ಹಿಟ್ಟು ರುಬ್ಬುವ ಕೆಲಸವೇ ಇಲ್ಲ! 10 ನಿಮಿಷದಲ್ಲಿ ಮಾಡಿ ಈ ಗರಿಗರಿ ದೋಸೆ.. ತಿಂಡಿಗೂ ಸೈ, ಊಟಕ್ಕೂ ಜೈ

ಹಿಟ್ಟು ರುಬ್ಬುವ ತಲೆನೋವಿಲ್ಲ..! 10 ನಿಮಿಷದಲ್ಲಿ ಮಾಡಿ ಗರಿಗರಿಯಾದ ದೋಸೆ! ಬೆಳಗ್ಗಿನ ಗಡಿಬಿಡಿಗೆ ಪರ್ಫೆಕ್ಟ್ ಬ್ರೇಕ್‌ಫಾಸ್ಟ್. ರವೆ (Rava), ಈರುಳ್ಳಿ (Onion) ಮತ್ತು ಟೊಮೆಟೊ (Tomato) ಬಳಸಿ ಮಾಡುವ ಸುಲಭ ವಿಧಾನ ಇಲ್ಲಿದೆ. ಹೌದು, ಸಾಂಪ್ರದಾಯಿಕ ದೋಸೆ ತಯಾರಿಕೆಗೆ ಸಾಮಾನ್ಯವಾಗಿ ಅಕ್ಕಿ ಮತ್ತು ಉದ್ದಿನಬೇಳೆಯನ್ನು ನೆನೆಸಿ, ರುಬ್ಬಿ, ರಾತ್ರಿಯಿಡೀ ಹುದುಗಲು ಬಿಡುವುದು ಅಗತ್ಯ.

ಆದರೆ, ಆಧುನಿಕ ಜೀವನಶೈಲಿಯಲ್ಲಿ ಸಮಯದ ಕೊರತೆಯಿದ್ದರೆ ಅಥವಾ ಅನಿರೀಕ್ಷಿತವಾಗಿ ದೋಸೆ ತಿನ್ನಲು ಬಯಸಿದಾಗ 'ರವಾ ಈರುಳ್ಳಿ ಟೊಮೆಟೊ ದೋಸೆ' (Rava Onion Tomato Dosa) ಅತ್ಯುತ್ತಮ ಆಯ್ಕೆ. ಇದು ಕೇವಲ 15-20 ನಿಮಿಷಗಳಲ್ಲಿ ತಯಾರಾಗುವ ತ್ವರಿತ ಉಪಹಾರ. ರವೆಯ ಗರಿಗರಿತನ, ಈರುಳ್ಳಿಯ ಸಿಹಿ ಮತ್ತು ಟೊಮೆಟೊದ ಹದವಾದ ಹುಳಿ ಮಿಶ್ರಿತ ರುಚಿ ಈ ದೋಸೆಯನ್ನು ಹೋಟೆಲ್‌ನಲ್ಲಿ ದೊರೆಯುವ ದೋಸೆಗಿಂತಲೂ ಹೆಚ್ಚು ಸ್ವಾದಿಷ್ಟವನ್ನಾಗಿಸುತ್ತದೆ.

Photo Credit: ಸಂಗ್ರಹ ಚಿತ್ರ

ರುಬ್ಬುವ, ಹದಬರಿಸುವ ಜಂಜಾಟ ಇಲ್ಲದೆ ರವಾ ಈರುಳ್ಳಿ ಟೊಮೆಟೊ ದೋಸೆಯನ್ನು ಸುಲಭವಾಗಿ ತಯಾರಿಸಬಹುದು. ಇದನ್ನು ಮಾಡಲು ಬೇಕಾಗುವ ಸಾಮಗ್ರಿಗಳು ಮತ್ತು ಸರಳ ವಿಧಾನ (Rava Onion Tomato Dosa Recipe) ಇಲ್ಲಿದೆ.

ದೋಸೆಗೆ ಬೇಕಾಗುವ ಸಾಮಗ್ರಿಗಳು

• ರವಾ (ಚಿರೋಟಿ ರವೆ ಅಥವಾ ಉಪ್ಪಿಟ್ಟು ರವೆ)
• ಅಕ್ಕಿ ಹಿಟ್ಟು
• ಮೈದಾ ಹಿಟ್ಟು
• ಮೊಸರು
• ಈರುಳ್ಳಿ
• ಟೊಮೆಟೊ
• ಹಸಿಮೆಣಸಿನಕಾಯಿ
• ಶುಂಠಿ
• ಕೊತ್ತಂಬರಿ ಸೊಪ್ಪು
• ಜೀರಿಗೆ
• ಕಾಳುಮೆಣಸಿನ ಪುಡಿ
• ರುಚಿಗೆ ತಕ್ಕಷ್ಟು ಉಪ್ಪು
• ನೀರು
• ಎಣ್ಣೆ ಅಥವಾ ತುಪ್ಪ

ದೋಸೆ ತಯಾರಿಸುವ ವಿಧಾನ

- ಒಂದು ದೊಡ್ಡ ಪಾತ್ರೆಯಲ್ಲಿ ರವೆ, ಅಕ್ಕಿ ಹಿಟ್ಟು, ಮೈದಾ ಹಿಟ್ಟು ಮತ್ತು ಮೊಸರನ್ನು ಸೇರಿಸಿ. ಗಂಟುಗಳಾಗದಂತೆ ನೋಡಿಕೊಳ್ಳುತ್ತಾ, ಸ್ವಲ್ಪ ಸ್ವಲ್ಪವಾಗಿ ನೀರು ಬೆರೆಸುತ್ತಾ ಚೆನ್ನಾಗಿ ಕಲಸಿ.

- ಈಗ ಸಿದ್ಧವಾಗಿರುವ ತೆಳುವಾದ ಮಿಶ್ರಣಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಟೊಮೆಟೊ, ಹಸಿಮೆಣಸಿನಕಾಯಿ, ತುರಿದ ಶುಂಠಿ, ಜೀರಿಗೆ, ಕಾಳುಮೆಣಸಿನ ಪುಡಿ, ರುಚಿಗೆ ತಕ್ಕಷ್ಟು ಉಪ್ಪು ಹಾಗೂ ಕೊತ್ತಂಬರಿ ಸೊಪ್ಪನ್ನು ಸೇರಿಸಿ. ಎಲ್ಲವನ್ನೂ ಸಮವಾಗಿ ಮಿಕ್ಸ್ ಮಾಡಿ.

- ಮಿಶ್ರಣವನ್ನು 10 ರಿಂದ 15 ನಿಮಿಷಗಳ ಕಾಲ ಮುಚ್ಚಿರಿಸಿ. ಇದು ರವೆಯು ನೀರನ್ನು ಹೀರಲು ಮತ್ತು ಹಿಟ್ಟು ಸ್ವಲ್ಪ ಉಬ್ಬಲು ಸಹಾಯ ಮಾಡುತ್ತದೆ. 15 ನಿಮಿಷಗಳ ನಂತರ ಹಿಟ್ಟು ಗಟ್ಟಿಯಾದಂತೆ ಕಂಡರೆ, ದೋಸೆ ಹಾಕುವ ಮೊದಲು ಮತ್ತಷ್ಟು ನೀರು ಸೇರಿಸಿ ಬೇಕಾದ ತೆಳು ಹದಕ್ಕೆ ತನ್ನಿ.

- ದೋಸೆ ಹಂಚನ್ನು ಗರಿಷ್ಠ ಉರಿಯಲ್ಲಿ ಚೆನ್ನಾಗಿ ಬಿಸಿ ಮಾಡಿ. ನಂತರ ಅದರ ಮೇಲೆ ಸ್ವಲ್ಪ ಎಣ್ಣೆ ಸವರಿ.

- ರವಾ ದೋಸೆ ಹಾಕುವ ವಿಧಾನ ವಿಶಿಷ್ಟವಾಗಿದೆ. ಸೌಟಿನಿಂದ ಹಿಟ್ಟು ತೆಗೆದುಕೊಂಡು ಹಂಚಿನ ಅಂಚಿನಿಂದ ಸುರಿಯುತ್ತಾ ಮಧ್ಯಕ್ಕೆ ಬನ್ನಿ. ಹಂಚಿನ ಮೇಲೆ ಅಲ್ಲಲ್ಲಿ ಜಾಲರಿಯಂತಹ ವಿನ್ಯಾಸ ಮೂಡುವಂತೆ ಹಿಟ್ಟು ಸುರಿಯುವುದು ಮುಖ್ಯ.

- ದೋಸೆಯ ಮೇಲೆ ಮತ್ತು ಸುತ್ತಲೂ ಒಂದು ಚಮಚ ಎಣ್ಣೆ ಅಥವಾ ತುಪ್ಪ ಹಾಕಿ. ಉರಿಯನ್ನು ಮಧ್ಯಮ ಹದದಲ್ಲಿಟ್ಟು, ದೋಸೆ ಕೆಂಪಗಾಗಿ, ಅಂಚುಗಳು ಹಂಚಿನಿಂದ ತಾವಾಗಿಯೇ ಬೇರ್ಪಡುವವರೆಗೆ ಬೇಯಿಸಿ.

- ರವಾ ದೋಸೆಯನ್ನು ಎರಡೂ ಬದಿ ಬೇಯಿಸುವ ಅಗತ್ಯವಿಲ್ಲ, ಒಂದೇ ಬದಿಯಲ್ಲಿ ಪರಿಪೂರ್ಣವಾಗಿ ಬೇಯುತ್ತದೆ.

ಯಾವ ಕಾಂಬಿನೇಷನ್ ಬೆಸ್ಟ್?

ಬಿಸಿಬಿಸಿ ಹಾಗೂ ಗರಿಗರಿಯಾದ ಈ ರವಾ ಈರುಳ್ಳಿ ಟೊಮೆಟೊ ದೋಸೆಯನ್ನು ಕೆಂಪು ಚಟ್ನಿ, ತೆಂಗಿನಕಾಯಿ ಚಟ್ನಿ ಅಥವಾ ಬಿಸಿಬಿಸಿ ಸಾಂಬಾರ್ ಜೊತೆ ಸವಿಯುವುದು ಅದ್ಭುತವಾಗಿರುತ್ತದೆ. ಇದು ಹೊಟ್ಟೆಗೆ ಸುಲಭವಾಗಿ ಜೀರ್ಣವಾಗಿ, ನಾಲಿಗೆಗೆ ರುಚಿಕರ ಅನುಭವ ನೀಡುತ್ತದೆ.