ಹೋಟೆಲ್ ರುಚಿಯ ತಂದೂರಿ ಚಿಕನ್ ಮನೆಯಲ್ಲೆ ಮಾಡಿ..! ಗ್ರಿಲ್, ಓವನ್ ಯಾವುದೂ ಬೇಡ..!

ನೀವು ನಾನ್‌ ವೆಜ್ ಪ್ರಿಯರಾಗಿದ್ದರೆ ಚಿಕನ್, ಮಟನ್‌ನಲ್ಲಿ ಹಲವಾರು ರುಚಿಯ ಖಾದ್ಯ ಸವಿದಿರುತ್ತೀರಿ, ಚಿಕನ್‌ನಲ್ಲಿ ಹತ್ತಾರು ಬಗೆಯ ಖಾದ್ಯ ಈಗ ಸಿಗುತ್ತೆ. ನಾನ್ ವೆಜ್ ಹೋಟೆಲ್‌ನಲ್ಲಿ ನಿಮ್ಮ ಬಾಯಲ್ಲಿ ನೀರು ತರಿಸುವಂತಹ ಅದ್ಭುತ ಖಾದ್ಯಗಳು ನಿಮ್ಮ ಕಣ್ಣುಕುಕ್ಕಿರಬಹುದು. ಹಾಗೆ ಮನೆಯಲ್ಲೂ ಕೂಡ ಹಲವು ಬಗೆಯ ಚಿಕನ್ ರೆಸಿಪಿಯನ್ನು ನೀವು ಮಾಡಿ ಸವಿದಿರುತ್ತೀರಿ.

ಹಾಗೆ ಚಿಕನ್ ರೆಸಿಪಿಗಳಲ್ಲಿ ಅತ್ಯಂತ ರುಚಿಕರ ಹಾಗೂ ಎಲ್ಲರು ಇಷ್ಟಪಟ್ಟು ಸವಿಯುವ ಒಂದು ಬಗೆ ಅಂದ್ರೆ ಅದು ತಂದೂರಿ ಚಿಕನ್. ನೀವು ಹೋಟೆಲ್, ಡಾಬಾ, ರೆಸ್ಟೊರೆಂಟ್‌ನಲ್ಲಿ ಹೊರಗೆ ತಂದೂರಿ ಚಿಕನ್ ಮಾಡಿ ಕೊಡುವುದು ನೋಡಿರಬಹುದು. ತಂದೂರಿಯ ಮೇಲೆ ನಿಂಬೆ ರಸ ಹಾಗೂ ಕಾಳು ಮೆಣಸಿನ ಪುಡಿ ಹಾಕಿಕೊಂಡು ಸವಿದರೆ ರುಚಿಗೆ ಬಾಯಲ್ಲಿ ನೀರು ಬರುತ್ತೆ.

ಇಷ್ಟೊಂದು ರುಚಿಕರ ಚಿಕನ್ ತಂದೂರಿಯನ್ನು ನಾವು ಮನೆಯಲ್ಲೂ ಕೂಡ ಮಾಡಬಹುದು. ಆದ್ರೆ ಈ ತಂದೂರಿ ಮಾಡಲು ಓವನ್, ದೊಡ್ಡ ದೊಡ್ಡ ಗ್ರಿಲ್‌ಗಳ ಅವಶ್ಯಕತೆ ಇಲ್ಲ. ಸುಲಭವಾಗಿ ಮನೆಯಲ್ಲಿ ಕಡಿಮೆ ಖರ್ಚಿನಲ್ಲಿ ಮಾಡಬಹುದು. ಹೋಟೆಲ್‌ನಲ್ಲಿ ತಂದೂರಿಗೆ ದುಬಾರಿ ಬೆಲೆ ನೀಡಬೇಕು ಆದ್ರೆ ಮನೆಯಲ್ಲಿ ಕಡಿಮೆ ಖರ್ಚಿನಲ್ಲಿ ಅಷ್ಟೇ ರುಚಿಯಾಗಿ ತಂದೂರಿ ಚಿಕನ್ ಮಾಡಬಹುದು.

ಹಾಗಾದ್ರೆ ಮನೆಯಲ್ಲೇ ತಂದೂರಿ ಚಿಕನ್ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು?, ಮಾಡುವ ವಿಧಾನವೇನು?, ಮಾಡಲು ಎಷ್ಟು ಸಮಯ ಹಿಡಿಯಲಿದೆ? ಮಾಡಲು ತಯಾರಿ ಹೇಗೆ ಮಾಡಿಕೊಳ್ಳಬೇಕು ಎಂಬುದನ್ನು ನಾವಿಂದು ತಿಳಿದುಕೊಳ್ಳೋಣ.

ಮನೆಯಲ್ಲಿ ತಂದೂರಿ ಚಿಕನ್ ಮಾಡಲು ಯಾವೆಲ್ಲಾ ವಸ್ತು ಬೇಕು?

• ಚಿಕನ್- ದೊಡ್ಡದಾಗಿ ಕತ್ತರಿಸಿದ ಪೀಸ್‌ಗಳು
• ನಿಂಬೆ
• ಕಾಶ್ಮೀರಿ ಕೆಂಪು ಮೆಣಸಿನ ಪುಡಿ
• ಮೊಸರು
• ಕೆಂಪು ಮೆಣಸಿನ ಪುಡಿ
• ಅರಿಶಿನ ಪುಡಿ
• ಗರಂ ಮಸಾಲ ಪುಡಿ
• ಕೊತ್ತಂಬರಿ ಪುಡಿ
• ತಂದೂರಿ ಮಸಾಲ ಪುಡಿ
• ಕರಿಮೆಣಸಿನ ಪುಡಿ
• ಕಸ್ತೂರಿ ಮೇಥಿ
• ಕೊತ್ತಂಬರಿ ಸೊಪ್ಪು
• ರುಚಿಗೆ ಉಪ್ಪು
• ಕೆಂಪು ಕಲರ್
• ಎಣ್ಣೆ

ಮನೆಯಲ್ಲಿ ತಂದೂರಿ ಚಿಕನ್ ಮಾಡುವ ವಿಧಾನ

ಮೊದಲು ಚಿಕನ್ ಅನ್ನು ತೊಳೆದು ಇಟ್ಟುಕೊಳ್ಳಿ. ಮಧ್ಯದಲ್ಲಿ ಸಣ್ಣ ಸಣ್ಣದಾಗಿ ಗೆರೆ ಎಳೆದಂತೆ ಕತ್ತರಿಸಿಕೊಳ್ಳಿ. ನಂತರ ಈ ಚಿನ್ ಮೇಲೆ ನಿಂಬೆ ಹುಳಿ ರಸ, ಅರ್ಧ ಕಪ್ ಮೊಸರು, ಖಾರದ ಪುಡಿ, ಅರಶಿಣ ಪುಡಿ, ಗರಂ ಮಸಾಲೆ, ಧನಿಯಾ ಪುಡಿ, ತಂದೂರಿ ಮಸಾಲೆ ಅಥವಾ ಚಿಕನ್ ಮಸಾಲೆ, ಕಸೂರಿ ಮೇಥಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಉಪ್ಪು, ಕೆಂಪು ಕಲರ್ ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ಎಲ್ಲಾ ಮಸಾಲೆ ಚೆನ್ನಾಗಿ ಹಿಡಿಯುವಂತೆ ಕಲಸಿಕೊಳ್ಳಿ. ಅನಂತರ ಇದು ನೆನೆಯಲು ಅರ್ಧ ಗಂಟೆ ಹಾಗೆಯೆ ಇಡಬೇಕು.

ಈಗ ಒಲೆ ಮೇಲೆ ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಹಾಕಿಕೊಂಡು ಕಾಯಲು ಬಿಡಿ. ಅನಂತರ ಅರ್ಧ ಗಂಟೆ ಇಟ್ಟಿರುವ ಚಿಕನ್ ಪೀಸ್‌ಗಳನ್ನು ಈ ಬಾಣಲೆ ಒಳಗೆ ಇಟ್ಟು ಕರಿಯಲು ಬಿಡಿ. ಮಧ್ಯಮ ಉರಿಯಲ್ಲಿ ಕರಿದುಕೊಳ್ಳಿ. 2 ನಿಮಿಷಗಳಿಗೊಮ್ಮೆ ತರಿಗಿಸಿಕೊಳ್ಳುತ್ತಾ ಇರಿ. ಚಿಕನ್‌ನ ಎಲ್ಲಾ ಭಾಗವೂ ಚೆನ್ನಾಗಿ ಬೇಯಬೇಕು. 15 ನಿಮಿಷ ಆದರೂ ಬೇಯಿಸಿಕೊಳ್ಳಿ.

ಚಿಕನ್ ಚೆನ್ನಾಗಿ ರೋಸ್ಟ್ ಆದ ಬಳಿಕ ಚಾಪತಿ ಅಥವಾ ರೊಟ್ಟಿಯನ್ನು ಮಾಡಲು ಬಳಸುವಂತಹ ಗ್ರಿಲ್ ಅನ್ನು ಒಲೆ ಮೇಲೆ ಇಟ್ಟು ಅದರ ಮೇಲೆ ಚಿಕನ್ ಪೀಸ್‌ಗಳನ್ನು ಇಟ್ಟುಕೊಳ್ಳಬೇಕು. ಬೆಂಕಿಯ ಉರಿಯಲ್ಲಿ ಚಿಕನ್ ಮತ್ತೆ ಬೇಯಲು ಬಿಡಬೇಕು. 1 ಅಥವಾ 2 ನಿಮಿಷ ಈ ಚಿಕನ್ ಬೇಯಿಸಿದರೆ ಸಾಕು. ನಂತರ ಒಲೆ ಆಫ್ ಮಾಡಿಕೊಂಡು ಈ ಚಿಕನ್ ಮೇಲೆ ಕಾಳು ಮೆಣಸಿನ ಪುಡಿಯನ್ನು ಹಾಕಿ ಸವಿಯಲು ನೀಡಬಹುದು.

ನೀವು ಕೂಡ ಮನೆಯಲ್ಲೇ ಈ ಚಿಕನ್ ತಂದೂರಿ ಮಾಡಿ ಸವಿಯಬಹುದು. ಒಮ್ಮೆ ಟ್ರೈ ಮಾಡಿ.