ಯಾವುದೇ ತಿಂಡಿಗೆ ತರಕಾರಿ ಕುರ್ಮಾ ಮಾಡಿ..! ಇಲ್ಲಿದೆ ನೋಡಿ ರೆಸಿಪಿ

ಸಸ್ಯಹಾರಿಗಳಿಗೆ ಅಚ್ಚುಮೆಚ್ಚಿನ ಖಾದ್ಯದಲ್ಲಿ ಈ ಕುರ್ಮ ಸಹ ಒಂದು. ರೊಟ್ಟಿ, ಚಪಾತಿ, ಅನ್ನ, ಪಲಾವ್, ಹೀಗೆ ಎಲ್ಲಾ ಖಾದ್ಯದ ಜೊತೆಗೂ ತರಕಾರಿ ಕುರ್ಮ ಇದ್ದರೆ ಆ ಊಟದ ಮಜವೇ ಬೇರೆಯಾಗುತ್ತದೆ. ಕುರ್ಮ ಇದ್ದರೆ ಊಟ ಒಂದು ತುತ್ತು ಹೆಚ್ಚಿಗೆ ಸೇರುತ್ತದೆ.

ಕುರ್ಮಾ ಮಾಡುವುದು ಹೇಗೆ ಎಂಬ ಕುರಿತು ನಿಮಗೆ ತಿಳಿದಿಲ್ಲದಿರಬಹುದು. ಆದ್ರೆ ಕುರ್ಮಾ ಮಾಡೋದು ತುಂಬಾನೆ ಸುಲಭ, ನೀವು ಇಡ್ಲಿ, ದೋಸೆ, ಪೂರಿ, ಚಪಾತಿಗೆ ಕುರ್ಮಾ ಇಲ್ಲದಿದ್ದರೆ ಅದರ ರುಚಿ ನಿಮಗೆ ತಿಳಿಯೋದಿಲ್ಲ. ಕುರ್ಮಾ ಆರೋಗ್ಯ ದೃಷ್ಟಿಯಲ್ಲಿ ಒಳ್ಳೆಯದು. ಎಲ್ಲಾ ತರಕಾರಿ ಸೇರಿಸಿ ಮಾಡುವ ಕುರ್ಮಾ ರುಚಿಕರ ಖಾದ್ಯದಲ್ಲಿ ಒಂದು.

ನೀವೇನಾದರು ಮಾಂಸಹಾರಿಗಳಾಗಿದ್ದರೆ ನಿಮಗೆ ಮಟನ್ ಹಾಗೂ ಚಿಕನ್ ಕುರ್ಮಾದ ರುಚಿ ತಿಳಿದಿರುತ್ತೆ. ಇದೂ ಸಹ ಅದೇ ರುಚಿ ಹೋಲುವ ತರಕಾರಿ ಕುರ್ಮಾ. ಹಾಗಾದ್ರೆ ಈ ತರಕಾರಿ ಕುರ್ಮಾ ಮಾಡೋದು ಹೇಗೆ? ಕುರ್ಮಾ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು? ಮಾಡುವ ವಿಧಾನವೇನು ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ತರಕಾರಿ ಕುರ್ಮಾ ಮಾಡಲು ಬೇಕಾಗುವ ಪದಾರ್ಥಗಳು

• ಬೀನ್ಸ್
• ಕ್ಯಾರೆಟ್
• ಹೂಕೋಸು
• ಆಲೂಗಡ್ಡೆ
• ಉಪ್ಪು
• ಕೊತ್ತಂಬರಿ ಸೊಪ್ಪು
• ಎಣ್ಣೆ
• ನವಿಲುಕೋಸು
• ಬಟಾಣಿ
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್ - 1 ಟೀಸ್ಪೂನ್
• ಈರುಳ್ಳಿ - 2
• ಅರಶಿನ- 1 ಟೀಸ್ಪೂನ್
• ಗರಂ ಮಸಾಲ- 1 ಟೀಸ್ಪೂನ್
• ಖಾರದ ಪುಡಿ- 1 ಟೀಸ್ಪೂನ್
• ತೆಂಗಿನಕಾಯಿ
• ಗಸಗಸೆ
• ಗೋಡಂಬಿ
• ಟೊಮೆಟೊ- 1

ತರಕಾರಿ ಕುರ್ಮಾ ಮಾಡುವ ವಿಧಾನ

ಮೊದಲು ತೆಂಗಿನಕಾಯಿ, ಗೋಡಂಬಿ, ಗಸಗಸೆಯನ್ನು ತೆಗೆದುಕೊಂಡು ಒಂದು ಮಿಕ್ಸಿ ಜಾರ್‌ಗೆ ಹಾಕಿಕೊಂಡು ರುಬ್ಬಿಕೊಳ್ಳಿ. ಹಿಟ್ಟಿನ ರೀತಿ ಆಗುವಂತೆ ಚೆನ್ನಾಗಿ ರುಬ್ಬಿಕೊಂಡು ಬದಿಗಿಟ್ಟುಕೊಳ್ಳಿ. ಈಗ ಒಲೆ ಮೇಲೆ ಒಂದು ಪಾತ್ರೆಯಿಟ್ಟು ಅದಕ್ಕೆ ಎಣ್ಣೆ ಹಾಕಿ.

ಈ ಎಣ್ಣೆಗೆ ಈರುಳ್ಳಿ ಹಾಕಿ ಹುರಿದುಕೊಳ್ಳಿ. ಇದಕ್ಕೆ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಎಲ್ಲಾ ತರಕಾರಿಗಳನ್ನು ಸಹ ಹಾಕಿಕೊಂಡಿ ಫ್ರೈ ಮಾಡಿಕೊಳ್ಳಿ. ಒಂದು 3 ನಿಮಿಷ ಫ್ರೈ ಮಾಡಿಕೊಳ್ಳಿ. ಯಾವುದೇ ನೀರು ಹಾಕದೆ ಫ್ರೈ ಮಾಡಿ. ಇದಕ್ಕೆ ಉಪ್ಪು ಹಾಕಿ ಬೇಯಿಸಿಕೊಳ್ಳಿ.

ಬಳಿಕ ಇದನ್ನು ಮುಚ್ಚಳ ಮುಚ್ಚಿ 15 ನಿಮಿಷ ಬೇಯಿಸಿಕೊಳ್ಳಿ. ಬಳಿಕ ಅರಶಿನ ಪುಡಿ, ಗರಂ ಮಸಾಲ, ಖಾರದ ಪುಡಿ, ಟೊಮೆಟೋ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಇದು ತರಿ ತರಿಯಾಗಿ ಹುರಿದಂತೆ ಆಗಬೇಕು. ಇದಕ್ಕೆ ಅರ್ಧ ಗ್ಲಾಸ್‌ನಲ್ಲಿ ನೀರು ಹಾಕಿ ಮಿಕ್ಸ್ ಮಾಡಿ 4 ನಿಮಿಷ ಬಿಡಿ.

ಬಳಿಕ ಇದಕ್ಕೆ ಮೊದಲು ರುಬ್ಬಿಕೊಂಡಿದ್ದ ತೆಂಗಿನಕಾಯಿ, ಗೋಡಂಬಿ, ಗಸೆಗಸೆ ಮಿಕ್ಸ್ ಅನ್ನು ಹಾಕಿಕೊಳ್ಳಿ. ಸ್ವಲ್ಪ ನೀರು ಸಹ ಹಾಕಿಕೊಂಡು ಚೆನ್ನಾಗಿ ಮಿಶ್ರಣ ಮಾಡಿ. 8 ರಿಂದ 10 ನಿಮಿಷ ಕುದಿಯಲು ಬಿಡಿ. ಇಷ್ಟಾದರೆ ನಿಮ್ಮ ಮುಂದೆ ತರಕಾರಿ ಕುರ್ಮಾ ಸವಿಯಲು ರೆಡಿ.

ಈ ಕುರ್ಮಾವನ್ನು ಚಪಾತಿ, ಅನ್ನ, ದೋಸೆ, ಇಡ್ಲಿ, ಪೂರಿ ಜೊತೆಗೆ ಸವಿಯಲು ನೀಡಿದರೆ ಅದರ ರುಚಿಯೇ ಬೇರೆ. ಈಗ ಈ ರೆಸಿಪಿ ನೋಡಿಕೊಂಡು ಸುಲಭವಾಗಿ ಕುರ್ಮಾ ಮಾಡಿ ನೋಡಿ. ತುಂಬಾನೆ ಸುಲಭದ ರೆಸಿಪಿ ಇದಾಗಿದ್ದು, ಎಲ್ಲಾ ಖಾದ್ಯಗಳಿಗೂ ಹಿಡಿಸುತ್ತದೆ.