ಅದ್ಭುತ ರುಚಿಕರ ಮಸಾಲಾ ಪಾಲಕ್ ಪೂರಿ ಹೀಗೆ ಮಾಡಿ! ಎಣ್ಣೆ ಕಡಿಮೆ, ರುಚಿ ಡಬಲ್.. ಮಾಡೋದು ಈಸಿ

ಬೆಳಗಿನ ತಿಂಡಿಗೆ ಮಸ್ತ್ ಕಾಂಬಿನೇಷನ್! ಒಮ್ಮೆ ಮಾಡಿದರೆ ಪದೇ ಪದೇ ಕೇಳ್ತಾರೆ.. ಅದ್ಭುತ ರುಚಿಕರ ಪಾಲಕ್ ಪೂರಿ ಹೀಗೆ ಮಾಡಿ ನೋಡಿ. ಹೌದು, ಮಕ್ಕಳು ಸೊಪ್ಪು ತಿನ್ನಲು ಹಿಂದೇಟು ಹಾಕುತ್ತಿದ್ದರೆ ಅಥವಾ ಪ್ರತೀ ಬಾರಿ ಒಂದೇ ರೀತಿಯ ಪೂರಿ ತಿಂದು ನಿಮಗೆ ಬೇಸರವಾಗಿದ್ದರೆ, ಈ 'ಮಸಾಲಾ ಪಾಲಕ್ ಪೂರಿ' (Masala Palak Poori) ಒಂದು ಅತ್ಯುತ್ತಮ ಆಯ್ಕೆಯಾಗಿದೆ.

ಪಾಲಕ್ ಸೊಪ್ಪು ಕಬ್ಬಿಣಾಂಶ, ಫೈಬರ್ ಮತ್ತು ಅಗತ್ಯ ವಿಟಮಿನ್‌ಗಳಿಂದ ಸಮೃದ್ಧವಾಗಿದೆ. ಮಸಾಲೆಗಳ ಹದವಾದ ಮಿಶ್ರಣವು ಈ ಪೂರಿಗೆ ಸಾಮಾನ್ಯ ಪೂರಿಗಿಂತ ಭಿನ್ನವಾದ ಮತ್ತು ವಿಶೇಷವಾದ ರುಚಿಯನ್ನು ನೀಡುತ್ತದೆ. ಇದನ್ನು ಬೆಳಗಿನ ಉಪಹಾರ, ಮಕ್ಕಳ ಟಿಫಿನ್ ಅಥವಾ ವಾರಾಂತ್ಯದ ಸ್ಪೆಷಲ್ ಅಡುಗೆಯಾಗಿ ಸುಲಭವಾಗಿ ತಯಾರಿಸಬಹುದು.

Photo Credit: ಸಂಗ್ರಹ ಚಿತ್ರ

ಪಾಲಕ್ ಸೊಪ್ಪಿನ ಪೌಷ್ಟಿಕಾಂಶದ ಗುಣಗಳು ಹಾಗೂ ದೇಶಿ ಮಸಾಲೆಗಳ ಅದ್ಭುತ ಸಮ್ಮಿಶ್ರಣವೇ ಈ ಮಸಾಲಾ ಪಾಲಕ್ ಪೂರಿ. ತನ್ನ ಆಕರ್ಷಕ ಹಸಿರು ಬಣ್ಣದಿಂದ ಕಣ್ಮನ ಸೆಳೆಯುವ ಈ ಪೂರಿ, ಕೇವಲ ರುಚಿಯಲ್ಲಿ ಮಾತ್ರವಲ್ಲದೆ, ಆರೋಗ್ಯದ ದೃಷ್ಟಿಯಿಂದಲೂ ಅತ್ಯಂತ ಉತ್ತಮವಾದ ಆಹಾರವಾಗಿದೆ. ಈ ಮಸಾಲಾ ಪಾಲಕ್ ಪೂರಿ ತಯಾರಿಸಲು ಬೇಕಾದ ಸಾಮಗ್ರಿಗಳು ಹಾಗೂ ಸುಲಭ ವಿಧಾನ (Masala Palak Poori Recipe) ಇಲ್ಲಿದೆ.

ಮಸಾಲಾ ಪಾಲಕ್ ಪೂರಿಗೆ ಬೇಕಾಗುವ ಸಾಮಗ್ರಿಗಳು

• ಪಾಲಕ್ ಸೊಪ್ಪು
• ಗೋಧಿ ಹಿಟ್ಟು
• ಹಸಿ ಮೆಣಸಿನಕಾಯಿ
• ಶುಂಠಿ
• ಅಜವಾನ
• ಜೀರಿಗೆ
• ಅಚ್ಚಖಾರದ ಪುಡಿ
• ಧನಿಯಾ ಪುಡಿ
• ಅರಿಶಿನ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ (ಹಿಟ್ಟು ಕಲಸಲು & ಪೂರಿ ಕರಿಯಲು)

ಮಸಾಲಾ ಪಾಲಕ್ ಪೂರಿ ತಯಾರಿಸುವ ವಿಧಾನ

- ಮೊದಲಿಗೆ, ಪಾಲಕ್ ಪ್ಯೂರಿ ಸಿದ್ಧಪಡಿಸಬೇಕು. ಪಾಲಕ್ ಸೊಪ್ಪನ್ನು ಚೆನ್ನಾಗಿ ತೊಳೆದು 2-3 ನಿಮಿಷಗಳ ಕಾಲ ಬಿಸಿ ನೀರಿನಲ್ಲಿ ಕುದಿಸಿ.

- ನಂತರ ಅದನ್ನು ತಣ್ಣನೆಯ ನೀರಿನಲ್ಲಿ ಹಾಕಿ, ಮಿಕ್ಸಿಯಲ್ಲಿ ನುಣ್ಣಗೆ ರುಬ್ಬಿ ಹಸಿರು ಪ್ಯೂರಿ ತಯಾರಿಸಿಕೊಳ್ಳಿ. ಈ ಹಂತವು ಪೂರಿಗೆ ಅದರ ಬಣ್ಣ ಮತ್ತು ಪೌಷ್ಟಿಕತೆಯನ್ನು ನೀಡುತ್ತದೆ.

- ಮುಂದಿನ ಹಂತದಲ್ಲಿ ಹಿಟ್ಟು ಕಲಸಬೇಕು. ಒಂದು ಅಗಲವಾದ ಪಾತ್ರೆಯಲ್ಲಿ ಗೋಧಿ ಹಿಟ್ಟನ್ನು ತೆಗೆದುಕೊಂಡು, ಅದಕ್ಕೆ ಉಪ್ಪು, ಅಜವಾನ, ಜೀರಿಗೆ, ಅರಿಶಿನ, ಖಾರದ ಪುಡಿ, ಧನಿಯಾ ಪುಡಿ, ತುರಿದ ಶುಂಠಿ ಮತ್ತು ಹಸಿಮೆಣಸಿನಕಾಯಿ ಪೇಸ್ಟ್ ಸೇರಿಸಿ.

- ಈಗ ತಯಾರಿಸಿದ ಪಾಲಕ್ ಪ್ಯೂರಿ ಮತ್ತು ಒಂದು ಚಮಚ ಎಣ್ಣೆಯನ್ನು ಹಾಕಿ, ನೀರನ್ನು ಅಲ್ಪ ಪ್ರಮಾಣದಲ್ಲಿ ಬಳಸುತ್ತಾ ಗಟ್ಟಿಯಾಗಿ ಹಿಟ್ಟು ಕಲಸಿಕೊಳ್ಳಿ.

- ಕಲಸಿದ ಹಿಟ್ಟಿನಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿ. ಲಟ್ಟಣಿಗೆಯ ಸಹಾಯದಿಂದ ಅವುಗಳನ್ನು ತುಂಬಾ ತೆಳುವಾಗಿಯೂ ಅಲ್ಲದ, ತುಂಬಾ ದಪ್ಪವಾಗಿಯೂ ಅಲ್ಲದ ಹದವಾಗಿ ಪೂರಿಗಳ ಆಕಾರದಲ್ಲಿ ಲಟ್ಟಿಸಿ.

- ಈಗ ಬಾಣಲೆಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಬಿಸಿ ಮಾಡಿ. ಉರಿಯನ್ನು ಮಧ್ಯಮ ಹಂತದಲ್ಲಿಟ್ಟುಕೊಂಡು ಲಟ್ಟಿಸಿದ ಪೂರಿಯನ್ನು ಎಣ್ಣೆಗೆ ಬಿಡಿ.

- ಪೂರಿ ಚೆನ್ನಾಗಿ ಉಬ್ಬಿ, ಎರಡೂ ಬದಿ ಗೋಲ್ಡ್ ಬಣ್ಣಕ್ಕೆ ಬಂದ ಮೇಲೆ ಎಣ್ಣೆಯಿಂದ ಹೊರಗೆ ತೆಗೆಯಿರಿ. ಇಷ್ಟು ಮಾಡಿದರೆ ಮಸಾಲಾ ಪಾಲಕ್ ಪೂರಿ ಸವಿಯಲು ಸಿದ್ಧ.

ಯಾವುದರ ಜೊತೆ ರುಚಿಯಾಗಿರುತ್ತದೆ?

ಈ ಮಸಾಲಾ ಪಾಲಕ್ ಪೂರಿಯನ್ನು (Masala Spinach Puri) ಬಿಸಿಬಿಸಿಯಾದ ಆಲೂಗಡ್ಡೆ ಪಲ್ಯ (Aloo Sabzi), ಮೊಸರು ಅಥವಾ ಪುದೀನಾ ಚಟ್ನಿಯೊಂದಿಗೆ ಸವಿಯಬಹುದು. ಇದು ಲಂಚ್ ಬಾಕ್ಸ್‌ಗೆ ನೀಡಿದರೂ ದೀರ್ಘಕಾಲದವರೆಗೆ ಮೃದುವಾಗಿಯೇ ಇರುತ್ತದೆ, ಮಕ್ಕಳಿಗೆ ಇದು ಇಷ್ಟವಾಗುತ್ತದೆ.

ಕಡಿಮೆ ಎಣ್ಣೆ ಹೀರಿಕೊಳ್ಳಲು ಟ್ರಿಕ್ಸ್

* ಪೂರಿ ಹಿಟ್ಟು ಯಾವಾಗಲೂ ಚಪಾತಿ ಹಿಟ್ಟಿಗಿಂತ ಸ್ವಲ್ಪ ಗಟ್ಟಿಯಾಗಿ ಇರಬೇಕು.
* ಹಿಟ್ಟು ಮೆದುವಾದರೆ ಪೂರಿ ಹೆಚ್ಚು ಎಣ್ಣೆ ಹೀರುತ್ತದೆ ಮತ್ತು ಎಣ್ಣೆಯುಕ್ತವಾಗುತ್ತದೆ.
* ಇನ್ನು, ಎಣ್ಣೆ ಸರಿಯಾಗಿ ಕಾದಿರಬೇಕು.
* ಎಣ್ಣೆ ತಣ್ಣಗಿದ್ದರೆ ಪೂರಿ ಉಬ್ಬುವುದಿಲ್ಲ ಮತ್ತು ಎಣ್ಣೆಯುಕ್ತವಾಗುತ್ತದೆ.
* ಹಿಟ್ಟು ಕಲಸುವಾಗ 2 ಚಮಚ ಅಕ್ಕಿ ಹಿಟ್ಟು ಸೇರಿಸಿದರೆ ಪೂರಿಗಳು ಹೆಚ್ಚು ಕ್ರಿಸ್ಪಿಯಾಗಿ ಬರುತ್ತವೆ.