ಹಬ್ಬದ ಸಂಭ್ರಮ ಹೆಚ್ಚಿಸುವ ಶಾವಿಗೆ ಸಾಬುದಾನಿ ಪಾಯಸ ಮಾಡಿ..! ಇಲ್ಲಿದೆ ಸುಲಭದ ವಿಧಾನ!!

ಹಬ್ಬಗಳ ಸೀಸನ್ ಆರಂಭವಾಗುತ್ತಿದೆ. ಹೀಗಾಗಿ ಮನೆಯಲ್ಲಿ ಸಿಹಿ ತಿಂಡಿಗಳು, ಕರಿದ ತಿಂಡಿಗಳು, ಪಾಯಸದಂತಹ ಖಾದ್ಯ ಮಾಡುವುದು ಕಾಮನ್. ಅದ್ರಲ್ಲೂ ಪಾಯಸ ಎಲ್ಲರ ಮನೆಯಲ್ಲೂ ಮಾಡುವ ಖಾದ್ಯ. ಸಣ್ಣ ಪುಟ್ಟ ವಿಶೇಷಗಳಿರಲಿ, ಪೂಜೆ ಇರಲಿ ಇಲ್ಲವೆ ಅತಿಥಿಗಳ ಆಗಮನವಾದರೆ ಅವರಿಗೆ ಪಾಯಸ ಸವಿಯಲು ನೀಡುವುದು ಸಾಮಾನ್ಯವಾಗಿ ಎಲ್ಲರು ಮಾಡುವ ಕೆಲಸವಾಗಿದೆ.

ಹಾಗೆ ಪಾಯಸದಲ್ಲೂ ಹತ್ತಾರು ಬಗೆಗಳಿವೆ. ಒಂದೊಂದು ಬಗೆಯೂ ಒಂದೊಂದು ರುಚಿ ನೀಡಲಿವೆ. ಒಂದಿಷ್ಟು ರುಚಿಯ ಪಾಯಸ ನೀವು ಕೂಡ ಮಾಡಿ ಸವಿದಿರುತ್ತೀರಿ. ಹಬ್ಬದಲ್ಲಂತು ಪಾಯಸ ಮಾಡಿಯೇ ಮಾಡುತ್ತಾರೆ. ಶಾವಿಗೆ ಪಾಯಸ, ಬೇಳೆ ಪಾಸಯ, ಅಕ್ಕಿ ಪಾಯಸ, ಸಾಬುದಾನಿ ಪಾಯಸ, ಪಾಸ್ತಾ ಪಾಯಸ ಹೀಗೆ ಹತ್ತಾರು ಬಗೆಯ ಪಾಯಸ ರೆಡಿ ಮಾಡಿ ಸವಿದಿರುತ್ತೀರಿ.

ಇನ್ನು ಮಕ್ಕಳಿಗಂತು ಪಾಯಸ ಅಂದರೆ ಪಂಚಪ್ರಾಣ. ನಾವಿಂದು ಈ ಹಬ್ಬದ ಸಮಯದಲ್ಲಿ ಮಾಡುವಂತಹ ಅದ್ಭುತ ರುಚಿಯ ಪಾಯಸವನ್ನು ನಾವಿಂದು ಮಾಡುವ ಕುರಿತು ತಿಳಿದುಕೊಳ್ಳೋಣ. ಅದರಲ್ಲೂ ಶಾವಿಗೆ ಹಾಗೂ ಸಾಬುದಾನ ಹಾಕಿ ಮಾಡುವಂತಹ ರುಚಿ ರುಚಿಯ ಬ್ರಾಹ್ಮಣರ ಶೈಲಿಯ ಪಾಯಸ ಇದು.

ಹಾಗಾದ್ರೆ ಈ ಶಾವಿಗೆ ಸಾಬುದಾನಿ ಪಾಯಸ ಮಾಡುವುದು ಹೇಗೆ? ಈ ಪಾಯಸ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಎಷ್ಟು ಸಮಯ ಹಿಡಿಯಲಿದೆ ಎಂಬ ಕುರಿತ ಮಾಹಿತಿ ಇಲ್ಲಿದೆ.

ಶಾವಿಗೆ ಸಾಬುದಾನಿ ಪಾಯಸ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?

• ಶಾವಿಗೆ
• ಹಾಲು
• ಸಬ್ಬಕ್ಕಿ
• ಗೋಡಂಬಿ
• ದ್ರಾಕ್ಷಿ
• ಏಲಕ್ಕಿ ಪುಡಿ
• ಬಾದಾಮಿ ಪುಡಿ
• ಸಕ್ಕರೆ
• ತುಪ್ಪ

ಶಾವಿಗೆ ಸಾಬುದಾನಿ ಪಾಯಸ ಮಾಡುವ ವಿಧಾನವೇನು?

ಸಬ್ಬಕ್ಕಿಯನ್ನು ತೊಳೆದು ಬಳಿಕ ನೀರಿನಲ್ಲಿ ಹಾಕಿ ನೆನೆಸಿಡಬೇಕು ಅದೇ ಅಳತೆಯಷ್ಟು ಶಾವಿಗೆ ತೆಗೆದುಕೊಳ್ಳಿ. ಈಗ ಒಂದು ಬಾಣಲೆ ಇಟ್ಟುಕೊಂಡು ಅದಕ್ಕೆ ತುಪ್ಪ ಹಾಕಿಕೊಳ್ಳಿ. ಈ ತುಪ್ಪಕ್ಕೆ ಗೋಡಂಬಿ, ದ್ರಾಕ್ಷಿ ಹಾಕಿಕೊಂಡು ಫ್ರೈ ಮಾಡಿಕೊಳ್ಳಿ. ನಂತರ ಗೋಡಂಬಿ, ದ್ರಾಕ್ಷಿ ತೆಗೆದಿಟ್ಟುಕೊಳ್ಳಿ. ಈಗ ಅದೇ ಬಾಣಲೆಗೆ ಶಾವಿಗೆ ಹಾಕಿಕೊಂಡು ಹುರಿದುಕೊಳ್ಳಿ.

ಸುಮಾರು 3 ನಿಮಿಷ ಸಣ್ಣ ಉರಿಯಲ್ಲಿ ಹುರಿದುಕೊಳ್ಳಿ. ಅನಂತರ ಇದಕ್ಕೆ ನೆನೆಸಿಟ್ಟ ನೀರಿನಿಂದ ತೆಗೆದಿಟ್ಟ ಸಬ್ಬಕ್ಕಿಯನ್ನು ಹಾಕಿ 1 ನಿಮಿಷ ಫ್ರೈ ಮಾಡಿಕೊಳ್ಳಿ. ಸಬ್ಬಕ್ಕಿ ಹಾಕಿದ ಬಳಿಕ ಸ್ವಲ್ಪವೇ ನೀರು ಹಾಕಿಕೊಳ್ಳಿ ಇಲ್ಲದಿದ್ದರೆ ತಳ ಹಿಡಿಯಲಿದೆ. ಈಗ ಇದಕ್ಕೆ ಹಾಲನ್ನು ಹಾಕಿಕೊಳ್ಳಿ. ಕಾಯಿಸಿದ ಹಾಲು ಕೂಡ ಬಳಸಬಹುದು.

ಈಗ ಚೆನ್ನಾಗಿ ಕುದಿಬರಲು ಬಿಡಬೇಕು. 10 ನಿಮಿಷ ಸಮಯ ಬೇಕಾಗುತ್ತದೆ. ನಂತರ ಇದಕ್ಕೆ ಏಲಕ್ಕಿ ಪುಡಿ, ಬಾದಾಮಿ ಪುಡಿ, ಸಕ್ಕರೆ ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ಅನಂತರ ಇದಕ್ಕೆ ಫ್ರೈ ಮಾಡಿಕೊಂಡ ದ್ರಾಕ್ಷಿ, ಗೋಡಂಬಿ ಕೂಡ ಇದಕ್ಕೆ ಹಾಕಿಕೊಂಡು ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ಇಷ್ಟಾದರೆ ನಿಮ್ಮ ಮುಂದೆ ರುಚಿ ರುಚಿಯ ಘಮ ಘಮ ಪಾಯಸ ರೆಡಿಯಾಗಿರುತ್ತೆ. ನೀವು ಕೂಡ ಒಮ್ಮೆ ಟ್ರೈ ಮಾಡಿ ನೋಡಿ.