ಚಳಿಗಾಲದ ಸ್ಪೆಷಲ್.. ಈ ಆಲೂ ಮಟರ್ ಪೂರಿ ಮಾಡಿ! ಇದರ ರುಚಿಗೆ ಎಲ್ಲರೂ ಮನಸೋಲ್ತಾರೆ!

ಚಳಿಗಾಲ ಬಂತೆಂದರೆ ತಾಜಾ ಹಸಿ ಬಟಾಣಿ ಮಾರುಕಟ್ಟೆಯಲ್ಲಿ ಕಾಣಸಿಗುತ್ತದೆ. ಈ ಚಳಿಯ (Winter) ವಾತಾವರಣದಲ್ಲಿ ಬಿಸಿ ಬಿಸಿಯಾದ, ಖಾರ ಮತ್ತು ಕುರುಕುಲಾದ ಚಟ್ಪಟಾ ತಿಂಡಿಗಳನ್ನು ಸವಿಯಲು ಹೆಚ್ಚಿನವರು ಇಷ್ಟಪಡುತ್ತಾರೆ. ಇಂತಹ ಸಮಯದಲ್ಲಿ, ರುಚಿ ಮತ್ತು ಪೋಷಕಾಂಶಗಳೆರಡರಲ್ಲೂ ಸಮೃದ್ಧವಾಗಿರುವ 'ಆಲೂ ಮಟರ್ ಪುರಿ' (Aloo Matar Puri) ಉತ್ತಮ ಚಳಿಗಾಲದ ವಿಶೇಷ ಖಾದ್ಯವಾಗಿದೆ.

ಸಾಮಾನ್ಯ ಪುರಿಗಿಂತ ಇದು ವಿಭಿನ್ನವಾಗಿದ್ದು, ಬೇಯಿಸಿದ ಆಲೂಗಡ್ಡೆ ಮತ್ತು ತಾಜಾ ಹಸಿ ಬಟಾಣಿಯನ್ನು ಮಸಾಲೆಗಳೊಂದಿಗೆ ಮಿಶ್ರಣ ಮಾಡಿ, ಹಿಟ್ಟನ್ನು ತಯಾರಿಸಲಾಗುತ್ತದೆ. ಈ ಪುರಿಗಳು ಎಣ್ಣೆಯಲ್ಲಿ ಕರಿದಾಗ ಕುರುಕುಲು ಆಗಿ ಮತ್ತು ಒಳಗಿನಿಂದ ಮೃದುವಾಗಿ, ಬಾಯಲ್ಲಿ ನೀರೂರಿಸುತ್ತವೆ. ಇದು ಬೆಳಗಿನ ಉಪಾಹಾರ, ಮಧ್ಯಾಹ್ನ ಅಥವಾ ಭಾನುವಾರದ ಬ್ರಂಚ್‌ಗೆ ಸೂಕ್ತವಾಗಿದೆ. ಇದರ ಸುವಾಸನೆ ಮತ್ತು ರುಚಿ ಎಷ್ಟು ಅದ್ಭುತವಾಗಿದೆ ಎಂದರೆ ಒಮ್ಮೆ ತಿಂದರೆ ಮತ್ತೆ ಮತ್ತೆ ಮಾಡಲು ಮನಸ್ಸಾಗುತ್ತದೆ.

ಬಿಸಿ ಬಿಸಿ ಆಲೂ ಮಟರ್ ಪೂರಿಯನ್ನು ಉಪ್ಪಿನಕಾಯಿ, ರಾಯ್ತಾ ಅಥವಾ ಆಲೂ ಟೊಮೆಟೊ ಸಬ್ಜಿಯೊಂದಿಗೆ ಬಡಿಸಿದರೆ ಚಳಿಗಾಲದ ದಿನ ಇನ್ನಷ್ಟು ವಿಶೇಷವಾಗುತ್ತದೆ. ಈ ವಿಶೇಷ ಖಾದ್ಯವನ್ನು ಹೇಗೆ ತಯಾರಿಸುವುದು, ಅದಕ್ಕೆ ಬೇಕಾದ ಸಾಮಗ್ರಿಗಳು ಮತ್ತು ಅದರ ಮಹತ್ವವನ್ನು ಈ ಲೇಖನದಲ್ಲಿ ತಿಳಿಸಲಾಗಿದೆ.

ಆಲೂಗಡ್ಡೆ ಬಟಾಣಿ ಪೂರಿಗೆ ಬೇಕಾದ ಸಾಮಗ್ರಿಗಳು

• ಗೋಧಿ ಹಿಟ್ಟು - 2 ಕಪ್
• ಬೇಯಿಸಿದ ಆಲೂಗಡ್ಡೆ - 2
• ಬೇಯಿಸಿದ ಹಸಿರು ಬಟಾಣಿ - ½ ಕಪ್
• ಶುಂಠಿ ಪೇಸ್ಟ್ - 1 ಚಮಚ
• ಹಸಿಮೆಣಸು ಪೇಸ್ಟ್ - 1 ಚಮಚ
• ಕೆಂಪು ಮೆಣಸಿನ ಪುಡಿ - ½ ಚಮಚ
• ಅರಿಶಿನ ಪುಡಿ - ¼ ಚಮಚ
• ಧನಿಯಾ ಪುಡಿ - 1 ಚಮಚ
• ಗರಂ ಮಸಾಲಾ - ¼ ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ಎಣ್ಣೆ - ಕರಿಯಲು

ಆಲೂಗಡ್ಡೆ ಬಟಾಣಿ ಪೂರಿ ತಯಾರಿಸುವ ಸುಲಭ ವಿಧಾನ

- ಮೊದಲಿಗೆ, ಬೇಯಿಸಿದ ಆಲೂಗಡ್ಡೆ ಮತ್ತು ಬಟಾಣಿಯನ್ನು ಚೆನ್ನಾಗಿ ಮಸೆದುಕೊಳ್ಳಿ. ಈ ಮಿಶ್ರಣದಲ್ಲಿ ಬಟಾಣಿ ತುಣುಕುಗಳು ಉಳಿದರೂ ಪರವಾಗಿಲ್ಲ, ಅವು ರುಚಿಯನ್ನು ಹೆಚ್ಚಿಸುತ್ತವೆ.

- ಈಗ ಮಸಾಲೆ ಮಿಶ್ರಣ ಮಾಡಿ. ಅದಕ್ಕಾಗಿ ಮಸೆದ ಮಿಶ್ರಣಕ್ಕೆ ಅರಿಶಿನ, ಧನಿಯಾ, ಕೆಂಪು ಮೆಣಸು, ಗರಂ ಮಸಾಲಾ, ಶುಂಠಿ-ಹಸಿಮೆಣಸಿನಕಾಯಿ ಪೇಸ್ಟ್ ಮತ್ತು ಉಪ್ಪನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ ಮಸಾಲೆ ಮಿಶ್ರಣಕ್ಕೆ ಗೋಧಿ ಹಿಟ್ಟನ್ನು ಸೇರಿಸಿ. ಈ ಮಿಶ್ರಣವನ್ನು ಗಟ್ಟಿಯಾಗಿ ನಾದಿ, ಹಿಟ್ಟು ಕಲಸಿ. ಆಲೂ ಮತ್ತು ಬಟಾಣಿಯಲ್ಲಿರುವ ತೇವಾಂಶವೇ ಸಾಕಾಗುವುದರಿಂದ ನೀರು ಬಹಳ ಕಡಿಮೆ ಅಥವಾ ಸೇರಿಸದಿರುವುದು ಉತ್ತಮ.

- ಇದಾದ ಬಳಿಕ ಕಲಸಿದ ಹಿಟ್ಟನ್ನು 10 ನಿಮಿಷಗಳ ಕಾಲ ಮುಚ್ಚಿಡಿ. ಇದರಿಂದ ಹಿಟ್ಟು ಮೃದುವಾಗುತ್ತದೆ.

- ಈಗ ಪುರಿ ಕರಿಯಬೇಕು. ಅದಕ್ಕಾಗಿ, ಹಿಟ್ಟಿನಿಂದ ಸಣ್ಣ ಉಂಡೆಗಳನ್ನು ಮಾಡಿ. ತೆಳ್ಳಗೆ ಪೂರಿ ಆಕಾರದಲ್ಲಿ ಲಟ್ಟಿಸಿ.

- ಬಳಿಕ ಬಾಣಲೆಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಕಾಯಿಸಿ. ಈಗ ಲಟ್ಟಿಸಿದ ಪುರಿಗಳನ್ನು ಹಾಕಿ ಚಿನ್ನದ ಕಂದು ಬಣ್ಣ ಬರುವವರೆಗೆ ಮತ್ತು ಪುರಿ ಚೆನ್ನಾಗಿ ಉಬ್ಬುವವರೆಗೆ ಕರಿಯಿರಿ.

ಈ ಪುರಿ ಏಕೆ ವಿಶೇಷ?

ಆಲೂ ಮಟರ್ ಪುರಿ ಅಥವಾ ಪೂರಿಯು ಕೇವಲ ರುಚಿಕರ ಮಾತ್ರವಲ್ಲ. ಇದು ಆಲೂಗಡ್ಡೆ ಮತ್ತು ಬಟಾಣಿಯಿಂದಾಗಿ ಮಕ್ಕಳಿಗೂ ಮತ್ತು ದೊಡ್ಡವರಿಗೂ ಬೇಕಾದ ಪೋಷಕಾಂಶಗಳನ್ನು ಒದಗಿಸುತ್ತದೆ. ಈ ಪೂರಿಗಳು ಎಣ್ಣೆ ಕುಡಿಯುವುದಿಲ್ಲ. ಹಾಗಾಗಿ, ಹೆಲ್ದಿ ಮತ್ತು ಟೇಸ್ಟಿ ಆಗಿರುತ್ತವೆ. ಮಕ್ಕಳು ಇದನ್ನು ತುಂಬಾ ಇಷ್ಟಪಡುವುದರಿಂದ, ಇದು ಟಿಫಿನ್ ಬಾಕ್ಸ್‌ಗೆ ಉತ್ತಮ ಆಯ್ಕೆಯಾಗಿದೆ.

ಇದನ್ನು ಬೆಳಗಿನ ಉಪಾಹಾರ, ಮಧ್ಯಾಹ್ನದ ಊಟ ಅಥವಾ ಭಾನುವಾರದ ಬ್ರಂಚ್‌ಗೆ ಬಳಸಬಹುದು. ಗರಂ ಗರಂ ಆಲೂ ಮಟರ್ ಪುರಿಯನ್ನು ಉಪ್ಪಿನಕಾಯಿ, ಮೊಸರು, ಅಥವಾ ಬಿಸಿ ಬಿಸಿ ಆಲೂ ಟೊಮೆಟೊ ಸಬ್ಜಿಯೊಂದಿಗೆ ಸವಿದರೆ ಚಳಿಗಾಲದ ಮಜವೇ ಬೇರೆ.