ಬಾಯಲ್ಲಿ ನೀರೂರಿಸುವ ಪೂರಿ! ಈ 2 ಪದಾರ್ಥ ಹಾಕಿ ಢಾಬಾ ಶೈಲಿಯ ಮಿಸ್ಸೀ ಪೂರಿ ಮಾಡಿ.. ಗರಿಗರಿಯಾಗಿ ಬರುಲು ಇಲ್ಲಿದೆ ಟ್ರಿಕ್

ಬೆಳಗಿನ ತಿಂಡಿಗೆ ಸ್ಪೆಷಲ್ ಮಿಸ್ಸೀ ಪೂರಿ! ಪ್ರತಿಬಾರಿ ಒಂದೇ ರೀತಿ ಪೂರಿ ತಿಂದು ಬೇಜಾರಾಗಿದೆಯೇ? ಹಾಗಾದ್ರೆ ಇದನ್ನು ಟ್ರೈ ಮಾಡಿ. ಹೌದು, ನಮ್ಮಲ್ಲಿ ಪೂರಿ-ಸಾಗು ತಿಂಡಿಗೆ ಸಾಮಾನ್ಯ ಆಯ್ಕೆ. ಆದರೆ, ಪ್ರತಿದಿನ ಗೋಧಿ ಹಿಟ್ಟಿನ ಪೂರಿ ತಿಂದು ಬೇಸರವಾಗಿದ್ದರೆ, ಉತ್ತರ ಭಾರತದ ಜನಪ್ರಿಯ 'ಮಿಸ್ಸೀ ಪೂರಿ' (Missi Puri) ನಿಮಗೆ ಅತ್ಯುತ್ತಮ.

ಢಾಬಾ ಮತ್ತು ಹೋಟೆಲ್‌ಗಳಲ್ಲಿ ದೊರೆಯುವ ಅಪ್ಪಟ ಪಂಜಾಬಿ ಶೈಲಿಯ ಈ ಪುರಿ ತನ್ನ ವಿಭಿನ್ನ ರುಚಿ ಮತ್ತು ಅಧ್ಬುತ ಗರಿಗರಿತನದಿಂದ ಮನೆಮಂದಿಯ ಮನಸ್ಸು ಗೆಲ್ಲುವುದು ಖಚಿತ. ಈ ಲೇಖನದಲ್ಲಿ ಮಿಸ್ಸೀ ಪೂರಿಯ ವಿಶಿಷ್ಟತೆ, ಇದನ್ನು ಮಾಡುವ ವಿಧಾನ ಹಾಗೂ ಆರೋಗ್ಯಕರ ಪ್ರಯೋಜನಗಳ ಬಗ್ಗೆ ತಿಳಿಸಲಾಗಿದೆ. ಇದರಿಂದ ನಿಮ್ಮ ಅಡುಗೆಮನೆಯಲ್ಲಿಯೇ ಸುಲಭವಾಗಿ ಈ ತಿಂಡಿಯನ್ನು ತಯಾರಿಸಬಹುದು.

Photo Credit: ಸಂಗ್ರಹ ಚಿತ್ರ

ಮನೆಯಲ್ಲೇ ರುಚಿಕರ ರಾಜಸ್ಥಾನಿ (ಪಂಜಾಬಿ) ಶೈಲಿಯ ಮಿಸ್ಸೀ ಪುರಿ ತಯಾರಿಸಲು ಬೇಕಾದ ಪದಾರ್ಥಗಳು ಮತ್ತು ಮಾಡುವ ವಿಧಾನ (Missi Puri Recipe) ಇಲ್ಲಿದೆ.

ಮಿಸ್ಸೀ ಪೂರಿ ಏಕೆ ಸ್ಪೆಷಲ್?

ಮಿಸ್ಸೀ ಪೂರಿಯ ಪ್ರಮುಖ ವಿಶೇಷತೆ ಅದರ ಹಿಟ್ಟಿನಲ್ಲಿದೆ. ಕೇವಲ ಗೋಧಿ ಹಿಟ್ಟಿಗೆ ಸೀಮಿತಗೊಳ್ಳದೆ, ಇದಕ್ಕೆ ಕಡಲೆ ಹಿಟ್ಟು (ಬೇಸನ್) ಮತ್ತು ಹಲವಾರು ಮಸಾಲೆಗಳನ್ನು ಸೇರಿಸಲಾಗುತ್ತದೆ. ಕಡಲೆ ಹಿಟ್ಟು ಸೇರ್ಪಡೆಯು ಪುರಿಗೆ ವಿಭಿನ್ನ ಸುವಾಸನೆ ಮತ್ತು ಅತ್ಯುತ್ತಮ ಗರಿಗರಿ ವಿನ್ಯಾಸವನ್ನು ನೀಡುತ್ತದೆ. ಇದು ಕೇವಲ ರುಚಿಗೆ ಮಾತ್ರವಲ್ಲದೆ, ಪ್ರೋಟೀನ್ ಅಂಶದಿಂದ ಸಮೃದ್ಧವಾಗಿರುವುದರಿಂದ ಸಾಮಾನ್ಯ ಪೂರಿಗಿಂತಲೂ ಹೆಚ್ಚು ಪೌಷ್ಟಿಕವಾಗಿದೆ.

ಮಿಸ್ಸೀ ಪೂರಿಗೆ ಅಗತ್ಯವಿರುವ ಸಾಮಗ್ರಿಗಳು

• ಗೋಧಿ ಹಿಟ್ಟು
• ಕಡಲೆ ಹಿಟ್ಟು (ಬೇಸನ್)
• ಓಂ ಕಾಳು (ಅಜ್ವೈನ್)
• ಅರಿಶಿನ ಪುಡಿ
• ಅಚ್ಚಖಾರದ ಪುಡಿ
• ಧನಿಯಾ ಪುಡಿ
• ಈರುಳ್ಳಿ
• ಕೊತ್ತಂಬರಿ ಸೊಪ್ಪು
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ

ಮಿಸ್ಸೀ ಪೂರಿ ತಯಾರಿಸುವ ವಿಧಾನ

- ಒಂದು ದೊಡ್ಡ ಪಾತ್ರೆಗೆ ಗೋಧಿ ಹಿಟ್ಟು ಮತ್ತು ಕಡಲೆ ಹಿಟ್ಟನ್ನು ಸಮಪ್ರಮಾಣದಲ್ಲಿ ತೆಗೆದುಕೊಳ್ಳಿ.

- ಇದಕ್ಕೆ ಉಪ್ಪು, ಅರಿಶಿನ ಪುಡಿ, ಖಾರದ ಪುಡಿ, ಧನಿಯಾ ಪುಡಿ ಮತ್ತು ಓಂ ಕಾಳನ್ನು ಸೇರಿಸಿ. ಓಂ ಕಾಳನ್ನು ನಿಮ್ಮ ಅಂಗೈಗಳ ನಡುವೆ ಉಜ್ಜಿ ಹಾಕುವುದರಿಂದ ಅದರ ಪರಿಮಳ ಹೆಚ್ಚುತ್ತದೆ.

- ನಂತರ, ಕತ್ತರಿಸಿದ ಈರುಳ್ಳಿ ಮತ್ತು ಕೊತ್ತಂಬರಿ ಸೊಪ್ಪನ್ನು ಸೇರಿಸಿಕೊಳ್ಳಿ. ಹಿಟ್ಟು ಮೃದುವಾಗಿ ಮತ್ತು ಗರಿಗರಿಯಾಗಿ ಬರಲು ಒಂದು ಚಮಚ ಎಣ್ಣೆ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ.

- ಈಗ ಸ್ವಲ್ಪ ಸ್ವಲ್ಪವೇ ನೀರನ್ನು ಸೇರಿಸುತ್ತಾ ಹಿಟ್ಟನ್ನು ಕಲಸಿ. ಸಾಮಾನ್ಯ ಪೂರಿ ಹಿಟ್ಟಿಗಿಂತ ಇದು ಸ್ವಲ್ಪ ಗಟ್ಟಿಯಾಗಿ, ಗರಿಗರಿಯಾಗಲು ಅನುಕೂಲವಾಗುವಂತೆ ಮಿಕ್ಸ್‌ ಮಾಡಿ.

- ಹಿಟ್ಟು ಕಲಸಿದ ನಂತರ ಅದನ್ನು 10 ರಿಂದ 15 ನಿಮಿಷಗಳ ಕಾಲ ಮುಚ್ಚಿ ಪಕ್ಕಕ್ಕಿಟ್ಟು ನೆನೆಯಲು ಬಿಡಿ.

- ಹಿಟ್ಟು ನೆನೆದ ನಂತರ, ಅದರಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿ. ಲಟ್ಟಣಿಗೆಗೆ ಸ್ವಲ್ಪ ಎಣ್ಣೆ ಸವರಿ, ಈ ಉಂಡೆಗಳನ್ನು ಪೂರಿಗಳಾಗಿ ಲಟ್ಟಿಸಿ.

- ಏಕಕಾಲದಲ್ಲಿ, ಕಡಾಯಿಯಲ್ಲಿ ಎಣ್ಣೆಯನ್ನು ಕರಿಯಲು ಬಿಸಿ ಮಾಡಿಕೊಳ್ಳಿ. ಎಣ್ಣೆ ಸರಿಯಾಗಿ ಕಾದಿದೆಯೇ ಎಂದು ಪರೀಕ್ಷಿಸಲು ಒಂದು ಚಿಕ್ಕ ಹಿಟ್ಟಿನ ತುಂಡನ್ನು ಹಾಕಿ ನೋಡಿ.

- ಎಣ್ಣೆ ಬಿಸಿಯಾದ ನಂತರ ಉರಿಯನ್ನು ಮಧ್ಯಮಕ್ಕೆ ಇಳಿಸಿ, ಪೂರಿಗಳನ್ನು ಎರಡೂ ಬದಿಯಲ್ಲಿ ಕೆಂಪು ಬಣ್ಣ ಬರುವವರೆಗೆ ಕರಿಯಿರಿ.

ಪರ್ಫೆಕ್ಟ್ ಮಿಸ್ಸೀ ಪೂರಿಗೆ ಈ ಟ್ರಿಕ್ಸ್ ಸಾಕು!

- ಹಿಟ್ಟು ಕಲಸುವಾಗ ಬಿಸಿ ಎಣ್ಣೆಯನ್ನು (ಮೋಯನ್) ಸೇರಿಸುವುದರಿಂದ ಪೂರಿಗಳು ಹೆಚ್ಚು ಸಮಯ ಗರಿಗರಿಯಾಗಿ ಉಳಿಯುತ್ತವೆ.

- ಕಡಲೆ ಹಿಟ್ಟು ನೀರನ್ನು ಕಡಿಮೆ ಹೀರಿಕೊಳ್ಳುವುದರಿಂದ, ಹಿಟ್ಟು ಕಲೆಸುವಾಗ ನೀರನ್ನು ಎಚ್ಚರಿಕೆಯಿಂದ ಮತ್ತು ಹಂತಹಂತವಾಗಿ ಸೇರಿಸಿ.

- ತುಂಬಾ ಕಡಿಮೆ ಉರಿಯಲ್ಲಿ ಕರಿದರೆ ಪೂರಿ ಹೆಚ್ಚು ಎಣ್ಣೆ ಹೀರುತ್ತದೆ. ಹೆಚ್ಚು ಉರಿಯಲ್ಲಿ ಕರಿದರೆ ಬೇಗನೆ ಕಪ್ಪಾಗುತ್ತದೆ. ಆದ್ದರಿಂದ ಮಧ್ಯಮ ಉರಿ ಸೂಕ್ತ.

ಯಾವುದರೊಂದಿಗೆ ಸವಿದರೆ ಚೆನ್ನಾಗಿರುತ್ತೆ?

ಮಸಾಲೆಯುಕ್ತ ಮಿಸ್ಸೀ ಪೂರಿ (Missi Poori) ಸಾಮಾನ್ಯವಾಗಿ ಆಲೂಗಡ್ಡೆ ಸಾರು ಜೊತೆ ಉತ್ತಮ ಹೊಂದಾಣಿಕೆ ನೀಡುತ್ತದೆ. ಇದಲ್ಲದೆ, ಬೂಂದಿ ರಾಯಿತಾ, ಮೆಂತ್ಯ ಸೊಪ್ಪಿನ ಚಟ್ನಿ ಅಥವಾ ಮಾವಿನಕಾಯಿ ಉಪ್ಪಿನಕಾಯಿಯೊಂದಿಗೆ ಸಹ ಇದು ಅದ್ಭುತವಾಗಿ ರುಚಿಸುತ್ತದೆ. ಮಕ್ಕಳಿಗೆ ಲಂಚ್ ಬಾಕ್ಸ್‌ಗೆ ಇದು ಅತ್ಯುತ್ತಮ ಮತ್ತು ಪೌಷ್ಟಿಕ ಆಯ್ಕೆ.