ಗೋಧಿಯಿಂದ ಮಾಡುವ ಸಿಹಿ ಬೋಂಡಾ, ತಿನ್ನಲು ಸೂಪರ್ ಆಗಿರುತ್ತೆ

ಕೆಲವೊಮ್ಮೆ ಏನೋ ಸಿಹಿ ತಿನ್ನಬೇಕೆನಿಸುತ್ತದೆ ಅಂಥ ಸಂದರ್ಭದಲ್ಲಿ ನೀವು ಈ ರೆಸಿಪಿ ಟ್ರೈ ಮಾಡಬಹುದು,ಇದು ತುಂಬಾ ಸುಲಭದ ರೆಸಿಪಿಯಾಗಿದೆ. ಟೀ ಜೊತೆ ಸವಿಯಲು ಸೂಪರ್ ಆಗಿರುತ್ತದೆ. ಇನ್ನು ಚಿಕ್ಕ ಟ್ರಾವೆಲ್‌ ಮಾಡುವಾಗ ಇದನ್ನು ಮಾಡಿ ಕೊಂಡೊಯ್ಯಬಹುದು, ಒಂದೆರಡು ದಿನ ಇಟ್ಟು ಕೂಡ ಬಳಸಬಹುದು. ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಗ್ರಿ
ಗೋಧಿ ಹಿಟ್ಟು ಒಂದೂವರೆ ಕಪ್‌
ಬೆಲ್ಲ ಅರ್ಧಕಪ್‌
ಕಲೆಸಲು ನೀರು
1/4 ಚಮಚ ಅಡುಗೆ ಸೋಡಾ
1/2 ಚಮಚ ಸೋಂಪು
2 ಏಲಕ್ಕಿ
1 ಕಪ್‌ ಎಣ್ಣೆ
ತೆಂಗಿನಕಾಯಿ ಹೋಳು 1/4 ಚಮಚ

ಮಾಡುವ ವಿಧಾನ

• ಒಂದು ಕಪ್‌ ನೀರನ್ನು ಪಾತ್ರೆಗೆ ಹಾಕಿ ಕಾಯಿಸಿ
• ನಂತರ ಬೆಲ್ಲ ಹಾಕಿ ಕರಗಿಸಿ
• ಬೆಲ್ಲದ ಪಾಕ ರೆಡಿಯಾದ ಮೇಲೆ ನೀವು ಉರಿಯಿಂದ ಇಳಿಸಿ ಇಡಿ, ನಂತರ ಪಾಕ ತಣ್ಣಗಾದ ಮೇಲೆ ಗೋಧಿ ಹಿಟ್ಟಿಗೆ ಹಾಕಿ ಕಲೆಸಿ
• ಸೋಡಾ ಸೇರಿಸಿ
• ಹಿಟ್ಟು ತುಂಬಾ ನೀರು-ನೀರಾಗಿರಬಹುದು, ಗಟ್ಟಿಯಾಗಿಯೂ ಇರಬಾರದು, ಹಿಟ್ಟಿಗೆ ಸೋಂಪು, ಏಲಕ್ಕಿ ಪುಡಿ, ತೆಂಗಿನ ಕಾಯಿ ಹೋಳು ಅಥವಾ ತೆಂಗಿನ ತುರಿ ಸೇರಿಸಿ ಮಿಕ್ಸ್ ಮಾಡಿ
• ಪ್ಯಾನ್‌ಗೆ ಎಣ್ಣೆ ಹಾಕಿ ಕುದಿಸಿ
• ಎಣ್ಣೆ ಕಾದಾಗ ಹಿಟ್ಟು ಹಾಕಿ, ಹಿಟ್ಟು ಕಂದು ಬಣ್ಣಕ್ಕೆ ಬರುವಾಗ ತೆಗೆಯಿರಿ. ಇಷ್ಟು ಮಾಡಿದರೆ ಸಿಹಿ ಬೋಂಡಾ ರೆಡಿ.
• ಸಿಹಿ ಇಷ್ಟವಿಲ್ಲ ಗೋಧಿಯಿಂದ ಖಾರ ಬೋಂಡಾ ಮಾಡಬೇಕೆಂದು ಬಯಸುವುದಾದರೆ
  ಒಂದು ಕಪ್‌ ಗೋಧಿ ಹಿಟ್ಟು
  ಒಂದು ಚಿಕ್ಕ ಈರುಳ್ಳಿ
  ತುರಿದ ಶುಂಠಿ 1 ಚಮಚ
  ಹಸಿ ಮೆಣಸು 1-2
  ಸ್ವಲ್ಪ ಕೊತ್ತಂಬರಿ ಸೊಪ್ಪು
  ಸ್ವಲ್ಪ ಕರಿಬೇವು
  ರುಚಿಗೆ ತಕ್ಕ ಉಪ್ಪು
  1/2 ಚಮಚ ಸಕ್ಕರೆ
  1/4 ಚಮಚ ಅಡುಗೆ ಸೋಡಾ
  1/2 ಕಪ್ ಅಕ್ಕಿ ಹಿಟ್ಟು
  1 ಕಪ್‌ ಎಣ್ಣೆ

ಮಾಡುವ ವಿಧಾನ
ಒಂದು ಬೌಲ್‌ನಲ್ಲಿ ಅಕ್ಕಿ ಹಿಟ್ಟು, ಗೋಧಿ ಹಿಟ್ಟು ಹಾಕಿ, ಉಳಿದ ಸಾಮಗ್ರಿ ಹಾಕಿ ನೀರು ಹಾಕಿ ಮಿಕ್ಸ್ ಮಾಡಿ,
ಎಣ್ಣೆ ಕಾಯಿಸಲು ಇಡಿ, ಕಾದ ಎಣ್ಣೆಗೆ ಹಿಟ್ಟು ಹಾಕಿ ಕಂದು ಬಣ್ಣ ಬರುವಾಗ ತೆಗೆಯಿರಿ.
ರೆಡಿಯಾದ ಬೋಂಡಾವನ್ನು ಟೀ ಜೊತೆ ಸವಿಯಿರಿ.