ಸಂಕ್ರಾಂತಿ ಸ್ಪೆಷಲ್ ಖಾರ ಪೊಂಗಲ್; ಈ ರುಚಿ ತಿಂಡಿ ನೀವೂ ಮಾಡಿ ನೋಡಿ!

ಜನವರಿಯಲ್ಲಿ ಹಿಂದೂಗಳಿಗೆ ಮೊದಲ ಹಬ್ಬ ಎಂದರೆ ಅದು ಸಂಕ್ರಾಂತಿ. ದಕ್ಷಿಣ ಭಾರತ ಮಾತ್ರವಲ್ಲ ಉತ್ತರ ಭಾರತದ ಹಲವು ಭಾಗದಲ್ಲಿ ಮಕರ ಸಂಕ್ರಾಂತಿ ಹಬ್ಬ ಆಚರಿಸಲಾಗುತ್ತದೆ. ದಕ್ಷಿಣ ಭಾರತದಲ್ಲಿ ಹಲವು ರೀತಿಯ ಹೆಸರುಗಳಿಂದ ಕರೆಯಲಾಗುತ್ತದೆ. ಸಂಕ್ರಾಂತಿಯಲ್ಲಿ ವಿವಿಧ ರೀತಿಯ ತಿಂಡಿಗಳು ಮಾಡಿ ಸವಿಯೋದು ಕಾಮನ್. ಅದ್ರಲ್ಲೂ ಸಂಕ್ರಾಂತಿಯಲ್ಲಿ ಪೊಂಗಲ್ ಸವಿಯೋಕೆ ಎಲ್ಲರಿಗೂ ಇಷ್ಟವಾಗುತ್ತೆ.

ಪೊಂಗಲ್ ರುಚಿಯನ್ನು ಒಮ್ಮೆ ನೀವು ಮಾಡಿ ಸವಿದರೆ ಪದೇ ಪದೇ ಮಾಡೋದು ಖಚಿತ. ಹಾಗೆ ತಮಿಳುನಾಡು ಶೈಲಿಯಲ್ಲಿ ನೀವು ಪೊಂಗಲ್ ಮಾಡಿದ್ರೆ ಮನೆಯಲ್ಲಿ ಎಲ್ಲರಿಗೂ ಇಷ್ಟವಾಗೋದು ಖಚಿತ. ಹಾಗೆ ಈ ಪೊಂಗಲ್‌ನಲ್ಲು ಹಲವು ಬಗೆಗಳಿವೆ. ಖಾರ ಪೊಂಗಲ್, ಸ್ವೀಟ್ ಪೊಂಗಲ್, ಬೇಳೆ ಪೊಂಗಲ್, ರೈಸ್ ಪೊಂಗಲ್ ಹೀಗೆ ಹತ್ತಾರು ವಿಧಾನದಲ್ಲಿ ಈ ಪೊಂಗಲ್ ಮಾಡಿ ಸವಿಯಬಹುದು.

ಹಾಗೆ ತಮಿಳುನಾಡಿನಲ್ಲಿ ವಿಶೇಷ ಹಾಗೂ ವಿಭಿನ್ನ ರೀತಿಯ ಪೊಂಗಲ್ ಮಾಡಿ ಸವಿಯೋದು ನೋಡಿರುತ್ತೀರಿ. ಈ ಪೊಂಗಲ್‌ಗಳು ಎಲ್ಲರಿಗೂ ಇಷ್ವವಾಗುವ ರೀತಿಯ ಸ್ವಾದ ಹೊಂದಿರಲಿವೆ. ಇಷ್ಟೆಲ್ಲಾ ವಿವಿಧ ಖಾದ್ಯಗಳ ನಡುವೆ ನಾವಿಂದು ಖಾರ ಪೊಂಗಲ್ ಮಾಡಿ ಸವಿಯುವ ಕುರಿತು ತಿಳಿದುಕೊಳ್ಳೋಣ. ಖಾರ ಪೊಂಗಲ್ ಮಾಡುವುದು ಹೇಗೆ ಅನ್ನೋದನ್ನು ತಿಳಿದುಕೊಳ್ಳೋಣ.

ಖಾರ ಪೊಂಗಲ್ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು? ಮಾಡುವ ವಿಧಾನವೇನು? ಎಷ್ಟು ಸಮಯ ಹಿಡಿಯಲಿದೆ ಎಂಬುದನ್ನು ತಿಳಿದುಕೊಳ್ಳಿ.

ಖಾರ ಪೊಂಗಲ್ ಮಾಡಲು ಯಾವೆಲ್ಲಾ ವಸ್ತುಗಳು ಬೇಕು?

• ಅಕ್ಕಿ
• ಹೆಸರು ಬೇಳೆ
• ತುಪ್ಪ
• ಎಣ್ಣೆ
• ಗೋಡಂಬಿ
• ಜೀರಿಗೆ
• ಶುಂಠಿ
• ಅರಶಿಣ
• ಕೊತ್ತಂಬರಿ ಸೊಪ್ಪು
• ಕೊಬ್ಬರಿ
• ಉಪ್ಪು
• ಕಾಳು ಮೆಣಸು
• ಕರಿಬೇವು

ಖಾರ ಪೊಂಗಲ್ ಮಾಡುವುದು ಹೇಗೆ?

ಒಂದು ಬೌಲ್‌ಗೆ 1 ಕಪ್ ಅಕ್ಕಿ ಹಾಗೆ 1 ಕಪ್ ಹೆಸರು ಬೇಳೆ ಹಾಕಿ ನೀರು ಹಾಕಿಕೊಂಡು ತೊಳೆದುಕೊಳ್ಳಿ. ನಂತರ ನೀರು ಬಸಿದು ಒಲೆ ಮೇಲೆ ಕುಕ್ಕರ್ ಇಟ್ಟು ಅದಕ್ಕೆ ಈ ಎರಡು ಪದಾರ್ಥಗಳ ಹಾಕಿಕೊಳ್ಳಿ. ಹಾಗೆ ಅದಕ್ಕೆ 1 ಚಮಚ ತುಪ್ಪ ಅಥವಾ ಎಣ್ಣೆ ಹಾಕಿ ಹುರಿದುಕೊಳ್ಳಿ. 1 ನಿಮಿಷ ಹುರಿದ ಬಳಿಕ ಇದಕ್ಕೆ ಅಳತೆ ಕಪ್‌ನಲ್ಲಿ 6 ಕಪ್ ನೀರು ಹಾಕಿಕೊಳ್ಳಿ.

ನೀರು ಹಾಕಿದ ಬಳಿಕ ಉಪ್ಪು, ಅರಶಿಣ ಹಾಕಿ ಮಿಕ್ಸ್ ಮಾಡಿಕೊಂಡು ಕುಕ್ಕರ್ ಮುಚ್ಚಳ ಮುಚ್ಚಿ 2 ಸೀಟಿ ಹೊಡೆಯಲು ಬಿಡಿ. ಅನಂತರಸಿಪಿಪ ತಣ್ಣಗಾಗಲು ಬಿಟ್ಟು ಮುಚ್ಚಳ ತೆಗೆದು ಒಮ್ಮೆ ಮಿಕ್ಸ್ ಮಾಡಿಕೊಳ್ಳಿ. ಗಟ್ಟಿಯಾಗಿದ್ದರೆ 1 ಲೋಟ ಬಿಸಿ ನೀರು ಹಾಕಿ ಮಿಕ್ಸ್ ಮಾಡಿಕೊಳ್ಳಿ. ತೆಳುವಾಗಿದ್ದರೆ ಹಾಕುವುದು ಬೇಡ.

ಈಗ ಒಲೆ ಮೇಲೆ ಒಂದು ಬಾಣಲೆ ಇಟ್ಟು ಅದಕ್ಕೆ ಎಣ್ಣೆ ಅಥವಾ ತುಪ್ಪ ಹಾಕಿಕೊಂಡು ನಂತರ ಜೀರಿಗೆ, ಕಾಳು ಮೆಣಸು, ಗೋಡಂಬಿ ಹಾಕಿ ಫ್ರೈ ಮಾಡಿ. ನಂತರ ಇದಕ್ಕೆ ಒಣ ಕೊಬ್ಬರಿ, ಕರಿಬೇವು, ಹಸಿ ಮೆಣಸು, ಶುಂಠಿ ಸಹ ಹಾಕಿಕೊಂಡು ಮಿಕ್ಸ್ ಮಾಡಿ. ನಂತರ ಈ ಒಗ್ಗರಣೆಯನ್ನು ಕುಕ್ಕರ್‌ನಲ್ಲಿನ ಪೊಂಗಲ್‌ಗೆ ಸೇರಿಸಿಕೊಳ್ಳಿ. ನಂತರ ರುಚಿ ನೋಡಿ ಉಪ್ಪು ಹಾಕಿಕೊಂಡು, ಕೊನೆಯಲ್ಲಿ ಕೊತ್ತಂಬರಿ ಸೊಪ್ಪು ಹಾಕಿ ಮಿಕ್ಸ್ ಮಾಡಿಕೊಳ್ಳಿ.

ಇಷ್ಟಾದರೆ ನಿಮ್ಮ ಮುಂದೆ ಸಂಕ್ರಾಂತಿ ಸ್ಪೆಷಲ್ ಖಾರ ಪೊಂಗಲ್ ಹಾಕಿಕೊಂಡು ಸವಿದು ನೋಡಿ. ಬೆಳಗ್ಗೆ ಬ್ರೇಕ್‌ ಫಾಸ್ಟ್‌ಗೆ ಇದು ಬಹಳ ಉತ್ತಮ ಖಾದ್ಯ ಎನ್ನಬಹುದು. ನೀವು ಸಹ ಮಾಡಿ ನೋಡಿ.