ಹಿಟ್ಟು ನೆನೆಸೋ ತೊಂದರೆ ಬೇಡ! 15 ನಿಮಿಷಗಳಲ್ಲಿ ಓಟ್ಸ್ ಮಸಾಲಾ ಇಡ್ಲಿ ಮಾಡಿ

ನಿತ್ಯ ಬೆಳಗ್ಗೆ ಟಿಫನ್‌ಗೆ ಹೊಸತನ್ನು ಮಾಡುವುದು ಎಲ್ಲರಿಗೂ ಸವಾಲು. ಇದಕ್ಕೆ ಪರಿಹಾರವಾಗಿ, ಓಟ್ಸ್ ಮಸಾಲಾ ಇಡ್ಲಿ (oats masala idli) ಒಂದು ಅತ್ಯುತ್ತಮ ಆಯ್ಕೆ. ಇದು ಕೇವಲ 15 ನಿಮಿಷಗಳಲ್ಲಿ ತಯಾರಿಸಬಹುದಾದ ರುಚಿಕರ ಹಾಗೂ ಆರೋಗ್ಯಕರ ತಿಂಡಿ. ಸಾಂಪ್ರದಾಯಿಕ ಇಡ್ಲಿಯಂತೆ ಹಿಟ್ಟು ನೆನೆಸಿ, ರುಬ್ಬುವ ಪ್ರಕ್ರಿಯೆ ಇರಲ್ಲ. ಇಂದಿನ ವೇಗದ ಜೀವನಶೈಲಿಗೆ ಇದು ಹೇಳಿ ಮಾಡಿಸಿದ ತಿಂಡಿ.

ಓಟ್ಸ್‌ನಲ್ಲಿ ನಾರಿನಾಂಶ ಅಧಿಕವಾಗಿರುತ್ತದೆ. ಇದರಿಂದ ತೂಕ ಇಳಿಸಿಕೊಳ್ಳಲು ಬಯಸುವವರಿಗೆ ಮತ್ತು ಮಧುಮೇಹಿಗಳಿಗೆ ಇದು ಬಹಳ ಉಪಯುಕ್ತ. ಇದು ರಕ್ತದಲ್ಲಿನ ಶುಗರ್ ಲೆವೆಲ್ (ಸಕ್ಕರೆ ಮಟ್ಟ) ಕಂಟ್ರೋಲ್ ಮಾಡಲು ಸಹಕಾರಿ. ಹೀಗಾಗಿ, ಟೇಸ್ಟ್ ಮತ್ತು ಹೆಲ್ತ್ ಅನ್ನು ಒಂದೇ ತಿಂಡಿಯಲ್ಲಿ ಬಯಸುವವರಿಗೆ ಓಟ್ಸ್ ಮಸಾಲಾ ಇಡ್ಲಿ ಬೆಸ್ಟ್. ಬನ್ನಿ. ಓಟ್ಸ್ ಮಸಾಲಾ ಇಡ್ಲಿ ತಯಾರಿಸುವ ವಿಧಾನವನ್ನು (oats masala idli recipe) ತಿಳಿಯೋಣ.

ಓಟ್ಸ್ ಮಸಾಲಾ ಇಡ್ಲಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಓಟ್ಸ್ - 1 ಕಪ್
• ರವೆ (ಹುರಿದ ಬಾಂಬೆ) - 1/2 ಕಪ್
• ಹುಳಿ ಮೊಸರು - 1/2 ಕಪ್
• ತುರಿದ ಕ್ಯಾರೆಟ್ - 2 ಚಮಚ
• ತುರಿದ ಶುಂಠಿ - 1/2 ಇಂಚು ತುಂಡು
• ಅಡುಗೆ ಸೋಡಾ - 1/2 ಚಮಚ
• ಉಪ್ಪು - ರುಚಿಗೆ ತಕ್ಕಷ್ಟು
• ನೀರು - ಅಗತ್ಯಕ್ಕೆ ತಕ್ಕಷ್ಟು

ಒಗ್ಗರಣೆಗೆ ಬೇಕಾಗುವ ಸಾಮಗ್ರಿಗಳು

• ಎಣ್ಣೆ
• ಸಾಸಿವೆ
• ಜೀರಿಗೆ
• ಉದ್ದಿನಬೇಳೆ
• ಚಿಟಿಕೆ ಇಂಗು
• ಕರಿಬೇವಿನ ಎಲೆ

ಓಟ್ಸ್ ಮಸಾಲಾ ಇಡ್ಲಿ ತಯಾರಿಸುವ ಸುಲಭ ವಿಧಾನ ಇಲ್ಲಿದೆ

ಹಂತ 1: ಮೊದಲಿಗೆ ಓಟ್ಸ್ ಪುಡಿ ಮಾಡಿ. ಓಟ್ಸ್ ಅನ್ನು ಮಿಕ್ಸರ್ ಜಾರ್‌ಗೆ ಹಾಕಿ, ತರಿತರಿಯಾಗಿ ಪುಡಿ ಮಾಡಿ. ಇದು ಇಡ್ಲಿಗೆ ಉತ್ತಮ ವಿನ್ಯಾಸ ನೀಡುತ್ತದೆ.

ಹಂತ 2: ಈಗ ಹಿಟ್ಟು ಮಿಕ್ಸ್ ಮಾಡಿ. ಒಂದು ದೊಡ್ಡ ಪಾತ್ರೆಯಲ್ಲಿ ಪುಡಿ ಮಾಡಿದ ಓಟ್ಸ್, ಹುರಿದ ಬಾಂಬೆ ರವೆ, ಹುಳಿ ಮೊಸರು, ತುರಿದ ಕ್ಯಾರೆಟ್ ಮತ್ತು ಶುಂಠಿ ಸೇರಿಸಿ ಮಿಶ್ರಣ ಮಾಡಿ. ಸ್ವಲ್ಪ ಸ್ವಲ್ಪ ನೀರು ಸೇರಿಸುತ್ತಾ ಗಂಟುಗಳಿಲ್ಲದ ನಯವಾದ ಇಡ್ಲಿ ಹಿಟ್ಟು ತಯಾರಿಸಿ.

ಹಂತ 3: ಈಗ ಒಗ್ಗರಣೆ ಹಾಕಿ. ಒಂದು ಸಣ್ಣ ಪ್ಯಾನ್‌ನಲ್ಲಿ ಎಣ್ಣೆ ಬಿಸಿ ಮಾಡಿ. ಈಗ ಸಾಸಿವೆ, ಜೀರಿಗೆ, ಉದ್ದಿನಬೇಳೆ, ಇಂಗು ಮತ್ತು ಕರಿಬೇವು ಸೇರಿಸಿ. ಸಾಸಿವೆ ಚಿಟಪಟ ಎಂದ ನಂತರ, ಈ ಬಿಸಿ ಒಗ್ಗರಣೆಯನ್ನು ಇಡ್ಲಿ ಹಿಟ್ಟಿಗೆ ಹಾಕಿ ಚೆನ್ನಾಗಿ ಬೆರೆಸಿ.

ಹಂತ 4: ಹಿಟ್ಟನ್ನು ಸ್ವಲ್ಪ ಕಾಲ ಬಿಡಿ. ಹಿಟ್ಟನ್ನು ಮುಚ್ಚಿ 10 ನಿಮಿಷಗಳ ಕಾಲ ಪಕ್ಕಕ್ಕೆ ಇಡಿ. ಇದರಿಂದ ರವೆ ಮತ್ತು ಓಟ್ಸ್ ನೀರನ್ನು ಹೀರಿಕೊಂಡು ಹಿಟ್ಟು ಮೃದುವಾಗುತ್ತದೆ.

ಹಂತ 5: ಅಂತಿಮವಾಗಿ ಇಡ್ಲಿಗಳನ್ನು ಬೇಯಿಸುವ ಮೊದಲು, ಹಿಟ್ಟಿಗೆ ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಅಡುಗೆ ಸೋಡಾ ಸೇರಿಸಿ. ಒಂದೇ ದಿಕ್ಕಿನಲ್ಲಿ ನಯವಾಗಿ ಬೆರೆಸಿ. ಸೋಡಾ ಸೇರಿಸಿದ ನಂತರ ಹೆಚ್ಚು ಕಲಸಬೇಡಿ.

ಹಂತ 6: ಈಗ ಇಡ್ಲಿ ಬೇಯಿಸಬೇಕು. ಇಡ್ಲಿ ತಟ್ಟೆಗಳಿಗೆ ಎಣ್ಣೆ ಹಚ್ಚಿ, ತಯಾರಿಸಿದ ಹಿಟ್ಟನ್ನು ಹಾಕಿ. ಇಡ್ಲಿ ಕುಕ್ಕರ್‌ನಲ್ಲಿ ಸುಮಾರು 15 ನಿಮಿಷಗಳ ಕಾಲ ಹಬೆಯಲ್ಲಿ ಬೇಯಿಸಿ. ಬೆಂದಿದೆಯೇ ಎಂದು ಪರೀಕ್ಷಿಸಲು, ಟೂತ್‌ಪಿಕ್ ಅನ್ನು ಇಡ್ಲಿಯ ಮಧ್ಯದಲ್ಲಿ ಚುಚ್ಚಿ ನೋಡಿ. ಅದು ಸ್ವಚ್ಛವಾಗಿ ಬಂದರೆ ಇಡ್ಲಿ ಬೆಂದಿದೆ ಎಂದರ್ಥ.

ಇಷ್ಟು ಮಾಡಿದರೆ ಸಾಕು, ಬಿಸಿ ಬಿಸಿಯಾದ ಓಟ್ಸ್ ಮಸಾಲಾ ಇಡ್ಲಿ ಸಿದ್ಧ. ಈ ಇಡ್ಲಿಗಳನ್ನು ತೆಂಗಿನಕಾಯಿ ಚಟ್ನಿ ಅಥವಾ ಸಾಂಬಾರ್ ಜೊತೆ ಸವಿಯಬಹುದು. ಪ್ರತಿದಿನ ಒಂದೇ ರೀತಿಯ ತಿಂಡಿ ಬೇಸರವಾಗಿದ್ದರೆ, ಕೇವಲ 15 ನಿಮಿಷಗಳಲ್ಲಿ ಸಿದ್ಧವಾಗುವ ಈ ಓಟ್ಸ್ ಮಸಾಲಾ ಇಡ್ಲಿ ಟ್ರೈ ಮಾಡಿ.