ಮಾಮೂಲಿ ಪುಲಾವ್ ಅಲ್ಲ.. ಕಡ್ಲೆಕಾಳು ಬಳಸಿ ಮಾಡಿ ಈ ಹೆಲ್ದಿ ಪುಲಾವ್! ತೂಕ ಇಳಿಯುತ್ತೆ, ಶುಗರ್ ಬರಲ್ಲ

ಅಪ್ಪಟ ಘಮಘಮಿಸುವ ರುಚಿ! ಲಂಚ್ ಬಾಕ್ಸ್‌ಗೆ ಸೂಪರ್.. ರೆಸ್ಟೋರೆಂಟ್ ಸ್ಟೈಲ್ ಹೆಲ್ದಿ & ಟೇಸ್ಟಿ ಚೆನ್ನಾ ಪುಲಾವ್ ಮಾಡಿ ನೋಡಿ. ಹೌದು, ಪ್ರತಿದಿನವೂ ಲಂಚ್‌ ಬಾಕ್ಸ್‌ಗೆ ಏನು ಮಾಡಬೇಕು ಎಂಬ ಗೊಂದಲಕ್ಕೆ ನಾವು ಸಿಲುಕುತ್ತೇವೆ. ಸಾರು-ಅನ್ನದಿಂದ ಬೇಸತ್ತಿದ್ದರೆ, ಕಡಿಮೆ ಸಮಯದಲ್ಲಿ ರುಚಿಕರ ಹಾಗೂ ಪೌಷ್ಟಿಕ ಆಹಾರ ತಯಾರಿಸಲು ಕಾಬೂಲಿ ಚನಾ ಪುಲಾವ್ (Kabuli Chana Pulao) ಅಥವಾ ಕಡ್ಲೆಕಾಳು ಪುಲಾವ್ (Kadalekalu Pulao) ಅತ್ಯುತ್ತಮ ಆಯ್ಕೆ.

ಇದು ಕೇವಲ ರುಚಿಯಲ್ಲಿ ಮಾತ್ರವಲ್ಲದೆ, ಆರೋಗ್ಯಕ್ಕೂ ಪೂರಕವಾಗಿದೆ. ಕಾಬೂಲಿ ಕಡ್ಲೆಯಲ್ಲಿರುವ ಅಧಿಕ ಪ್ರೋಟೀನ್ ಮತ್ತು ಫೈಬರ್ ದೇಹಕ್ಕೆ ಶಕ್ತಿ ನೀಡಿ, ಜೀರ್ಣಕ್ರಿಯೆ ಸುಧಾರಿಸುತ್ತದೆ. ಈ ಪ್ರೋಟೀನ್ ಯುಕ್ತ ಪುಲಾವ್ ಲಂಚ್ ಬಾಕ್ಸ್‌ಗೆ ಅಥವಾ ರಾತ್ರಿಯ ವಿಶೇಷ ಭೋಜನಕ್ಕೆ ಸೂಕ್ತ. ಘಮಘಮಿಸುವ ಮಸಾಲೆ ಮತ್ತು ಪೌಷ್ಟಿಕಾಂಶಗಳ ಈ ಅಡುಗೆಯನ್ನು ಸುಲಭವಾಗಿ ತಯಾರಿಸುವ ವಿಧಾನ (Kabuli Chana Pulao Recipe) ಇಲ್ಲಿದೆ.

Photo Credit: ಸಂಗ್ರಹ ಚಿತ್ರ

ಸಸ್ಯಾಹಾರಿಗಳಿಗೆ ಇದು ಮಾಂಸಾಹಾರಕ್ಕೆ ಸರಿಸಮನಾದ ಪೌಷ್ಟಿಕಾಂಶ ಒದಗಿಸುತ್ತದೆ. ಜೊತೆಗೆ ತೂಕ ಇಳಿಸಲು ಮತ್ತು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸಲು ಸಹಕಾರಿ. ಕಡ್ಲೆಕಾಳು ಪುಲಾವ್ ಮಾಡಲು ಬೇಕಾಗುವ ಸಾಮಾಗ್ರಿಗಳು ಮತ್ತು ಸಿಂಪಲ್ ರೆಸಿಪಿ ನಿಮಗಾಗಿ.

ಕಡ್ಲೆಕಾಳು ಪುಲಾವ್‌ಗೆ ಬೇಕಾಗುವ ಸಾಮಾಗ್ರಿಗಳು

• ಬಾಸ್ಮತಿ ಅಕ್ಕಿ - 1 ಕಪ್
• ಬೇಯಿಸಿದ ಕಾಬುಲಿ ಚನಾ (ಕಡ್ಲೆಕಾಳು) - 1 ಕಪ್
• ಎಣ್ಣೆ ಅಥವಾ ತುಪ್ಪ - 2 ದೊಡ್ಡ ಚಮಚ
• ಈರುಳ್ಳಿ - 1 ಅಥವಾ 2
• ಟೊಮೆಟೊ - 1
• ಹಸಿಮೆಣಸು - 1
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್ - 1 ಚಮಚ
• ಜೀರಿಗೆ - ½ ಚಮಚ
• ಬಿರಿಯಾನಿ ಎಲೆ - 1
• ಲವಂಗ - 2 ರಿಂದ 3
• ಏಲಕ್ಕಿ - 1
• ಗರಂ ಮಸಾಲಾ - ½ ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ನೀರು - 2 ಕಪ್
• ಕೊತ್ತಂಬರಿ ಸೊಪ್ಪು - ಸ್ವಲ್ಪ (ಅಲಂಕಾರಕ್ಕಾಗಿ)

ಕಡ್ಲೆಕಾಳು ಪುಲಾವ್ ತಯಾರಿಸುವ ವಿಧಾನ

- ಮೊದಲು ಬಾಸುಮತಿ ಅಕ್ಕಿಯನ್ನು ಚೆನ್ನಾಗಿ ತೊಳೆದು ಇಪ್ಪತ್ತು ನಿಮಿಷಗಳ ಕಾಲ ನೀರಿನಲ್ಲಿ ನೆನೆಸಿಡಿ. ಇದು ಪುಲಾವ್ ಉದುರು ಉದುರಾಗಿ ಬರಲು ಸಹಕಾರಿ.

- ನಂತರ, ಕುಕ್ಕರ್ ಅಥವಾ ಅಗಲವಾದ ಪಾತ್ರೆಯಲ್ಲಿ ಎಣ್ಣೆ ಅಥವಾ ತುಪ್ಪ ಬಿಸಿ ಮಾಡಿ.

- ಜೀರಿಗೆ, ಪಲಾವ್ ಎಲೆ, ಲವಂಗ ಮತ್ತು ಏಲಕ್ಕಿಯನ್ನು ಹಾಕಿ ಅವು ಘಮ ಬಿಡುವವರೆಗೆ ಹುರಿಯಿರಿ. ಇದಕ್ಕೆ ಉದ್ದಕ್ಕೆ ಹೆಚ್ಚಿದ ಈರುಳ್ಳಿ ಸೇರಿಸಿ ಹೊಂಬಣ್ಣ ಬರುವವರೆಗೆ ಬಾಡಿಸಿ.

- ಶುಂಠಿ-ಬೆಳ್ಳುಳ್ಳಿ ಪೇಸ್ಟ್ ಮತ್ತು ಹಸಿಮೆಣಸಿನಕಾಯಿ ಹಾಕಿ ಹಸಿ ವಾಸನೆ ಹೋಗಲಾಡಿಸಿ, ಸಣ್ಣದಾಗಿ ಹೆಚ್ಚಿದ ಟೊಮೆಟೊ ಮೃದುವಾಗುವವರೆಗೆ ಬೇಯಿಸಿ.

- ಟೊಮೆಟೊ ಬೆಂದ ನಂತರ, ಮೊದಲೇ ಬೇಯಿಸಿಟ್ಟುಕೊಂಡ ಕಾಬೂಲಿ ಕಡ್ಲೆ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಗರಂ ಮಸಾಲವನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದರಿಂದ ಮಸಾಲೆಗಳ ಸುವಾಸನೆಯು ಕಡ್ಲೆಕಾಳಿಗೆ ಸರಿಯಾಗಿ ಹಿಡಿದುಕೊಳ್ಳುತ್ತದೆ.

- ಈಗ ನೆನೆಸಿಟ್ಟ ಅಕ್ಕಿಯ ನೀರನ್ನು ಬಸಿದು ಕುಕ್ಕರ್‌ಗೆ ಹಾಕಿ, ಅಕ್ಕಿ ಮುರಿಯದಂತೆ ಮೆಲ್ಲಗೆ ಕೈಯಾಡಿಸಿ.

- ನಂತರ ಎರಡು ಕಪ್ ನೀರನ್ನು ಸೇರಿಸಿ ಕುಕ್ಕರ್ ಮುಚ್ಚಳ ಮುಚ್ಚಿ ಎರಡು ಸೀಟಿ ಬರುವವರೆಗೆ ಬೇಯಿಸಿ. ಕುಕ್ಕರ್ ತಣ್ಣಗಾದ ಮೇಲೆ ಮುಚ್ಚಳ ತೆಗೆದು, ಸಿದ್ಧವಾದ ಪುಲಾವ್ ಅನ್ನು ಕೊತ್ತಂಬರಿ ಸೊಪ್ಪಿನಿಂದ ಅಲಂಕರಿಸಿ.

- ಬಿಸಿ ಕಾಬೂಲಿ ಚನಾ ಪುಲಾವ್ ಅಥವಾ ಕಡ್ಲೆಕಾಳು ಪುಲಾವ್ ಅನ್ನು ಸೌತೆಕಾಯಿ ರೈತಾ, ಮೊಸರು ಬಜ್ಜಿ ಅಥವಾ ಸಲಾಡ್ ಜೊತೆಗೆ ಸವಿಯಲು ರುಚಿಕರವಾಗಿರುತ್ತದೆ.

- ಇದು ಡಿನ್ನರ್‌ಗೆ ಮಾತ್ರವಲ್ಲದೆ, ಮಕ್ಕಳ ಲಂಚ್ ಬಾಕ್ಸ್‌ಗೂ ಸೂಕ್ತವಾದ ಹೆಲ್ದಿ ರೆಸಿಪಿಯಾಗಿದೆ. ಪೌಷ್ಟಿಕಾಂಶ ಮತ್ತು ರುಚಿಯ ಪರಿಪೂರ್ಣ ಮಿಶ್ರಣವಾಗಿದೆ.