ದೀಪಾವಳಿಗೆ ಕ್ರಿಸ್ಪಿ & ಜ್ಯೂಸಿ ಜಿಲೇಬಿ! ಜಾತ್ರೆ ಶೈಲಿಯ ರುಚಿ ಈಗ ಮನೆಯಲ್ಲೇ.. ಈ ಟ್ರಿಕ್ ಬಳಸಿ

ದೀಪಾವಳಿಯು ಸಾಂಪ್ರದಾಯಿಕ ಸಿಹಿ ತಿಂಡಿಗಳಿಲ್ಲದೆ ಪೂರ್ಣಗೊಳ್ಳುವುದಿಲ್ಲ. ಇವುಗಳಲ್ಲಿ ಜಿಲೇಬಿ ಪ್ರಮುಖವಾದುದು ಮತ್ತು ಅದರ ತಿರುವುಗಳಷ್ಟೇ ರುಚಿಕರವಾಗಿರುತ್ತದೆ. ಅನೇಕರಿಗೆ ಇದನ್ನು ಮನೆಯಲ್ಲಿ ತಯಾರಿಸುವುದು ಕಷ್ಟವೆನಿಸುತ್ತದೆ. ಆದರೆ, ಕೆಲವು ಸರಳ ಸಲಹೆಗಳೊಂದಿಗೆ, ಮನೆಯಲ್ಲಿಯೇ ಪರಿಪೂರ್ಣ ಜಿಲೇಬಿ ಮಾಡಬಹುದು. ಕೇವಲ ನಿಮಿಷಗಳಲ್ಲಿ ರುಚಿಕರ ಜಿಲೇಬಿ (Jalebi Recipe) ತಯಾರಿಸುವ ವಿಧಾನ ಇಲ್ಲಿದೆ. ಈ ಲೇಖನದಲ್ಲಿ ಜಿಲೇಬಿ ಮಾಡಲು ಬೇಕಾದ ಪದಾರ್ಥಗಳು ಮತ್ತು ತಯಾರಿಸುವ ಹಂತಗಳನ್ನು ತಿಳಿಸಲಾಗಿದೆ.

ಸಿಹಿ ತಿಂಡಿಗಳಲ್ಲಿ ಜಿಲೇಬಿಗೆ ತನ್ನದೇ ಆದ ವಿಶೇಷ ಸ್ಥಾನವಿದೆ. ಬಾಯಲ್ಲಿಟ್ಟರೆ ಕರಗುವ ಈ ಸಿಹಿ ಖಾದ್ಯ ಮಕ್ಕಳಿಂದ ಹಿಡಿದು ಹಿರಿಯರವರೆಗೂ ಎಲ್ಲರಿಗೂ ಅಚ್ಚುಮೆಚ್ಚು. ರಸ್ತೆ ಬದಿಯ ಅಂಗಡಿಗಳಿಂದ ಹಿಡಿದು ದೊಡ್ಡ ಸಮಾರಂಭಗಳವರೆಗೂ ಜಿಲೇಬಿ ಜನಪ್ರಿಯವಾಗಿದೆ. ದೀಪಾವಳಿಯಂತಹ (Diwali) ಹಬ್ಬಗಳಲ್ಲಿ ಜಿಲೇಬಿ ಪ್ರತಿಯೊಬ್ಬರ ಆಕರ್ಷಣೆಯಾಗಿರುತ್ತವೆ. ಸಾಮಾನ್ಯವಾಗಿ ಮಾಡುವ ಸಿಹಿತಿಂಡಿಗಳ ಹೊರತಾಗಿ, ದೀಪಾವಳಿಗೆ ಸಾಂಪ್ರದಾಯಿಕ ಸಿಹಿಯಾದ ಜಿಲೇಬಿಯನ್ನು (Homemade Jalebi) ಯಾರೂ ಮರೆಯಲು ಸಾಧ್ಯವಿಲ್ಲ.

ದೀಪಾವಳಿಗೆ ಜಿಲೇಬಿ ಏಕೆ ತಯಾರಿಸಲಾಗುತ್ತದೆ?

ಜಿಲೇಬಿಯು ಭಾರತೀಯ ಸಾಂಪ್ರದಾಯಿಕ ಸಿಹಿ ತಿಂಡಿ. ದೀಪಾವಳಿಯಂದು ಸಂಬಂಧಗಳಲ್ಲಿ ಸಿಹಿ ಮತ್ತು ಪ್ರೀತಿಯನ್ನು ತುಂಬಲು ಇದನ್ನು ತಯಾರಿಸಲಾಗುತ್ತದೆ. ಇದು ಹಬ್ಬದ ವಾತಾವರಣಕ್ಕೆ ಸಂತೋಷ ಮತ್ತು ಸೌಹಾರ್ದತೆಯನ್ನು ತರುತ್ತದೆ. ಇಂದು ಕಪ್ಪು, ಹಳದಿ, ಕೆಂಪು, ಕೇಸರಿ ಬಣ್ಣಗಳಲ್ಲಿ ಮತ್ತು ವಿಭಿನ್ನ ಆಕಾರಗಳಲ್ಲಿ ಜಿಲೇಬಿ ಲಭ್ಯವಿದೆ. ಹಬ್ಬಗಳು, ಶುಭ ಸಮಾರಂಭಗಳಲ್ಲಿ ಇದರ ಅಸ್ತಿತ್ವ ಅನಿವಾರ್ಯ. ಅದರಲ್ಲೂ ಉತ್ತರ ಭಾರತದಲ್ಲಿ ಬೆಳಗಿನ ತಿಂಡಿಗೆ ಜಿಲೇಬಿ ಸವಿಯುವುದು ಸಾಮಾನ್ಯ.

ಜಿಲೇಬಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಮೈದಾ ಹಿಟ್ಟು - 1 ಕಪ್
• ಸಕ್ಕರೆ - 2 ಕಪ್
• ನೀರು - 1 ಕಪ್ (ಹಿಟ್ಟು ಕಲಸಲು)
• ನಿಂಬೆ ರಸ - 1 ಸ್ಪೂನ್
• ಮೊಸರು - ½ ಕಪ್
• ತುಪ್ಪ ಅಥವಾ ಎಣ್ಣೆ (ಕರಿಯಲು) - 1 ಸ್ಪೂನ್
• ಏಲಕ್ಕಿ ಪುಡಿ - 1/4 ಸ್ಪೂನ್
• ಕೇಸರಿ ಬಣ್ಣ
• ಕಾರ್ನ್‌ಫ್ಲೋರ್ - 2 ಟೇಬಲ್ ಚಮಚ

ಜಿಲೇಬಿ ಹಿಟ್ಟನ್ನು ಹೇಗೆ ತಯಾರಿಸುವುದು?

ಮೈದಾ, ಕಾರ್ನ್‌ಫ್ಲೋರ್, ಮೊಸರು ಮತ್ತು ಅರಿಶಿನವನ್ನು ಸೇರಿಸಿ ನಯವಾದ ಹಿಟ್ಟನ್ನು ತಯಾರಿಸಿ. ಸ್ವಲ್ಪ ಸ್ವಲ್ಪ ನೀರು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಹಿಟ್ಟನ್ನು 8-10 ಗಂಟೆಗಳ ಕಾಲ ಅಥವಾ ರಾತ್ರಿಯಿಡೀ ಹುದುಗಲು ಮುಚ್ಚಿಡಿ. ಇದು ಜಿಲೇಬಿಗೆ ಉತ್ತಮ ರುಚಿ ಮತ್ತು ವಿನ್ಯಾಸವನ್ನು ನೀಡುತ್ತದೆ.

ಸಕ್ಕರೆ ಪಾಕವನ್ನು ಹೇಗೆ ತಯಾರಿಸುವುದು?

ಒಂದು ಪಾತ್ರೆಯಲ್ಲಿ ಸಕ್ಕರೆ ಮತ್ತು ನೀರನ್ನು ಹಾಕಿ, ಸಣ್ಣ ಉರಿಯಲ್ಲಿ ಕುದಿಸಿ. ಒಂದು ಎಳೆ ಪಾಕ ಬಂದ ನಂತರ, ಸಕ್ಕರೆ ಗಟ್ಟಿಯಾಗುವುದನ್ನು ತಡೆಯಲು ನಿಂಬೆ ರಸವನ್ನು ಸೇರಿಸಿ. ಇದು ಪಾಕಕ್ಕೆ ಹೊಳಪನ್ನು ನೀಡುತ್ತದೆ.

ಜಿಲೇಬಿಯನ್ನು ಹೇಗೆ ಕರಿಯುವುದು?

ಹುದುಗಿದ ಹಿಟ್ಟನ್ನು ಪೈಪಿಂಗ್ ಬ್ಯಾಗ್ ಅಥವಾ ನಳಿಕೆಯ ಬಾಟಲಿಗೆ ತುಂಬಿಸಿ. ಬಿಸಿಯಾದ ಎಣ್ಣೆ ಅಥವಾ ತುಪ್ಪದಲ್ಲಿ ವೃತ್ತಾಕಾರದ ಜಿಲೇಬಿಗಳನ್ನು ಮಾಡಿ. ಅವು ಗೋಲ್ಡನ್ ಬ್ರೌನ್ ಆಗುವವರೆಗೆ ಕರಿಯಿರಿ. ನಂತರ ತಕ್ಷಣವೇ ಬಿಸಿ ಸಕ್ಕರೆ ಪಾಕದಲ್ಲಿ 1-2 ನಿಮಿಷಗಳ ಕಾಲ ನೆನೆಸಿ.

ಜಿಲೇಬಿ ತಯಾರಿಸುವ ಮತ್ತೊಂದು ವಿಧಾನ

• ಮೊದಲು ಸಕ್ಕರೆ ಪಾಕ ತಯಾರಿಸಿ. ಒಂದು ಪಾತ್ರೆಯಲ್ಲಿ ಸಕ್ಕರೆ ಮತ್ತು ನೀರು ಹಾಕಿ ಕುದಿಸಿ. ಇದಕ್ಕೆ ಏಲಕ್ಕಿ ಪುಡಿ ಮತ್ತು ನಿಂಬೆ ರಸ ಸೇರಿಸಿ.

• ಈಗ ಒಂದು ಬೌಲ್‌ಗೆ ಮೈದಾ ಹಿಟ್ಟು, ಮೊಸರು ಮತ್ತು ಕೇಸರಿ ಬಣ್ಣ ಸೇರಿಸಿ. ಇದಕ್ಕೆ ನೀರು ಸೇರಿಸಿ ಹಿಟ್ಟು ಕಲಸಿಕೊಳ್ಳಿ.

• ಹಿಟ್ಟು ಕಲಸುವಾಗ ಅಡಿಗೆ ಸೋಡಾ ಸೇರಿಸಿ. ಸ್ವಲ್ಪ ತುಪ್ಪ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿದರೆ ಹಿಟ್ಟು ಸಿದ್ಧ.

• ಈಗ ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ. ಜಿಲೇಬಿ ಹಿಟ್ಟನ್ನು ಪ್ಲಾಸ್ಟಿಕ್ ಕವರ್‌ಗೆ ಅಥವಾ ಬಟ್ಟೆಗೆ ಹಾಕಿ ತುದಿಯಲ್ಲಿ ಸಣ್ಣ ರಂಧ್ರ ಮಾಡಿಕೊಳ್ಳಿ.

• ಬಿಸಿಯಾದ ಎಣ್ಣೆಯಲ್ಲಿ ವೃತ್ತಾಕಾರವಾಗಿ ಜಿಲೇಬಿಗಳನ್ನು ಹಾಕಿ. ಎರಡೂ ಕಡೆ ಚಿನ್ನದ ಬಣ್ಣ ಬರುವವರೆಗೆ ಹುರಿಯಿರಿ.

• ಈ ಜಿಲೇಬಿಗಳನ್ನು ಸಕ್ಕರೆ ಪಾಕದಲ್ಲಿ ಅದ್ದಿ. ಒಂದೆರಡು ನಿಮಿಷಗಳ ಕಾಲ ಪಾಕದಲ್ಲಿ ನೆನೆಸಿ. ಇಷ್ಟು ಮಾಡಿದರೆ, ಬಿಸಿಬಿಸಿ ಜಿಲೇಬಿ ಸಿದ್ಧ.