದು ಚಮಚದಿಂದ ಹಿಟ್ಟನ್ನು ಒಳಭಾಗದವರೆಗೂ ಚುಚ್ಚಿ, ಅದು ಸರಿಯಾಗಿ ಬೆಂದಿದೆಯೇ ಎಂದು ಪರೀಕ್ಷಿಸಿ.

ಬೆಂದ ರಾಗಿ ಪಿಟ್ಟನ್ನು ಮತ್ತೊಂದು ಪಾತ್ರೆಯಲ್ಲಿ ತೆಗೆದು ಸ್ವಲ್ಪ ತಣ್ಣಗಾಗಲು ಬಿಡಿ. ನಂತರ ಅದಕ್ಕೆ ಕಾಲು ಕಪ್ ಬೆಲ್ಲದ ಪುಡಿ, ಕಾಲು ಕಪ್ ಹಸಿ ತೆಂಗಿನ ತುರಿ (ಪ್ರೌಢಾವಸ್ಥೆಯ ಹೆಣ್ಣುಮಕ್ಕಳಿಗೆ ನೀಡುವಾಗ ಹಸಿ ತೆಂಗಿನಕಾಯಿಯ ಬದಲು ಒಣ ಕೊಬ್ಬರಿ ಬಳಸಬೇಕು) ಮತ್ತು 1 ಸ್ಪೂನ್ ಏಲಕ್ಕಿ ಪುಡಿ ಸೇರಿಸಿ ಚೆನ್ನಾಗಿ ಮಿಕ್ಸ್‌ ಮಾಡಿ.

ಇಷ್ಟು ಮಾಡಿದರೆ ಸಾಕು, ರುಚಿಕರ ರಾಗಿ ಪಿಟ್ಟು ಸಿದ್ಧ. ಇದು ಒಂದು ದಿನ ಮಾತ್ರ ತಾಜಾ ಆಗಿರುತ್ತದೆ. ಬೇಕಿದ್ದರೆ ರಾಗಿ ಪಿಟ್ಟು ಸ್ವಲ್ಪ ಬಿಸಿಯಾಗಿರುವಾಗಲೇ ಅದಕ್ಕೆ ತುಪ್ಪ ಸೇರಿಸಿ ಕಲಸಿ ಸೇವಿಸಬಹುದು.