ಉತ್ತರ ಕರ್ನಾಟಕ ಶೈಲಿಯ ಎಣ್ಣೆಗಾಯಿ ಪಲ್ಯ ಮಾಡೋದು ಹೇಗೆ?

ನಾವು ತಿಂಡಿಯಲ್ಲಿ ಹಲವು ರೀತಿಯ ವಿಧವನ್ನು ನೋಡುತ್ತಿರುತ್ತೇವೆ. ಆದ್ರೆ ಊಟದ ವಿಚಾರದಲ್ಲಿ ಬಹಳಷ್ಟು ವಿಧವನ್ನು ನಾವು ನೋಡುವುದಿಲ್ಲ. ತಿಂಡಿಯಲ್ಲಿ ನೂರಾರು ವಿಧಗಳು, ಬಗೆ ಬಗೆಯ ಖಾದ್ಯಗಳು ಬಾಯಲ್ಲಿ ನೀರು ತರಿಸುತ್ತವೆ. ತಿಂಡಿಯಲ್ಲಿ ಉತ್ತರ ಕರ್ನಾಟಕ ಶೈಲಿಯ ಖಾದ್ಯಗಳಂತು ಎಲ್ಲರಿಗೂ ಇಷ್ಟವಾಗುತ್ತದೆ. ಅದರಲ್ಲಿ ಹೆಚ್ಚಾಗಿ ರೊಟ್ಟಿಗಳು.

ರೊಟ್ಟಿ ಉತ್ತರ ಕರ್ನಾಟಕ ಭಾಗದ ನಿತ್ಯದ ತಿಂಡಿ. ಅವರು ಜೋಳ, ರಾಗಿ, ಅಕ್ಕಿ ಹಿಟ್ಟಿನಿಂದ ಬಹಳ ಅದ್ಭುತ ರುಚಿಯ ರೊಟ್ಟಿ ಮಾಡುತ್ತಾರೆ. ಸಾಮಾನ್ಯವಾಗಿ ಈ ರೊಟ್ಟಿಗಳನ್ನು ಒಮ್ಮೆ ಸವಿದರೆ ಮತ್ತೆ ಮತ್ತೆ ಸವಿಯಬೇಕು ಎನ್ನುವಂತಹ ರುಚಿ ನೀಡುತ್ತವೆ. ಅದರಲ್ಲೂ ಅಕ್ಕಿ ರೊಟ್ಟಿ ಎಣ್ಣೆಗಾಯಿ ಪಲ್ಯ ಅದ್ಭುತ ರುಚಿ ನೀಡುವ ಖಾದ್ಯ.

ಈ ಎರಡರ ಕಾಂಬಿನೇಷನ್‌ನಲ್ಲಿ ಬೆಳಗ್ಗಿನ ಖಾದ್ಯ ಸವಿಯೋಕೆ ಸಖತ್ ರುಚಿ ನೀಡುತ್ತದೆ. ಹೀಗಾಗಿ ಅಕ್ಕಿ ರೊಟ್ಟಿ ಮಾಡಿದರೆ ಅದಕ್ಕೆ ಎಣ್ಣೆಗಾಯಿ ಪಲ್ಯ ಕಡ್ಡಾಯ. ಅಕ್ಕಿ ರೊಟ್ಟಿ ಆರೋಗ್ಯದ ದೃಷ್ಟಿಯಲ್ಲು ಬಹಳ ಒಳ್ಳೆಯದು. ಇದರಲ್ಲಿ ಕಡಿಮೆ ಎಣ್ಣೆ ಬಳಸಲಾಗುತ್ತದೆ. ಹೆಚ್ಚಿನ ಫೈಬರ್ ಸಹ ಇರುವ ಕಾರಣ ಜೀರ್ಣಕ್ರಿಯೆಗೆ ಉತ್ತಮ.

ಹಾಗಾದ್ರೆ ನಾವಿಂದು ಉತ್ತರ ಕರ್ನಾಟಕ ಶೈಲಿಯ ಎಣ್ಣೆಗಾಯಿ ಪಲ್ಯ ಮಾಡುವ ಕುರಿತು ತಿಳಿದುಕೊಳ್ಳೋಣ. ಅಕ್ಕಿ ರೊಟ್ಟಿ ಜೊತೆ ಸವಿಯುವ ಎಣ್ಣೆಗಾಯಿ ಪಲ್ಯ ಮಾಡಲು ಬೇಕಾಗುವ ಪದಾರ್ಥಗಳೇನು? ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಬೇಕು? ಹಿಟ್ಟು ಹೇಗೆ ರೆಡಿ ಮಾಡಿಕೊಳ್ಳಬೇಕು ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಎಣ್ಣೆಗಾಯಿ ಪಲ್ಯ ಮಾಡಲು ಬೇಕಾಗುವ ಪದಾರ್ಥಗಳು

• ಬದನೆಕಾಯಿ
• ಜೀರಿಗೆ
• ಸಾಸಿವೆ
• ಎಣ್ಣೆ
• ಹುಚ್ಚೆಳ್ಳು
• ಕಡಲೆ ಬೀಜ
• ಈರುಳ್ಳಿ
• ಇಂಗು
• ಅರಶಿನ
• ಕೊತ್ತಂಬರಿ ಸೊಪ್ಪು
• ಕರಿಬೇವು
• ಬೆಳ್ಳುಳ್ಳಿ
• ಒಣ ಕೊಬ್ಬರಿ

ಎಣ್ಣೆಗಾಯಿ ಪಲ್ಯ ಮಾಡುವ ವಿಧಾನವೇನು?

ಮೊದಲು ಇದಕ್ಕೆ ಮಸಾಲೆ ಮಾಡಿಕೊಳ್ಳಲು ತಯಾರಿ ಮಾಡೋಣ. ಮೊದಲು ಒಂದು ಪಾತ್ರೆ ಒಲೆ ಮೇಲೆ ಇಟ್ಟು ಅದಕ್ಕೆ ಕಡಲೆ ಬೀಜ ಹಾಕಿ ಹುರಿದುಕೊಳ್ಳಿ. ಎಣ್ಣೆ ಹಾಕದೆ ಹಾಗೆ ಹುರಿದುಕೊಳ್ಳಿ. ಬಳಿಕ 2 ಚಮಚ ಗೊರೆಳ್ಳು ಅಥವಾ ಹುಚ್ಚೆಳ್ಳು ಹಾಕಿ ಹುರಿದು ತೆಗೆದಿಟ್ಟುಕೊಳ್ಳಿ. ಈಗ ಒಂದು ಸ್ಪೂನ್ ಎಣ್ಣೆ ಹಾಕಿ ಜೀರಿಗೆ, ಬೆಳ್ಳುಳ್ಳಿ, ಕರಿಬೇವು, ಕೊತ್ತಂಬರಿ ಸೊಪ್ಪು, ಹಸಿ ಮೆಣಸು ಹಾಕಿ ಫ್ರೈ ಮಾಡಿಕೊಳ್ಳಿ.

ಈಗ ಫ್ರೈ ಮಾಡಿದ ವಸ್ತುಗಳನ್ನು ತಣ್ಣಗಾಗಲು ಬದಿಗೆ ಇಡಿ. ಈಗ ಮೊದಲು ಹುರಿದುಕೊಂಡಿರುವ ಕಡಲೆ ಬೀಜ, ಹುಚ್ಚೆಳ್ಳು ಹಾಕಿಕೊಂಡು ರುಬ್ಬಿಕೊಳ್ಳಿ. ನೀರು ಹಾಕದೆ ರುಬ್ಬಬೇಕು. ರುಬ್ಬಿಕೊಂಡ ಬಳಿಕ ಈಗ ಫ್ರೈ ಮಾಡಿಕೊಂಡಿದ್ದ ಬೆಳ್ಳುಳ್ಳಿ, ಜೀರಿಗೆ ಸೇರಿ ಎಲ್ಲಾ ವಸ್ತುಗಳನ್ನು ಸಹ ಇದಕ್ಕೆ ಹಾಕಿ ಮತ್ತೆ ರುಬ್ಬಿಕೊಳ್ಳಿ.

ಹೀಗೆ ರುಬ್ಬಿಕೊಳ್ಳುವಾಗ ಸ್ವಲ್ಪ ಒಣ ಕೊಬ್ಬರಿಯನ್ನು ಸಹ ಹಾಕಿಕೊಂಡು ರುಬ್ಬಿಕೊಳ್ಳಿ. ಈಗ ಬೇಕಾದರೆ ಸ್ವಲ್ಪ ನೀರು ಹಾಕಿಕೊಂಡು ತರಿ ತರಿಯಾಗಿ ರುಬ್ಬಿಕೊಳ್ಳಬೇಕು.

ಈಗ ಒಲೆ ಮೇಲೆ ಇರುವ ಪಾತ್ರೆಗೆ 4 ಸ್ಪೂನ್ ಎಣ್ಣೆ ಹಾಕಿಕೊಂಡು ಅದಕ್ಕೆ ಇಂಗು, ಸಾಸಿವೆ, ಜೀರಿಗೆ, ಒಣ ಮೆಣಸು, ಕರಿಬೇವು ಹಾಕಿಕೊಂಡು ಫ್ರೈ ಮಾಡಿ. 1 ನಿಮಿಷದ ಬಳಿಕ ಇದಕ್ಕೆ ಈರುಳ್ಳಿ ಹಾಕಿ 3 ನಿಮಿಷ ಫ್ರೈ ಮಾಡಿ. ನಂತರ ಕತ್ತರಿಸಿ ಇಟ್ಟುಕೊಂಡಿರುವ ಬದನೆಕಾಯಿಯನ್ನು ಹಾಕಿ, ನೀವು ಉದ್ದವಾಗಿ ಹೆಚ್ಚಿಕೊಳ್ಳಬಹುದು.

ಬಳಿಕ ಇದಕ್ಕೆ ಅರ್ಧ ಚಮಚ ಅರಶಿನ, ಉಪ್ಪು ಹಾಕಿಕೊಂಡು ಮಿಕ್ಸ್ ಮಾಡಿ ಬದನೆಕಾಯಿ ಬೇಯಲು ಬಿಡಬೇಕು. ಚೆನ್ನಾಗಿ ಬೇಯಲು ಮುಚ್ಚಳ ಮುಚ್ಚಿ ಹಾಗೆ ಬಿಡಿ. 10 ನಿಮಿಷ ಬೇಯಿಸಿಕೊಂಡ ಬಳಿಕ ಮುಚ್ಚಳ ತೆಗೆದು ಚೆನ್ನಾಗಿ ತಿರುಗಿಸಿಕೊಳ್ಳಿ. ಇಗ ಇದಕ್ಕೆ ಹುಣಸೆ ಹುಳಿ, ಹಾಗೂ ರುಬ್ಬಿಕೊಂಡಿರುವ ಮಸಾಲೆಯನ್ನು ಸೇರಿಸಿ ಚೆನ್ನಾಗಿ ತಿರುಗಿಸಿ.

ಸಣ್ಣ ಉರಿಯಲ್ಲಿ 8 ನಿಮಿಷ ಬೇಯಿಸಿಕೊಳ್ಳಿ. ಈಗ ಮೊದಲು ಹುರಿದುಕೊಂಡಿದ್ದ ಹುಚ್ಚೆಳ್ಳಿ, ಕಡಲೇಬೀಜದ ಪುಡಿಯನ್ನು ಹಾಕಿಕೊಂಡು ತಿರುಗಿಸಿಕೊಳ್ಳಿ. ಹಾಗೆ 10 ನಿಮಿಷ ಬಿಡಿ. ಆಗಾಗ ತಿರುಗಿಸುತ್ತಾ ಇರಿ. ಇಷ್ಟಾದರೆ ನಿಮ್ಮ ಮುಂದೆ ಎಣ್ಣೆಗಾಯಿ ಪಲ್ಯ ರೆಡಿಯಾಗುತ್ತದೆ. ನೀವು ಸಹ ಮನೆಯಲ್ಲಿ ಇದನ್ನು ಒಮ್ಮೆ ಟ್ರೈ ಮಾಡಿ ನೋಡಿ.