ಒಮ್ಮೆ ತಿಂದ್ರೆ ರುಚಿ ಮರೆಯಲ್ಲ! ಹಸಿ ಬಟಾಣಿ ಬಳಸಿ ಮಾಡಿ ಮಸಾಲ ಮಟರ್ ಪೂರಿ.. ಸಾಂಬಾರ್ ಇಲ್ಲದೆಯೂ ತಿನ್ನಬಹುದು

ಒಮ್ಮೆ ತಿಂದರೆ ರುಚಿ ಮರೆಯಲ್ಲ! ಸಾಂಬಾರ್ ಇಲ್ಲದೆಯೂ ಸವಿಯಬಹುದು ಈ ರುಚಿಯಾದ ಪೂರಿ.. ಹಸಿ ಬಟಾಣಿ ಬಳಸಿ ಮಸಾಲ ಪೂರಿ (Masala Puri) ಮಾಡುವ ಸಿಂಪಲ್ ವಿಧಾನ ಇಲ್ಲಿದೆ. ಹೌದು, ಸಾಮಾನ್ಯ ಗೋಧಿ ಹಿಟ್ಟಿನ ಪೂರಿಗಳಿಗಿಂತ ವಿಭಿನ್ನವಾಗಿ, ಚಳಿಗಾಲದಲ್ಲಿ ಸಿಗುವ ತಾಜಾ ಹಸಿ ಬಟಾಣಿಗಳಿಂದ ತಯಾರಿಸಿದ ಮಸಾಲ ಮಟರ್ ಪೂರಿಯು ವಿಶಿಷ್ಟ ರುಚಿ ನೀಡುತ್ತದೆ.

ಮಸಾಲ ಮಟರ್ ಪೂರಿ (Masala Matar Puri) ಎಂದು ಜನಪ್ರಿಯವಾದ ಈ ಹಸಿರು ಖಾದ್ಯವು ತನ್ನ ಆಕರ್ಷಕ ಬಣ್ಣದಿಂದ ಮಕ್ಕಳಿಂದ ಹಿರಿಯರವರೆಗೆ ಎಲ್ಲರನ್ನೂ ಆಕರ್ಷಿಸುವುದು ಖಂಡಿತ. ಹಸಿ ಬಟಾಣಿ ಮತ್ತು ಮಸಾಲೆಗಳ ಅದ್ಭುತ ಸಮ್ಮಿಲನದಿಂದ ಕೂಡಿದ ಈ ಪೂರಿಗಳನ್ನು ಹಬ್ಬಗಳ ಸಂದರ್ಭದಲ್ಲಿ ಅಥವಾ ವಿಶೇಷ ಅತಿಥಿಗಳು ಬಂದಾಗ ಸುಲಭವಾಗಿ ತಯಾರಿಸಬಹುದು.

ಮನೆಯಲ್ಲೇ ರೆಸ್ಟೋರೆಂಟ್ ಶೈಲಿಯ ಮಸಾಲ ಮಟರ್ ಪೂರಿ ತಯಾರಿಸುವ (Masala Matar Puri Recipe) ಸರಳ ರೆಸಿಪಿ ಮತ್ತು ಬೇಕಾಗುವ ಸಾಮಗ್ರಿಗಳು ಬಗ್ಗೆ ಇಲ್ಲಿದೆ ಮಾಹಿತಿ. ಇದು ನಿಮ್ಮ ಬೆಳಗಿನ ಉಪಾಹಾರ ಅಥವಾ ಲಂಚ್ ಬಾಕ್ಸ್‌ಗೆ ಸೂಕ್ತ ಆಯ್ಕೆಯಾಗಿದೆ.

ಮಸಾಲ ಮಟರ್ ಪೂರಿಗೆ ಬೇಕಾಗುವ ಸಾಮಗ್ರಿಗಳು

• ಹಸಿ ಬಟಾಣಿ
• ಗೋಧಿ ಹಿಟ್ಟು
• ಹಸಿ ಮೆಣಸಿನಕಾಯಿ
• ಶುಂಠಿ (ಸಣ್ಣ ತುಂಡು)
• ಜೀರಿಗೆ
• ಅಜವಾನ (ಜೀರ್ಣಕ್ರಿಯೆಗೆ ಉತ್ತಮ)
• ಜೀರಿಗೆ ಪುಡಿ
• ಧನಿಯಾ ಪುಡಿ
• ಗರಂ ಮಸಾಲಾ
• ಖಾರದ ಪುಡಿ
• ರುಚಿಗೆ ತಕ್ಕಷ್ಟು ಉಪ್ಪು
• ಎಣ್ಣೆ (ಹಿಟ್ಟಿಗೆ ಹಾಕಲು ಮತ್ತು ಕರಿಯಲು)

ಮಸಾಲ ಮಟರ್ ಪೂರಿ ತಯಾರಿಸುವ ವಿಧಾನ

- ಮೊದಲು ಬಟಾಣಿ ಪೇಸ್ಟ್ ತಯಾರಿಸುವುದು. ಇದಕ್ಕಾಗಿ ಒಂದು ಕಪ್ ಹಸಿ ಬಟಾಣಿಯನ್ನು ಚೆನ್ನಾಗಿ ತೊಳೆದು ಬೇಯಿಸಿಕೊಳ್ಳಿ. ಬಟಾಣಿ ತಣ್ಣಗಾದ ನಂತರ, ಅದನ್ನು ಮಿಕ್ಸಿ ಜಾರ್‌ಗೆ ಹಾಕಿ. ಅದರ ಜೊತೆಗೆ ಹಸಿಮೆಣಸಿನಕಾಯಿ, ಶುಂಠಿ ಮತ್ತು ಅಗತ್ಯವಿದ್ದಷ್ಟು ನೀರು ಸೇರಿಸಿ ನುಣ್ಣಗೆ ಪೇಸ್ಟ್ ತಯಾರಿಸಿಕೊಳ್ಳಿ.

ಈಗ ಹಿಟ್ಟು ಕಲಸುವುದು. ಒಂದು ದೊಡ್ಡ ಪಾತ್ರೆಗೆ ೨ ಕಪ್ ಗೋಧಿ ಹಿಟ್ಟನ್ನು ತೆಗೆದುಕೊಂಡು, ಅದಕ್ಕೆ ಒಂದು ಚಮಚ ಜೀರಿಗೆ, ಸ್ವಲ್ಪ ಅಜವಾನ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಎರಡು ಚಮಚ ಎಣ್ಣೆ ಬೆರೆಸಿ.

- ನಂತರ ಸಿದ್ಧಪಡಿಸಿದ ಬಟಾಣಿ ಪೇಸ್ಟ್ ಅನ್ನು ಈ ಹಿಟ್ಟಿಗೆ ಸೇರಿಸಿ. ಇದರ ಜೊತೆಗೆ ಧನಿಯಾ ಪುಡಿ, ಜೀರಿಗೆ ಪುಡಿ, ಗರಂ ಮಸಾಲಾ ಮತ್ತು ಕೆಂಪು ಖಾರದ ಪುಡಿ ಹಾಕಿ ಮಿಕ್ಸ್ ಮಾಡಿ. ನೀರು ಬೇಕಿದ್ದರೆ ಮಾತ್ರ ಸ್ವಲ್ಪ ಸೇರಿಸಿಕೊಂಡು, ಪುರಿ ಹಿಟ್ಟಿನ ಹದಕ್ಕೆ (ಸ್ವಲ್ಪ ಗಟ್ಟಿಯಾಗಿ) ಕಲಸಿಕೊಳ್ಳಿ. ಹೆಚ್ಚು ನೀರು ಸೇರಿಸಬೇಡಿ.

- ಈಗ ಕಲಸಿದ ಹಿಟ್ಟನ್ನು ಒದ್ದೆ ಬಟ್ಟೆಯಿಂದ ಅಥವಾ ತಟ್ಟೆಯಿಂದ ಮುಚ್ಚಿ ಸುಮಾರು 10 ರಿಂದ 15 ನಿಮಿಷಗಳ ಕಾಲ ನೆನೆಯಲು ಬಿಡಿ. ಹೀಗೆ ಮಾಡುವುದರಿಂದ ಪುರಿಗಳು ಮೃದುವಾಗಿ, ಚೆನ್ನಾಗಿ ಉಬ್ಬಿ ಬರುತ್ತವೆ.

- ಬಳಿಕ ಪೂರಿ ಕರಿಯುವುದು. ನೆನೆದ ಹಿಟ್ಟಿನಿಂದ ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿಕೊಂಡು, ಸ್ವಲ್ಪ ಎಣ್ಣೆ ಹಚ್ಚಿ ಲಟ್ಟಿಸಿಕೊಳ್ಳಿ.

- ಈ ಮಧ್ಯೆ, ಕಡಾಯಿಯಲ್ಲಿ ಎಣ್ಣೆಯನ್ನು ಚೆನ್ನಾಗಿ ಕಾಯಲು ಇಡಿ. ಎಣ್ಣೆ ಕಾದ ನಂತರ, ಉರಿಯನ್ನು ಮಧ್ಯಮ ಹದಕ್ಕೆ ತಗ್ಗಿಸಿ, ಲಟ್ಟಿಸಿದ ಪೂರಿಗಳನ್ನು ಎರಡೂ ಬದಿಯಲ್ಲಿ ಕೆಂಪಾಗುವವರೆಗೆ ಕರಿಯಿರಿ.

- ಇಷ್ಟು ಮಾಡಿದರೆ ಸಾಕು, ಬಿಸಿಬಿಸಿ ಮಸಾಲ ಮಟರ್ ಪೂರಿ ಈಗ ಸಿದ್ಧ.

ಸವಿಯುವುದು ಹೇಗೆ?

ಮಸಾಲ ಮಟರ್ ಪೂರಿಯನ್ನು ಆಲೂಗಡ್ಡೆ ಪಲ್ಯ, ಉಪ್ಪಿನಕಾಯಿ ಅಥವಾ ಕಾಯಿ ಚಟ್ನಿಯಂತಹ ಯಾವುದೇ ಸಬ್ಜಿ ಜೊತೆ ಸವಿಯಬಹುದು. ಮಸಾಲೆಗಳು ಹಿಟ್ಟಿನಲ್ಲೇ ಇರುವುದರಿಂದ ಇದು ರುಚಿಯಾಗಿರುತ್ತದೆ. ಪ್ರಯಾಣದ ಸಮಯದಲ್ಲಿ ಕೊಂಡೊಯ್ಯಲು ಕೂಡ ಇದೊಂದು ಉತ್ತಮ ಆಯ್ಕೆ.