ತೊಂಡೆಕಾಯಿ ಹೀಗೆ ಮಾಡಿದರೆ ಅಬ್ಬಾಬ್ಬ! ಎಷ್ಟೊಂದು ರುಚಿ ಗೊತ್ತಾ?

ನೀವು ತೊಂಡೆಕಾಯಿಯಿಂದ ಹಲವಾರು ಬಗೆಯ ಖಾದ್ಯ ಮಾಡಿರಬಹುದು, ಆದರೆ ಅದರಿಂದ ಒಂದು ಸ್ಪೆಷಲ್ ಫ್ರೈ ಮಾಡಿದ್ದೀರಾ? ತೊಂಡೆಕಾಯಿ ತರಕಾರಿ ಕೆಲವರಿಗೆ ಪೇವರೆಟ್ ಆದರೆ ಇನ್ನು ಕೆಲವರು ಇಷ್ಟಡಲ್ಲ, ಆದರೆ ಅದನ್ನು ಈ ರಿತಿ ಮಾಡಿದ್ದೇ ಆದರೆ ಇಷ್ಟ ಆಗಿಲ್ಲ ಅಂತ ಯಾರು ಹೇಳುವುದಕ್ಕೆ ಚಾನ್ಸೇ ಅಲ್ಲ, ಅಲ್ಲದೆ ಈಗ ಸುಡು ಬಿಸಿಲಿನ ಸಮಯ , ಈ ಸಮಯದಲ್ಲಿ ಮಾಡಲು ಹೇಳಿ ಮಾಡಿಸಿದ ರೆಸಿಪಿ ಇದಾಗಿದೆ.

ತೊಂಡೆಕಾಯಿ ಪಲ್ಯ ಅಂತ ಹೇಳಲು ಸಾಧ್ಯವಿಲ್ಲ, ಇದು ಅತ್ತ ಪಲ್ಯನೂ ಅಲ್ಲ, ಇತ್ತ ಡ್ರೈ ಕೂಡ ಅಲ್ಲದ ಒಂದು ಸ್ಪೆಷಲ್ ರೆಸಿಪಿ ಇದಾಗಿದೆ. ಬಿಸಿಲಿನಲ್ಲಿ ಒಣಗಿಸಿ ಮಾಡುವಂಥ ಈ ತೊಂಡೆಕಾಯಿಡ್ರೈ ಒಮ್ಮೆ ಟ್ರೈ ಮಾಡಿದರೆ ಮತ್ತೆ ಮಾರ್ಕೆಟ್‌ಗೆ ಹೋದಾಗ ತೊಂಡೆಕಾಯಿ ಖರೀದಿಸದೇ ಬರುವುದೇ ಅಲ್ಲ, ಬನ್ನಿ ಇದನ್ನು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಗ್ರಿ
1 ಕೆಜಿ ತೊಂಡೆಕಾಯಿ
1 ಚಮಚ ಅರಿಶಿಣ ಪುಡಿ
ಅರ್ಧ ಚಮಚ ಖಾರದ ಪುಡಿ
1/2 ಚಮಚ ಗರಂ ಮಸಾಲ ಪುಡಿ
ಚಿಟಿಕೆಯಷ್ಟು ಇಂಗು ಪುಡಿ
ಚಿಟಿಕೆಯಷ್ಟು ಮೆಂತೆ ಪುಡಿ
ರುಚಿಗೆ ತಕ್ಕ ಉಪ್ಪು
2-3 ಚಮಚ ತೆಂಗಿನೆಣ್ಣೆ

ಮಾಡುವ ವಿಧಾನ

• ತೊಂಡೆಕಾಯಿ ತಂದುಅದನ್ನು ತೊಳೆದು ನಾಲ್ಕು ಭಾಗವಾಗಿ ಸೀಳಿ
• ನಂತರ ಇದನ್ನು ಇದನ್ನು ಇಡ್ಲಿ ಪಾತ್ರೆಗೆ ಹಾಕಿ 3 ನಿಮಿಷ ಆವಿಯಲ್ಲಿ ಬೇಯಿಸಿ, ತುಂಬಾ ಬೇಯಿಸಬೇಡಿ, ಸ್ವಲ್ಪ ಬೆಂದರಷ್ಟೇ ಸಾಕಾಗುತ್ತೆ.
• ನಂತರ ಇದನ್ನು ತಟ್ಟೆಗೆ ಹಾಕಿ 1 ಚಮಚ ಅರಿಶಿಣ ಪುಡಿ, ಅರ್ಧ ಚಮಚ ಖಾರದ ಪುಡಿ, ರುಚಿಗೆ ತಕ್ಕ ಉಪ್ಪು, 1/2 ಚಮಚ ಗರಂ ಮಸಾಲ ಪುಡಿ, ಚಿಟಿಕೆಯಷ್ಟು ಇಂಗು ಪುಡಿ ಹಾಕಿ ಮಿಕ್ಸ್ ಮಾಡಿ. ಈ ಮಸಾಲೆ ಜೊತೆಗೆ ಚಿಟಿಕೆಯಷ್ಟು ಇಂಗು ಪುಡಿ ಕೂಡ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ ತೆಗಿಯಬೇಕು.
• ನಂತರ ಇದನ್ನು ಒಂದು ದಿನ ಪೂರ್ತಿ ಬಿಸಿಲಿನಲ್ಲಿ ದೊಡ್ಡ ತಟ್ಟೆ ಮೇಲೆ ಹರಡಿ ಒಣಗಿಸಿ, ಅದರ ಸಿಪ್ಪೆ ಭಾಗ ಒಣಗಿರುತ್ತದೆ, ಆದರೆ ಓಳಭಾಗ ಮೃದುವಾಗಿರುತ್ತದೆ.
• ಬೆಳಗ್ಗೆ 9 ಸಂಜೆ 4 ಗಂಟೆಯವರೆಗೆ ಬಿಸಿಲಿನಲ್ಲಿ ಹಾಕಿ , ಬಿಸಿಲು ಕಡಿಮೆಯಾಗುತ್ತಿದ್ದಂತೆ ತೆಗಯಿರಿ.
• ನಂತರ ರಾತ್ರಿ 2 ಚಮಚ ತೆಂಗಿನೆಣ್ಣೆ ಹಾಕಿ ಅದರಲ್ಲಿ ಈ ತೊಂಡೆಕಾಯಿ ಹಾಕಿ ಫ್ರೈ ಮಾಡಿ ತೆಗೆದರೆ ಸೂಪರ್ ರುಚಿಯ ತೊಂಡೆಕಾಯಿ ಡ್ರೈ ರೆಡಿ.

ಇತರ ಸಲಹೆ

ನೀವು ಬೇಕಿದ್ದರೆ ಎಣ್ಣೆಯಲ್ಲಿ ಕರಿದು ಕೂಡ ತಿನ್ನಬಹುದು, ಅನ್ನದ ಜೊತೆಗೆ ಇದು ಸೈಡ್‌ನಲ್ಲಿದ್ದರೆ ಆಹಾ ಎಂಥ ರುಚಿಯ ಭೋಜನ.
ಹೆಚ್ಚೇನು ಶ್ರಮವಿಲ್ಲ ಈ ರೆಸಿಪಿ ಟ್ರೈ ಮಾಡಿ ನೋಡಿ ಮನೆಮಂದಿಗೆಲ್ಲಾ ತುಂಬಾನೇಇಷ್ಟವಾಗಬಹುದು.
ನೀವು ಖಾರ ಪ್ರಿಯರಾಗಿದ್ದರೆ ಒಂದು ಚಮಚ ಖಾರದ ಪುಡಿ ಬಳಸಬಹುದು
ಇದಕ್ಕೆ ಹಣ್ಣಾದ ತೊಂಡೆಕಾಯಿ ಬಳಸಬೇಡಿ, ಹಸಿ ತೊಂಡೆಕಾಯಿ ಮಾತ್ರ ಬಳಸಿ.