ಸಿಹಿ, ಖಾರ, ಸ್ಪೈಸಿ! ಬ್ಯಾಂಗ್ ಬ್ಯಾಂಗ್ ಚಿಕನ್ ಫ್ರೈಡ್ ರೈಸ್ ಮನೆಯಲ್ಲಿ ಮಾಡಿ.. ತುಂಬಾ ಈಸಿ

ಇದು ಸಾಮಾನ್ಯ ಚಿಕನ್ ಫ್ರೈಡ್ ರೈಸ್ ಅಲ್ಲ! ಒಂದೇ ಬಟ್ಟಲಿನಲ್ಲಿ ಸಿಹಿ, ಖಾರ, ಸ್ಪೈಸಿ ಎಲ್ಲವೂ. ಹೊಟ್ಟೆಗೂ, ಹೃದಯಕ್ಕೂ ಸ್ಪೈಸಿ ಟ್ರೀಟ್. ಹೌದು, ರುಚಿಕರವಾದ ಮತ್ತು ವಿಭಿನ್ನವಾದ ಫ್ರೈಡ್ ರೈಸ್ ಇಷ್ಟಪಡುವವರಿಗೆ 'ಬ್ಯಾಂಗ್ ಬ್ಯಾಂಗ್ ಚಿಕನ್ ಫ್ರೈಡ್ ರೈಸ್' (Bang Bang Chicken Fried Rice) ಒಂದು ಅದ್ಭುತ ಆಯ್ಕೆಯಾಗಿದೆ. ಇದು ಸರಳ ಪಾಕವಿಧಾನವಾಗಿದೆ. ಚಿಕನ್ ಮತ್ತು ಅನ್ನದೊಂದಿಗೆ, ನಿಮಗೆ ಇಷ್ಟವಾದ ತರಕಾರಿಗಳನ್ನು ಸೇರಿಸುವ ಮೂಲಕ ಇದನ್ನು ಮತ್ತಷ್ಟು ವಿಭಿನ್ನವಾಗಿ ತಯಾರಿಸಬಹುದು. ಇದಕ್ಕೆ ಸ್ಪೆಷಲ್ ಬ್ಯಾಂಗ್ ಬ್ಯಾಂಗ್ ಸಾಸ್ ನೆಕ್ಸ್ಟ್ ಲೆವೆಲ್ ಟೇಸ್ಟ್ ನೀಡುತ್ತದೆ.

ನಿಮ್ಮ ಮನೆಯಲ್ಲೇ ರೆಸ್ಟೋರೆಂಟ್ ಸ್ಟೈಲ್ ಮಜಾ. ಇದನ್ನು ಟ್ರೈ ಮಾಡಲೇಬೇಕು. ಈ ಫ್ರೈಡ್ ರೈಸ್ ತಯಾರಿಸಲು ಒಟ್ಟು 7 ಗಂಟೆ 45 ನಿಮಿಷಗಳು ಬೇಕಾಗುತ್ತವೆ. ಇದರಲ್ಲಿ 10 ನಿಮಿಷ ಸಿದ್ಧತಾ ಸಮಯ ಮತ್ತು 35 ನಿಮಿಷ ಅಡುಗೆ ಸಮಯ ಸೇರಿದೆ. ಉಳಿದ 7 ಗಂಟೆಗಳು ಅನ್ನ ಮತ್ತು ಚಿಕನ್ ಅನ್ನು ಫ್ರಿಜ್‌ನಲ್ಲಿಡಲು ಬೇಕಾಗುತ್ತದೆ. ಈ ಪ್ರಮಾಣವು 6 ಜನರಿಗೆ ಸಾಕಾಗುತ್ತದೆ. ಬ್ಯಾಂಗ್ ಬ್ಯಾಂಗ್ ಚಿಕನ್ ಫ್ರೈಡ್ ರೈಸ್ (Chicken Fried Rice) ತಯಾರಿಸುವ ವಿಧಾನ ಇಲ್ಲಿದೆ.

ಚಿಕನ್ ಫ್ರೈಡ್ ರೈಸ್ ತಯಾರಿಸಲು ಬೇಕಾಗುವ ಪದಾರ್ಥಗಳು

• ವೈಟ್ ರೈಸ್ (ಅನ್ನ) - 1 ಕಪ್
• ನೀರು - 2 ಕಪ್
• ಉಪ್ಪು - ರುಚಿಗೆ ತಕ್ಕಷ್ಟು
• ಕರಿಮೆಣಸು - ಪುಡಿ ಮಾಡಿದ
• ಚಿಕನ್ ಬ್ರೆಸ್ಟ್‌- 2 (ಚರ್ಮರಹಿತ, ಮೂಳೆರಹಿತ)
• ಆವಕಾಡೊ ಎಣ್ಣೆ - 2 ಚಮಚ
• ಬೆಳ್ಳುಳ್ಳಿ ಪೇಸ್ಟ್ - 2 ಚಮಚ
• ಶುಂಠಿ ಪೇಸ್ಟ್ - 2 ಚಮಚ
• ಮೊಟ್ಟೆ - 1 ದೊಡ್ಡ (ಹೊಡೆದದ್ದು)
• ಕಡಿಮೆ ಸೋಡಿಯಂ ಸೋಯಾ ಸಾಸ್ - 2 ಚಮಚ (ಹೆಚ್ಚುವರಿ ರುಚಿಗೆ)
• ಎಳ್ಳೆಣ್ಣೆ - 2 ಚಮಚ
• ಈರುಳ್ಳಿ - 2 ದೊಡ್ಡ (ಕತ್ತರಿಸಿದ್ದು)

ಸಾಸ್‌ಗೆ ಬೇಕಾಗುವ ಪದಾರ್ಥಗಳು

• ಮೇಯನೇಸ್ - 1/2 ಕಪ್
• ಸ್ವೀಟ್ ಚಿಲ್ಲಿ ಸಾಸ್ - 2 ಚಮಚ
• ಹಾಟ್ ಸಾಸ್ - 1 ಚಮಚ (ಟಬಾಸ್ಕೋ)

ಚಿಕನ್ ಫ್ರೈಡ್ ರೈಸ್ ತಯಾರಿಸುವ ವಿಧಾನ

ಮೊದಲಿಗೆ, ಮಡಕೆಯಲ್ಲಿ ನೀರನ್ನು ಕುದಿಸಿ. ಸ್ವಲ್ಪ ಉಪ್ಪು ಬೆರೆಸಿ. ಬಳಿಕ ಅಕ್ಕಿ ಹಾಕಿ, ಉರಿಯನ್ನು ಕಡಿಮೆ ಮಾಡಿ ಮತ್ತು ಮುಚ್ಚಿ. ಸುಮಾರು 20 ನಿಮಿಷಗಳ ಕಾಲ ಮೃದುವಾಗುವವರೆಗೆ ಬೇಯಿಸಿ. ಬಳಿಕ ಕೆಳಗಿಳಿಸಿ, ತಣ್ಣಗಾಗಲು ಬಿಡಿ. ಒಂದು ಫೋರ್ಕ್ ಬಳಸಿ ಅನ್ನವನ್ನು ಸಡಿಲಗೊಳಿಸಿ. ಒಂದು ಕ್ಯಾಸರೋಲ್ ಡಿಶ್‌ಗೆ ಸಮವಾಗಿ ಹರಡಿ. ಫಾಯಿಲ್ ಹಾಕಿ ಮುಚ್ಚಿ, ಅನ್ನ ಒಣಗಲು 5 ಗಂಟೆ ಅಥವಾ ರಾತ್ರಿಯಿಡೀ ಫ್ರಿಜ್‌ನಲ್ಲಿಡಿ. ಇದು ಫ್ರೈಡ್ ರೈಸ್‌ಗೆ ಉತ್ತಮ ಲುಕ್ ನೀಡುತ್ತದೆ.

ಈಗ ಚಿಕನ್ ಬ್ರೆಸ್ಟ್‌ಗಳನ್ನು ಒಂದು ತಟ್ಟೆಯಲ್ಲಿಟ್ಟು, ಉಪ್ಪು ಮತ್ತು ಮೆಣಸು ಬೆರೆಸಿ. ಬಳಿಕ ಮುಚ್ಚಿ, 2 ರಿಂದ 3 ಗಂಟೆಗಳ ಕಾಲ ಫ್ರಿಜ್‌ನಲ್ಲಿಡಿ. ಈಗ ಚಿಕನ್ ಅನ್ನು ಕಚ್ಚುವ ಗಾತ್ರದ ತುಂಡುಗಳಾಗಿ ಕತ್ತರಿಸಿ. ಒಂದು ವೊಕ್ ಅಥವಾ ದೊಡ್ಡ ಸ್ಕಿಲೆಟ್‌ನಲ್ಲಿ ಮಧ್ಯಮ ಉರಿಯಲ್ಲಿ ಎಣ್ಣೆಯನ್ನು ಬಿಸಿ ಮಾಡಿ. ಚಿಕನ್ ಹಾಕಿ ಸುಮಾರು 5 ನಿಮಿಷಗಳ ಕಾಲ ಕಂದು ಬಣ್ಣ ಬರುವವರೆಗೆ ಮತ್ತು ಮಧ್ಯದಲ್ಲಿ ಗುಲಾಬಿ ಬಣ್ಣ ಕಣ್ಮರೆಯಾಗುವವರೆಗೆ ಆಗಾಗ್ಗೆ ತಿರುವುತ್ತಾ ಬೇಯಿಸಿ. ಬಳಿಕ ವೊಕ್‌ನಿಂದ ತೆಗೆದು ಪಕ್ಕಕ್ಕಿಡಿ.

ಈಗ ಅದೇ ವೊಕ್‌ಗೆ ಮಧ್ಯಮ ಉರಿಯಲ್ಲಿ ಇನ್ನಷ್ಟು ಎಣ್ಣೆ ಸೇರಿಸಿ. ಅನ್ನ ಹಾಕಿ, ಸುಮಾರು 1 ನಿಮಿಷ ಬೇಯಿಸಿ. ನಂತರ ಬೆಳ್ಳುಳ್ಳಿ ಮತ್ತು ಶುಂಠಿ ಸೇರಿಸಿ ಒಂದು ನಿಮಿಷ ಬೇಯಿಸಿ. ಬಳಿಕ ಮೊಟ್ಟೆ ಹಾಕಿ. ಅದು ಗಟ್ಟಿಯಾಗುವವರೆಗೆ ಸುಮಾರು 2 ನಿಮಿಷ ಬೇಯಿಸಿ. ಉರಿಯನ್ನು ಕಡಿಮೆ ಮಾಡಿ. ಬೇಯಿಸಿದ ಚಿಕನ್ ಅನ್ನು ವೊಕ್‌ಗೆ ಹಾಕಿ. ಈಗ ಸೋಯಾ ಸಾಸ್ ಮತ್ತು ಎಳ್ಳೆಣ್ಣೆ ಹಾಕಿ. ರುಚಿ ನೋಡಿ, ನಿಮ್ಮಿಷ್ಟದಂತೆ ಹೆಚ್ಚು ಸೇರಿಸಿ. ನಂತರ ವೊಕ್ ಅನ್ನು ಉರಿಯಿಂದ ತೆಗೆದು, ಬಟ್ಟಲುಗಳಿಗೆ ಹಾಕಿ. ಈಗ ಅದರ ಮೇಲೆ ಕತ್ತರಿಸಿದ ಈರುಳ್ಳಿ ಹಾಕಿ.

ಈಗ ಸಾಸ್ ತಯಾರಿಸಿ. ಒಂದು ಬಟ್ಟಲಿನಲ್ಲಿ ಮೇಯನೇಸ್, ಸ್ವೀಟ್ ಚಿಲ್ಲಿ ಸಾಸ್ ಮತ್ತು ಹಾಟ್ ಸಾಸ್ ಅನ್ನು ಒಟ್ಟಿಗೆ ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ಬಡಿಸುವ ಮೊದಲು ಚಿಕನ್ ರೈಸ್ ಬಟ್ಟಲುಗಳ ಮೇಲೆ ಈ ಸಾಸ್ ಅನ್ನು ಸುರಿಯಿರಿ. ಇಷ್ಟು ಮಾಡಿದರೆ, ಬ್ಯಾಂಗ್ ಬ್ಯಾಂಗ್ ಚಿಕನ್ ಫ್ರೈಡ್ ರೈಸ್ ಸವಿಯಲು ಸಿದ್ದ.