ಮಕ್ಕಳಿಗೆ ಅಚ್ಚುಮೆಚ್ಚು! ಟಿಫಿನ್‌ಗೂ, ಸ್ನ್ಯಾಕ್‌ಗೂ ಸೂಪರ್.. 10 ನಿಮಿಷದಲ್ಲಿ ಈ ಸ್ಯಾಂಡ್‌ವಿಚ್ ಸಿದ್ಧ

10 ನಿಮಿಷದಲ್ಲಿ ಸಿದ್ಧವಾಗುತ್ತೆ ಈ ವೆಜ್ ಸ್ಯಾಂಡ್‌ವಿಚ್! ಮಕ್ಕಳಿಗೆ ಇಷ್ಟವಾಗುವ ಕ್ರೀಮಿ ರುಚಿ, ಸುಲಭ ರೆಸಿಪಿ. ಹೌದು, ಸಂಜೆ ಶಾಲೆ ಮುಗಿಸಿ ಹಸಿದು ಬರುವ ನಿಮ್ಮ ಮಕ್ಕಳಿಗೆ ಆರೋಗ್ಯಕರ ಆಹಾರ ಕೊಡಲು ಬಯಸಿದರೆ, ಈ ತರಕಾರಿ ಮೇಯನೇಸ್ ಸ್ಯಾಂಡ್‌ವಿಚ್ (Veg Mayonnaise Sandwich) ಒಮ್ಮೆ ಟ್ರೈ ಮಾಡಿ. ಈ ಸ್ಯಾಂಡ್‌ವಿಚ್ ಸಂಜೆ ಮಾತ್ರವಲ್ಲದೆ, ಬೆಳಗ್ಗೆಯೂ ಮಾಡಬಹುದು. ಅದರಲ್ಲೂ ಕೆಲಸಕ್ಕೆ ಹೋಗುವವರು ಬೆಳಗ್ಗೆ ಇದನ್ನು ಪ್ರಯತ್ನಿಸಬಹುದು. ಹಾಗಿದ್ರೆ, ಆ ತರಕಾರಿ ಮೇಯನೇಸ್ ಸ್ಯಾಂಡ್‌ವಿಚ್ ರೆಸಿಪಿ (Veg Mayonnaise Sandwich Recipe) ಹೇಗೆ ಮಾಡಬೇಕೆಂದು ತಿಳಿಯೋಣ ಬನ್ನಿ.

ವೆಜ್ ಮಯೋನೆಸ್ ಸ್ಯಾಂಡ್‌ವಿಚ್ ನೀವು ಬ್ಯುಸಿ ಇರುವಾಗ ಬೇಗನೆ ತಯಾರಿಸಬಹುದಾದ ರುಚಿಕರ ಮತ್ತು ಆರೋಗ್ಯಕರವಾದ ಆಹಾರವಾಗಿದೆ. ಗರಿಗರಿಯಾದ ಬ್ರೆಡ್, ತಾಜಾ ತರಕಾರಿಗಳು ಮತ್ತು ಕ್ರೀಮಿ ಮಯೋ ಮಸಾಲೆಯೊಂದಿಗೆ ಈ ಸ್ಯಾಂಡ್‌ವಿಚ್ ತಯಾರಿಸಿದರೆ, ಬೆಳಗ್ಗಿನ ಟಿಫನ್‌ಗೆ ಹೇಳಿಮಾಡಿಸಿದಂತಿರುತ್ತದೆ. ಈ ಸ್ಯಾಂಡ್‌ವಿಚ್ ಸಾಮಾನ್ಯವಾಗಿ ಟಿಫಿನ್ ಸೆಂಟರ್‌ಗಳು ಮತ್ತು ಫಾಸ್ಟ್ ಫುಡ್ ಅಂಗಡಿಗಳಲ್ಲಿ ಲಭ್ಯ. ಆದರೆ, ಇದನ್ನು ನಿಮ್ಮ ಮನೆಯಲ್ಲಿಯೂ ಸುಲಭವಾಗಿ ತಯಾರಿಸಬಹುದು.

ಈ ಸ್ಯಾಂಡ್‌ವಿಚ್ ತುಂಬಾ ಸರಳವಾಗಿದೆ. ಮನೆಯಲ್ಲಿರುವ ಬ್ರೆಡ್, ಕೆಲವು ತರಕಾರಿಗಳು, ಸ್ವಲ್ಪ ಮಸಾಲೆ ಮತ್ತು ಮಯೋನೆಸ್ ಇದ್ದರೆ ಸಾಕು. ಬ್ರೆಡ್ ಟೋಸ್ಟರ್ (ಓವನ್) ಇಲ್ಲದೆಯೂ ಇದನ್ನು ಮಾಡಬಹುದು. ಕ್ರೀಮಿಯಾಗಿರುವ ಈ ಸ್ಯಾಂಡ್‌ವಿಚ್ ಅನ್ನು ಟೋಸ್ಟ್ ಮಾಡದೆಯೂ ತಯಾರಿಸಬಹುದು. ನೀವು ಬ್ರೆಡ್ ಅನ್ನು ಟೋಸ್ಟ್ ಮಾಡಲು ಇಷ್ಟಪಡದಿದ್ದರೆ, ನೇರವಾಗಿ ಫಿಲ್ಲಿಂಗ್ ಹಾಕಿ ತಿನ್ನಬಹುದು. ಇದು ಮಕ್ಕಳಿಂದ ಹಿಡಿದು ವಯಸ್ಕರವರೆಗೆ ಎಲ್ಲರಿಗೂ ಇಷ್ಟಪಡುವ ಟೇಸ್ಟ್ ಹೊಂದಿರುತ್ತದೆ.

ವೆಜ್ ಮಯೋನೆಸ್ ಸ್ಯಾಂಡ್‌ವಿಚ್‌ಗೆ ಬೇಕಾಗುವ ಸಾಮಗ್ರಿಗಳು

• ಬ್ರೆಡ್ ಹೋಳುಗಳು (ಸ್ಲೈಸ್)
• ಬೆಣ್ಣೆ
• ಸಣ್ಣಗೆ ಕತ್ತರಿಸಿದ ಈರುಳ್ಳಿ
• ಹಸಿ ಮೆಣಸಿನಕಾಯಿ
• ಬೆಳ್ಳುಳ್ಳಿ ಪುಡಿ
• ಕೆಂಪು ಬೆಲ್ ಪೆಪರ್ ಅಥವಾ ಟೊಮೆಟೊ
• ಲೆಟಿಸ್ ಅಥವಾ ಎಲೆಕೋಸು
• ಕ್ಯಾರೆಟ್
• ಸ್ವೀಟ್ ಕಾರ್ನ್
• ಮೆಣಸಿನ ಪುಡಿ
• ಕೆಂಪು ಮೆಣಸಿನಕಾಯಿ ಪುಡಿ
• ಮೇಯನೇಸ್
• ಸಾಸಿವೆ ಪುಡಿ

ವೆಜ್ ಮಯೋನೆಸ್ ಸ್ಯಾಂಡ್‌ವಿಚ್‌ ತಯಾರಿಸುವ ವಿಧಾನ

ಮೊದಲಿಗೆ ನಾಲ್ಕು ಬ್ರೆಡ್ ಸ್ಲೈಸ್‌ಗಳ ಮೇಲೆ ಬೆಣ್ಣೆ ಸವರಿ. ತವಾದ ಮೇಲೆ ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಟೋಸ್ಟ್ ಮಾಡಿ. ಒಂದು ವೇಳೆ ತವಾ ಮೇಲೆ ಟೋಸ್ಟ್ ಮಾಡಲು ಇಷ್ಟವಿಲ್ಲದಿದ್ದರೆ, ನೇರವಾಗಿ ಫಿಲ್ಲಿಂಗ್ ಹಾಕಿ ಸ್ಯಾಂಡ್‌ವಿಚ್ ಮೇಕರ್‌ನಲ್ಲಿಯೂ ಟೋಸ್ಟ್ ಮಾಡಬಹುದು. ನಂತರ, ಒಂದು ಬಟ್ಟಲಿನಲ್ಲಿ ಸಣ್ಣಗೆ ಹೆಚ್ಚಿದ ಈರುಳ್ಳಿ (ಹಸಿರು ಈರುಳ್ಳಿ), ಹಸಿ ಮೆಣಸಿನಕಾಯಿ, ಬೆಳ್ಳುಳ್ಳಿ ಪುಡಿ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಈ ಮಿಶ್ರಣಕ್ಕೆ ಕೆಂಪು ಬೆಲ್ ಪೆಪ್ಪರ್ ಅಥವಾ ಟೊಮೆಟೊ, ಎಲೆಕೋಸು, ತುರಿದ ಕ್ಯಾರೆಟ್, ಬೇಯಿಸಿದ ಸ್ವೀಟ್ ಕಾರ್ನ್ ಹಾಕಿ ಮಿಕ್ಸ್ ಮಾಡಿ.

ಈಗ ಮೆಣಸಿನ ಪುಡಿ, ರೆಡ್ ಚಿಲ್ಲಿ ಫ್ಲೇಕ್ಸ್, ಮಯೋನೆಸ್, ಡ್ರೈ ಮಸ್ಟರ್ಡ್ ಪೌಡರ್ ಅಥವಾ ಡಿಜಾನ್ ಮಸ್ಟರ್ಡ್ ಹಾಕಿ ಫಿಲ್ಲಿಂಗ್ ಅನ್ನು ಚೆನ್ನಾಗಿ ಮಿಕ್ಸ್ ಮಾಡಿ ಸಿದ್ಧಪಡಿಸಿ. ರುಚಿ ನೋಡಿದ ಮೇಲೆ ಅಗತ್ಯವಿದ್ದರೆ, ಇನ್ನಷ್ಟು ಮಸಾಲೆ ಮತ್ತು ಮಯೋನೆಸ್ ಸೇರಿಸಬಹುದು. ಬೇಕೆನಿಸಿದರೆ ಚಿಲ್ಲಿ ಸಾಸ್ ಅಥವಾ ಶೆಜ್ವಾನ್ ಸಾಸ್ ಕೂಡ ಸೇರಿಸಿಕೊಳ್ಳಬಹುದು. ಈಗ ಒಂದು ಟೋಸ್ಟ್ ಮಾಡಿದ ಬ್ರೆಡ್ ಸ್ಲೈಸ್ ಮೇಲೆ ಸಿದ್ಧಪಡಿಸಿದ ಫಿಲ್ಲಿಂಗ್ ಅನ್ನು ಸಮವಾಗಿ ಹಾಕಿ. ಇನ್ನೊಂದು ಬ್ರೆಡ್ ಸ್ಲೈಸ್‌ನಿಂದ ಮುಚ್ಚಿ, ಮಧ್ಯದಲ್ಲಿ ಕತ್ತರಿಸಿ. ಇಷ್ಟು ಮಾಡಿದರೆ, ಬಿಸಿ ಬಿಸಿಯಾಗದ ವೆಜ್ ಮಯೋನೆಸ್ ಸ್ಯಾಂಡ್‌ವಿಚ್‌ ಸವಿಯಲು ಸಿದ್ಧ.

ಈ ಸ್ಯಾಂಡ್‌ವಿಚ್ ಅನ್ನು ಬೆಳಗ್ಗಿನ ಟಿಫನ್ ಅಥವಾ ಸಂಜೆಯ ಸ್ನ್ಯಾಕ್ಸ್‌ಗೆ ತಿನ್ನಬಹುದು. ಮಕ್ಕಳಿಗೆ ಲಂಚ್ ಬಾಕ್ಸ್‌ಗೂ ಇದು ಉತ್ತಮ ಆಯ್ಕೆ. ಪ್ರಯಾಣ ಮಾಡುವಾಗಲೂ ತೆಗೆದುಕೊಂಡು ಹೋಗಲು ಇದು ಸುಲಭ. ಇದಲ್ಲದೆ, ನೀವು ನಿಮ್ಮಿಷ್ಟದ ತರಕಾರಿಗಳನ್ನು ಸೇರಿಸುವ ಮೂಲಕ ಈ ಸ್ಯಾಂಡ್‌ವಿಚ್ ಅನ್ನು ಇನ್ನಷ್ಟು ರುಚಿಕರವಾಗಿಸಬಹುದು. ಚೀಸ್, ಟೊಮೆಟೊ, ಸೌತೆಕಾಯಿ, ಪಾಲಕ್ ಸೊಪ್ಪು ಮುಂತಾದವುಗಳನ್ನು ಸೇರಿಸುವುದರಿಂದ ಸ್ಯಾಂಡ್‌ವಿಚ್‌ನ ಪೌಷ್ಟಿಕಾಂಶದ ಮೌಲ್ಯ ಹೆಚ್ಚಾಗುತ್ತದೆ. ಒಟ್ಟಾರೆ, ವೆಜ್ ಮೇಯನೇಸ್ ಸ್ಯಾಂಡ್‌ವಿಚ್ ಒಂದು ತ್ವರಿತವಾಗಿ ತಯಾರಿಸಬಹುದಾದ ಮತ್ತು ಆರೋಗ್ಯಕರವಾದ ತಿಂಡಿಯಾಗಿದ್ದು, ಎಲ್ಲರೂ ಇದನ್ನು ಎಂಜಾಯ್ ಮಾಡಬಹುದು.