ಚಪಾತಿ, ದೋಸೆ, ಊಟಕ್ಕೆ ಈ ಸ್ಪೆಷಲ್ ಸೈಡ್ ಡಿಶ್ ಮಾಡಿ.. ಈ ರೀತಿ ರುಚಿ ನೀವೆಂದು ಸವಿದಿರಲ್ಲ!

ಜಸ್ಟ್ 4 ಮೊಟ್ಟೆ ಮತ್ತು ಪುದೀನಾ ಇದ್ದರೆ ಸಾಕು! ದೋಸೆ, ಚಪಾತಿಗೆ ಸೂಪರ್ ಸೈಡ್ ಡಿಶ್ ರೆಡಿ. ಹೌದು, ಪಲಾವ್, ಚಪಾತಿ, ಮತ್ತು ದೋಸೆಗೆ ಹೊಂದಿಕೊಳ್ಳುವ ಸಾರು ಅಂದರೆ ಅದು ಮೊಟ್ಟೆ ಸಾರು. ಈ ಸಾರು ಎಲ್ಲರಿಗೂ ಇಷ್ಟವಾಗುತ್ತದೆ. ಸಾಮಾನ್ಯವಾಗಿ ಮೊಟ್ಟೆ ಸಾರು ಅಂದರೆ ಮೊಟ್ಟೆಗಳನ್ನು ನೇರವಾಗಿ ಸಾರಿಗೆ ಸೇರಿಸಿ ಬೇಯಿಸುವುದು ಅಥವಾ ಬೇಯಿಸಿದ ಮೊಟ್ಟೆಗಳನ್ನು ಹಾಕಿ ಗ್ರೇವಿ ತಯಾರಿಸುವುದು ರೂಢಿ. ಆದರೆ, ಪ್ರತಿದಿನ ಒಂದೇ ರೀತಿಯ ಮೊಟ್ಟೆ ಸಾರು ಏಕೆ? ಇಂದು ಒಮ್ಮೆ ಹೊಸ ರೆಸಿಪಿ ಟ್ರೈ ಮಾಡಿ.

ಹೌದು, ಒಮ್ಮೆ ಮೊಟ್ಟೆಯೊಂದಿಗೆ ಪುದೀನಾ ಸೇರಿಸಿ ಸಾರು ಮಾಡಿ ನೋಡಿ. ಇದರ ರುಚಿ ಖಂಡಿತಾ ನಿಮಗೆ ಇಷ್ಟವಾಗುತ್ತದೆ. ಪುದೀನಾ, ಕೊತ್ತಂಬರಿ, ಮತ್ತು ಹಸಿಮೆಣಸಿನಕಾಯಿಯ ಮಿಶ್ರಣದಿಂದ ತಯಾರಿಸುವ ಈ ಮೊಟ್ಟೆ ಖಾದ್ಯ (Egg Pudina Masala) ದೋಸೆ, ಚಪಾತಿ, ಪೂರಿ, ಮತ್ತು ಅನ್ನದೊಂದಿಗೆ ತಿನ್ನಲು ಅದ್ಭುತವಾಗಿರುತ್ತದೆ.

ಈ ಮೊಟ್ಟೆ ಗ್ರೇವಿ ಸುಲಭವಾಗಿ ತಯಾರಿಸಬಹುದು ಮತ್ತು ಇದು ವಿಭಿನ್ನ ರುಚಿಯನ್ನು ಹೊಂದಿರುತ್ತದೆ. ಅಡುಗೆ ಗೊತ್ತಿಲ್ಲದ ಬ್ಯಾಚುಲರ್‌ಗಳು ಕೂಡ 15 ನಿಮಿಷಗಳಲ್ಲಿ ಈ ಖಾದ್ಯವನ್ನು ತಯಾರಿಸಬಹುದು. ನಿಮಗೆ ಪುದೀನಾ ಮೊಟ್ಟೆ ಸಾರು ಮಾಡುವ ವಿಧಾನ ತಿಳಿಯಬೇಕೇ? ಈ ಲೇಖನದಲ್ಲಿ ಪುದೀನಾ ಮೊಟ್ಟೆ ಗ್ರೇವಿಯ (Egg Pudina Masala Recipe) ಸರಳ ರೆಸಿಪಿ ಬಗ್ಗೆ ತಿಳಿಸಲಾಗಿದೆ. ಇದನ್ನು ಒಮ್ಮೆ ಮನೆಯಲ್ಲಿ ಮಾಡಿ ನೋಡಿ, ನಿಮ್ಮ ಅನಿಸಿಕೆಗಳನ್ನು ನಿಮ್ಮ ಸ್ನೇಹಿತರ ಬಳಿಯೂ ಹಂಚಿಕೊಳ್ಳಿ.

ಪುದೀನಾ ಮೊಟ್ಟೆ ಗ್ರೇವಿಗೆ ಬೇಕಾಗುವ ಪದಾರ್ಥಗಳು

• ಮೊಟ್ಟೆ - 4
• ಪುದೀನಾ - 1 ಕಪ್
• ಕೊತ್ತಂಬರಿ ಸೊಪ್ಪು - 1/4 ಕಪ್
• ಶುಂಠಿ - ಒಂದು ತುಂಡು
• ಬೆಳ್ಳುಳ್ಳಿ ಎಸಳುಗಳು - 4
• ಸೋಂಪು - 2 ಚಮಚ
• ಹಸಿಮೆಣಸಿನಕಾಯಿ - 4
• ಅರಿಶಿನ ಪುಡಿ - ಅರ್ಧ ಚಮಚ
• ದೊಡ್ಡ ಈರುಳ್ಳಿ - 1
• ಕರಿಬೇವಿನ ಸೊಪ್ಪು - 1 ಗೊಂಚಲು
• ಉಪ್ಪು - ರುಚಿಗೆ ತಕ್ಕಷ್ಟು
• ಎಣ್ಣೆ - ಬೇಕಾದಷ್ಟು

ಪುದೀನಾ ಮೊಟ್ಟೆ ಗ್ರೇವಿ ಮಾಡುವ ವಿಧಾನ

- ಮೊದಲು ಮೊಟ್ಟೆಗಳನ್ನು ಮುಳುಗುವಷ್ಟು ನೀರಿನಲ್ಲಿ ಹಾಕಿ, ಸ್ವಲ್ಪ ಉಪ್ಪು ಸೇರಿಸಿ ಬೇಯಿಸಿ. ಬಳಿಕ ಸಿಪ್ಪೆ ತೆಗೆದು ಪ್ರತ್ಯೇಕವಾಗಿ ಇಟ್ಟುಕೊಳ್ಳಿ.

- ಇದಾದ ಬಳಿಕ ಪುದೀನಾ ಮತ್ತು ಕೊತ್ತಂಬರಿ ಸೊಪ್ಪನ್ನು ಮಣ್ಣು ಇಲ್ಲದಂತೆ ಚೆನ್ನಾಗಿ ತೊಳೆದು ಸ್ವಚ್ಛಗೊಳಿಸಿ.

- ಈರುಳ್ಳಿಯನ್ನು ಚಿಕ್ಕದಾಗಿ ಕತ್ತರಿಸಿ. ಒಂದು ಕಪ್ ಪುದೀನಾ, 1/4 ಕಪ್ ಕೊತ್ತಂಬರಿ ಸೊಪ್ಪು, ಒಂದು ಚಮಚ ಸೋಂಪು, ನಾಲ್ಕು ಬೆಳ್ಳುಳ್ಳಿ ಎಸಳುಗಳು, ನಾಲ್ಕು ಹಸಿಮೆಣಸಿನಕಾಯಿ ಮತ್ತು ಸ್ವಲ್ಪ ಶುಂಠಿ ಸೇರಿಸಿ ರುಬ್ಬಿಕೊಳ್ಳಿ.

- ಈಗ ಒಂದು ಕಡಾಯಿಯಲ್ಲಿ, ಎರಡು ಚಮಚ ಎಣ್ಣೆ ಹಾಕಿ ಕಾಯಿಸಿ. ಅದು ಕಾದ ನಂತರ ಒಂದು ಚಮಚ ಸೋಂಪು ಸೇರಿಸಿ ಒಗ್ಗರಣೆ ಕೊಡಿ.

- ಇದಾದ ನಂತರ ಕತ್ತರಿಸಿದ ದೊಡ್ಡ ಈರುಳ್ಳಿಯನ್ನು ಪಾರದರ್ಶಕವಾಗುವವರೆಗೆ ಹುರಿಯಿರಿ. ಈರುಳ್ಳಿ ಬೆಂದ ನಂತರ 1/2 ಚಮಚ ಅರಿಶಿನ ಪುಡಿ ಮತ್ತು ಒಂದು ಗೊಂಚಲು ಕರಿಬೇವಿನ ಸೊಪ್ಪು ಸೇರಿಸಿ ಹುರಿಯಿರಿ.

- ಬಳಿಕ ರುಬ್ಬಿದ ಪುದೀನಾ ಮಸಾಲಾವನ್ನು ಸೇರಿಸಿ, ಐದು ನಿಮಿಷಗಳ ಕಾಲ ಹುರಿಯಿರಿ. ಮಸಾಲಾ ಹಸಿ ವಾಸನೆ ಹೋದ ನಂತರ, ಸಿಪ್ಪೆ ತೆಗೆದ ಮೊಟ್ಟೆಗಳನ್ನು ನಾಲ್ಕು ಕಡೆ ಕತ್ತರಿಸಿ, ಮಸಾಲಾಕ್ಕೆ ಸೇರಿಸಿ 2 ನಿಮಿಷ ಕುದಿಸಿ.

- ಅಂತಿಮವಾಗಿ ರುಚಿಗೆ ತಕ್ಕಷ್ಟು ಉಪ್ಪು ಬೆರೆಸಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ಕೆಳಗಿಳಿಸಿದರೆ ರುಚಿಕರವಾದ ಮೊಟ್ಟೆ ಪುದೀನಾ ಮಸಾಲಾ ಸವಿಯಲು ಸಿದ್ಧ.