ಮೊಸರು ಮೆಣಸಿನ ತೊಕ್ಕು: ಇದನ್ನು ನೀವು ಉಪ್ಪಿನಕಾಯಿಯಂತೆ ತಿಂಗಳವರೆಗೆ ಇಟ್ಟು ಬಳಸಬಹುದು

ಈ ತೊಕ್ಕು ಹಲವು ರುಚಿಯಲ್ಲಿ ತಯಾರಿಸಬಹುದು, ನಾವಿಲ್ಲಿ ಮೊಸರು-ಮೆಣಸಿನ ತೊಕ್ಕು ರೆಸಿಪಿ ನೀಡಿದ್ದೇವೆ, ಇದೊಂದು ಸುಲಭ ರೆಸಿಪಿಯಾಗಿದ್ದು ಇದನ್ನು ಮಾಡಿಟ್ಟರೆ ನೀವು ಇದನ್ನು ಉಪ್ಪಿನಕಾಯಿ ರೀತಿ ಬಳಸಬಹುದು. ಈ ತೊಕ್ಕು ಮಾಡುವುದು ಹೇಗೆ ಎಂದು ನೋಡೋಣ ಬನ್ನಿ:

Photo Credit:

ಬೇಕಾಗುವ ಸಾಮಗ್ರಿ
ಬ್ಯಾಡಗಿ ಮೆಣಸು 4-5
ಗುಂಟೂರು ಮೆಣಸು 3-4
ಹುಳಿ ಮೊಸರು ಅರ್ಧ ಕಪ್

1/2 ಚಮಚ ಕೊತ್ತಂಬರಿ ಬೀಜ
1/ 2 ಚಮಚ ಜೀರಿಗೆ

5-6 ಎಸಳು ಬೆಳ್ಳುಳ್ಳಿ
ಸ್ವಲ್ಪ ಕರಿಬೇವು
1 ಚಮಚ ಎಣ್ಣೆ(ತೆಂಗಿನೆಣ್ಣೆ, ಕಡ್ಲೆಣ್ಣೆ)
ರುಚಿಗೆ ತಕ್ಕ ಉಪ್ಪು

ಒಗ್ಗರಣೆಗೆ
1 ಚಮಚ ಎಣ್ಣೆ
1-2 ಒಣ ಮೆಣಸು
ಸ್ವಲ್ಪ ಜೀರಿಗೆ
ಸ್ವಲ್ಪ ಉದ್ದು
ಸ್ವಲ್ಪ ಸಾಸಿವೆ
ಸ್ವಲ್ಪ ಕರಿಬೇವು
ಸ್ವಲ್ಪ ಇಂಗು

ಮಾಡುವ ವಿಧಾನ

• ನೀವು ಒಣ ಮೆಣಸು (ಬ್ಯಾಡಗಿ ಹಾಗೂ ಗುಂಟೂರು ಅಥವಾ ಯಾವುದೇ ಖಾರ ಒಣಮೆಣಸು) ತೆಗೆದು ಅದನ್ನು ಸ್ವಲ್ಪ ರೋಸ್ಟ್‌ ಮಾಡಿ ಅದರ ಬೀಜಗಳನ್ನು ತೆಗೆಯಿರಿ
• ಕೊತ್ತಂಬರಿ ಬೀಜ,ಜೀರಿಗೆಯನ್ನು ರೋಸ್ಟ್‌ ಮಾಡಿ
• ಈಗ ನೀವು ಇವುಗಳನ್ನು ಮಿಕ್ಸಿ ಜಾರ್‌ಗೆ ಹಾಕಿ, ಒಣ ಮೆಣಸು ಚಿಕ್ಕದಾಗಿ ಕತ್ತರಿಸಿ ಹಾಕಿದರೆ ಒಳ್ಳೆಯದು
• ನಂತರ ನೀವು ಹುಳಿ ಒಸರು ಸೇರಿಸಿ, ಬೆಳ್ಳುಳ್ಳಿ, ಕರಿಬೇವು, ಎಣ್ಣೆ, ರುಚಿಗೆ ತಕ್ಕ ಉಪ್ಪು ಸೇರಿಸಿ ನುಣ್ಣಗೆ ರುಬ್ಬಿಕೊಳ್ಳಿ

ನಂತರ ಒಗ್ಗರಣೆ ಹಾಕಿ

• ನೀವು ಪಾತ್ರೆಗೆ ಎಣ್ಣೆ ಹಾಕಿ ಬಿಸಿ ಮಾಡಿ, ನಂತರ ಸಾಸಿವೆ, ಜೀರಿಗೆ ಹಾಕಿ, ಸಾಸಿವೆ-ಜೀರಿಗೆ ಚಟ್‌ಪಟ್‌ ಶಬ್ದ ಮಾಡುವಾಗ ಒಣ ಮೆಣಸು ಮುರಿದು ಹಾಕಿ, ಕರಿಬೇವು, ಉದ್ದು, ಇಂಗು ಸೇರಿಸಿ, ನಂತರ ರುಬ್ಬಿದ ಚಟ್ನಿ ಸೇರಿಸಿ, ಅದೇ ಜಾರ್‌ಗೆ ಸ್ವಲ್ಪ ನೀರು ಸೇರಿಸಿ, ಅಲುಗಾಡಿಸಿ ಆ ನೀರನ್ನು ಸೇರಿಸಿ, ನಂತರ ಮಿಶ್ರಣ ಕುದಿಸಿ, ಇಷ್ಟು ಮಾಡಿದರೆ ಮೊಸರು-ಮೆಣಸಿನ ತೊಕ್ಕು ರೆಡಿ.

ಇದನ್ನು ದೋಸೆ, ಇಡ್ಲಿ, ಅನ್ನದ ಜೊತೆ ಕೂಡ ಸವಿಯಬಹುದು.

ಈ ತೊಕ್ಕು ವಾರದವರೆಗೆಇಟ್ಟು ಕೂಡ ಬಳಸಬಹುದು.
ಇನ್ನು ಜ್ವರ ಬಂದಾಗ ಈ ತೊಕ್ಕು ಮಾಡಿದರೆ ಆಹಾರ ಬಾಯಿಗೆ ರುಚಿಸುತ್ತೆ.

• ಇತರ ಸಲಹೆ: ನೀವು ಈ ಮೊಸರು ತೊಕ್ಕು ಮಾಡಿದರೆ ರೂಮ್‌ನ ಉಷ್ಣಾಂಶದಲ್ಲಿಟ್ಟರೆ ಒಂದು ವಾರದವರೆಗೆ ಇಡಬಹುದು, ಫ್ರಿಡ್ಜ್‌ನಲ್ಲಿಟ್ಟರೆ 10-15 ದಿನ ಇಟ್ಟು ಉಪಪಿನಕಾಯಿಯಂತೆ ಬಳಸಬಹುದು.
• ನೀವು ಖಾರ ಹೆಚ್ಚು ಬೇಕೆಂದರೆ ಒಂದೆರಡು ಮೆಣಸು ಹೆಚ್ಚು ಹಾಕಿ, ಕಡಿಮೆ ಬೇಕೆಂದರೆ ಒಣ ಮೆಣಸು ಕಡಿಮೆ ಸೇರಿಸಿ.
• ನೀವು ಇದಕ್ಕೆ ಪುಡಿ ಉಪ್ಪು ಬದಲಿಗೆ ಕಲ್ಲುಪ್ಪು ಬಳಸಬಹುದು.