ಹಳ್ಳಿ ಸೊಗಡಿನ ಮಟ್ಕಾ ಚಿಕನ್! ಈ ವಾರ ಟ್ರೈ ಮಾಡಿ.. ಟೇಸ್ಟ್ ಬೇರೆ ಲೆವೆಲ್; ಹನಿ ನೀರು ಇಲ್ಲದೆ ಮಾಡೋದು ಹೇಗೆ?

ಗ್ರಾಮೀಣ ಸೊಗಡಿನ ಮಟ್ಕಾ ಚಿಕನ್! ಈ ವಾರ ಹೀಗೆ ಟ್ರೈ ಮಾಡಿ.. ಟೇಸ್ಟ್ ಬೇರೆ ಲೆವೆಲ್. ಒಂದೇ ಒಂದು ಹನಿ ನೀರು ಬಳಸದೆ ಮಟ್ಕಾ ಚಿಕನ್ (matka chicken) ಮಾಡುವುದು ಹೇಗೆ? ಇಲ್ಲಿದೆ ಸೀಕ್ರೆಟ್ ರೆಸಿಪಿ. ಹೌದು, ಇಂದಿನ ವೇಗದ ಬದುಕಿನಲ್ಲಿ ಅಡುಗೆಗೆ ನಾನ್‌ಸ್ಟಿಕ್ ಪಾತ್ರೆಗಳು, ಪ್ರೆಷರ್ ಕುಕ್ಕರ್‌ಗಳು ಪ್ರಮುಖ. ಆದರೆ, ಹಿರಿಯರು ಅನುಸರಿಸುತ್ತಿದ್ದ ಸಾಂಪ್ರದಾಯಿಕ ಅಡುಗೆ ವಿಧಾನಗಳ ರುಚಿ ಹಾಗೂ ಆರೋಗ್ಯ ಪ್ರಯೋಜನಗಳು ಆಧುನಿಕ ಪದ್ಧತಿಗಳಲ್ಲಿ ಸಿಗುವುದು ಕಷ್ಟ.

ಇಂತಹ ರೆಸಿಪಿಗಳಲ್ಲಿ ಮಟ್ಕಾ ಚಿಕನ್ ಅಥವಾ ಮಡಕೆ ಚಿಕನ್ ಪ್ರಮುಖವಾಗಿದೆ. ಮಣ್ಣಿನ ಮಡಕೆಯಲ್ಲಿ ಸಣ್ಣ ಉರಿಯಲ್ಲಿ ನಿಧಾನವಾಗಿ ಬೇಯುವ ಈ ಕೋಳಿ ಖಾದ್ಯ ಅದ್ಭುತ ರುಚಿಯ ಜೊತೆಗೆ ಹಲವು ಆರೋಗ್ಯ ಲಾಭಗಳನ್ನೂ ನೀಡುತ್ತದೆ. ಈ ವೀಕೆಂಡ್‌ನಲ್ಲಿ ವಾರ ವಿಶೇಷ ಖಾದ್ಯ ಸಿದ್ಧಪಡಿಸಲು ಈ ಮಟ್ಕಾ ಚಿಕನ್ ರೆಸಿಪಿ (matka chicken recipe) ನಿಮಗಾಗಿ.

Photo Credit: ಸಂಗ್ರಹ ಚಿತ್ರ

ಮಟ್ಕಾ ಚಿಕನ್‌ನ ಪ್ರಯೋಜನಗಳು

ಮಣ್ಣಿನ ಪಾತ್ರೆಯಲ್ಲಿ ಅಡುಗೆ ಮಾಡುವುದರಿಂದ ಆಹಾರದ pH ಮಟ್ಟ ಸಮತೋಲನದಲ್ಲಿರುತ್ತದೆ. ಮಡಕೆಯು ಶಾಖವನ್ನು ಸಮವಾಗಿ ಹಂಚಿ, ಚಿಕನ್ ತನ್ನ ನೈಸರ್ಗಿಕ ಎಣ್ಣೆ ಮತ್ತು ರಸದಲ್ಲಿ ಹದವಾಗಿ ಬೇಯುವಂತೆ ಮಾಡುತ್ತದೆ. ಇದರಿಂದ ಮಾಂಸ ಅತ್ಯಂತ ಮೃದುವಾಗಿಸಿ, ರುಚಿಕರವಾಗುತ್ತದೆ.

ಮಟ್ಕಾ ಚಿಕನ್‌ಗೆ ಬೇಕಾಗುವ ಸಾಮಗ್ರಿಗಳು

• ಚಿಕನ್
• ಈರುಳ್ಳಿ (ಉದ್ದಕ್ಕೆ ಸೀಳಿದ್ದು)
• ಬೆಳ್ಳುಳ್ಳಿ ಗಡ್ಡೆ
• ಸಾಸಿವೆ ಎಣ್ಣೆ ಅಥವಾ ಸಾಮಾನ್ಯ ಎಣ್ಣೆ
• ಶುಂಠಿ-ಬೆಳ್ಳುಳ್ಳಿ ಪೇಸ್ಟ್
• ಮೊಸರು
• ಕೊತ್ತಂಬರಿ ಸೊಪ್ಪು

ಒಣ ಮಸಾಲೆಗಳು

• ಪಲಾವ್ ಎಲೆ
• ಒಣ ಮೆಣಸಿನಕಾಯಿ
• ಲವಂಗ
• ಏಲಕ್ಕಿ
• ದಾಲ್ಚಿನ್ನಿ
• ಕಾಳುಮೆಣಸು
• ಶಾಜೀರಾ / ಜೀರಿಗೆ

ಪುಡಿ ಮಸಾಲೆಗಳು

• ಖಾರದ ಪುಡಿ
• ಅರಿಶಿನ
• ಧನಿಯಾ ಪುಡಿ
• ಜೀರಿಗೆ ಪುಡಿ
• ಗರಂ ಮಸಾಲಾ
• ಕಾಶ್ಮೀರಿ ಚಿಲ್ಲಿ ಪೌಡರ್
• ರುಚಿಗೆ ತಕ್ಕಷ್ಟು ಉಪ್ಪು
• ಮಣ್ಣಿನ ಮಡಕೆ ಮತ್ತು ಸೀಲ್ ಮಾಡಲು ಗೋಧಿ ಹಿಟ್ಟಿನ ಮುದ್ದೆ

ಮಟ್ಕಾ ಚಿಕನ್ ತಯಾರಿಸುವ ವಿಧಾನ

- ಮೊದಲು ಚಿಕನ್ ತುಂಡುಗಳನ್ನು ಉಪ್ಪು-ಅರಿಶಿನ ನೀರಿನಿಂದ ಚೆನ್ನಾಗಿ ತೊಳೆಯಿರಿ.

- ದೊಡ್ಡ ಪಾತ್ರೆಯಲ್ಲಿ ತೊಳೆದ ಚಿಕನ್‌ಗೆ ಹೆಚ್ಚಿದ ಈರುಳ್ಳಿ, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್, ಹಸಿಮೆಣಸಿನಕಾಯಿ, ಎಲ್ಲಾ ಪುಡಿ ಮಸಾಲೆಗಳು, ಮೊಸರು, ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ ಚೆನ್ನಾಗಿ ಬೆರೆಸಿ.

- ಸಣ್ಣ ಕಡಾಯಿಯಲ್ಲಿ ಸಾಸಿವೆ ಎಣ್ಣೆಯನ್ನು ಬಿಸಿ ಮಾಡಿ (ಹೊಗೆ ಬರುವವರೆಗೆ ಕಾಯಿಸಿ ತಣ್ಣಗಾಗಿಸಿ). ಎಣ್ಣೆಗೆ ಪಲಾವ್ ಎಲೆ, ಲವಂಗ, ಏಲಕ್ಕಿ, ದಾಲ್ಚಿನ್ನಿ, ಜೀರಿಗೆ, ಒಣ ಮೆಣಸಿನಕಾಯಿಯನ್ನು ಹಾಕಿ ಹುರಿಯಿರಿ.

- ಈ ಬಿಸಿ ಒಗ್ಗರಣೆಯನ್ನು ಮ್ಯಾರಿನೇಟ್ ಮಾಡಿದ ಚಿಕನ್‌ಗೆ ಸುರಿದು ಕೈಯಿಂದ ಕಲಸಿ ಅರ್ಧ ಗಂಟೆ ಪಕ್ಕಕ್ಕಿಡಿ.

- ಈಗ ಮಣ್ಣಿನ ಮಡಕೆಯ ಒಳಭಾಗಕ್ಕೆ ಎಣ್ಣೆ ಸವರಿ. ಮ್ಯಾರಿನೇಟ್ ಮಾಡಿದ ಚಿಕನ್ ಅನ್ನು ಮಡಕೆಗೆ ಹಾಕಿ.

- ಚಿಕನ್ ಮಧ್ಯದಲ್ಲಿ ಸಿಪ್ಪೆ ಸುಲಿಯದ ಇಡೀ ಬೆಳ್ಳುಳ್ಳಿ ಗಡ್ಡೆಗಳನ್ನು ಸ್ವಚ್ಛಗೊಳಿಸಿ ಇಡಿ. ಸ್ವಲ್ಪ ನೀರನ್ನು ಇದರ ಮೇಲೆ ಚಿಮುಕಿಸಿ.

- ಮಡಕೆಯ ಮೇಲೆ ಮುಚ್ಚಳವಿಟ್ಟು, ಗೋಧಿ ಹಿಟ್ಟಿನ ಮುದ್ದೆಯಿಂದ ಅಂಚುಗಳ ಸುತ್ತ ಗಾಳಿ ಹೋಗದಂತೆ ಸೀಲ್ ಮಾಡಿ. ಇದನ್ನು 'ದಮ್' ಎನ್ನುತ್ತಾರೆ. ಈ ಪ್ರಕ್ರಿಯೆಯು ಚಿಕನ್‌ನ ಸುವಾಸನೆ ಮತ್ತು ರುಚಿಯನ್ನು ಮಡಕೆಯ ಒಳಗೇ ಉಳಿಸುತ್ತದೆ.

- ಒಲೆ ಅಥವಾ ಸ್ಟೌವ್ ಅನ್ನು ತುಂಬಾ ಸಣ್ಣ ಉರಿಯಲ್ಲಿ ಇಟ್ಟು ಮಡಕೆಯನ್ನು ಅದರ ಮೇಲೆ ಇಡಿ. ಸುಮಾರು ಒಂದು ಗಂಟೆಯವರೆಗೆ ನಿಧಾನವಾಗಿ ಬೇಯಿಸಿ.

- ಪ್ರತಿ ಹದಿನೈದು ನಿಮಿಷಕ್ಕೊಮ್ಮೆ ಬಟ್ಟೆಯಿಂದ ಮಡಕೆ ಹಿಡಿದು ಮೆಲ್ಲನೆ ಕುಲುಕುತ್ತಿರಿ (ತಳ ಹಿಡಿಯುವುದನ್ನು ತಪ್ಪಿಸಲು).

- ಒಂದು ಗಂಟೆಯ ನಂತರ ಸ್ಟೌವ್ ಆಫ್ ಮಾಡಿ ಹದಿನೈದು ನಿಮಿಷ ಹಾಗೆಯೇ ಬಿಡಿ. ಗೋಧಿ ಹಿಟ್ಟಿನ ಸೀಲ್ ತೆಗೆದು ಮುಚ್ಚಳ ತೆರೆದರೆ, ಬಾಯಲ್ಲಿ ನೀರೂರಿಸುವ ಘಮಘಮಿಸುವ ಮಟ್ಕಾ ಚಿಕನ್ ಸಿದ್ಧ.

- ಈ ಮಟ್ಕಾ ಚಿಕನ್ ಬಿಸಿಬಿಸಿ ಅನ್ನ, ರೊಟ್ಟಿ, ಚಪಾತಿ ಅಥವಾ ಬಗಾರ್ ರೈಸ್‌ನೊಂದಿಗೆ ಅದ್ಭುತ. ಈ ವಾರ ಹಳ್ಳಿ ಸೊಗಡಿನ ಈ ವಿಶಿಷ್ಟ ರುಚಿಯನ್ನು ಎಂಜಾಯ್ ಮಾಡಿ.