ರೆಸಿಪಿ: ಸುರಿಯುವ ಮಳೆಯಲ್ಲಿ ಟೀ ಜೊತೆ ಸವಿಯಲು ನಿಪ್ಪಟ್ಟು ... ಆಹಾ!

ಮಳೆಗಾಲ ಅಲ್ವಾ, ಸಂಜೆ ಟೀ ಜೊತೆಗೆ ಏನಾದರೂ ಕರಂ ಕುರಂ ಸವಿಯಬೇಕೆಂದು ಅನಿಸುತ್ತದೆ ಅಲ್ವಾ? ಟೀ ಜೊತೆ ತಿನ್ನಲು ನಿಪ್ಪಟ್ಟು ಸೂಪರ್‌, ಇದನ್ನು ಮಾಡಿಟ್ಟರೆ ನಿಮಗೆ ಬೇಕೆನಿಸಿದಾಗ ತಿನ್ನಬಹುದು, ಅಲ್ಲದೆ ಮನೆಗೆ ಗೆಸ್ಟ್‌ ಬಂದಾಗ ಸ್ನ್ಯಾಕ್ಸ್‌ ಇದನ್ನೇ ನೀಡಬಹುದು.

ಈ ನಿಪ್ಪಟ್ಟು ಮಾಡುವುದೇನು ಅಷ್ಟೇನು ಕಷ್ಟಕರವಲ್ಲ, ಸ್ವಲ್ಪ ಮಾಡುವುದಾದರೆ 30 ನಿಮಿಷದಲ್ಲಿ ಮಾಡಬಹುದು, ನೀವು ಒಂದು ತಿಂಗಳಿಗೆ ಸಾಕಾಗುವಷ್ಟು ಮಾಡುತ್ತೇನೆ ಎಂದರು ಒಂದು ಗಂಟೆಯ ಶ್ರಮವಷ್ಟೇ... ಬನ್ನಿ ಈ ನಿಪ್ಪಟ್ಟು ಮಾಡುವುದು ಹೇಗೆ ಎಂದು ನೋಡೋಣ:

ಬೇಕಾಗುವ ಸಾಮಗ್ರಿ

1 ಕಪ್ ಅಕ್ಕಿಹಿಟ್ಟು
3-4 ಚಮಚ ನೆಲಗಡಲೆ
4 ಚಮಚ ಹುರಿಗಡಲೆ
ಸ್ವಲ್ಪ ಕೊಬ್ಬರಿ
1 ಚಮಚ ಬಿಳಿ ಎಳ್ಳು
ಸ್ವಲ್ಪ ಖಾರದ ಪುಡಿ (1/4 ಚಮಚ ಸಾಕು, ನೀವು ಖಾರ ಇಷ್ಟ ಪಡುವವರಾದರೆ ಇನ್ನೂ ಸ್ವಲ್ಪ ಸೇರಿಸಬಹುದು
1/2 ಚಮಚ ಉಪ್ಪುಸ
ಸ್ವಲ್ಪ ಕರಿಬೇವಿನ ಎಲೆ(ಚಿಕ್ಕದಾಗಿ ಕತ್ತರಿಸಿದ್ದು)
1 ಚಮಚ ಕಾಯಿಸಿದ ಎಣ್ಣೆ
1/4 ಕಪ್‌ ಬಿಸಿ ನೀರು
1 ಚಮಚಚ ಚಿರೋಟಿ ರವೆ

ಮಾಡುವ ವಿಧಾನ

• ನೀವು ನೆಲಗಡಲೆ ರೋಸ್ಟ್‌ ಮಾಡಿ ಸಿಪ್ಪೆ ತೆಗೆಯಿರಿ, ರೋಸ್ಟ್‌ ಮಾಡಿದ ಮೇಲೆ ಕೈಯಿಂದಲೇ ಉಜ್ಜಿದರೆ ಸಾಕು ಸಿಪ್ಪೆ ಹೋಗುತ್ತೆ. ಹುರಿಗಡಲೆ ರೋಸ್ಟ್ ಮಾಡಿ. ಕೊಬ್ಬರಿ ಕೂಡ ರೋಸ್ಟ್‌ ಮಾಡಿ, ನಂತರ ತರಿ ತರಿಯಾಗಿ ಪುಡಿ ಮಾಡಿ.
• ಈಗ ದೊಡ್ಡ ಬೌಲ್‌ಗೆ ಅಕ್ಕಿ ಹಿಟ್ಟು, ಪುಡಿ ಮಾಡಿದ ಹಿಟ್ಟು, ಎಳ್ಳು, ಚಿಕ್ಕದಾಗಿ ಕತ್ತರಿಸಿದ ಕರಿಬೇವಿನ ಎಲೆ, ಕಾರದ ಪುಡಿ, ಉಪ್ಪು, ಚಿರೋಟಿ ರವೆ ಹಾಕಿ, 1 ಚಮಚ ಬಿಸಿ ಎಣ್ಣೆ ಹಾಕ ಮಿಕ್ಸ್ ಮಾಡಿ, ನಂತರ ಬಿಸಿ ನೀರು ಹಾಕಿ ಮಿಕ್ಸ್ ಮಾಡಿ, ಹಿಟ್ಟು ಗಟ್ಟಿಯಾಗಿರಬೇಕು.
• ನಂತರ ಅದರಿಮದ ಚಿಕ್ಕ ಚಿಕ್ಕ ಉಂಡೆ ಮಾಡಿ
• ಈಗ ಬಾಣಲೆಯಲ್ಲಿ ಫ್ರೈ ಮಾಡಲು 1 ಕಪ್ ಎಣ್ಣೆ ಹಾಕಿ ಕಾಯಿಸಿ, ಬಳಿಕ ಚಿಕ್ಕ ಉಂಡೆಯನ್ನು ಕೈಯಿಂದಲೇ ತಟ್ಟಿ ಎಣ್ಣೆಗೆ ಹಾಕಿ ಫ್ರೈ ಮಾಡಿ, ಚೆನ್ನಾಗಿ ರೋಸ್ಟ್‌ ಆದಾಗ ತೆಗೆಯಿರಿ.
• ನೀವು ಒಂದೊಂದೇ ನಿಪ್ಪಟ್ಟು ಎಣ್ಣೆಗೆ ಬಿಡಬಹುದು ಅಥವಾ 3-4 ಜೊತೆಗೆ ಕೂಡ ಬಿಡಬಹುದು.
• ಈಗ ರೆಡಿಯಾದ ನಿಪ್ಪಟ್ಟು ಅನ್ನು ಆರಿದ ಮೇಲೆ ಗಾಳಿಯಾಡದಂತೆ ಹಾಕಿಟ್ಟು ಟೀ ಜೊತೆ ಸವಿಯಿರಿ.
• ಇದನ್ನು ತಿಂಗಳಗಟ್ಟಲೆ ಇಡಬಹುದು.