ಎಣ್ಣೆ ಇಲ್ಲದೆ ಚಿಕನ್ ಕರಿ! ಟೇಸ್ಟ್ ಮತ್ತು ಹೆಲ್ತ್ ಎರಡೂ ಗ್ಯಾರಂಟಿ.. ಮಾಡೋದು ಹೇಗೆ?

ಚಿಕನ್ ಹೀಗೆ ಮಾಡಿದ್ರೆ ಟೇಸ್ಟ್ ನೆಕ್ಸ್ಟ್ ಲೆವೆಲ್! ಆರೋಗ್ಯಕ್ಕೂ ಒಳ್ಳೆಯದು. ಚಿಕನ್ ಅಂದರೆ ಯಾರಿಗೆ ತಾನೇ ಇಷ್ಟವಾಗುವುದಿಲ್ಲ ಹೇಳಿ. ಚಿಕನ್ ಆರೋಗ್ಯಕ್ಕೆ ಬಹಳ ಒಳ್ಳೆಯದು. ಆದರೆ ಅತಿಯಾದರೆ ಆರೋಗ್ಯಕ್ಕೆ ಬಹಳ ಡೇಂಜರ್. ಹೌದು, ಚಿಕನ್ (Chicken) ಒಂದು ಜನಪ್ರಿಯ ಆಹಾರವಾಗಿದ್ದು, ಇದನ್ನು ಅನೇಕರು ಇಷ್ಟಪಟ್ಟು ಸವಿಯುತ್ತಾರೆ. ತಂದೂರಿ, ಚಿಕನ್ 65, ಕಬಾಬ್‌ಗಳಂತಹ ವಿಭಿನ್ನ ಶೈಲಿಗಳಲ್ಲಿ ಇದನ್ನು ತಯಾರಿಸಲಾಗುತ್ತದೆ. ಆದರೆ, ಕೆಲವರು ಎಣ್ಣೆಯ ಅಂಶದಿಂದಾಗಿ ಚಿಕನ್ ಸೇವಿಸಲು ಹಿಂಜರಿಯುತ್ತಾರೆ. ಅಂತಹವರಿಗೆ, ಎಣ್ಣೆ ಬಳಸದೆ ರುಚಿಕರ ಹಾಗೂ ಆರೋಗ್ಯಕರ ಚಿಕನ್ ತಯಾರಿಸುವುದು ಹೇಗೆ (Oil Less Chicken) ಎಂಬುದನ್ನು ನಾವು ಈ ಲೇಖನದಲ್ಲಿ ತಿಳಿಸಿದ್ದೇವೆ.

ಈ ರೀತಿಯ ಚಿಕನ್ ಎಂದೂ ತಿಂದಿರಲಿಲ್ಲ. ಟೇಸ್ಟಿ & ಹೆಲ್ದಿ ಎರಡೂ ಒಂದೇ ರುಚಿಯಲ್ಲಿ! ಸಾಂಪ್ರದಾಯಿಕ ವಿಧಾನಗಳಲ್ಲಿ ಎಣ್ಣೆ ಹೆಚ್ಚಾಗಿ ಬಳಕೆಯಾಗುವ ಕಾರಣ ಆರೋಗ್ಯದ ಬಗ್ಗೆ ಕಾಳಜಿ ಇರುವವರು ಚಿಕನ್‌ನಿಂದ ದೂರ ಉಳಿಯುತ್ತಾರೆ. ಆದರೆ, ಈ ವಿಶೇಷ ವಿಧಾನವು ಎಣ್ಣೆಯ ಬಳಕೆಯನ್ನು ಸಂಪೂರ್ಣವಾಗಿ ನಿವಾರಿಸಿ, ಚಿಕನ್‌ನ ನೈಜ ರುಚಿಯನ್ನು ಉಳಿಸಿಕೊಳ್ಳುತ್ತದೆ. ಇದು ನಿಮ್ಮ ಆರೋಗ್ಯಕ್ಕೂ ಅತ್ಯುತ್ತಮ ಆಯ್ಕೆಯಾಗಿದೆ. ಯಾವುದೇ ರಾಜಿ ಇಲ್ಲದೆ ಚಿಕನ್ ಸವಿಯಲು ಬೇಕಾದ ಮಾರ್ಗವಾಗಿದೆ.

ಎಣ್ಣೆ ರಹಿತ ಚಿಕನ್ ತಯಾರಿಸಲು ಬೇಕಾದ ಸಾಮಗ್ರಿಗಳು

• ಚಿಕನ್ ಬ್ರೆಸ್ಟ್‌ಗಳು - 4 (ಮೂಳೆ ಮತ್ತು ಚರ್ಮರಹಿತ ಕೋಳಿ ಮಾಂಸ)
• ನಿಂಬೆ ಹಣ್ಣು - 2 (ರಸ ತೆಗೆದ)
• ತಾಜಾ ರೋಸ್ಮರಿ - 2 ಚಮಚ (ಸಣ್ಣಗೆ ಹೆಚ್ಚಿದ್ದು)
• ತಾಜಾ ಥೈಮ್ - 2 ಚಮಚ (ಹೆರ್ಬಲ್ ಅಂಗಡಿಗಳಲ್ಲಿ ಲಭ್ಯ)
• ಬೆಳ್ಳುಳ್ಳಿ ಎಸಳುಗಳು - 2 ಸಣ್ಣಗೆ ಕಟ್ ಮಾಡಿದ
• ಉಪ್ಪು - ರುಚಿಗೆ ತಕ್ಕಷ್ಟು
• ಮೆಣಸು (ಕಾಳು ಮೆಣಸು)

ಎಣ್ಣೆ ರಹಿತ ಚಿಕನ್ ತಯಾರಿಸುವ ವಿಧಾನ

ಮೊದಲಿಗೆ, ಒಂದು ಬಟ್ಟಲು ತೆಗೆದುಕೊಳ್ಳಿ. ಅದರಲ್ಲಿ ನಿಂಬೆ ರಸ, ರೋಸ್ಮರಿ, ಥೈಮ್, ಬೆಳ್ಳುಳ್ಳಿ, ಉಪ್ಪು ಮತ್ತು ಕಾಳುಮೆಣಸನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ, ಮ್ಯಾರಿನೇಡ್ ತಯಾರಿಸಿ. ನಂತರ ಗ್ಯಾಸ್ ಆನ್ ಮಾಡಿ ಗ್ರಿಲ್ ಅಥವಾ ಗ್ರಿಲ್ ಪ್ಯಾನ್ ಅನ್ನು ಮಧ್ಯಮದಿಂದ ಹೆಚ್ಚಿನ ಉರಿಯಲ್ಲಿ ಸ್ವಲ್ಪ ಹೊತ್ತು ಬಿಸಿ ಮಾಡಿ. ಪ್ಯಾನ್ ಸರಿಯಾಗಿ ಬಿಸಿಯಾದಾಗ ಚಿಕನ್ ಬೇಯಿಸಲು ಸಿದ್ಧವಾಗುತ್ತದೆ.

ಪ್ಯಾನ್ ಬಿಸಿಯಾದ ಬಳಿಕ, ಚಿಕನ್ ಬ್ರೆಸ್ಟ್‌ಗಳನ್ನು ಸಿದ್ಧಪಡಿಸಿದ ಮ್ಯಾರಿನೇಡ್‌ನಲ್ಲಿ ಸಂಪೂರ್ಣವಾಗಿ ಲೇಪಿಸಿ. ಬಳಿಕ ಅದನ್ನು ಬಿಸಿ ಮಾಡಿದ ಗ್ರಿಲ್ ಪ್ಯಾನ್ ಮೇಲೆ ಇರಿಸಿ, ಎರಡೂ ಕಡೆಗಳನ್ನು ತಿರುಗಿಸುತ್ತಾ 5 ರಿಂದ 7 ನಿಮಿಷಗಳ ಕಾಲ ಸಂಪೂರ್ಣವಾಗಿ ಬೇಯುವವರೆಗೆ ಗ್ರಿಲ್ ಮಾಡಿ. ಚಿಕನ್ ಸರಿಯಾಗಿ ಬೆಂದ ನಂತರ, ಸ್ಟವ್ ಆಫ್ ಮಾಡಿ ಕೆಲವು ನಿಮಿಷಗಳ ಕಾಲ ಹಾಗೆಯೇ ಬಿಟ್ಟು ಬಳಿಕ ತಟ್ಟೆಗೆ ಹಾಕಿ. ಇಷ್ಟು ಮಾಡಿದರೆ, ಈಗ ನಿಮ್ಮ ಎಣ್ಣೆ ರಹಿತ ರುಚಿಕರ ಚಿಕನ್ ಸವಿಯಲು ಸಿದ್ಧ.

ಇದನ್ನು ಸವಿಯುವುದು ಹೇಗೆ?

ಬಿಸಿ ಬಿಸಿಯಾದ ಎಣ್ಣೆ ರಹಿತ ಚಿಕನ್ ಅನ್ನು ಅನ್ನ ಅಥವಾ ಚಪಾತಿ ಜೊತೆ ಸವಿಯಬಹುದು. ಚಿಕನ್ ಪ್ಯಾನ್‌ಗೆ ಅಂಟಿಕೊಳ್ಳುವುದನ್ನು ತಪ್ಪಿಸಲು ನಾನ್-ಸ್ಟಿಕ್ ಗ್ರಿಲ್ ಪ್ಯಾನ್ ಅಥವಾ ಗ್ರಿಲ್ ಮ್ಯಾಟ್ ಬಳಸಬೇಕು. ಪ್ಯಾನ್ ಅನ್ನು ಅತಿಯಾಗಿ ತುಂಬಿಸಬೇಡಿ, ಅಗತ್ಯವಿದ್ದರೆ ಚಿಕನ್ ಅನ್ನು ಸಣ್ಣ ಬ್ಯಾಚ್‌ಗಳಲ್ಲಿ ಬೇಯಿಸುವುದು ಉತ್ತಮ. ಗ್ರಿಲ್ ಜೊತೆಗೆ, ಮ್ಯಾರಿನೇಟ್ ಮಾಡಿದ ಚಿಕನ್ ಬ್ರೆಸ್ಟ್‌ಗಳನ್ನು ಬೇರೆ ವಿಧಾನಗಳಲ್ಲಿಯೂ ತಯಾರಿಸಬಹುದು. ಈ ಪರ್ಯಾಯ ವಿಧಾನಗಳು ಸಹ ಎಣ್ಣೆ ರಹಿತ ಚಿಕನ್ ಪಡೆಯಲು ಸಹಾಯಕವಾಗಿವೆ.