ತೆಂಗಿನಕಾಯಿ ಬೇಡವೇ ಬೇಡ! ಹೋಟೆಲ್ ಸ್ಟೈಲ್ ಪುಳಿಯೋಗರೆ.. ಹೀಗೆ ಮಾಡಿ ನೋಡಿ

ತೆಂಗಿನಕಾಯಿ ಬೇಡವೇ ಬೇಡ! 5 ನಿಮಿಷಗಳಲ್ಲಿ ಮಾಡಿ ಹೋಟೆಲ್ ಸ್ಟೈಲ್ ರುಚಿಯಾದ ಪುಳಿಯೋಗರೆ (Pulihora). ದಕ್ಷಿಣ ಭಾರತದಲ್ಲಿ ಹುಣಸೆಹಣ್ಣು ಅನ್ನ (pulihora tamarind rice), ಅಂದರೆ ಪುಳಿಯೋಗರೆ ಹೆಚ್ಚು ಜನಪ್ರಿಯ. ಇದರ ವಿಶಿಷ್ಟ ಹುಳಿ, ಖಾರ ಮತ್ತು ಸಿಹಿಯ ಸಮತೋಲಿತ ರುಚಿ ಎಲ್ಲರ ಬಾಯಲ್ಲೂ ನೀರೂರಿಸುತ್ತದೆ. ದೇವಸ್ಥಾನದ ಪ್ರಸಾದದಿಂದ ಹಿಡಿದು ಹಬ್ಬದ ವಿಶೇಷ ಭೋಜನದವರೆಗೆ, ಪುಳಿಯೋಗರೆ ನಮ್ಮ ಜೀವನದ ಅವಿಭಾಜ್ಯ ಅಂಗ. ನೋಡಲು ಸರಳವಾಗಿದ್ದರೂ, ಇದನ್ನು ತಯಾರಿಸುವಲ್ಲಿ ಕೆಲವು ಸೀಕ್ರೆಟ್‌ಗಳಿವೆ. ಮನೆಯಲ್ಲಿಯೇ ಹೋಟೆಲ್ ಶೈಲಿಯ ಪುಳಿಯೋಗರೆ (Puliyogare) ಮಾಡುವುದು ಹೇಗೆ ಎಂದು ಈ ಲೇಖನದಲ್ಲಿ ತಿಳಿಸಲಾಗಿದೆ.

ಪುಳಿಯೋಗರೆಯ ಸ್ವಾದದ ರಹಸ್ಯ ಹುಣಸೆಹಣ್ಣಿನ ಹುಳಿ, ಮಸಾಲೆಗಳ ಪರಿಮಳ ಮತ್ತು ಕಡಲೆಕಾಯಿ ಗರಿಗರಿತನದಲ್ಲಿದೆ. ಈ ಮೂರರ ಸಂಯೋಜನೆಯೇ ಈ ತಿಂಡಿಯನ್ನು ಜನಪ್ರಿಯಗೊಳಿಸಿದೆ. ಸಾಂಬಾರ್ ಮತ್ತು ಚಟ್ನಿಯಂತೆ, ಪುಳಿಯೋಗರೆಗೆ ನಿರ್ದಿಷ್ಟವಾಗಿ ತಯಾರಿಸಿದ ಮಸಾಲೆ ಪುಡಿಯೇ ಇದರ ಆತ್ಮ. ತಾಜಾ ಮಸಾಲೆಗಳನ್ನು ಹುರಿದು ಪುಡಿ ಮಾಡಿ ತಯಾರಿಸುವುದರಿಂದ ಇದರ ಪರಿಮಳ ಮತ್ತು ರುಚಿ ಅದ್ಭುತ. ಇದು ಹೊರಗಿನ ರೆಸ್ಟೋರೆಂಟ್‌ಗಳಲ್ಲಿ ಸಿಗುವ ರುಚಿಗಿಂತ ಉತ್ತಮ. ಹಬ್ಬ ಹರಿದಿನಗಳಲ್ಲಿ ಅಥವಾ ಒತ್ತಡದ ಸಮಯದಲ್ಲಿ ಪುಳಿಯೋಗರೆ ಒಂದು ಉತ್ತಮ ಆಯ್ಕೆ. ಬೇಗ ಕೆಡದೇ ಇರುವುದರಿಂದ ಪ್ರಯಾಣಕ್ಕೆ ಹೇಳಿ ಮಾಡಿಸಿದ ತಿಂಡಿ.

ಮಸಾಲೆ ಪುಡಿ ತಯಾರಿಸಲು ಬೇಕಾದ ಸಾಮಗ್ರಿಗಳು

• ಕೊತ್ತಂಬರಿ ಬೀಜಗಳು
• ಒಣ ಕೊಬ್ಬರಿ
• ಮೆಣಸು
• ಎಳ್ಳು
• ಮೆಂತ್ಯೆ ಕಾಳುಗಳು
• ಕಡಲೆಬೇಳೆ
• ಉದ್ದಿನಬೇಳೆ
• ಜೀರಿಗೆ
• ಸಾಸಿವೆ
• ಇಂಗು

ಪುಳಿಯೋಗರೆ ತಯಾರಿಸಲು ಬೇಕಾಗುವ ಸಾಮಗ್ರಿಗಳು

• ಹುಣಸೆ ಪೇಸ್ಟ್
• ಬೇಯಿಸಿದ ಅನ್ನ
• ಉಪ್ಪು
• ಬೆಲ್ಲ
• ಸಾಸಿವೆ ಕಾಳುಗಳು
• ಹಸಿ ಮೆಣಸಿನಕಾಯಿ
• ಕೆಂಪು ಮೆಣಸಿನಕಾಯಿ
• ಕರಿಬೇವಿನ ಎಲೆಗಳು
• ಇಂಗು
• ಎಣ್ಣೆ
• ಉದ್ದಿನಬೇಳೆ
• ಕಡಲೆಬೇಳೆ
• ಕಡಲೆಕಾಯಿ

ಮನೆಯಲ್ಲೇ ಪುಳಿಯೋಗರೆ ಮಾಡುವ ಸುಲಭ ವಿಧಾನ

ಮೊದಲಿಗೆ, ಮಸಾಲೆ ಪುಡಿಗಾಗಿ ಬೇಕಾದ ಎಲ್ಲಾ ಮಸಾಲೆಗಳನ್ನು ಪ್ರತ್ಯೇಕವಾಗಿ ಹುರಿಯಿರಿ. ಅದು ತಣ್ಣಗಾದ ಮೇಲೆ ನುಣುಪಾದ ಪುಡಿಯನ್ನಾಗಿ ಮಾಡಿಕೊಳ್ಳಿ. ನಂತರ, ಹುಣಸೆಹಣ್ಣಿನ ಮಸಾಲೆ ಅಂದರೆ ಪುಳಿಕಾಚನ ತಯಾರಿಸಿ. ಒಂದು ಬಾಣಲೆಯಲ್ಲಿ ಎಣ್ಣೆ ಬಿಸಿ ಮಾಡಿ. ಅದರಲ್ಲಿ ಸಾಸಿವೆ, ಉದ್ದಿನಬೇಳೆ, ಕಡಲೆಬೇಳೆ, ಇಂಗು ಮತ್ತು ಕಡಲೆಕಾಯಿಗಳನ್ನು ಹುರಿಯಿರಿ. ಅವು ಚಿನ್ನದ ಬಣ್ಣಕ್ಕೆ ತಿರುಗಿದ ನಂತರ, ಕರಿಬೇವಿನ ಎಲೆಗಳು, ಕೆಂಪು ಮೆಣಸಿನಕಾಯಿಗಳು ಮತ್ತು ಹಸಿ ಮೆಣಸಿನಕಾಯಿ ಹಾಕಿ ಹುರಿಯಿರಿ. ನಂತರ, ಹುಣಸೆ ಪೇಸ್ಟ್ ಮತ್ತು ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ. ಈ ಮಿಶ್ರಣವನ್ನು ಎಣ್ಣೆ ಮೇಲ್ಭಾಗದಲ್ಲಿ ತೇಲುವವರೆಗೆ ಬೇಯಿಸಿ.

ಈಗ ತಯಾರಿಸಿದ ಹುಣಸೆ ಮಸಾಲೆಗೆ ಎರಡು ಚಮಚ ಮಸಾಲೆ ಪುಡಿಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. ಇದು ಮಸಾಲೆ ಮತ್ತು ಹುಣಸೆ ಹಣ್ಣಿನ ಮಿಶ್ರಣವನ್ನು ಸಿದ್ಧಪಡಿಸುವ ಪ್ರಮುಖ ಹಂತ. ನಂತರ, ಬೇಯಿಸಿದ ಅನ್ನವನ್ನು ಸೇರಿಸಿ, ಉರಿಯನ್ನು ಹೆಚ್ಚಿಸಿ ಮಿಶ್ರಣವನ್ನು ನಿಧಾನವಾಗಿ ಕಲಸಿ. ಅನ್ನದ ಗಂಟುಗಳನ್ನು ಮುರಿಯದಂತೆ ಎಚ್ಚರವಹಿಸಿ, ರುಚಿಗೆ ತಕ್ಕಂತೆ ಉಪ್ಪನ್ನು ಹಾಕಿ. ಅಂತಿಮವಾಗಿ, ಅನ್ನ ಮತ್ತು ಮಸಾಲೆ ಚೆನ್ನಾಗಿ ಬೆರೆತ ನಂತರ, ಒಲೆಯಿಂದ ಕೆಳಗಿಳಿಸಿ.

ಪುಳಿಯೋಗರೆಗೆ (ಹುಣಸೆಹಣ್ಣು ಅನ್ನ) ಸರಿಯಾದ ಟೇಸ್ಟ್ ಬರಲು ಅದನ್ನು ಒಂದೆರಡು ಗಂಟೆಗಳ ಕಾಲ ಹಾಗೆಯೇ ಬಿಡಿ. ನಂತರ ಬಿಸಿ ಬಿಸಿಯಾಗಿ ಸವಿಯಿರಿ. ಈ ತಿಂಡಿಯ ರುಚಿ ಮರುದಿನ ಇನ್ನಷ್ಟು ಹೆಚ್ಚಿರುತ್ತದೆ. ಈ ಸರಳ ವಿಧಾನವನ್ನು ಅನುಸರಿಸಿ, ನಿಮ್ಮ ಮನೆಯಲ್ಲೇ ರುಚಿಕರವಾದ ಪುಳಿಯೋಗರೆ ತಯಾರಿಸಿ.