ಚಕ್ಕುಲಿಯಂತಹ ಅಕ್ಕಿ ಸಂಡಿಗೆ ಥಟ್ ಅಂತ ರೆಡಿ ಮಾಡಿ..! ಹೇಗೆ ಗೊತ್ತಾ?

ಊಟದ ಜೊತೆಗೆ ಸವಿಯಲು ಉಪ್ಪಿನಕಾಯಿ, ಪಲ್ಯ ಎಷ್ಟು ರುಚಿ ನೀಡಲಿದ್ಯೋ ಹಾಗೆ ಹಪ್ಪಳ, ಸಂಡಿಗೆ ಕೂಡ ಅಷ್ಟೇ ರುಚಿ ನೀಡಲಿದೆ. ಹಲವರಿಗೆ ಈ ಹಪ್ಪಲ ಸಂಡಿಗೆ ಇಲ್ಲದೆ ಊಟವೇ ರುಚಿಕರ ಅನಿಸೋದಿಲ್ಲ. ಹಾಗೆ ಈಗಂತು ಅಂಗಡಿಗಳಲ್ಲಿ ವಿವಿಧ ರೀತಿಯ ವಿವಿಧ ರುಚಿಯ ಸಂಡಿಗೆ ಪ್ಯಾಕೆಟ್‌ಗಳು ಸಿಗುತ್ತವೆ. ಅದನ್ನು ಖರೀದಿಸಿ ತಂದು ಕಾದ ಎಣ್ಣೆಗೆ ಇಳಿಬಿಟ್ಟು ಸವಿಯೋದು ನೋಡಬಹುದು.

ಊಟದೊಂದಿಗೆ ಈ ರೀತಿ ಸಂಡಿಗೆ ಹಾಗೂ ಹಪ್ಪಳ ಬಹಳ ರುಚಿ ತರಲಿದೆ. ಈ ಸಂಡಿಗೆ ಮಾಡೋದು ಕೂಡ ಬಹಳ ಸುಲಭ. ಅಕ್ಕಿಯನ್ನು ಬಳಸಿ ವಿವಿಧ ಬಗೆಯಲ್ಲಿ ಸಂಡಿಗೆ ಮಾಡಬಹುದು. ನಾವಿಂದು ರುಚಿ ರುಚಿಯಾದ ಅಕ್ಕಿ ಹಿಟ್ಟಿನಿಂದ ಮಾಡುವ ಚಕ್ಕುಲಿಯಂತಹ ಸಂಡಿಗೆಯ ಕುರಿತು ತಿಳಿದುಕೊಳ್ಳೋಣ. ನೋಡಲು ಚಕ್ಕುಲಿಯಂತಿದ್ದರೂ ಊಟದೊಂದಿಗೆ ಇದು ಬಹಳ ರುಚಿ ನೀಡಲಿದೆ.

ಅಕ್ಕಿ ಸಂಡಿಗೆಯನ್ನು ನೀವು ಕೂಡ ಮಾಡಿರುತ್ತೀರಿ. ಅನ್ನ ಉಳಿದಿದ್ದರೂ ಕೂಡ ಅದರಿಂದ ಸಂಡಿಗೆ ಮಾಡಿ ಸವಿದಿರುತ್ತೀರಿ. ಆದ್ರೆ ನಾವಿಂದು ಮನೆಯಲ್ಲೇ ಹೇಗೆ ಅಕ್ಕಿ ಬಳಸಿ ಚಕ್ಕುಲಿಯಂತಹ ಸಂಡಿಗೆ ಮಾಡುವುದು ಅನ್ನೋದನ್ನು ತಿಳಿಯೋಣ. ಅಕ್ಕಿ ಸಂಡಿಗೆ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು? ಮಾಡುವ ವಿಧಾನವೇನು? ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ಇಲ್ಲಿ ತಿಳಿದುಕೊಳ್ಳಿ.

ಅಕ್ಕಿ ಸಂಡಿಗೆ ಮಾಡಲು ಬೇಕಾಗುವ ಪದಾರ್ಥಗಳು

ಅಕ್ಕಿ
ಸಾಬುದಾನಿ
ಜೀರಿಗೆ
ಬಿಳಿ ಎಳ್ಳು

ಅಕ್ಕಿ ಸಂಡಿಗೆ ಮಾಡುವ ವಿಧಾನವೇನು?

ಒಂದು ಪಾತ್ರೆಯಲ್ಲಿ 4 ಕಪ್ ಅಕ್ಕಿ ಹಾಕಿ ಚೆನ್ನಾಗಿ ತೊಳೆದು ನಂತರ ಸತತ 2 ದಿನಗಳ ಕಾಲ ನೆನೆಸಿಡಬೇಕು. ಹಾಗೆ ಒಂದು ದಿನ ಮೊದಲು 1 ಕಪ್ ಸಾಬುದಾನಿಯನ್ನು ಸಹ ಪಾತ್ರೆಯಲ್ಲಿ ಹಾಕಿ ನೆನೆಸಿಡಬೇಕು. 2 ದಿನದ ಬಳಿಕ ಈಗ ಅಕ್ಕಿಯನ್ನು ನೀರಿನಿಂದ ತೆಗೆದು ಒಂದು ಮಿಕ್ಸಿ ಜಾರ್‌ಗೆ ಹಾಕಿಕೊಂಡು ನುಣ್ಣಗೆ ರುಬ್ಬಿಕೊಳ್ಳಬೇಕು. ಸ್ವಲ್ಪ ಸ್ವಲ್ಪ ನೀರು ಹಾಕಿ ನುಣ್ಣಗೆ ರುಬ್ಬಿ ಒಂದು ಪಾತ್ರೆಗೆ ಹಾಕಿಕೊಳ್ಳಿ. ಒಟ್ಟು 3 ಕಪ್‌ಗಿಂತ ಹೆಚ್ಚು ನೀರು ಬಳಸಬೇಡಿ.

ಈಗ ನೆನೆಸಿಟ್ಟ ಸಾಬುದಾನಿಯನ್ನು ಸಹ ನುಣ್ಣಗೆ ರುಬ್ಬಿಕೊಂಡು ಅಕ್ಕಿ ಹಿಟ್ಟಿನಲ್ಲಿ ಹಾಕಿಕೊಂಡು ಮಿಕ್ಸ್ ಮಾಡಿ. ಎರಡು ಹಿಟ್ಟು ಚೆನ್ನಾಗಿ ಮಿಶ್ರಣವಾಗಬೇಕು. ಈಗ ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಅದಕ್ಕೆ 8 ಕಪ್ ನೀರು ಹಾಕಿ ಅದಕ್ಕೆ 3 ಸ್ಪೂನ್ ಉಪ್ಪು ಸಹ ಹಾಕಿಕೊಂಡು ಕುದಿಬರಲು ಬಿಡಿ. ನಂತರ ರುಬ್ಬಿಕೊಂಡ ಹಿಟ್ಟನ್ನು ನಿಧಾನವಾಗಿ ಹಾಕಿಕೊಳ್ಳುತ್ತಾ ಮಿಕ್ಸ್ ಮಾಡಿಕೊಳ್ಳಬೇಕು. ಇದು ಗಟ್ಟಿಯಾಗಲು ಆರಂಭಿಸಬೇಕು ಹಾಗೆ ಕೈ ಬಿಡದೆ ಮಿಕ್ಸ್ ಮಾಡಿಕೊಳ್ಳಿ.

ಹಾಗೆ ಮುಚ್ಚಳ ಮುಚ್ಚಿ ಸಣ್ಣ ಉರಿಯಲ್ಲಿ 3 ನಿಮಿಷ ಬಿಡಿ. ಇದು ಬೆಣ್ಣೆಯಂತೆ ಹದವಾದಾಗ ಒಲೆ ಆಫ್ ಮಾಡಿ ಮಿಕ್ಸ್ ಮಾಡಿ. ನಂತರ ಇದಕ್ಕೆ ಬಿಳಿ ಎಳ್ಳು, ಜೀರಿಗೆ ಸಹ ಹಾಕಿ ಮಿಕ್ಸ್ ಮಾಡಬೇಕು. ಈ ಹಿಟ್ಟು ಗಟ್ಟಿ ಮೊಸರಿನ ಹದಕ್ಕೆ ಬಂದಿರಬೇಕು. ಈಗ ಸಂಡಿಗೆ ಮಾಡಲು ಚಕ್ಕುಲಿ ಅಚ್ಚು ತೆಗೆದುಕೊಳ್ಳಿ. ಅದರ ಒಳಗೆ ಸಂಡಿಗೆ ಹಿಟ್ಟನ್ನು ಹಾಕಿಕೊಂಡು ಪ್ಲಾಸ್ಟಿಕ್ ಮೇಲೆ ಅಥವಾ ಕಾಟನ್ ಬಟ್ಟೆಯ ಮೇಲೆ ನಿಮಗೆ ಯಾವ ಗಾತ್ರಕ್ಕೆ ಬೇಕೋ ಆ ಗಾತ್ರಕ್ಕೆ ಚಕ್ಕುಲಿ ರೀತಿಯಲ್ಲಿ ಹಾಕಿಕೊಳ್ಳಿ.

ನಂತರ ಒಂದು ಬಿಸಿಲು ಒಂದು ಕಡೆ ಹಾಗೆ ಇನ್ನೊಂದು ಬಿಸಿಲಿ ಇನ್ನೊಂದು ಕಡೆ ಒಣಗಲು ಬಿಡಿ. ಇಷ್ಟಾದರೆ ನಿಮ್ಮ ಮುಂದೆ ರುಚಿ ರುಚಿಯ ಸಂಡಿಗೆ ಸಿದ್ದವಾಗುತ್ತೆ. ನೀವು ಕೂಡ ಮನೆಯಲ್ಲಿ ಈ ಸಂಡಿಗೆ ಮಾಡಿ ಸವಿದು ನೋಡಿ. ಎಲ್ಲರಿಗೂ ಇದು ಇಷ್ಟವಾಗೋದು ಖಚಿತ.