ಮಂಗಳೂರು ಸ್ಪೆಷಲ್.. ಈ ರೀತಿ ಸೌತೆಕಾಯಿ ಹುಳಿ ಮಾಡಿ! ಮಟನ್ ಸಾಂಬಾರ್ ಕೂಡ ಫೇಲ್

ಒಂದು ಸೌತೆಕಾಯಿ ಹಾಕಿ ಮಾಡಿ ಈ ಹುಳಿ..! ಸಾಂಪ್ರದಾಯಿಕ ರುಚಿಯ ಸುಲಭ ರೆಸಿಪಿ ಇಲ್ಲಿದೆ. ಹೌದು, ಕರಾವಳಿ ಕರ್ನಾಟಕದ ಅಡುಗೆ ಸಂಪ್ರದಾಯದಲ್ಲಿ ಮಂಗಳೂರು ಶೈಲಿಯ ಸೌತೆಕಾಯಿ ಹುಳಿ (Mangaluru Southekayi Huli) ತನ್ನದೇ ಆದ ವಿಶಿಷ್ಟ ಸ್ಥಾನವನ್ನು ಪಡೆದಿದೆ. ಸೌತೆಕಾಯಿಯನ್ನು ಪ್ರಧಾನವಾಗಿ ಬಳಸಿ ತಯಾರಿಸಲಾಗುವ ಈ ರುಚಿಕರ ಸಾಂಬಾರು ದಕ್ಷಿಣ ಕನ್ನಡದ ಮನೆಗಳಲ್ಲಿ ಜನಪ್ರಿಯ ಭಕ್ಷ್ಯವಾಗಿದೆ. ಇದರ ವಿಶಿಷ್ಟ ರುಚಿ, ಆರೋಗ್ಯಕರ ಗುಣಗಳಿಂದಾಗಿ ಇದು ಊಟದ ಒಂದು ಪ್ರಮುಖ ಭಾಗವಾಗಿದೆ.

ಅನ್ನದ ಜೊತೆ ಚೆನ್ನಾಗಿ ಹೊಂದಿಕೆಯಾಗುವ ಈ ಮಸಾಲೆಯುಕ್ತ ಹುಳಿಯನ್ನು ಮನೆಯಲ್ಲೇ ಸುಲಭವಾಗಿ ಸಿದ್ಧಪಡಿಸಬಹುದು. ಮಂಗಳೂರು ಅಡುಗೆಯ ಪ್ರತೀಕವಾದ ಸೌತೆಕಾಯಿ ಹುಳಿ ತಯಾರಿಕೆಗೆ ಬೇಕಾದ ಸಾಮಗ್ರಿಗಳು, ಮಸಾಲೆ, ಒಗ್ಗರಣೆ ಮತ್ತು ಅಂತಿಮ ಹಂತಗಳ ಬಗ್ಗೆ ಸಂಪೂರ್ಣ ಮಾಹಿತಿ (Mangaluru Style Southekayi Huli Recipe) ಈ ಲೇಖನದಲ್ಲಿದೆ.

ಸೌತೆಕಾಯಿ ಹುಳಿಗೆ ಅಗತ್ಯವಿರುವ ಸಾಮಗ್ರಿಗಳು

• ಮಂಗಳೂರು ಸೌತೆಕಾಯಿ
• ತೊಗರಿಬೇಳೆ
• ಟೊಮೆಟೊ
• ಅರಿಶಿನ
• ತೆಂಗಿನ ತುರಿ
• ಹುಣಸೆ ಹಣ್ಣು
• ರುಚಿಗೆ ತಕ್ಕಷ್ಟು ಉಪ್ಪು
• ಕೆಂಪು ಮೆಣಸು
• ಉದ್ದಿನಬೇಳೆ
• ಕೊತ್ತಂಬರಿ
• ಜೀರಿಗೆ
• ಮೆಂತ್ಯ
• ಇಂಗು
• ಅಡುಗೆ ಎಣ್ಣೆ
• ಸಾಸಿವೆ
• ಕರಿಬೇವಿನ ಎಲೆ
• ಒಣಮೆಣಸಿನ ಕಾಯಿ
• ಬೆಲ್ಲ (ಅಗತ್ಯಕ್ಕೆ ತಕ್ಕಷ್ಟು)

ಸೌತೆಕಾಯಿ ಹುಳಿ ಮಾಡುವ ಸರಳ ವಿಧಾನ

- ಮೊದಲಿಗೆ, ಸೌತೆಕಾಯಿಯನ್ನು ಚೆನ್ನಾಗಿ ತೊಳೆದು, ಸಿಪ್ಪೆ ತೆಗೆದು ಸಣ್ಣ ತುಂಡುಗಳಾಗಿ ಕತ್ತರಿಸಿ.

- ಸೌತೆಕಾಯಿಯ ಮಧ್ಯಭಾಗ ಕಹಿಯಾಗಿರುವುದರಿಂದ ರುಚಿ ಹಾಳಾಗದಂತೆ ತಡೆಯಲು ಕತ್ತರಿಸಿದ ನಂತರ ಮತ್ತೊಮ್ಮೆ ನೀರಿನಲ್ಲಿ ತೊಳೆಯಿರಿ.

- ನಂತರ ತೊಗರಿಬೇಳೆಯನ್ನು ಪ್ರೆಶರ್ ಕುಕ್ಕರ್‌ಗೆ ಹಾಕಿ, ಅರಿಶಿನ, ಸ್ವಲ್ಪ ಅಡುಗೆ ಎಣ್ಣೆ ಮತ್ತು ಒಂದು ಕಪ್ ನೀರು ಸೇರಿಸಿ ಎರಡು ಸೀಟಿಗೆ ಅರ್ಧ ಬೇಯಿಸಿ.

- ಅರ್ಧ ಬೆಂದ ಬೇಳೆಗೆ ಕತ್ತರಿಸಿದ ಸೌತೆಕಾಯಿ, ಒಂದು ಚಮಚ ಉಪ್ಪು ಮತ್ತು ಸುಮಾರು ಒಂದೂವರೆ ಕಪ್ ನೀರು ಸೇರಿಸಿ.

- ಇದನ್ನು ಮತ್ತೊಮ್ಮೆ ಎರಡು ಸೀಟಿ ಬರುವವರೆಗೆ ಬೇಯಿಸಿ, ಸೌತೆಕಾಯಿ ಮೃದುವಾಗಲು ಬಿಡಿ. ಈ ಹಂತದಲ್ಲಿ, ಬೇಳೆ ಹಾಗೂ ಸೌತೆಕಾಯಿ ಎರಡೂ ಚೆನ್ನಾಗಿ ಬೆಂದಿರುತ್ತದೆ.

- ಮಸಾಲೆ ತಯಾರಿಸಲು, ಒಂದು ಬಾಣಲೆಯಲ್ಲಿ ಒಂದು ಚಮಚ ಎಣ್ಣೆ ಬಿಸಿ ಮಾಡಿ, ಕೆಂಪು ಮೆಣಸಿನಕಾಯಿ, ಉದ್ದಿನ ಬೇಳೆ, ಕೊತ್ತಂಬರಿ ಬೀಜ, ಜೀರಿಗೆ, ಮೆಂತ್ಯ ಮತ್ತು ಇಂಗು ಹಾಕಿ ಮಧ್ಯಮ ಉರಿಯಲ್ಲಿ ಹುರಿಯಿರಿ.

- ಹುರಿದ ಈ ಮಸಾಲೆಗಳು ಹಾಗೂ ತೆಂಗಿನ ತುರಿಯನ್ನು ಸೇರಿಸಿ ನುಣ್ಣಗೆ ರುಬ್ಬಿ ಪೇಸ್ಟ್ ಮಾಡಿ.

- ಈ ರುಬ್ಬಿದ ಮಸಾಲೆ ಪೇಸ್ಟ್ ಅನ್ನು ಬೇಯಿಸಿದ ಬೇಳೆ-ಸೌತೆಕಾಯಿ ಮಿಶ್ರಣಕ್ಕೆ ಸೇರಿಸಿ. ರುಚಿಗೆ ತಕ್ಕಷ್ಟು ಉಪ್ಪು, ಹುಣಸೆ ಹಣ್ಣಿನ ರಸ ಮತ್ತು ಒಂದು ಚಮಚ ಬೆಲ್ಲ ಸೇರಿಸಿ ಚೆನ್ನಾಗಿ ಕುದಿಸಿ.

- ಮಿಶ್ರಣವು ಎಲ್ಲಾ ರುಚಿಗಳನ್ನು ಹೀರಿಕೊಳ್ಳಲು ಸುಮಾರು ಐದರಿಂದ ಏಳು ನಿಮಿಷ ಕುದಿಯಲು ಬಿಡಿ.

- ಕೊನೆಯದಾಗಿ ಒಗ್ಗರಣೆ ಸಿದ್ಧಪಡಿಸಿ: ಚಿಕ್ಕ ಒಗ್ಗರಣೆ ಪಾತ್ರೆಯಲ್ಲಿ ಎಣ್ಣೆ ಹಾಕಿ, ಸಾಸಿವೆ ಸಿಡಿಸಿ.

- ಅದಕ್ಕೆ ಕರಿಬೇವಿನ ಎಲೆ, ಒಣಮೆಣಸಿನ ಕಾಯಿ ಮತ್ತು ಸ್ವಲ್ಪ ಇಂಗು ಸೇರಿಸಿ. ಈ ಒಗ್ಗರಣೆಯನ್ನು ಕುದಿಯುತ್ತಿರುವ ಹುಳಿಯ ಮೇಲೆ ಹಾಕಿ ಮಿಶ್ರಣ ಮಾಡಿ.

- ಇಷ್ಟು ಮಾಡಿದರೆ ಸಾಕು, ಈಗ ಬಿಸಿ ಬಿಸಿ ಮಂಗಳೂರು ಶೈಲಿಯ ಸೌತೆಕಾಯಿ ಹುಳಿ ಅನ್ನದೊಂದಿಗೆ ಸವಿಯಲು ಸಿದ್ಧ.