ಮಶ್ರೂಮ್ ಬಳಸಿ ಈ ರೀತಿ ಸೂಪರ್ ಪಕೋಡ ಮಾಡಿ..!! ಒಮ್ಮೆ ತಿಂದ್ರೆ ಅಡಿಕ್ಟ್ ಆಗ್ತೀರಾ

ಮಳೆಗಾಲವಿರಲಿ ಅಥವಾ ಚಳಿಗಾಲವಿರಲಿ.. ಸಂಜೆಯ ಹೊತ್ತು ಕುರುಕಲು ತಿಂಡಿ ಬೇಕೆಂಬ ಬಯಕೆ ಸಹಜ. ಬಿಸಿಬಿಸಿ ಚಹಾದೊಂದಿಗೆ ಏನಾದರೂ ವಿಶೇಷ ಕರಿಯುವ ಪದಾರ್ಥ ಸವಿಯಲು ಸಿಕ್ಕರೆ ಮನಸಿಗೆ ಹೆಚ್ಚು ಖುಷಿ. ಸಾಮಾನ್ಯವಾಗಿ ಈರುಳ್ಳಿ ಪಕೋಡ ಅಥವಾ ಆಲೂಗೆಡ್ಡೆ ಬಜ್ಜಿ ಮುಂಚೂಣಿಯಲ್ಲಿರುತ್ತವೆ. ಆದರೆ, ಈ ಬಾರಿ ಸಾಂಪ್ರದಾಯಿಕ ಆಯ್ಕೆಗಳನ್ನು ಬದಿಗಿಟ್ಟು ಹೊಸದೊಂದು ರುಚಿಯನ್ನು ಟ್ರೈ ಮಾಡಿ. ಅದುವೇ ಮಶ್ರೂಮ್ ಈರುಳ್ಳಿ ಪಕೋಡ (Mushroom Pakoda).

ಪಕೋಡವು ಹೊರಗಿನಿಂದ ಗರಿಗರಿಯಾಗಿದ್ದರೆ, ಒಳಗೆ ಮೃದುವಾಗಿರುತ್ತದೆ. ಮಶ್ರೂಮ್ ಮಸಾಲಾ ಅಥವಾ ಚಿಲ್ಲಿಗಿಂತ ಭಿನ್ನವಾಗಿ, ಈ ಪಕೋಡವು ವಿಶಿಷ್ಟವಾದ ರುಚಿ ಮತ್ತು ವಿನ್ಯಾಸವನ್ನು ನೀಡುತ್ತದೆ. ಇದು ನಿಮ್ಮ ಸಂಜೆಯ ಉಪಾಹಾರಕ್ಕೆ ಒಂದು ಹೊಸ ಮಜವನ್ನು ತರುತ್ತದೆ. ಮಶ್ರೂಮ್ ಈರುಳ್ಳಿ ಪಕೋಡ (Mushroom Pyaz ke Pakode) ತಯಾರಿಸಲು ಬೇಕಾಗುವ ಸಾಮಗ್ರಿಗಳು ಮತ್ತು ತಯಾರಿಸುವ ಸರಳ ವಿಧಾನ ಇಲ್ಲಿದೆ.

ಮಶ್ರೂಮ್ ತನ್ನದೇ ಆದ ವಿಶಿಷ್ಟ ಸುವಾಸನೆ ಮತ್ತು ರುಚಿಯನ್ನು ಹೊಂದಿದೆ. ಇದನ್ನು ಸೂಕ್ಷ್ಮವಾಗಿ ಹೆಚ್ಚಿದ ಈರುಳ್ಳಿಯೊಂದಿಗೆ ಸೇರಿಸಿ ಕರಿದಾಗ, ಪಕೋಡವು ಹೊರಭಾಗದಲ್ಲಿ ಅತ್ಯಂತ ಗರಿಗರಿಯಾಗಿ ಮತ್ತು ಒಳಭಾಗದಲ್ಲಿ ಮೃದುವಾಗಿ ಬಾಯಲ್ಲಿ ಕರಗುತ್ತದೆ. ಅಣಬೆ ತಿನ್ನಲು ಇಷ್ಟಪಡದ ಮಕ್ಕಳು ಕೂಡ ಈ ಪಕೋಡವನ್ನು (Mushroom Pakoda Recipe) ಖಂಡಿತಾ ಇಷ್ಟಪಡುತ್ತಾರೆ. ಇದು ಕೇವಲ ರುಚಿಕರವಷ್ಟೇ ಅಲ್ಲ, ಪ್ರೋಟೀನ್‌ನಿಂದ ಕೂಡಿದ್ದು ಆರೋಗ್ಯಕ್ಕೂ ಉತ್ತಮ.

ಮಶ್ರೂಮ್ ಈರುಳ್ಳಿ ಪಕೋಡಗೆ ಬೇಕಾಗುವ ಸಾಮಗ್ರಿಗಳು

• ಮಶ್ರೂಮ್ (ಸಣ್ಣ ತುಂಡುಗಳು)
• ಈರುಳ್ಳಿ
• ಕಡಲೆ ಹಿಟ್ಟು
• ಅಕ್ಕಿ ಹಿಟ್ಟು
• ಹಸಿ ಮೆಣಸಿನಕಾಯಿ
• ಧನಿಯಾ ಪುಡಿ
• ಖಾರದ ಪುಡಿ
• ಅರಿಶಿನ ಪುಡಿ
• ಓಂಕಾಳು
• ರುಚಿಗೆ ತಕ್ಕಷ್ಟು ಉಪ್ಪು
• ಕೊತ್ತಂಬರಿ ಸೊಪ್ಪು
• ಪಕೋಡ ಕರಿಯಲು ಎಣ್ಣೆ

ಮಶ್ರೂಮ್ ಈರುಳ್ಳಿ ಪಕೋಡ ತಯಾರಿಸುವ ವಿಧಾನ

- ಮೊದಲು, ದೊಡ್ಡ ಪಾತ್ರೆಯಲ್ಲಿ ಕಡಲೆ ಹಿಟ್ಟು, ಅಕ್ಕಿ ಹಿಟ್ಟು, ಮಸಾಲೆ ಪುಡಿಗಳು (ಅರಿಶಿನ, ಖಾರದ ಪುಡಿ, ಧನಿಯಾ ಪುಡಿ), ಓಮಕಾಳು, ಉಪ್ಪು ಸೇರಿಸಿ ಮಿಕ್ಸ್ ಮಾಡಿ.

- ಸ್ವಲ್ಪ ನೀರು ಸೇರಿಸಿ ಬಜ್ಜಿ ಹಿಟ್ಟಿಗಿಂತ ಗಟ್ಟಿಯಾದ ಮಿಶ್ರಣ ತಯಾರಿಸಿ. ಇದಕ್ಕೆ ಕತ್ತರಿಸಿದ ಮಶ್ರೂಮ್, ಹೆಚ್ಚಿದ ಈರುಳ್ಳಿ, ಹಸಿರು ಮೆಣಸಿನಕಾಯಿ ಮತ್ತು ಕೊತ್ತಂಬರಿ ಸೊಪ್ಪು ಸೇರಿಸಿ ಚೆನ್ನಾಗಿ ಬೆರೆಸಿ.

- ಈಗ ಒಲೆಯ ಮೇಲೆ ಬಾಣಲೆ ಇಟ್ಟು ಎಣ್ಣೆಯನ್ನು ಮಧ್ಯಮ ಉರಿಯಲ್ಲಿ ಬಿಸಿ ಮಾಡಿ. ಎಣ್ಣೆ ಕಾದ ನಂತರ, ಮಿಶ್ರಣದಿಂದ ಸಣ್ಣ ಉಂಡೆಗಳನ್ನು ಮಾಡಿ ನಿಧಾನವಾಗಿ ಎಣ್ಣೆಗೆ ಬಿಡಿ.

- ಪಕೋಡಗಳು ಎರಡೂ ಬದಿಯಲ್ಲಿ ಹೊಂಬಣ್ಣಕ್ಕೆ ತಿರುಗಿ ಗರಿಗರಿಯಾಗುವವರೆಗೆ ಮಧ್ಯಮ ಉರಿಯಲ್ಲಿ ಕರಿಯಿರಿ.

- ಉರಿ ಜಾಸ್ತಿಯಾದರೆ ಪಕೋಡಗಳು ಮೇಲೆ ಮಾತ್ರ ಬೆಂದು, ಒಳಗೆ ಹಸಿಯಾಗಿ ಉಳಿಯಬಹುದು. ಆದ್ದರಿಂದ ತಾಳ್ಮೆಯಿಂದ ಕರಿಯುವುದು ಮುಖ್ಯ.

- ಬೆಂದ ನಂತರ, ಅವುಗಳನ್ನು ಎಣ್ಣೆಯಿಂದ ತೆಗೆದು, ಹೆಚ್ಚುವರಿ ಎಣ್ಣೆಯನ್ನು ಹೀರಿಕೊಳ್ಳಲು ಕಿಚನ್ ಟಿಶ್ಯೂ ಇರುವ ತಟ್ಟೆಯ ಮೇಲೆ ಹರಡಿ. ಇಷ್ಟು ಮಾಡಿದರೆ ಸಾಕು, ಬಿಸಿಬಿಸಿ ಪಕೋಡಗಳನ್ನು ಸವಿಯಲು ಸಿದ್ಧ.

ಸವಿಯುವುದು ಹೇಗೆ?

ಬಿಸಿಬಿಸಿ, ಗರಿಗರಿಯಾದ ಮಶ್ರೂಮ್ ಈರುಳ್ಳಿ ಪಕೋಡ ಸಿದ್ಧವಾದ ಬಳಿಕ ಸವಿಯುವುದು ಹೇಗೆ ಅಂತ ಹಲವರಿಗೆ ತಿಳಿದಿಲ್ಲ. ಇದನ್ನು ಪುದೀನಾ ಚಟ್ನಿ ಅಥವಾ ಟೊಮೆಟೊ ಕೆಚಪ್ ಜೊತೆಗೆ ಸವಿಯಿರಿ. ಸಂಜೆಯ ಮಳೆಯಲ್ಲಿ, ಒಂದು ಕಪ್ ಶುಂಠಿ ಟೀ ಜೊತೆ ಈ ಪಕೋಡ ಸವಿಯುವ ಅನುಭವ ಅತ್ಯಂತ ಮನಮೋಹಕವಾಗಿರುತ್ತದೆ.

ಈ ಟಿಪ್ಸ್ ಫಾಲೋ ಮಾಡಿ

- ಮಶ್ರೂಮ್ ಅನ್ನು ಅತಿಯಾಗಿ ತೊಳೆಯಬೇಡಿ. ನೀರು ಹೀರಿ ಮೆತ್ತಗಾಗಬಹುದು.

- ಹಿಟ್ಟಿಗೆ ಒಂದು ಚಮಚ ಬಿಸಿ ಎಣ್ಣೆ ಸೇರಿಸಿದರೆ ಪಕೋಡ ಇನ್ನಷ್ಟು ಗರಿಗರಿಯಾಗುತ್ತದೆ.

- ಈರುಳ್ಳಿಯನ್ನು ತೆಳುವಾಗಿ ಹೆಚ್ಚಿದರೆ ಮಶ್ರೂಮ್ ಜೊತೆ ಚೆನ್ನಾಗಿ ಬೆರೆತು ರುಚಿ ನೀಡುತ್ತದೆ.

ಅತಿಥಿಗಳು ಬಂದಾಗ ಅಥವಾ ಸಣ್ಣ ಪಾರ್ಟಿಗಳಿಗೆ ಈ ಮಶ್ರೂಮ್ ಈರುಳ್ಳಿ ಪಕೋಡ ಸುಲಭವಾಗಿ ಮಾಡಬಹುದು. ಇದು ಎಲ್ಲರ ಮೆಚ್ಚುಗೆ ಗಳಿಸುವ ತಿಂಡಿ. ಕಡಿಮೆ ಸಮಯದಲ್ಲಿ ಆರೋಗ್ಯಕರ ಮತ್ತು ರುಚಿಕರ ಸ್ನ್ಯಾಕ್ಸ್ ಬೇಕೆನ್ನುವವರು ಇಂದೇ ಈ ರೆಸಿಪಿಯನ್ನು ಟ್ರೈ ಮಾಡಿ.