ವ್ರತ, ತಿಂಡಿಗೆ ಪರ್ಫೆಕ್ಟ್! ಟೇಸ್ಟಿ & ಹೆಲ್ದಿ ಸಬ್ಬಕ್ಕಿ ಇಡ್ಲಿ ಮಾಡುವ ಸುಲಭ ವಿಧಾನ

ಎಂಥ ರುಚಿ ಗೊತ್ತ ಸಬ್ಬಕ್ಕಿ ಇಡ್ಲಿ. ಕೇವಲ 10 ನಿಮಿಷದಲ್ಲಿ ಮಾಡಬಹುದು. ನೀವು ಉಪವಾಸ ವ್ರತದಲ್ಲಿ ತಿನ್ನಲು ರುಚಿಕರವಾದ ಮತ್ತು ಆರೋಗ್ಯಕರ ಖಾದ್ಯ ಹುಡುಕುತ್ತಿದ್ದರೆ, ನಿಮಗಾಗಿ ಇದಕ್ಕಿಂತ ಉತ್ತಮವಾದದ್ದು ಬೇರೊಂದಿಲ್ಲ. ನೀವು ಬೆಳಗ್ಗೆ ಅಥವಾ ಸಂಜೆಯ ಉಪಹಾರಕ್ಕೆ ಸಬ್ಬಕ್ಕಿ ಇಡ್ಲಿ (Sabakki Idli) ಮಾಡಬಹುದು. ಇದು ನಿಜಕ್ಕೂ ತುಂಬಾ ರುಚಿಕರವಾಗಿರುತ್ತದೆ ಮತ್ತು ಒಂದು ಹೊಸ ರುಚಿಯನ್ನು ಸವಿದ ತೃಪ್ತಿ ನಿಮ್ಮದಾಗುತ್ತದೆ. ಇದು ಬಹಳ ಕಡಿಮೆ ಸಮಯದಲ್ಲಿ ತಯಾರಿಸಬಹುದಾದಂತಹ ಒಂದು ಖಾದ್ಯವಾಗಿದೆ. ನೀವು ನಾಳೆ ಬೆಳಗ್ಗೆ ತಿಂಡಿಗೆ ಏನು ಮಾಡಬೇಕೆಂದು ಯೋಚಿಸುತ್ತಿದ್ದೀರಾ? ಹಾಗಾದರೆ, ನಾವು ತಿಳಿಸಿರುವ ಇಡ್ಲಿ (Sabudana Idli Recipe) ರೆಸಿಪಿಯನ್ನು ಟ್ರೈ ಮಾಡಿ.

ನೀವು ವಿಭಿನ್ನವಾದ ಇಡ್ಲಿಗಳನ್ನು ತಿನ್ನಲು ಬಯಸುತ್ತೀರಾ? ಯಾವಾಗಲೂ ಅಕ್ಕಿ ಇಡ್ಲಿ, ರವೆ ಇಡ್ಲಿ ತಿಂದು ಬೇಜಾರಾಗಿದ್ದರೆ, ನಿಮ್ಮ ನಾಲಿಗೆಗೆ ಹೊಸ ರುಚಿಯನ್ನು ನೀಡಲು, ಮೃದುವಾದ ಮತ್ತು ರುಚಿಕರವಾದ ಸಬ್ಬಕ್ಕಿ ಇಡ್ಲಿಯನ್ನು ಮಾಡಿ. ಇದನ್ನು ತಯಾರಿಸಲು ಹೆಚ್ಚು ಸಮಯ ಬೇಕಾಗುವುದಿಲ್ಲ. ಅಕ್ಕಿಯನ್ನು ನೆನೆಸಿ ರುಬ್ಬುವ ತಲೆಬಿಸಿ ಇಲ್ಲದೆ, ಕೇವಲ 20 ನಿಮಿಷಗಳಲ್ಲಿ ರುಚಿಯಾದ ಸಬ್ಬಕ್ಕಿ ಇಡ್ಲಿಯನ್ನು ತಯಾರಿಸಬಹುದು. ಈ ಇಡ್ಲಿ ರುಚಿಕರವಾಗಿರುವುದರ ಜೊತೆಗೆ ಹಗುರವಾದ, ಆರೋಗ್ಯಕರ ಮತ್ತು ಜೀರ್ಣಿಸಿಕೊಳ್ಳಲು ಸುಲಭವಾಗಿದೆ. ಯಾವುದೇ ಮುಜುಗರವಿಲ್ಲದೆ ನೀವು ಇದನ್ನು ಉಪವಾಸದಲ್ಲಿಯೂ ತಿನ್ನಬಹುದು. ಇದನ್ನು ತಯಾರಿಸುವ ಸುಲಭವಾದ ವಿಧಾನ ಇಲ್ಲಿದೆ.

ಸಬ್ಬಕ್ಕಿ ಇಡ್ಲಿ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಸಬ್ಬಕ್ಕಿ - 1 ಕಪ್
• ರಾಜಗಿರಾ ಹಿಟ್ಟು - ಅರ್ಧ ಕಪ್
• ಮೊಸರು - 1 ಕಪ್
• ಅಗತ್ಯಕ್ಕೆ ತಕ್ಕಷ್ಟು ನೀರು
• ಸಣ್ಣಗೆ ಹೆಚ್ಚಿದ ಹಸಿ ಮೆಣಸಿನಕಾಯಿ
• ತುರಿದ ಶುಂಠಿ - 1 ಸ್ಪೂನ್
• ರುಚಿಗೆ ತಕ್ಕಷ್ಟು ಉಪ್ಪು
• ಅಡುಗೆ ಸೋಡಾ ಅಥವಾ ಇನೋ - ಅರ್ಧ ಸ್ಪೂನ್
• ಸಣ್ಣಗೆ ಹೆಚ್ಚಿದ ಕೊತ್ತಂಬರಿ ಸೊಪ್ಪು
• ತುಪ್ಪ ಅಥವಾ ಎಣ್ಣೆ - ಇಡ್ಲಿ ತಟ್ಟೆಗೆ ಸವರಲು

ಸಬ್ಬಕ್ಕಿ ಇಡ್ಲಿ ಮಾಡುವ ವಿಧಾನ

ಮೊದಲಿಗೆ, ಸಬ್ಬಕ್ಕಿಯನ್ನು ಚೆನ್ನಾಗಿ ತೊಳೆದು 4 ರಿಂದ 5 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿ. ನೀವು ಬೇಗನೆ ಮಾಡಲು ಬಯಸಿದರೆ, ಬಿಸಿ ನೀರಿನಲ್ಲಿ 2 ಗಂಟೆಗಳ ಕಾಲ ನೆನೆಸಿ. ಈಗ ನೆನೆಸಿದ ಸಬ್ಬಕ್ಕಿಯ ಹೆಚ್ಚುವರಿ ನೀರನ್ನು ತೆಗೆಯಿರಿ. ಅದನ್ನು ಸ್ವಲ್ಪ ತರಿತರಿಯಾಗಿ ರುಬ್ಬಿಕೊಳ್ಳಿ. ಈಗ ಒಂದು ಬಟ್ಟಲಿನಲ್ಲಿ ಸಬ್ಬಕ್ಕಿ, ರಾಜಗಿರಾ ಹಿಟ್ಟು ಮತ್ತು ಮೊಸರು ಹಾಕಿ. ಅಗತ್ಯಕ್ಕೆ ತಕ್ಕಷ್ಟು ನೀರು ಸೇರಿಸಿ ದಪ್ಪಗಿನ ಹಿಟ್ಟನ್ನು ತಯಾರಿಸಿ. ಈಗ ಈ ಹಿಟ್ಟಿಗೆ ಕತ್ತರಿಸಿದ ಹಸಿ ಮೆಣಸಿನಕಾಯಿ, ಶುಂಠಿ, ಉಪ್ಪು ಮತ್ತು ಕೊತ್ತಂಬರಿ ಸೊಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದನ್ನು 15 ರಿಂದ 20 ನಿಮಿಷಗಳ ಕಾಲ ಮುಚ್ಚಿಡಿ. ಹೀಗೆ ಮಾಡಿದರೆ ಪದಾರ್ಥಗಳು ಚೆನ್ನಾಗಿ ಬೆರೆಯುತ್ತವೆ.

ಕೊನೆಯಲ್ಲಿ ನೀವು ಇಡ್ಲಿಯನ್ನು ಬೇಯಿಸುವಾಗ ಈ ಹಿಟ್ಟಿಗೆ ಇನೋ ಅಥವಾ ಅಡುಗೆ ಸೋಡಾ ಹಾಕಿ. ಮತ್ತು ನಿಧಾನವಾಗಿ ಮಿಕ್ಸ್ ಮಾಡಿ. ಹೀಗೆ ಮಾಡುವುದರಿಂದ ಇಡ್ಲಿ ಮೃದುವಾಗಿ ಮತ್ತು ಉಬ್ಬಿದಂತೆ ಬರುತ್ತದೆ. ಈಗ ಇಡ್ಲಿ ತಟ್ಟೆಗೆ ತುಪ್ಪ ಅಥವಾ ಎಣ್ಣೆಯನ್ನು ಹಚ್ಚಿ. ಬಳಿಕ ಹಿಟ್ಟನ್ನು ತಟ್ಟೆಯಲ್ಲಿ ಹಾಕಿ ಮತ್ತು ಮೊದಲೇ ಬಿಸಿ ಮಾಡಿದ ಇಡ್ಲಿ ಕುಕ್ಕರ್ ಅಥವಾ ಸ್ಟೀಮರ್ ನಲ್ಲಿ ಇಡಿ. 10 ರಿಂದ 12 ನಿಮಿಷಗಳ ಕಾಲ ಬೇಯಿಸಿ. ಟೂತ್‌ಪಿಕ್‌ನಿಂದ ಇಡ್ಲಿಯನ್ನು ಪರೀಕ್ಷಿಸಿ. ಅದು ಸ್ವಚ್ಛವಾಗಿ ಹೊರಬಂದರೆ, ಇಡ್ಲಿ ಬೆಂದಿದೆ ಎಂದು ಅರ್ಥ. ಈಗ ಅವುಗಳನ್ನು ಸ್ವಲ್ಪ ತಣ್ಣಗಾಗಿಸಿ ತಟ್ಟೆಯಿಂದ ತೆಗೆಯಿರಿ.

ಈ ಮೇಲಿನ ಸರಳ ವಿಧಾನ ಬಳಸಿದರೆ, ಬಿಸಿ ಬಿಸಿಯಾದ ಸಬ್ಬಕ್ಕಿ ಇಡ್ಲಿ ಸಿದ್ಧ. ಇದನ್ನು ತೆಂಗಿನಕಾಯಿ ಚಟ್ನಿ, ಮೊಸರು ಅಥವಾ ವ್ರತದ ಆಲೂಗಡ್ಡೆ ಪಲ್ಯದೊಂದಿಗೆ ಸವಿಯಬಹುದು. ನೀವು ಉಪವಾಸದಲ್ಲಿರುವಾಗ ತಿನ್ನಲು ಇದು ಅತ್ಯುತ್ತಮ ಆಯ್ಕೆಯಾಗಿದೆ. ಇದು ಹೊಟ್ಟೆಯನ್ನು ಹಗುರವಾಗಿರಿಸುವುದರ ಜೊತೆಗೆ ಸಾಕಷ್ಟು ಶಕ್ತಿಯನ್ನು ನೀಡುತ್ತದೆ.