ಆರೋಗ್ಯ ವೃದ್ಧಿಸುವ ನುಗ್ಗೆ ಸೊಪ್ಪಿನ ಖಾರ ಚಟ್ನಿ..! ಬೆಳಗ್ಗೆ ತಿಂಡಿಗೆ ಮಾಡಿ ನೋಡಿ..!

ನುಗ್ಗೆ ಸೊಪ್ಪು ಬಹಳಷ್ಟು ಪೋಷಕಾಂಶಗಳನ್ನು ತನ್ನಲ್ಲಿಟ್ಟುಕೊಂಡಿರುವ ಹಸಿರು ತರಕಾರಿಯಾಗಿದೆ, ನುಗ್ಗೆಕಾಯಿ ಸಾಂಬಾರ್ ಅನ್ನು ನಾವೆಲ್ಲಾ ಬಾಯಿ ಚಪ್ಪರಿಸಿ ಸವಿದಿರುತ್ತೇವೆ. ಹಾಗೆ ಈ ನುಗ್ಗೆ ಸೊಪ್ಪಿನಿಂದ ಮಾಡುವ ಕೆಲವು ಖಾದ್ಯ ಕೂಡ ಅ‍ಷ್ಟೇ ರುಚಿಯಾಗಿರುತ್ತೆ, ಅದರಲ್ಲೂ ನುಗ್ಗೆ ಸೊಪ್ಪಿನ ಪಲ್ಯ, ಚಟ್ನಿ ಅಂತು ಊಟ ತಿಂಡಿಗೆ ಹೇಳಿ ಮಾಡಿಸಿದ ಖಾದ್ಯ ಎನ್ನಬಹುದು.

ಈ ನುಗ್ಗೆ ಸೊಪ್ಪಿನ ಯಾವುದೇ ಖಾದ್ಯ ಆದ್ರೂ ಅದನ್ನು ಮಾಡುವುದು ಬಹಳ ಸುಲಭ ಹಾಗೆ ಕಡಿಮೆ ಸಮಯದಲ್ಲಿ ಮಾಡಬಹುದು. ಇನ್ನು ನುಗ್ಗೆ ಸೊಪ್ಪಿನ ಆರೋಗ್ಯಕಾರಿ ಅಂಶಗಳ ಬಗ್ಗೆ ನಾವು ಹೇಳುವುದಾದರೆ ಈ ಸೊಪ್ಪಿನಲ್ಲಿ ಕಬ್ಬಿಣ, ಕ್ಯಾಲ್ಸಿಯಂ, ಪೊಟ್ಯಾಸಿಯಮ್, ವಿಟಮಿನ್ ಎ, ಸಿ ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳು ಹೇರಳವಾಗಿದ್ದು, ಬೊಜ್ಜು, ಮಧುಮೇಹ, ರಕ್ತಹೀನತೆ, ಹೃದ್ರೋಗ, ಸಂಧಿವಾತ, ಪಿತ್ತಜನಕಾಂಗದ ಕಾಯಿಲೆಗಳು, ಚರ್ಮ ರೋಗ ಸೇರಿ ಹಲವು ಸಮಸ್ಯೆಗಳಿಗೆ ಇದು ಪರಿಹಾರ ನೀಡಬಹುದು.

Photo Credit:

ಹೀಗಾಗಿಯೇ ಇದನ್ನು ಸೂಪರ್ ಫುಡ್ ಅಂತಲೂ ವರ್ಗೀಕರಿಸಲಾಗಿದೆ. ಅಂದರೆ ನೀವು ಬೆಳಗ್ಗೆ ಈ ನುಗ್ಗೆ ಸೊಪ್ಪಿನ ಯಾವುದಾದರು ಖಾದ್ಯ ಸವಿಯುವುದು ನಿಮ್ಮ ಆರೋಗ್ಯದ ದೃಷ್ಟಿಯಿಂದ ಬಹಳ ಉತ್ತಮ ಅಭ್ಯಾಸವಾಗಲಿದೆ, ಇದರಿಂದ ಇಡೀ ದಿನ ಚಟುವಟಿಕೆಯಿಂದ ಕೆಲಸ ಮಾಡಬಹುದು. ಹಾಗಾದ್ರೆ ನಾವಿಂದು ಬೆಳಗ್ಗೆ ತಿಂಡಿಗೆ ಖಾರ ಖಾರವಾಗಿ ನುಗ್ಗೆ ಸೊಪ್ಪಿನಿಂದ ಮಾಡಲಾದ ಚಟ್ನಿಯ ಸ್ವಾಧಿಸೋಣ.

ಈ ನುಗ್ಗೆ ಸೊಪ್ಪಿನ ಚಟ್ನಿ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ? ಮಾಡಲು ಯಾವೆಲ್ಲಾ ತಯಾರಿಯನ್ನು ಮಾಡಿಕೊಳ್ಳಬೇಕಾಗುತ್ತದೆ ಎಂಬ ಮಾಹಿತಿಯನ್ನು ಇಲ್ಲಿ ತಿಳಿದುಕೊಳ್ಳೋಣ.

ನುಗ್ಗೆ ಸೊಪ್ಪಿನ ಚಟ್ನಿ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು?

• ನುಗ್ಗೆ ಸೊಪ್ಪು
• ಕರಿಬೇವು
• ಎಣ್ಣೆ
• ಹಸಿ ಮೆಣಸು
• ಕಡಲೆ ಬೇಳೆ
• ಮೆಂತ್ಯ
• ಹುಣಸೆ ಹುಳಿ
• ಕಾಯಿ ತುರಿ
• ಉದ್ದಿನ ಬೇಳೆ
• ಉಪ್ಪು
• ಕೊತ್ತಂಬರಿ ಸೊಪ್ಪು

ನುಗ್ಗೆ ಸೊಪ್ಪಿನ ಚಟ್ನಿ ಮಾಡುವುದು ಹೇಗೆ?

ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಎಣ್ಣೆ ಹಾಕಿ ಎಣ್ಣೆ ಬಿಸಿಯಾದಾಗ ಇದಕ್ಕೆ 3 ಸ್ಪೂನ್ ಕಡಲೆ ಬೇಳೆ ಹಾಗೂ ಉದ್ದಿನ ಬೇಳೆ, ಸ್ವಲ್ಪ ಮೆಂತ್ಯ, ಕರಿಬೇವು ಹಾಕಿಕೊಂಡು 1 ನಿಮಿಷ ಫ್ರೈ ಮಾಡಿಕೊಳ್ಳಿ. ಈಗ ಚೆನ್ನಾಗಿ ತೊಳೆದಿರುವ ಒಂದು ಕಪ್‌ಗಿಂತ ಹೆಚ್ಚಿನ ನುಗ್ಗೆ ಸೊಪ್ಪನ್ನು ಹಾಕಿಕೊಳ್ಳಿ. ನುಗ್ಗೆ ಸೊಪ್ಪು ಹೆಚ್ಚಾಗಿ ಬಳಸಿ ಇದನ್ನು ಫ್ರೈ ಮಾಡಿದಾಗ ಸ್ವಲ್ಪವೇ ಪ್ರಮಾಣದಲ್ಲಿ ಸಿಗುತ್ತದೆ.

ನುಗ್ಗೆ ಸೊಪ್ಪು ಸೇರಿಸಿ ಬೇಯಿಸಿಕೊಳ್ಳಬೇಕು. 3 ನಿಮಿಷ ಬೇಯಿಸಿಕೊಂಡರೆ ಸಾಕು. ಈಗ ಇಡಿ ಹಸಿ ಮೆಣಸು ಹಾಕಿ ಫ್ರೈ ಮಾಡಿಕೊಳ್ಳಿ. ಅನಂತರ ಇದಕ್ಕೆ ಹುಣಸೆ ಹಣ್ಣು ಹಾಗೂ ಕಾಯಿ ತುರಿ ಕೊತ್ತಂಬರಿ ಸೊಪ್ಪು ಸೇರಿಸಿ 1 ನಿಮಿಷ ಫ್ರೈ ಮಾಡಿಕೊಂಡು ಒಲೆ ಆಫ್ ಮಾಡಿಕೊಳ್ಳಿ. ಹಾಗೆ ಈ ಎಲ್ಲಾ ಮಿಶ್ರಣ ತಣ್ಣಗಾಗಲು ಬಿಡಬೇಕಾಗುತ್ತದೆ.

ತಣ್ಣಗಾದ ಬಳಿಕ ಒಂದು ಮಿಕ್ಸಿ ಜಾರ್‌ಗೆ ಈ ಎಲ್ಲಾ ಮಸಾಲೆಗಳ ಸೇರಿಸಿಕೊಂಡು ಅನಂತರ ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಕೂಡ ಸೇರಿಸಿಕೊಂಡು ರುಬ್ಬಿಕೊಳ್ಳಬೇಕು. ಈ ವೇಳೆ ನಿಮಗೆ ಬೇಕಾದರೆ ಸ್ವಲ್ವವೇ ಸ್ವಲ್ಪ ನೀರು ಹಾಕಿಕೊಳ್ಳಿ. ನೀವು ಗಟ್ಟಿಯಾಗಿಯೂ ಚಟ್ನಿ ಮಾಡಬಹುದು ಇಲ್ಲವೆ ನೀರಾಗಿಯೂ ಮಾಡಬಹುದು. ಇಷ್ಟಾದರೆ ನಿಮ್ಮ ಮುಂದೆ ಈ ನುಗ್ಗೆ ಚಟ್ನಿ ರೆಡಿಯಾಗುತ್ತದೆ, ನೀವು ಕೂಡ ಒಮ್ಮೆ ಇದನ್ನು ಮಾಡಿ ನೋಡಿ.