ಪುದೀನಾ ಚಿಕನ್ ಟಿಕ್ಕಾ.. ರೆಸ್ಟೋರೆಂಟ್‌ ಸ್ಟೈಲ್‌ನಲ್ಲಿ ಮನೆಯಲ್ಲೇ ಮಾಡಿ! ಮನೆಮಂದಿಗೂ ಇಷ್ಟವಾಗುತ್ತೆ

ವಾರಾಂತ್ಯದಲ್ಲಿ ವಿಶೇಷ ಖಾದ್ಯವನ್ನು ಸವಿಯಲು ಬಯಸಿದರೆ, ಪುದೀನಾ ಚಿಕನ್ ಟಿಕ್ಕಾ (Mint Chicken Tikka) ಅತ್ಯುತ್ತಮ ಆಯ್ಕೆಯಾಗಿದೆ. ಈ ಖಾದ್ಯವು ಮಳೆಗಾಲಕ್ಕೆ ಹೇಳಿ ಮಾಡಿಸಿದಂತಿದೆ. ಪುದೀನಾ ಬಳಸಿ ತಯಾರಿಸುವುದರಿಂದ ಇದು ಜೀರ್ಣಕ್ರಿಯೆಗೆ ಸಹಕಾರಿ. ಚಿಕನ್ ಜೊತೆ ಪುದೀನಾ ಸೇರಿಸುವುದರಿಂದ ರುಚಿ ಹೆಚ್ಚುವುದರ ಜೊತೆಗೆ ಆರೋಗ್ಯಕರವೂ ಹೌದು. ಇದು ಕುಟುಂಬ ಮತ್ತು ಸ್ನೇಹಿತರೊಂದಿಗೆ ಹಂಚಿಕೊಳ್ಳಲು ಸೂಕ್ತವಾದ ಹಗುರ ಮತ್ತು ಪೌಷ್ಟಿಕ ಭಕ್ಷ್ಯವಾಗಿದೆ. ಹಾಗಿದ್ರೆ, ಮನೆಯಲ್ಲಿಯೇ ರೆಸ್ಟೋರೆಂಟ್ ಶೈಲಿಯ ಪುದೀನಾ ಚಿಕನ್ ಟಿಕ್ಕಾ (Mint Chicken Tikka Recipe) ಮಾಡುವುದು ಹೇಗೆ ಅಂತ ನೋಡೋಣ ಬನ್ನಿ.

ಪುದೀನಾ ಚಿಕನ್ ಟಿಕ್ಕಾ ಮಾಡಲು ಬೇಕಾದ ಸಾಮಗ್ರಿಗಳು

• ಚಿಕನ್ (ಮೂಳೆಗಳಿಲ್ಲದ)
• ಪುದೀನಾ
• ಬೆಣ್ಣೆ
• ಉಪ್ಪು
• ಮೊಟ್ಟೆಗಳು
• ಚೀಸ್ ಸ್ಪ್ರೆಡ್
• ನಿಂಬೆ ರಸ
• ಗೋಡಂಬಿ ಪೇಸ್ಟ್
• ಶುಂಠಿ ಬೆಳ್ಳುಳ್ಳಿ ಪೇಸ್ಟ್
• ಏಲಕ್ಕಿ ಪುಡಿ
• ಮೆಣಸಿನ ಪುಡಿ

ಪುದೀನಾ ಚಿಕನ್ ಟಿಕ್ಕಾ ತಯಾರಿಸುವ ವಿಧಾನ

ಮೊದಲು, ಮೂಳೆಗಳಿಲ್ಲದ (ಎಲುಬಿಲ್ಲದ) ಚಿಕನ್ ತುಂಡುಗಳನ್ನು ಚೆನ್ನಾಗಿ ತೊಳೆಯಿರಿ. ನೀರು ಬಸಿದು ಒಣಗಲು ಬಿಡಿ. ಒಂದು ಬೌಲ್‌ನಲ್ಲಿ 1 ಚಮಚ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, 4 ಚಮಚ ನಿಂಬೆ ರಸ ಮತ್ತುಅಗತ್ಯವಿರುವಷ್ಟು ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಈ ಮಿಶ್ರಣವನ್ನು ಚಿಕನ್ ತುಂಡುಗಳಿಗೆ ಚೆನ್ನಾಗಿ ಹಚ್ಚಿ ಸ್ವಲ್ಪ ಸಮಯ ಇಡಿ.

ಇದಾದ ನಂತರ, 1 ಚಮಚ ಮೆಣಸಿನ ಪುಡಿ, 1 ಚಮಚ ಏಲಕ್ಕಿ ಪುಡಿ, 6 ಚಮಚ ಗೋಡಂಬಿ ಪೇಸ್ಟ್, 6 ಚಮಚ ಚೀಸ್ ಸ್ಪ್ರೆಡ್, ಪುದೀನಾ ಪೇಸ್ಟ್ ಮತ್ತು 2 ಹೊಡೆದ ಮೊಟ್ಟೆಗಳನ್ನು ಚಿಕನ್‌ಗೆ ಹಾಕಿ. ಚೆನ್ನಾಗಿ ಮಿಕ್ಸ್ ಮಾಡಿ 3 ರಿಂದ 4 ಗಂಟೆಗಳ ಕಾಲ ಮ್ಯಾರಿನೇಟ್ ಮಾಡಲು ಫ್ರಿಡ್ಜ್‌ನಲ್ಲಿಡಿ.

ಈಗ, ನಾನ್ ಸ್ಟಿಕ್ ಪ್ಯಾನ್‌ನಲ್ಲಿ (ಬಾಣಲೆ) ಪ್ರತಿ ಚಿಕನ್ ತುಂಡನ್ನು ಇಟ್ಟು ಚೆನ್ನಾಗಿ ಬೇಯಿಸಿ. ಬೇಯಿಸುವಾಗ ಸ್ವಲ್ಪ ಬೆಣ್ಣೆಯನ್ನು ಹಚ್ಚಬಹುದು. ಚಿಕನ್ ಬೆಂದ ನಂತರ ಟಿಕ್ಕಾ ತುಂಡುಗಳನ್ನು ತೆಗೆಯಿರಿ. ಇಷ್ಟು ಮಾಡಿದರೆ, ಬಿಸಿ ಬಿಸಿ ಪುದೀನಾ ಚಿಕನ್ ಟಿಕ್ಕಾ ಸಿದ್ಧ. ನಿಮ್ಮ ನೆಚ್ಚಿನ ಚಟ್ನಿ ಅಥವಾ ಟೊಮೆಟೊ ಸಾಸ್‌ನೊಂದಿಗೆ ಸವಿಯಬಹುದು.

ಸಾಮಾನ್ಯ ಚಿಕನ್ ಟಿಕ್ಕಾ ತಯಾರಿಸುವ ವಿಧಾನ

ಮೊದಲಿಗೆ, ಒಂದು ದೊಡ್ಡ ಪಾತ್ರೆಯಲ್ಲಿ ನಿಂಬೆ ರಸ, ಕೊತ್ತಂಬರಿ ಪುಡಿ, ಕೆಂಪು ಕ್ಯಾಪ್ಸಿಕಂ, ಜೀರಿಗೆ ಪುಡಿ, ಸೆಲರಿ ಬೀಜಗಳು, ಕಸೂರಿ ಮೇಥಿ ಪುಡಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಮೆಣಸಿನ ಪುಡಿ ಮತ್ತು ಮೊಸರು ಹಾಕಿ. ಇದರಿಂದ ಮ್ಯಾರಿನೇಡ್ ತಯಾರಿಸಿ. ಈಗ ಒಲೆಯನ್ನು ಹಚ್ಚಿ ಕಾಯಿಸಿ. ಚಿಕನ್ ಅನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದು, ಒಣಗಿಸಿ ಸಣ್ಣ ತುಂಡುಗಳಾಗಿ ಕತ್ತರಿಸಿ. ಮ್ಯಾರಿನೇಡ್ ಪಾತ್ರೆಯಲ್ಲಿ ಕತ್ತರಿಸಿದ ಚಿಕನ್, ಹೆಚ್ಚಿದ ಈರುಳ್ಳಿ ಮತ್ತು ಕ್ಯಾಪ್ಸಿಕಂ ಸೇರಿಸಿ, ಕೈಗಳಿಂದ ಚೆನ್ನಾಗಿ ಮಿಕ್ಸ್ ಮಾಡಿ. 1 ರಿಂದ 2 ಗಂಟೆಗಳ ಕಾಲ ಮ್ಯಾರಿನೇಟ್ ಮಾಡಲು ಬಿಡಿ.

ನಂತರ, ಚಿಕನ್ ತುಂಡುಗಳನ್ನು ಈರುಳ್ಳಿ ಮತ್ತು ಕ್ಯಾಪ್ಸಿಕಂನೊಂದಿಗೆ ಕಂಬಿಗಳಿಗೆ ಪೋಣಿಸಿ, ಎಲ್ಲಾ ಕಡೆ ಎಣ್ಣೆ ಹಚ್ಚಿ. ಈ ಕಂಬಿಗಳನ್ನು ಒಲೆಯಲ್ಲಿ 15 ನಿಮಿಷಗಳ ಕಾಲ ಬೇಯಿಸಿ. ಎರಡೂ ಬದಿಗೆ ತಿರುಗಿಸಿ ಎಣ್ಣೆ ಅಥವಾ ಬೆಣ್ಣೆಯನ್ನು ಹಚ್ಚಿ. ಚಿಕನ್ 10 ರಿಂದ 15 ನಿಮಿಷಗಳಲ್ಲಿ ಕಂದು ಬಣ್ಣಕ್ಕೆ ತಿರುಗುವವರೆಗೆ ಬೇಯಿಸಿ. ಚಿಕನ್ ಸಂಪೂರ್ಣವಾಗಿ ಬೆಂದ ನಂತರ, ಹೆಚ್ಚಿದ ಈರುಳ್ಳಿ, ಟೊಮೆಟೊ ಮತ್ತು ನಿಂಬೆಯೊಂದಿಗೆ ಚಿಕನ್ ಟಿಕ್ಕಾವನ್ನು ಸವಿಯಿರಿ.