ಡೌಟೇ ಬೇಡ.. ಪಕ್ಕಾ ರಾಜಸ್ಥಾನಿ ಸ್ಟ್ರೀಟ್ ಸ್ಟೈಲ್ ಕ್ರಿಸ್ಪಿ ಮಿರ್ಚಿ ವಡಾ! ಸ್ಟಫಿಂಗ್ ರಹಸ್ಯ ಇಲ್ಲಿದೆ

ಡೌಟ್‌ ಬೇಡವೇ ಬೇಡ.. ಇದು ಸಂಜೆಯ ಅತ್ಯುತ್ತಮ ತಿಂಡಿ! ಅದರಲ್ಲೂ ಮಳೆಗಾಲಕ್ಕೆ ಸೂಪರ್. ಸ್ಟಫಿಂಗ್ ಮಾಡುವ ರಹಸ್ಯ ಇಲ್ಲಿದೆ. ಹೌದು, ರಾಜಸ್ಥಾನದ ಪ್ರಖ್ಯಾತ ಬೀದಿ ಆಹಾರವಾದ ಬಿಸಿಬಿಸಿಯಾದ ಮತ್ತು ಖಾರವಾದ ಜೋಧ್‌ಪುರಿ ಮಿರ್ಚಿ ವಡಾವನ್ನು (Mirchi Vada) ಮನೆಯಲ್ಲೇ ಸುಲಭವಾಗಿ ತಯಾರಿಸುವ ವಿಧಾನ ಇಲ್ಲಿದೆ.

ರಾಜಸ್ಥಾನದ ಪಾಕಪದ್ಧತಿಯು (ರೆಸಿಪಿ) ತನ್ನ ವೈಭವ ಮತ್ತು ಖಾರವಾದ ರುಚಿಗೆ ಹೆಸರಾಗಿದೆ. ಜೈಪುರ ಮತ್ತು ಜೋಧ್‌ಪುರ ನಗರಗಳ ಬೀದಿಗಳಲ್ಲಿ, 'ಮಿರ್ಚಿ ವಡಾ' (Jodhpuri Mirchi Vada) ಅತ್ಯಂತ ಜನಪ್ರಿಯ ತಿಂಡಿಯಾಗಿದೆ. ಇದು ಸಾಮಾನ್ಯ ಮಿರ್ಚಿ ಬಜ್ಜಿಯಂತೆ ಕಂಡರೂ, ಒಳಗಿನ ಮಸಾಲೆಯುಕ್ತ ಆಲೂಗಡ್ಡೆ ಸ್ಟಫಿಂಗ್ ಮತ್ತು ವಿಶಿಷ್ಟ ಮಸಾಲೆಗಳು ಇದನ್ನು ವಿಶೇಷವಾಗಿಸುತ್ತವೆ.

Photo Credit: ಸಂಗ್ರಹ ಚಿತ್ರ

ಹೊರಗೆ ಗರಿಗರಿಯಾದ ಕಡಲೆ ಹಿಟ್ಟಿನ ಲೇಪನ ಮತ್ತು ಒಳಗಡೆ ಚಟಪಟ ಎನ್ನುವ ಆಲೂಗಡ್ಡೆ ಮಸಾಲೆಯು ಚಹಾದೊಂದಿಗೆ ಅತ್ಯುತ್ತಮ ಸಂಗಮವನ್ನು ನೀಡುತ್ತದೆ. ಈ ವಿಶೇಷ ವರದಿಯಲ್ಲಿ, ರಾಜಸ್ಥಾನಿ ಶೈಲಿಯ ಜೋಧ್‌ಪುರಿ ಮಿರ್ಚಿ ವಡಾವನ್ನು ಮನೆಯಲ್ಲೇ ಸರಳವಾಗಿ ತಯಾರಿಸುವ ಸಂಪೂರ್ಣ ವಿಧಾನವನ್ನು (Mirchi Vada Recipe) ಈಗ ತಿಳಿಯೋಣ.

ಮಿರ್ಚಿ ವಡಾಗೆ ಬೇಕಾಗುವ ಸಾಮಗ್ರಿಗಳು

ಆಲೂಗಡ್ಡೆ ಸ್ಟಫಿಂಗ್‌

• ಬೇಯಿಸಿದ ಆಲೂಗಡ್ಡೆ
• ಸೋಂಪು (ಇದು ರಾಜಸ್ಥಾನಿ ರುಚಿಗೆ ಮುಖ್ಯ)
• ಧನಿಯಾ ಪುಡಿ
• ಅಚ್ಚಖಾರದ ಪುಡಿ
• ಆಮ್ಚೂರ್ ಪುಡಿ (ಮಾವಿನಕಾಯಿ ಪುಡಿ)
• ಗರಂ ಮಸಾಲ
• ರುಚಿಗೆ ತಕ್ಕಷ್ಟು ಉಪ್ಪು
• ಹಸಿ ಶುಂಠಿ - ಮೆಣಸಿನಕಾಯಿ ಪೇಸ್ಟ್
• ಕೊತ್ತಂಬರಿ ಸೊಪ್ಪು

ವಡಾ ಮತ್ತು ಹಿಟ್ಟಿನ ತಯಾರಿಕೆಗೆ

• ದೊಡ್ಡ ಹಸಿಮೆಣಸಿನಕಾಯಿ (ಬಜ್ಜಿ ಮೆಣಸಿನಕಾಯಿ)
• ಕಡಲೆ ಹಿಟ್ಟು
• ಅರಿಶಿನ
• ಓಮಕಾಳು
• ರುಚಿಗೆ ತಕ್ಕಷ್ಟು ಉಪ್ಪು
• ನೀರು (ಹಿಟ್ಟು ಕಲಸಲು ಬೇಕಾದಷ್ಟು)
• ಎಣ್ಣೆ

Photo Credit: ಸಂಗ್ರಹ ಚಿತ್ರ

ಜೋಧ್‌ಪುರಿ ಮಿರ್ಚಿ ವಡಾ ತಯಾರಿಸುವ ವಿಧಾನ

- ಮಸಾಲೆಯುಕ್ತ ಆಲೂಗಡ್ಡೆ ಸ್ಟಫಿಂಗ್ ಸಿದ್ಧತೆ. ಇದಕ್ಕಾಗಿ ಮೊದಲು, ಬೇಯಿಸಿದ ಆಲೂಗಡ್ಡೆಗಳನ್ನು ಸಿಪ್ಪೆ ತೆಗೆದು ಚೆನ್ನಾಗಿ ಮ್ಯಾಶ್ ಮಾಡಿ.

- ನಂತರ ಸೋಂಪು, ಧನಿಯಾ ಪುಡಿ, ಖಾರದ ಪುಡಿ, ಆಮ್ಚೂರ್, ಗರಂ ಮಸಾಲ, ಉಪ್ಪು, ಹಸಿ ಶುಂಠಿ ಮೆಣಸಿನಕಾಯಿ ಪೇಸ್ಟ್ ಹಾಗೂ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಈ ಮಸಾಲೆಯು ಚಟಪಟ ಎನ್ನುವಂತಿರಬೇಕು.

- ಈಗ ದೊಡ್ಡ ಹಸಿಮೆಣಸಿನಕಾಯಿಗಳನ್ನು ತೊಳೆದು ಒರೆಸಿಕೊಳ್ಳಿ. ಮಧ್ಯದಲ್ಲಿ ಉದ್ದಕ್ಕೆ ಸೀಳಿ, ಬೀಜಗಳನ್ನು ತೆಗೆಯಿರಿ (ಇದರಿಂದ ಖಾರ ಕಡಿಮೆಯಾಗುತ್ತದೆ).

- ಈಗ ಸಿದ್ಧಪಡಿಸಿದ ಆಲೂಗಡ್ಡೆ ಮಸಾಲೆಯನ್ನು ಸೀಳಿದ ಮೆಣಸಿನಕಾಯಿಯೊಳಗೆ ಅಚ್ಚುಕಟ್ಟಾಗಿ ತುಂಬಿಸಿ.

- ಒಂದು ಪಾತ್ರೆಯಲ್ಲಿ ಕಡಲೆ ಹಿಟ್ಟು, ಅರಿಶಿನ, ಉಪ್ಪು ಮತ್ತು ಓಂಕಾಳನ್ನು ಹಾಕಿರಿ. ದೋಸೆ ಹಿಟ್ಟಿಗಿಂತ ಸ್ವಲ್ಪ ಗಟ್ಟಿಯಾದ ಹದಕ್ಕೆ ಸ್ವಲ್ಪ ಸ್ವಲ್ಪ ನೀರು ಸೇರಿಸಿ ಕಲಸಿಕೊಳ್ಳಿ. ಹಿಟ್ಟು ಮೆಣಸಿನಕಾಯಿಗೆ ಸರಿಯಾಗಿ ಅಂಟಿಕೊಳ್ಳುವಷ್ಟು ಗಟ್ಟಿಯಾಗಿರಲಿ.

- ಈಗ ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ. ಎಣ್ಣೆ ಕಾದ ನಂತರ, ಮಸಾಲೆ ತುಂಬಿದ ಮೆಣಸಿನಕಾಯಿಗಳನ್ನು ಹಿಟ್ಟಿನಲ್ಲಿ ಅದ್ದಿ ಎಣ್ಣೆಗೆ ಬಿಡಿ.

- ಉರಿಯನ್ನು ಮಧ್ಯಮ ಹದದಲ್ಲಿ ಇಟ್ಟು, ವಡಾ ಸುವರ್ಣ ಬಣ್ಣ ಬರುವವರೆಗೆ ಮತ್ತು ಗರಿಗರಿಯಾಗುವವರೆಗೆ ಕರಿಯಿರಿ.

ಈ ಟಿಪ್ಸ್ ಫಾಲೋ ಮಾಡಿ

• ಆಲೂಗಡ್ಡೆ ಮಸಾಲೆಯನ್ನು ಹಿಟ್ಟಿನಲ್ಲಿ ಅದ್ದುವ ಮೊದಲು ಮೆಣಸಿನಕಾಯಿಯ ಹೊರಭಾಗಕ್ಕೂ ಲೇಪಿಸಿ. ಇದರಿಂದ ವಡಾ ದಪ್ಪವಾಗಿ ಮತ್ತು ಹೆಚ್ಚು ರುಚಿಯಾಗಿ ಬರುತ್ತದೆ.

• ಮೆಣಸಿನಕಾಯಿ ಹೆಚ್ಚು ಖಾರವಿದ್ದರೆ, ಬಳಸುವ ಮೊದಲು ಅದನ್ನು ಬಿಸಿ ನೀರಿನಲ್ಲಿ ೫ ನಿಮಿಷ ಇಟ್ಟು ನಂತರ ಒರೆಸಿ ಬಳಸಿ. ಇದು ಖಾರದ ಅಂಶವನ್ನು ಕಡಿಮೆಗೊಳಿಸುತ್ತದೆ.

• ಹಿಟ್ಟು ಕಲಸುವಾಗ ಒಂದು ಚಮಚ ಬಿಸಿ ಎಣ್ಣೆಯನ್ನು ಸೇರಿಸಿದರೆ, ವಡಾ ಸಖತ್ ಕ್ರಿಸ್ಪಿಯಾಗಿ ಮೂಡಿಬರುತ್ತದೆ.

ಈ ಬಿಸಿಬಿಸಿ ರಾಜಸ್ಥಾನಿ ಮಿರ್ಚಿ ವಡಾವನ್ನು ಪುದೀನಾ ಚಟ್ನಿ ಅಥವಾ ಹುಣಸೆಹಣ್ಣಿನ ಸಿಹಿ ಚಟ್ನಿ ಜೊತೆಗೆ ಸವಿಯಿರಿ. ಸಂಜೆಯ ಮಳೆ ಬೀಳುವಾಗ, ಒಂದು ಕಪ್ ಮಸಾಲಾ ಚಹಾದೊಂದಿಗೆ ಇದರ ರುಚಿ ಖಂಡಿತವಾಗಿಯೂ ಸ್ವರ್ಗಕ್ಕೆ ಸಮಾನ.