1 ಕಪ್ ರವೆ ಇದ್ರೆ 1 ವರ್ಷಕ್ಕೆ ಬೇಕಾಗುವಷ್ಟು ಸಂಡಿಗೆ ಮಾಡಬಹುದು! ಇಲ್ಲಿದೆ ತಯಾರಿ ವಿಧಾನ!

ಊಟದ ಜೊತೆಗೆ ಸವಿಯಲು ನೀವು ಹಲವು ಸೈಡ್ ಡಿಶ್‌ಗಳ ಬಯಸುತ್ತೀರಿ. ಚಟ್ನಿ, ಪಲ್ಯ, ಹಪ್ಪಳ, ಮೆಣಸು, ಸಂಡಿಗೆ ಹೀಗೆ ಹಲವು ರೀತಿಯ ವಸ್ತುಗಳನ್ನು ನೀವು ಸವಿಯಲು ಬಯಸೋದು ನೋಡಬಹುದು. ಈ ಎಲ್ಲಾ ವಿಧವಾದ ಖಾದ್ಯಗಳು ನಿಮ್ಮ ಊಟದ ರುಚಿಯನ್ನು ಹೆಚ್ಚಿಸೋದಂತು ನಿಜ. ಅದ್ರಲ್ಲೂ ಬಹಳಷ್ಟು ಮಂದಿ ಸಂಡಿಗೆ ಸವಿಯಲು ಮುಂದಾಗೋದು ನೋಡಬಹುದು.

ಅಂಗಡಿಯಲ್ಲಿ ಸಿಗುವ ಸಂಡಿಗೆಯನ್ನು ತಂದು ಮನೆಯಲ್ಲಿ ಮಾಡಿ ಸವಿಯುತ್ತೇವೆ. ಊಟದೊಂದಿಗೆ ಸಂಡಿಗೆ ಇದ್ದರೆ ಊಟದ ರುಚಿ ಮತ್ತಷ್ಟು ಹೆಚ್ಚಾಗೋದು ನೋಡಬಹುದು. ಹಾಗೆ ರುಚಿ ರುಚಿಯ ಊಟ ಮಾತ್ರವಲ್ಲ ಸಂಜೆ ಸ್ನ್ಯಾಕ್ಸ್ ಟೈಮ್‌ಗೂ ಕೂಡ ಸಂಡಿಗೆ ಸವಿಯಬಹುದು. ಈಗಂತು ಮಾರ್ಕೆಟ್‌ನಲ್ಲಿ ಬಗೆ ಬಗೆಯ ರುಚಿಯ ಸಂಡಿಗೆ ದೊರೆಯುತ್ತವೆ.

ಆದ್ರೆ ನಾವಿಂದು ಮನೆಯಲ್ಲಿಯೇ ನೀವು ಮಾಡಬಹುದಾದ ಸಂಡಿಗೆ ಕುರಿತು ಹೇಳಲಿದ್ದೇವೆ. ಅದ್ರಲ್ಲೂ ಒಂದು ಕಪ್ ರವೆ ಬಳಸಿಕೊಂಡು ಮಾಡುವ ಈ ಸಂಡಿಗೆಯು ವರ್ಷ ಪೂರ್ತಿ ಇಟ್ಟು ಸವಿಯಬಹುದು. ನೀವು ಮಳೆಗಾಲಕ್ಕೂ ಈಗಲೇ ಸಂಡಿಗೆ ರೆಡಿ ಮಾಡಿಕೊಳ್ಳಬಹುದು. ಹಾಗಾದ್ರೆ ರವೆಯಿಂದ ಸಂಡಿಗೆ ಮಾಡುವುದು ಹೇಗೆ?

ರವೆ ಸಂಡಿಗೆ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು? ಮಾಡುವ ವಿಧಾನವೇನು? ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ತಿಳಿದುಕೊಳ್ಳೋಣ.

ರವೆ ಸಂಡಿಗೆ ಮಾಡಲು ಬೇಕಾಗುವ ವಸ್ತುಗಳು?

• ರವೆ- 1 ಕಪ್
• ಅಜ್ವೈನ ಅಥವಾ ಜೀರಿಗೆ
• ಉಪ್ಪು

ರವೆ ಸಂಡಿಗೆ ಮಾಡುವುದು ಹೇಗೆ?

ಮೊದಲು ಒಲೆ ಮೇಲೆ ಕುಕ್ಕರ್ ಇಟ್ಟು ಅದಕ್ಕೆ ರವೆ ತೆಗೆದುಕೊಂಡ ಕಪ್‌ನಲ್ಲಿ 15 ಕಪ್ ನೀರು ಹಾಕಿಕೊಳ್ಳಿ. ನಂತರ ನೀರು ಕುದಿಬರಲು ಬಿಡಿ. ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಸಹ ಹಾಕಿಕೊಂಡು ಅಳತೆ ಕಪ್‌ನಲ್ಲಿ 1 ಕಪ್ ರವೆ ಹಾಕಿಕೊಳ್ಳಿ. ಚೆನ್ನಾಗಿ ಮಿಶ್ರಣ ಮಾಡಿಕೊಳ್ಳುತ್ತಾ ಇರಬೇಕು. ಗಂಟು ಇಲ್ಲದಂತೆ 5 ನಿಮಿಷಗಳ ಕಾಲ ಮಿಕ್ಸ್ ಮಾಡುತ್ತಾ ಇರಿ.

ಇದಕ್ಕೆ 1 ಚಮಚ ಅಜ್ವೈನ ಹಾಕಿ ಮಿಶ್ರಣ ಮಾಡಿ. ಅಜ್ವೈನ ಇಲ್ಲದಿದ್ದರೆ ಜೀರಿಗೆ ಸಹ ಹಾಕಿಕೊಳ್ಳಬಹುದು. ಹಾಗೆ ಮಿಶ್ರಣ ಮಾಡುತ್ತಾ ಒಟ್ಟಾರೆ 10 ನಿಮಿಷ ಬಿಟ್ಟು ಒಲೆ ಆಫ್ ಮಾಡಿಕೊಳ್ಳಿ. ಅನಂತರ ತಣ್ಣಗಾಗಲು ಬಿಡಿ. ಸಂಪೂರ್ಣ ತಣ್ಣಗಾದ ಬಳಿಕ ಇದು ಸ್ವಲ್ಪ ಗಟ್ಟಿಯಾಗುತ್ತದೆ. ಈಗ ಒಂದು ದೊಡ್ಡ ಪ್ಲಾಸ್ಟಿಕ್ ಅಥವಾ ಕಾಟನ್ ಬಟ್ಟೆ ಹರಡಿಕೊಂಡು ಅದರ ಮೇಲೆ ಸಂಡಿಗೆ ಹಾಕಿ.

ಸಂಡಿಗೆಯನ್ನು ಕೈಯಿಂದ ಅಥವಾ ಹಾಲಿನ ಪ್ಲಾಸ್ಟಿಕ್ ಬಳಸಿಕೊಂಡು ಹಾಕಿಕೊಳ್ಳಬಹುದು. ಎಲ್ಲಾ ಸಂಡಿಗೆ ಹಾಕಿದ ಬಳಿಕ ಬಿಸಿಲಿನಲ್ಲಿ ಒಣಗಿಸಬೇಕು ಎಂಬುದಿಲ್ಲ, ನೆರಳಿನ ಜಾಗದಲ್ಲಿ ಒಂದು ದಿನ ಒಣಗಿಸಿಕೊಂಡರೆ ಸಾಕಾಗುತ್ತದೆ. ಮೊದಲು ಒಂದು ಗಂಟೆ ಬಿಸಿಲಿನಲ್ಲಿ ಒಣಗಿಸಿ ಅನಂತರ ಮನೆಯ ಒಳಗೆ ಒಣಗಿಸಿಕೊಳ್ಳಿ.

ಒಣಗಿದ ಬಳಿಕ ಇದನ್ನು ನೀವು ಎಣ್ಣೆಯ ಹಾಕಿಕೊಂಡು ಕರಿದುಕೊಳ್ಳಬಹುದು. ಉಳಿದ ಸಂಡಿಗೆಯನ್ನು ಒಂದು ಸ್ಟೀಲ್ ಡಬ್ಬಿಯಲ್ಲಿ ಹಾಕಿ ಇಟ್ಟರೆ ಒಂದು ವರ್ಷ ಇಡಬಹುದು. ಇದು ಸೋಡಾ ಹಾಕದೆ ಇದ್ದರೂ ಉಬ್ಬಿ ಬರಲಿದೆ. ಊಟದೊಂದಿಗೆ ಮತ್ತಷ್ಟು ರುಚಿ ಬರಲಿದೆ.