ಪಪ್ಪಾಯಿ ಕಾಯಿಯಿಂದ ಸುಲಭದಲ್ಲಿ ಮಾಡಬಹುದು ರುಚಿಯಾದ ಹಲ್ವಾ: ನಾಲ್ಕೇ ಸಾಮಗ್ರಿ ಸಾಕು

ಪಪ್ಪಾಯಿ ಕಾಯಿಯಿಂದ ತುಂಬಾನೇ ರುಚಿಯಾದ ಹಲ್ವಾ ಮಾಡಬಹುದು ಎಂಬುವುದು ನಿಮಗೆ ಗೊತ್ತೇ, ಅದರಲ್ಲಿಯೂ ಈ ಹಲ್ವಾ ಅಂತೂ ತುಂಬಾ ಸುಲಭದಲ್ಲಿ ಮಾಡಬಹುದು, ಬನ್ನಿ ಪಪ್ಪಾಯಿ ಕಾಯಿಯಿಂದ ಹಲ್ವಾ ಮಾಡುವುದು ಹೇಗೆ ಎಂದು ನೋಡೋಣ ಬನ್ನಿ:

ಬೇಕಾಗುವ ಸಾಮಗ್ರಿ

ಒಂದು ಕಾಯಿ ಪಪ್ಪಾಯಿ
ಅರ್ಧ ಕೆಜಿ ಬೆಲ್ಲ
ತುಪ್ಪ
200 ಗ್ರಾಂ ಕಾರ್ನ್‌ಫ್ಲೋರ್
ಡ್ರೈ ಫ್ರೂಟ್ಸ್

ಮಾಡುವ ವಿಧಾನ:
ನೀವು ಪಪ್ಪಾಯಿ ಸಿಪ್ಪೆ ಸುಲಿದು ತೊಳೆದು ಚಿಕ್ಕದಾಗಿ ಕತ್ತರಿಸಿ ಕುಕ್ಕರ್‌ನಲ್ಲಿ ಹಾಕಿ ಬೇಯಲು ತಕ್ಕ ನೀರು ಹಾಕಿ ಬೇಯಿಸಿ, 2-3 ವಿಶಲ್ ಬರುವವರೆಗೆ ಬೇಯಿಸಿ
ನಂತರ ಕುಕ್ಕರ್‌ನ ಆವಿ ಸಂಪೂರ್ಣ ಹೋದ ಮೇಲೆ ಪಪ್ಪಾಯಿ ತುಂಡುಗಳನ್ನು ತೆಗೆದು ಒಂದು ತಟ್ಟೆಯಲ್ಲಿ ಹಾಕಿ, ಅದರಲ್ಲಿರುವ ನೀರಿನಂಶ ಹೋಗುವಂಥ ಪಾತ್ರೆಯಲ್ಲಿ ಹಾಕಿಡಿ ಅಥವಾ ನೀರನ್ನು ಸೋಸಿ ಬೆಂದ ಪಪ್ಪಾಯಿಯನ್ನು ತಟ್ಟೆಯಲ್ಲಿ ಹಾಕಿಡಿ
ಇದೇ ಸಮಯದಲ್ಲಿ ನೀವು ಬೆಲ್ಲವನ್ನು ಕರಗಿಸಿ, ಬೆಲ್ಲದ ಪಾಕ ಮಂದವಾಗಿರಲಿ
ಪಪ್ಪಾಯಿ ತಣ್ಣಗಾದ ಮೇಲೆ ನೀವು ಮಿಕ್ಸಿ ಜರ್‌ಗೆ ಹಾಕಿ ರುಬ್ಬಿ
ಈಗ ನೀವು ಪ್ಯಾನ್‌ಗೆ 2-3 ಚಮಚ ತುಪ್ಪ ಹಾಕಿ
ನಂತರ ರುಬ್ಬಿದ ಪಪ್ಪಾಯಿ ಹಾಕಿ
ಒಂದು 5 ನಿಮಿಷ ಬಿಸಿ ಮಾಡುವಷ್ಟರಲ್ಲಿ ಮೆತ್ತಗಾಗುತ್ತದೆ, ಅದರಲ್ಲಿ ಬೆಲ್ಲದ ಪಾಕ ಹಾಕಿ ಮಿಕ್ಸ್ ಮಾಡಿ, ಆಗಾಗ ಸೌಟ್‌ನಿಂದ ಆಡಿಸುತ್ತಾ ಇರಿ. ನಂತರ 200 ಗ್ರಾಂ ಕಾರ್ನ್‌ಫ್ಲೋರ್‌ಗೆ ಸ್ವಲ್ಪ ನೀರು ಹಾಕಿ ಮಿಕ್ಸ್ ಮಾಡಿ ಅದನ್ನು ಹಲ್ವಾ ಜೊತೆ ಸೇರಿಸಿ ಮಿಕ್ಸ್ ಮಾಡಿ.
ಮಿಶ್ರಣ ಗಟ್ಟಿಯಾಗುತ್ತಾ ಬರುತ್ತದೆ. ಆವಾಗ ನೀವು ಮತ್ತೆ ಸ್ವಲ್ಪ ತುಪ್ಪ ಸೇರಿಸಿ, ಡ್ರೈ ಫ್ರೂಟ್ಸ್‌ ಸೇರಿಸಿ ಮಿಕ್ಸ್ ಮಾಡಿ
ಹಲ್ವಾ ಸೌಟ್‌ನಿಂದ ಆಡಿಸುವಾಗ ಅದರ ತಳ ಬಿಟ್ಟು ಬರುವಾಗ ಹಲ್ವಾ ರೆಡಿಯಾಗಿದೆ ಎಂದರ್ಥ.

ಈಗ ನೀವು ತಟ್ಟೆಗೆ ತುಪ್ಪ ಸವರಿ ಅದರಲ್ಲಿ ಹಲ್ವಾ ಸುರಿದು ಸ್ಪೂನ್‌ನಿಂದ ಸೆಟ್‌ ಮಾಡಿ ಅರ್ಧ ಗಂಟೆ ಬಿಡಿ
ನಂತರ ಕತ್ತರಿಸಿದರೆ ರುಚಿಯಾದ ಹಲ್ವಾ ರೆಡಿ.

ಇತರ ಸಲಹೆ
ಹಣ್ಣಾದ ಪಪ್ಪಾಯಿ ಬಳಸಬೇಡಿ
ಹಸಿ ಅಥವಾ ಬಲಿತ ಪಪ್ಪಾಯಿ ಬಳಸಬಹುದು
ಬೆಲ್ಲದ ಪುಡಿ ಅಥವಾ ಬೆಲ್ಲ ಬಳಸಬಹುದು
ಡ್ರೈ ಫ್ರೂಟ್ಸ್‌ ಗೋಡಂಬಿ, ದ್ರಾಕ್ಷಿ, ಪಿಸ್ತಾ ಅಂತ ಏನಿದೆಯೋ ಅದನ್ನು ಬಸಬಹುದು.
ಅರ್ಧ ಗಂಟೆಯಲ್ಲಿ ಹಲ್ವಾ ರೆಡಿಯಾಗುತ್ತೆ.