ಇಲ್ಲಿದೆ ಸುಲಭವಾಗಿ ಮಾಡಬಹುದಾದ ಮಂಗಳೂರು ಸೌತೆ ಸಾರು

ಮಂಗಳೂರು ಸೌತೆ ಸೇವನೆಯಿಂದ ಇದೆ ನೂರೆಂಟು ಲಾಭ : ಮದುವೆ ಮನೆಯಲ್ಲಿ ತಯಾರಿಸೋ ಶೈಲಿಯ ಸೌತೆ ಹುಳಿ ಮಾಡುವ ವಿಧಾನ ಇಲ್ಲಿದೆ

ಮಂಗಳೂರು ಸೌತೆಯನ್ನು ನೀವು ನೋಡಿದ್ದಿರಬಹುದು. ಮದುವೆ ಮನೆಗಳಲ್ಲಿ ಘಮ ಘಮ ಎನ್ನುವ ಸೌತೆ ಹುಳಿಯನ್ನು ನೀವು ಎರಡೆರಡು ಬಾರಿ ಬಡಿಸಿಕೊಂಡು ಸವಿದಿದ್ದರಲೂಬಹುದು.

ಆದರೆ ಅನೇಕರಿಗೆ ಮನೆಯಲ್ಲಿ ಎಷ್ಟೇ ಬಾರಿ ಪ್ರಯತ್ನಿಸಿದರೂ ಆ ಮದುವೆ ಮನೆ ಶೈಲಿಯ ಸೌತೆ ಹುಳಿ ತಯಾರಿಸಲು ಸಾಧ್ಯವಾಗುವುದಿಲ್ಲ. ಸೌತೆಕಾಯಿ ಹುಳಿ ತಯಾರಿಸುವ ಸರಳ ವಿಧಾನವನ್ನು ಕಲಿಯುವ ಮುನ್ನ ನಾವು ಸೌತೆಕಾಯಿಯಿಂದ ದೇಹಕ್ಕೆ ಯಾವೆಲ್ಲ ರೀತಿಯ ಆರೋಗ್ಯ ಲಾಭವಿದೆ ಎಂಬುದನ್ನು ತಿಳಿದುಕೊಳ್ಳೋಣ

ಮಂಗಳೂರು ಸೌತೆಯಿಂದ ಆರೋಗ್ಯ ಲಾಭ : ಸೌತೆಕಾಯಿಯು ಮೆಗ್ನಿಷಿಯಂ, ಫಾಸ್ಪರಸ್​ ಹಾಗೂ ಪೊಟ್ಯಾಷಿಯಂನಂತಹ ಖನಿಜಾಂಶಗಳನ್ನು ಹೊಂದಿದ್ದು ಜೀರ್ಣಕ್ರಿಯೆಯನ್ನು ಸುಧಾರಿಸುವ ಕಾರ್ಯವನ್ನು ಮಾಡುತ್ತದೆ. ಅಧಿಕ ರಕ್ತದೊತ್ತಡದಿಂದ ಬಳಲುತ್ತಿರುವವರು ಈ ಸೌತೆಕಾಯಿ ಸೇವಿಸುವುದು ಒಳ್ಳೆಯದು ಎಂದು ವೈದ್ಯರೇ ಶಿಫಾರಸು ಮಾಡಿದ್ದಾರೆ. ಸೌತೆಕಾಯಿಯಲ್ಲಿ ನೀರಿನಂಶ ಅಗಾಧ ಪ್ರಮಾಣದಲ್ಲಿ ಇರುತ್ತದೆ. ಹೀಗಾಗಿ ನಿಶ್ಶಕ್ತಿಯಿಂದ ಬಳಲುತ್ತಿರುವವರು ಸೌತೆಕಾಯಿ ಸೇವನೆ ಮಾಡುವುದು ಒಳ್ಳೆಯದು. ಒಣಚರ್ಮದ ಸಮಸ್ಯೆಯಿಂದಬಳಲುತ್ತಿರುವವರು ಸಹ ಈ ಸೌತೆಯನ್ನು ಸೇವಿಸಬಹುದಾಗಿದೆ.

ಮದುವೆ ಮನೆ ಶೈಲಿಯ ಮಂಗಳೂರು ಸೌತೆ ಹುಳಿ ತಯಾರಿಸುವ ಸಿಂಪಲ್​ ವಿಧಾನ ಇಲ್ಲಿದೆ :
ಬೇಕಾಗುವ ಸಾಮಗ್ರಿಗಳು :
ಕತ್ತರಿಸಿದ ಮಂಗಳೂರು ಸೌತೆ 1 ಕಪ್​,
ಸಣ್ಣಗೆ ಕತ್ತರಿಸಿದ ಟೊಮೆಟೋ 1 ,
ಉದ್ದನಾಗಿ ಕತ್ತರಿಸಿದ ಈರುಳ್ಳಿ 1/2 ಕಪ್​,
ಹಸಿಮೆಣಸು 1, ಬೆಲ್ಲ ಸ್ವಲ್ಪ,
ತೊಗರಿಬೇಳೆ 1 ಟೇಬಲ್​ ಚಮಚ,
ನೀರು ಅಳತೆಗೆ ತಕ್ಕಷ್ಟು, ಸಾಸಿವೆ 1ಚಿಟಿಕೆ ,
ಕೊತ್ತಂಬರಿ ಬೀಜ 1 ದೊಡ್ಡ ಚಮಚ,
ಜೀರಿಗೆ 1/2 ಚಮಚ ,
ಮೆಂತೆ 1/4 ಚಮಚ, ಕಡ್ಲೆ ಬೇಳೆ 1/2 ಚಮಚ,
ಒಣಮೆಣಸು 5,
ಬೇವಿನ ಸೊಪ್ಪು 1 ಎಸಳು,
ಕೊತ್ತಂಬರಿ ಸೊಪ್ಪು 1/4 ಕಪ್​,ಕಾಯಿ ತುರಿ 1 ಹೋಳು, ಅರಿಶಿಣ 1 ಚಿಟಿಕೆ,
ಅಡುಗೆ ಎಣ್ಣೆ 1ಚಮಚ,
ಬೆಳ್ಳುಳ್ಳಿ 2 ಎಸಳು ,
ಉಪ್ಪು ರುಚಿಗೆ ತಕ್ಕಷ್ಟು

ಮಾಡುವ ವಿಧಾನ :

• ಮೊದಲಿಗೆ ಒಂದು ಕುಕ್ಕರ್​ ತೆಗೆದುಕೊಂಡು ಇದಕ್ಕೆ ಕತ್ತರಿಸಿದ ಸೌತೆಕಾಯಿ, ಈರುಳ್ಳಿ, ಟೊಮೆಟೋ, ಹಸಿ ಮೆಣಸು, ತೊಗರಿಬೇಳೆ, ಉಪ್ಪು ಹಾಗೂ ಬೆಲ್ಲವನ್ನು ಸೇರಿಸಿ. ಸ್ವಲ್ಪ ನೀರನ್ನು ಸೇರಿಸಿ ಮೂರು ವಿಶಲ್​ ಬರುವವರೆಗೂ ಬೇಯಿಸಿ. ನೆನಪಿಡಿ ಅತಿಯಾಗಿ ಬೆಲ್ಲವನ್ನು ಸೇರಿಸಿದರೆ ಹುಳಿ ತುಂಬಾನೇ ಸಿಹಿಯಾಗಿ ಬಿಡುತ್ತದೆ. ಹೀಗಾಗಿ ಸ್ವಲ್ಪವೇ ಸ್ವಲ್ಪ ಬೆಲ್ಲವನ್ನು ಸೇರಿಸಿದರೆ ಸಾಕಾಗುತ್ತದೆ.
• ಈಗ ಒಂದು ಬಾಣಲೆಗೆ ತೆಗೆದುಕೊಂಡು ಅದಕ್ಕೆ ಎಣ್ಣೆ, ಕೊತ್ತಂಬರಿ ಬೀಜ, ಬೇವಿನಸೊಪ್ಪು, ಜೀರಿಗೆ, ಮೆಂತೆ, ಕಡಲೆಬೇಳೆ, ಸಾಸಿವೆ ಹಾಕಿ ಹುರಿದುಕೊಳ್ಳಿ. ಬಳಿಕ ಇದೇ ಬಾಣಲೆಯಲ್ಲಿ ಒಣ ಮೆಣಸನ್ನು ಹುರಿದುಕೊಳ್ಳಿ. ಮಸಾಲೆ ಪದಾರ್ಥಗಳು ತಣ್ಣಗಾದ ಬಳಿಕ ಮಿಕ್ಸಿ ಜಾರಿಗೆ ಇದನ್ನು ಹಾಕಿ. ಬಳಿಕ ತುರಿದಿಟ್ಟುಕೊಂಡ ಕಾಯಿ ತುರಿ, ಬೆಳ್ಳುಳ್ಳಿ ಹಾಗೂ ಅರಿಶಿಣವನ್ನು ಸೇರಿಸಿ ಮಸಾಲೆಯನ್ನು ರುಬ್ಬಿಕೊಳ್ಳಿ.
• ಈಗ ಕುಕ್ಕರ್​ನಲ್ಲಿಟ್ಟ ತರಕಾರಿಗಳನ್ನು ಒಂದು ಪಾತ್ರೆಗೆ ಹಾಕಿಕೊಳ್ಳಿ. ಇದಕ್ಕೆ ರುಬ್ಬಿಕೊಂಡ ಮಸಾಲೆ ಪದಾರ್ಥವನ್ನು ಹಾಕಿ ಅವಶ್ಯಕತೆ ಬಿದ್ದರೆ ಅಳತೆಗೆ ತಕ್ಕಷ್ಟು ನೀರನ್ನು ಸೇರಿಸಿ ಮಧ್ಯಮ ಉರಿಯಲ್ಲಿ ಕುದಿಯಲು ಇಡಿ. ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ ಸೌತೆ ಹುಳಿಯನ್ನು ಅಲಂಕರಿಸಿದರೆ ಘಮ ಘಮ ಮದುವೆ ಮನೆ ಶೈಲಿಯ ಸೌತೆಕಾಯಿ ಹುಳಿ ಸವಿಯಲು ಸಿದ್ಧ . ಬಿಸಿ ಬಿಸಿ ಅನ್ನದೊಂದಿಗೆ ಮಂಗಳೂರು ಸೌತೆಯಿಂದ ತಯಾರಿಸಿದ ಹುಳಿ ಸವಿಯಲು ತುಂಬಾನೇ ಮಜವಾಗಿರುತ್ತದೆ.