ಹಬ್ಬಕ್ಕಾಗಿ ರವೆ ಲಡ್ಡು ಮಾಡಿ.! ಪಾಕ-ಹಾಲು ಯಾವುದು ಬೇಡ..!

ಹಬ್ಬ ಆರಂಭವಾಗುತ್ತಿರುವ ದಿನದಲ್ಲಿ ಯಾವ ಸಿಹಿ ತಿಂಡಿ ಮಾಡಬೇಕು ಎಂಬ ನಿಮ್ಮ ಆಲೋಚನೆ ಇದ್ದರೆ ಹತ್ತಾರು ಪ್ರಕಾರಗಳಿವೆ. ಆದ್ರೆ ಎಲ್ಲದಕ್ಕಿಂತ ಸುಲಭವಾಗಿ, ಕಡಿಮೆ ವಸ್ತುಗಳ ಬಳಸಿ, ಕಡಿಮೆ ಸಮಯದಲ್ಲಿ ಮಾಡಬಹುದಾದ ತಿಂಡಿಯನ್ನು ನೀವು ಸಹ ಹುಡುಕುತ್ತಿರುತ್ತೀರಿ. ಹಬ್ಬ ಎಂದರೆ ಕೆಲಸಗಳು ಹೆಚ್ಚಾಗಿರುತ್ತವೆ. ಹೀಗಾಗಿ ಕಡಿಮೆ ಸಮಯದಲ್ಲಿ ಆದಷ್ಟು ಕಡಿಮೆ ವಸ್ತು ಬಳಸಿ ಬಾಯಿ ಚಪ್ಪರಿಸಿ ಸವಿಯಬಹುದಾದ ಅದ್ಭುತ ತಿಂಡಿ ಹುಡುಕಾಡುತ್ತಾರೆ.

ಹೀಗೆ ಹಬ್ಬಕ್ಕಾಗಿ ಸಿಹಿ ತಿಂಡಿ ಮಾಡುವ ನಿಮ್ಮ ಆಲೋಚನೆ ಇದ್ದರೆ ನಿಮಗಾಗಿ ನಾವಿಂದು ಸುಲಭವಾಗಿ ಮಾಡಬಹುದಾದ ರವೆ ಉಂಡೆ ಅಥವಾ ರವೆ ಲಡ್ಡು ಮಾಡುವ ಕುರಿತು ತಿಳಿಸುತ್ತಿದ್ದೇವೆ. ಈ ಸಿಹಿ ಚಿಕ್ಕವರಿಂದ ಹಿಡಿದು ಹಿರಿಯರ ವರೆಗೂ ಎಲ್ಲರೂ ಇಷ್ಟಪಟ್ಟು ಸವಿಯುತ್ತಾರೆ. ಹಾಗೆ ಇದನ್ನು ಎಲ್ಲ ಬೇಕರಿಯಲ್ಲಿಯೂ ನೀವು ನೋಡಿರುತ್ತೀರಿ.

ಆದ್ರೆ ಹಬ್ಬದಲ್ಲಿ ಈ ರವೆ ಲಡ್ಡು ನೃವೇಧ್ಯಕ್ಕೂ ಬರುತ್ತದೆ. ಹೀಗಾಗಿ ನಾವಿಂದು ಈ ಲಡ್ಡ ಮಾಡುವುದು ಹೇಗೆ? ರವೆ ಉಂಡೆ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡುವ ವಿಧಾನವೇನು? ಮಾಡುವ ಯಾವ ರೀತಿ ಎಚ್ಚರಿಕೆ ತಗೆದುಕೊಳ್ಳಬೇಕು ಎಂಬೆಲ್ಲಾ ಕುರಿತು ನಾವಿಂದು ತಿಳಿದುಕೊಳ್ಳೋಣ.

ರವೆ ಉಂಡೆ ಮಾಡಲು ಬೇಕಾಗುವ ಪದಾರ್ಥಗಳು

• ಉಪ್ಪಿಟ್ಟು ರವೆ - 1 ಕಪ್
• ತುಪ್ಪ - 4 ಚಮಚ
• ಒಣ ದ್ರಾಕ್ಷಿ
• ಗೋಡಂಬಿ
• ಬಾದಾಮಿ
• ಸಕ್ಕರೆ - ಮುಕ್ಕಾಲು ಕಪ್
• ತೆಂಗಿನ ತುರಿ- ಅರ್ಧ ಕಪ್

ರವೆ ಉಂಡೆ ಮಾಡುವುದು ಹೇಗೆ?

ಮೊದಲು ಒಲೆ ಮೇಲೆ ಒಂದು ಪಾತ್ರೆ ಇಟ್ಟು ಅದಕ್ಕೆ ಮೂರರಿಂದ ನಾಲ್ಕು ಚಮಚ ತುಪ್ಪ, ಗೋಡಂಬಿ, ಒಣದ್ರಾಕ್ಷಿ, ಬಾದಾಮಿ ಸಹ ಹಾಕಿಕೊಳ್ಳಬಹುದು. ಇದನ್ನು ಹುರಿದ ಬಳಿಕ ಅದನ್ನು ಪಾತ್ರೆಯಿಂದ ತೆಗೆಯದೇ ಅದರ ಮೇಲೆ ರವೆಯನ್ನು ಹಾಕಿ. ನೀವು ಉಪ್ಪಿಟ್ಟಿನ ರವೆಯಲ್ಲಿ ಈ ಲಡ್ಡು ಮಾಡಬಹುದು. ಮೃದುವಾಗಿ ಬರುತ್ತದೆ.

ರವೆ ಹಾಕಿಕೊಳ್ಳುತ್ತಾ ಚೆನ್ನಾಗಿ ಮಿಕ್ಸ್ ಮಾಡಿಕೊಳ್ಳಿ. ರವೆಯನ್ನು 10 ನಿಮಿಷಗಳ ಕಾಲ ಚೆನ್ನಾಗಿ ಹುರಿದುಕೊಳ್ಳಿ. ಉರಿ ಸಣ್ಣದಾಗಿ ಇರಲಿ. ಈಗ ಏಲಕ್ಕಿ ಹಾಕಿಕೊಂಡು ಮತ್ತೆ ಕಲಸಿಕೊಂಡು ಹುರಿದುಕೊಳ್ಳಿ. ಈಗ ಗ್ಯಾಸ್ ಆಫ್ ಮಾಡಿಕೊಂಡು ರವೆ ಬದಿಗಿಟ್ಟುಕೊಳ್ಳಿ. ಈಗ ಒಲೆ ಮೇಲೆ ಮತ್ತೊಂದು ಬಾಣಲಿ ಇಟ್ಟು ತೆಂಗಿನಕಾಯಿ ತುರಿ ಹಾಕಿ 3 ನಿಮಿಷ ಹುರಿದುಕೊಳ್ಳಿ. ಬಳಿಕ ಇದನ್ನು ತೆಗೆದು ಬದಿಗಿಡಿ.

ಈಗ ಅದೇ ಪಾತ್ರೆಯನ್ನು ಒಲೆ ಮೇಲೆ ಇಟ್ಟು ಅದಕ್ಕೆ ಮುಕ್ಕಾಲು ಕಪ್ ಸಕ್ಕರೆ ಹಾಕಿ ಸ್ವಲ್ಪವೇ ನೀರು ಹಾಕಿ ಕರಗಿಸಿಕೊಳ್ಳಿ. ಸಕ್ಕರೆ ಕರಗಿದರೆ ಸಾಕಾಗುತ್ತದೆ, ಪಾಕ ಮಾಡುವ ಅವಶ್ಯಕತೆ ಇಲ್ಲ. ಸಕ್ಕರೆ ಕರಗಿದ ಬಳಿಕ ತೆಗೆದು ಬದಿಗಿಟ್ಟು, ಈಗ ಹುರಿದುಕೊಂಡಿದ್ದ ರವೆಗೆ ಹುರಿದುಕೊಂಡ ತೆಂಗಿನ ತುರಿಯನ್ನು ಹಾಕಿ ಮಿಕ್ಸ್ ಮಾಡಿ.

ಈಗ ಸಕ್ಕರೆ ನೀರನ್ನು ಸಹ ಸ್ವಲ್ಪ ಸ್ವಲ್ಪ ಹಾಕಿಕೊಳ್ಳುತ್ತಾ ಉಂಡೆ ಕಟ್ಟಲು ಆರಂಭಿಸಿ. ನಿಮಗೆ ಎಷ್ಟು ದೊಡ್ಡ ಉಂಡೆ ಬೇಕೋ ಅಷ್ಟು ದೊಡ್ಡದಾಗಿ ಮಾಡಿಕೊಳ್ಳಿ. ಸಕ್ಕರೆ ನೀರು ಬಿಸಿ ಬಿಸಿ ಇರುವಾಗ ಉಂಡೆ ಕಟ್ಟಿಕೊಳ್ಳಿ. ಸ್ವಲ್ಪ ಸ್ವಲ್ಪ ಸಕ್ಕರೆ ನೀರು ಹಾಕಿಕೊಳ್ಳುತ್ತಾ ಉಂಡೆ ಮಾಡಿಕೊಳ್ಳಿ. ಎಲ್ಲಾ ಉಂಡೆಯಲ್ಲೂ ದ್ರಾಕ್ಷಿ, ಗೋಡಂಬಿ, ಬಾದಾಮಿ ಬರುವಂತೆ ನೋಡಿಕೊಳ್ಳಿ. ಇಷ್ಟಾದರೆ ನಿಮ್ಮ ಮುಂದೆ ಮೃದುವಾದ ನೀರು ತರಿಸುವ ರವೆ ಲಡ್ಡು ರೆಡಿಯಾಗುತ್ತದೆ. ಇದನ್ನು ಹಬ್ಬದಂದು ನೈವೇಧ್ಯಕ್ಕೆ ಹಾಗೆ ಊಟದ ಜೊತೆ ಸವಿಯಲು ನೀಡಬಹುದು. ನೀವು ಸಹ ಒಮ್ಮೆ ಮನೆಯಲ್ಲಿ ಇದನ್ನು ಟ್ರೈ ಮಾಡಿ ನೋಡಿ.