ಉತ್ತರ ಕರ್ನಾಟಕ ಸೊಗಡಿನ ಹುಚ್ಚೆಳ್ಳು ಚಟ್ನಿ ಮಾಡಿ..! ಎಷ್ಟು ಸುಲಭ ಗೊತ್ತಾ?

ಹುಚ್ಚೆಳ್ಳು ಸಾಮಾನ್ಯವಾಗಿ ಉತ್ತರ ಕರ್ನಾಟಕದ ಮಂದಿಗೆ ಚಿರಪರಿಚಿತ. ಅವರು ಗುರೆಳ್ಳು ಅಂತಲೂ ಇದನ್ನು ಕರೆಯುತ್ತಾರೆ. ಹುಡಿದು ಪುಡಿ ಮಾಡಿದ ಈ ಎಳ್ಳಿನ ರುಚಿ ಸವಿದರಿಗೆ ಗೊತ್ತು. ರಾಗಿ ರೊಟ್ಟಿಯೊಂದಿಗೆ ಹುಚ್ಚೆಳ್ಳು ಚಟ್ನಿ ಇದ್ದರೆ ಹುಟ್ಟೆ ತುಂಬಿದ್ದರೂ ಮತ್ತೆ ಮತ್ತೆ ರೊಟ್ಟಿ ಸವಿಯೋದು ನೋಡಬಹುದು. ಈ ಹುಚ್ಚೆಳ್ಳಿನಲ್ಲಿ ಪ್ರೊಟೀನ್ ಕಾರ್ಬೋಹೈಡ್ರೇಟ್, ಫೈಬರ್, ಕ್ಯಾಲ್ಸಿಯಂ ಹಾಗೆ ವಿಟಮಿನ್‌ಗಳು ತುಂಬಿರುವುದು ನೋಡಬಹುದು. ಹೀಗಾಗಿ ಇದು ಆರೋಗ್ಯಕ್ಕೂ ಬಹಳ ಉತ್ತಮ.

ಈ ಹುಚ್ಚೆಳ್ಳು ಚಟ್ನಿಯನ್ನು ಊಟದ ಜೊತೆಗೂ ಸವಿಯುವುದು ನೋಡಬಹುದು. ಗುರೆಳ್ಳು ಪುಡಿಯನ್ನು ಬದನೆಕಾಯಿ ಪಲ್ಯ, ಚೌಳಿ ಕಾಯಿ ಪಲ್ಯ ಇತರೆ ಪಲ್ಯಗಳಿಗೂ ಬಳಸುತ್ತಾರೆ. ಹುಚ್ಚೆಳ್ಳು ಆರೋಗ್ಯಕ್ಕೆ ಬಹಳ ಉತ್ತಮ ಇದು ಹೃದಯದ ಆರೋಗ್ಯಕ್ಕೂ ಬಹಳ ಉತ್ತಮ. ಕೊಲೆಸ್ಟ್ರಾಲ್ ನಿರ್ವಹಣೆಗೆ ಇದು ಸಹಕಾರಿಯಾಗಿದೆ. ಇದರ ಎಣ್ಣೆ ನೋವು ನಿವಾರಕವಾಗಿಯೂ ಬಳಕೆಯಾಗುತ್ತದೆ.

ಆದ್ರೆ ಹುಚ್ಚೆಳ್ಳು ಚಟ್ನಿ ಮಾಡುವುದು ಹೇಗೆ ಅನ್ನೋದು ನಿಮಗೆ ತಿಳಿದಿದ್ಯಾ? ಹಾಗಾದ್ರೆ ನಾವಿಂದು ಈ ಹುಚ್ಚೆಳ್ಳು ಚಟ್ನಿ ಮಾಡಲು ಯಾವೆಲ್ಲಾ ಪದಾರ್ಥಗಳು ಬೇಕು? ಮಾಡುವ ವಿಧಾನವೇನು? ಮಾಡಲು ಎಷ್ಟು ಸಮಯ ಹಿಡಿಯಲಿದೆ ಎಂಬೆಲ್ಲಾ ಕುರಿತು ತಿಳಿದುಕೊಳ್ಳೋಣ.

ಹುಚ್ಚೆಳ್ಳು ಚಟ್ನಿ ಮಾಡಲು ಬೇಕಾಗುವ ವಸ್ತುಗಳು

• ಕಪ್ಪು ಎಳ್ಳು - 1 ಕಪ್
• ಒಣ ಮೆಣಸು - 5 ರಿಂದ 6
• ಬೆಳ್ಳುಳ್ಳಿ
• ಉಪ್ಪು

ಹುಚ್ಚೆಳ್ಳು ಚಟ್ನಿ ಮಾಡುವ ವಿಧಾನವೇನು?

ಮೊದಲು ಕಪ್ಪು ಎಳ್ಳು ತೆಗೆದಿಕೊಳ್ಳಿ. ಸುಮಾರು 1 ಕಪ್ ಕಪ್ಪು ಎಳ್ಳು ತೆಗೆದುಕೊಂಡು ಒಲೆ ಮೇಲೆ ಒಂದು ಕಾವಲಿ ಇಟ್ಟು ಅದಕ್ಕೆ ಹಾಕಿ ಹುರಿದುಕೊಳ್ಳಬೇಕು. ಸಣ್ಣ ಉರಿಯಲ್ಲಿ ಇಟ್ಟು ಹುರಿದುಕೊಳ್ಳಬೇಕು. ಹೀಗೆ ಹುರಿಯುವಾಗ ಎಳ್ಳು ಚಟಪಟ ಎಂದು ಸಿಡಿಯಲು ಆರಂಭಿಸುತ್ತದೆ. ಹೀಗೆ ಸಿಡಿಯಲು ಆರಂಭಿಸಿದಾಗ ಒಲೆ ಮೇಲಿನ ಎಳ್ಳು ತೆಗೆದು ಮತ್ತೊಂದು ಪಾತ್ರೆಗೆ ಹಾಕಿಟ್ಟುಕೊಳ್ಳಿ.

ಈಗ ಅದೇ ಬಾಣಲೆಗೆ 5ರಿಂದ 6 ಒಣ ಮೆಣಸು ಹಾಕಿಕೊಂಡು ಫ್ರೈ ಮಾಡಿಕೊಳ್ಳಿ. ನಂತರ ಈ ಒಣ ಮೆಣಸು ಕೂಡ ತೆಗದು ಬದಿಗಿಟ್ಟುಕೊಳ್ಳಿ. ಈಗ ಅದೇ ಬಾಣಲೆಗೆ ಸ್ವಲ್ಪ ಜೀರಿಗೆ ಹಾಕಿ ಬಿಸಿ ಮಾಡಿಕೊಂಡರೆ ಸಾಕು. ಈಗ ಎಲ್ಲಾ ವಸ್ತುಗಳನ್ನು ತಣ್ಣಗಾಗಲು ಬಿಡಿ. ಬಿಸಿ ಇದ್ದಾಗ ಇದನ್ನು ಪುಡಿ ಮಾಡಿಕೊಳ್ಳಲು ಹೋಗಬೇಡಿ.

ಬಿಸಿ ಇದ್ದಾಗಲೇ ಪುಡಿ ಮಾಡಲು ಹೋದರೆ ಗಟ್ಟಿಯಾಗಬಹುದು, ಇಲ್ಲವೆ ಮಿಕ್ಸಿ ಜಾರ್ ಕೂಡ ಹಾಳಾಗಬಹುದು. ಈ ವಸ್ತುಗಳು ಸಂಪೂರ್ಣ ತಣ್ಣಗಾದ ಬಳಿಕ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು ಅದಕ್ಕೆ ಎಲ್ಲಾ ವಸ್ತುಗಳನ್ನು ಸಹ ಹಾಕಿಕೊಳ್ಳಿ. ನಂತರ ಇದಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ, ಎರಡು ಸುತ್ತು ಪುಡಿ ಮಾಡಿ, ನಂತರ ಇದಕ್ಕೆ ಎರಡು ಬೆಳ್ಳುಳ್ಳಿ ಸಿಪ್ಪೆ ತೆಗೆದು ಇದಕ್ಕೆ ಹಾಕಿಕೊಂಡು ಮತ್ತೆ ರುಬ್ಬಿಕೊಳ್ಳಿ. ಇದು ನುಣ್ಣಗೆ ಪುಡಿಯಾಗುವವರೆಗೂ ಪುಡಿ ಮಾಡಿಕೊಳ್ಳಿ.

ಈ ರೀತಿ ಪುಡಿ ಮಾಡಿದರೆ ನಿಮ್ಮ ಮುಂದೆ ರುಚಿ ರುಚಿಯ ಹುಚ್ಚೆಳ್ಳು ಚಟ್ನಿ ರೆಡಿಯಾಗುತ್ತದೆ. ಈ ಪುಡಿಯನ್ನು ಯಾವುದೇ ಖಾದ್ಯದೊಂದಿಗೆ ನೀವು ಸವಿಯಬಹುದು. ನೀವು ಕೂಡ ಮನೆಯಲ್ಲಿ ಈ ರೀತಿ ಹುಚ್ಚೆಳ್ಳು ಚಟ್ನಿ ಮಾಡಿ ನೋಡಿ. ಇದನ್ನು ಎಲ್ಲಾ ತಿಂಡಿಗೂ ಬಳಸಬಹುದು, ಹಾಗೆ ಊಟದ ಜೊತೆಗೂ ಕೂಡ ಅದ್ಭುತ ರುಚಿ ನೀಡಲಿದೆ. ಹಾಗೆ ಆರೋಗ್ಯದ ದೃಷ್ಟಿಯಲ್ಲೂ ಈ ಹುಚ್ಚೆಳ್ಳು ಬಹಳ ಉತ್ತಮವಾಗಿದೆ. ಮಾಡುವುದು ಕೂಡ ಬಹಳ ಸುಲಭವಾಗಿದೆ.