ತೂಕ ಇಳಿಸಬೇಕೆ? ಈ ಓಟ್ಸ್ ಮಸಾಲ ದೋಸೆ ಟ್ರೈ ಮಾಡಿ! ಇದಕ್ಕಿಂತ ಬೆಸ್ಟ್ ಇನ್ನೊಂದಿಲ್ಲ

10 ನಿಮಿಷದಲ್ಲಿ ರೆಡಿ..! ರುಬ್ಬುವ ಕೆಲಸವೇ ಇಲ್ಲ.. ಆರೋಗ್ಯಕರ ತಿಂಡಿಗೆ ಇದಕ್ಕಿಂತ ಬೆಸ್ಟ್ ಇನ್ನೊಂದಿಲ್ಲ. ತೂಕ ಇಳಿಸಬೇಕು ಅಂದ್ರೆ ಈ ಓಟ್ಸ್ ಮಸಾಲ ದೋಸೆ ಟ್ರೈ ಮಾಡಿ. ಹೌದು, ಸಾಂಪ್ರದಾಯಿಕ ದೋಸೆ ತಯಾರಿಕೆ ಸಮಯ ತೆಗೆದುಕೊಳ್ಳುತ್ತದೆ. ಅಕ್ಕಿ-ಬೇಳೆ ನೆನೆಸಿ, ರುಬ್ಬಿ, ಹಿಟ್ಟು ಹುದುಗುವವರೆಗೆ ಕಾಯುವ ಜಂಜಾಟ ಹಲವರಿಗೆ ಕಷ್ಟಕರ. ಆದರೆ, ಬೆಳಗಿನ ಅವಸರದಲ್ಲಿ ಪೌಷ್ಟಿಕ ಮತ್ತು ರುಚಿಕರವಾದ ತಿಂಡಿ ಹುಡುಕುತ್ತಿರುವವರಿಗೆ 'ಓಟ್ಸ್ ಮಸಾಲ ದೋಸೆ' (Oats Masala Dosa) ಅತ್ಯುತ್ತಮ ಪರ್ಯಾಯವಾಗಿದೆ.

ಕೇವಲ ಹತ್ತು ನಿಮಿಷಗಳಲ್ಲಿ ಸಿದ್ಧವಾಗುವ ಈ ದೋಸೆಯಲ್ಲಿ, ನಾರಿನಂಶ ಸಮೃದ್ಧವಾಗಿದೆ. ಇದು ತೂಕ ಇಳಿಸಲು ಬಯಸುವವರಿಗೆ ಹಾಗೂ ಸಕ್ಕರೆ ಕಾಯಿಲೆ ಇರುವವರಿಗೆ ಬಹಳ ಪ್ರಯೋಜನಕಾರಿ ಆಹಾರವಾಗಿದೆ. ಅಕ್ಕಿ-ಬೇಳೆ ನೆನೆಸಿ ರುಬ್ಬುವ ಪ್ರಕ್ರಿಯೆ ಇಲ್ಲದೆ, ಕೇವಲ ಹತ್ತು ನಿಮಿಷಗಳಲ್ಲಿ ಗರಿಗರಿಯಾದ ಓಟ್ಸ್ ಮಸಾಲ ದೋಸೆ ಮಾಡಿಕೊಳ್ಳಬಹುದು.

Photo Credit: ಸಂಗ್ರಹ ಚಿತ್ರ

ಮುಖ್ಯವಾಗಿ, ಇದು ತೂಕ ಇಳಿಸಲು ಪ್ರಯತ್ನಿಸುವವರಿಗೆ ಮತ್ತು ಬೆಳಗಿನ ತಿಂಡಿಗೆ ಆರೋಗ್ಯಕರ ಆಯ್ಕೆ ಹುಡುಕುವವರಿಗೆ ಆದರ್ಶ ಸೂತ್ರವಾಗಿದೆ. ಹಾಗಾದರೆ, ಈ ಪೌಷ್ಟಿಕಾಂಶ ಭರಿತ ಓಟ್ಸ್ ಮಸಾಲ ದೋಸೆಯನ್ನು ತಯಾರಿಸಲು ಅಗತ್ಯವಿರುವ ಸಾಮಗ್ರಿಗಳು ಮತ್ತು ಮಾಡುವ ಸರಳ ವಿಧಾನವನ್ನು (Oats Masala Dosa Recipe) ಈ ಲೇಖನದಲ್ಲಿ ತಿಳಿಯೋಣ ಬನ್ನಿ.

ಓಟ್ಸ್ ಮಸಾಲ ದೋಸೆಗೆ ಬೇಕಾಗುವ ಸಾಮಗ್ರಿಗಳು

ದೋಸೆ ಹಿಟ್ಟಿಗೆ

• ಓಟ್ಸ್
• ರವೆ (ಚಿರೋಟಿ ರವೆ)
• ಅಕ್ಕಿ ಹಿಟ್ಟು
• ಮೊಸರು
• ರುಚಿಗೆ ತಕ್ಕಷ್ಟು ಉಪ್ಪು
• ನೀರು

ಮಸಾಲಾ ಪಲ್ಯಕ್ಕೆ

• ಆಲೂಗಡ್ಡೆ (ಬೇಯಿಸಿ ಕಿವುಚಿದ್ದು)
ಈರುಳ್ಳಿ
• ಟೊಮೆಟೊ
• ಹಸಿ ಮೆಣಸಿನಕಾಯಿ
• ಶುಂಠಿ (ತುರಿದಿದ್ದು ಸ್ವಲ್ಪ)
• ಸಾಸಿವೆ
• ಜೀರಿಗೆ
• ಕರಿಬೇವು

ಒಗ್ಗರಣೆಗೆ

• ಕೊತ್ತಂಬರಿ ಸೊಪ್ಪು
• ಎಣ್ಣೆ (ಅಗತ್ಯಕ್ಕೆ ತಕ್ಕಂತೆ)

ಓಟ್ಸ್ ಮಸಾಲಾ ದೋಸೆ ತಯಾರಿಸುವ ವಿಧಾನ

- ಮೊದಲು ಓಟ್ಸ್‌ ಅನ್ನು ಮಿಕ್ಸಿ ಜಾರ್‌ನಲ್ಲಿ ನುಣ್ಣಗೆ ಪುಡಿ ಮಾಡಿಕೊಳ್ಳಿ.

- ನಂತರ, ಒಂದು ದೊಡ್ಡ ಪಾತ್ರೆಯಲ್ಲಿ ಈ ಓಟ್ಸ್ ಪುಡಿ, ರವೆ, ಅಕ್ಕಿ ಹಿಟ್ಟು ಮತ್ತು ಮೊಸರನ್ನು ಹಾಕಿ ಉತ್ತಮವಾಗಿ ಮಿಶ್ರಣ ಮಾಡಿ. ಇದಕ್ಕೆ ನಿಧಾನವಾಗಿ ನೀರು ಸೇರಿಸುತ್ತಾ ದೋಸೆ ಹಿಟ್ಟಿನ ಹದಕ್ಕೆ (ಹೆಚ್ಚು ಗಟ್ಟಿಯಾಗದ, ಹೆಚ್ಚು ತೆಳ್ಳಗಾಗದ) ಕಲಸಿಕೊಳ್ಳಿ.

- ರವೆ ನೀರನ್ನು ಹೀರಿಕೊಳ್ಳಲು ಈ ಹಿಟ್ಟನ್ನು 10 ರಿಂದ 15 ನಿಮಿಷಗಳ ಕಾಲ ಮುಚ್ಚಿಡಿ.

- ಈಗ ಆಲೂಗಡ್ಡೆ ಮಸಾಲಾ ತಯಾರಿಸಿಕೊಳ್ಳಿ. ಒಂದು ಬಾಣಲೆಯಲ್ಲಿ ಎರಡು ಚಮಚ ಎಣ್ಣೆ ಹಾಕಿ ಬಿಸಿ ಮಾಡಿ.

- ಅದಕ್ಕೆ ಸಾಸಿವೆ, ಜೀರಿಗೆ, ಹಸಿಮೆಣಸಿನಕಾಯಿ, ಕರಿಬೇವು, ಮತ್ತು ತುರಿದ ಶುಂಠಿ ಸೇರಿಸಿ ಒಗ್ಗರಣೆ ತಯಾರಿಸಿ.

- ನಂತರ ಹೆಚ್ಚಿದ ಈರುಳ್ಳಿ ಸೇರಿಸಿ, ಅದು ಹೊಂಬಣ್ಣಕ್ಕೆ ತಿರುಗುವವರೆಗೆ ಹುರಿಯಿರಿ. ಈಗ ಹೆಚ್ಚಿದ ಟೊಮೆಟೊ ಹಾಗೂ ಅರಿಶಿನ ಪುಡಿ ಸೇರಿಸಿ, ಟೊಮೆಟೊ ಮೆತ್ತಗಾಗುವವರೆಗೆ ಚೆನ್ನಾಗಿ ಬೇಯಿಸಿ.

- ಕೊನೆಯದಾಗಿ, ಬೇಯಿಸಿ ಕಿವುಚಿದ ಆಲೂಗಡ್ಡೆ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಕೊತ್ತಂಬರಿ ಸೊಪ್ಪನ್ನು ಸೇರಿಸಿ ಮಿಶ್ರಣ ಮಾಡಿದರೆ ದೋಸೆಗೂಡುವ ಮಸಾಲೆ ಸಿದ್ಧ.

- ಈಗ ದೋಸೆ ಸುಡುವುದು. ದೋಸೆ ತಯಾರಿಸಲು, ಹಂಚನ್ನು ಬಿಸಿ ಮಾಡಿ, ಅದರ ಮೇಲೆ ಸ್ವಲ್ಪ ಎಣ್ಣೆ ಸವರಿ.

- ನಂತರ, ಸಿದ್ಧಪಡಿಸಿದ ಓಟ್ಸ್ ಹಿಟ್ಟನ್ನು ಹಂಚಿನ ಮೇಲೆ ಹಾಕಿ ತೆಳ್ಳಗೆ ಹರಡಿ. ಮಧ್ಯಮ ಉರಿಯಲ್ಲಿ ದೋಸೆ ಎರಡೂ ಬದಿಯಲ್ಲಿ ಕೆಂಪಾಗಿ, ಗರಿಗರಿಯಾಗುವವರೆಗೆ ಬೇಯಿಸಿ.

- ದೋಸೆ ಬೆಂದ ನಂತರ, ಅದರ ಮಧ್ಯದಲ್ಲಿ ಆಲೂಗಡ್ಡೆ ಪಲ್ಯವನ್ನು ಇರಿಸಿ, ದೋಸೆಯನ್ನು ಮಡಚಿ ತೆಗೆಯಿರಿ.

- ಬಿಸಿಬಿಸಿಯಾದ ಓಟ್ಸ್ ಮಸಾಲ ದೋಸೆಯನ್ನು ತೆಂಗಿನಕಾಯಿ ಚಟ್ನಿ ಅಥವಾ ಟೊಮೆಟೊ ಚಟ್ನಿ ಜೊತೆಗೆ ಸವಿಯಲು ನೀಡಿ.

- ಈ ಹಗುರವಾದ ಮತ್ತು ಶಕ್ತಿಯುತವಾದ ಉಪಾಹಾರವು ಮಕ್ಕಳಿಗೆ ಮತ್ತು ಡಯಟ್ ಪಾಲಿಸುವವರಿಗೆ ಸೂಕ್ತವಾಗಿದೆ.